ଭାରତକୁ 5 ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବାଲାଗି ମୌଳିକଢାଞ୍ଚା କ୍ଷେତ୍ରର ଭୂମିକା

ଭାରତ ଆସନ୍ତା ପାଞ୍ଚ ବର୍ଷ ମଧ୍ୟରେ ଏହାର ଅର୍ଥନିତୀକୁ ପାଞ୍ଚ ଟ୍ରିଲିୟନ ଡଲାର ଓ ଏହା ପରେ ଆଠବର୍ଷ ମଧ୍ୟରେ 10 ଟ୍ରିଲିୟନ ଡଲାର ରେ ପରିଣତ କରିବା ଲାଗି ପ୍ରସ୍ତୁତି ଚଳେଇଛି | ଏହି ମହତ୍ବାକାଙ୍ଖି ଲକ୍ଷ ହାସଲ କରିବା ଲାଗି ମୌଳିକଢାଞ୍ଚା କ୍ଷେତ୍ରର ପ୍ରମୁଖ ଭୂମିକା ରହିବ | ସମ୍ପ୍ରତି ଶେଷ ହୋଇଥିବା ସଂସଦର ଅଧିବେଶନ ସମୟରେ ଲୋକସଭାରେ ଏକ ପ୍ରଶ୍ନ ର ଜବାବ ଦେଇ ଅର୍ଥ ରାଷ୍ଟ୍ରମନ୍ତ୍ରୀ ଶ୍ରୀ ଅନୁରାଗ ସିଂ ଠାକୁର କହିଥିଲେ ଯେ ଭାରତ ପ୍ରତିବର୍ଷ ଏହି କ୍ଷେତ୍ରରେ ଏକ ଟ୍ରିଲିୟନ ଡଲାର ରୁ ଅଧିକ ଖର୍ଚ୍ଚ କରୁଛି | ସେ କହିଥିଲେ ଯେ 2018-2019 ପାଇଁ ମୌଳିକଢାଞ୍ଚା କ୍ଷେତ୍ରରେ ସରକାରୀ ବ୍ୟୟର ବଜେଟ ଅଟକଳ 5.97 ଟ୍ରିଲିୟନ ଟଙ୍କା ଥିଲା |.

ଭାରତୀୟ ଅର୍ଥନିତୀକୁ 2025 ସୁଦ୍ଧା 5 ଟ୍ରିଲିୟନ ରେ ପରିଣତ କରିବାର ଲକ୍ଷ ଯଦିଓ ବହୁତ ବଡ ତେବେ ଏହା ହାସଲ କରିବା ଆଦୌ ଅସମ୍ଭବ ନୁହେଁ | ଏ ଦିଗରେ ମୌଳିକଢାଞ୍ଚା କ୍ଷେତ୍ରକୁ ପ୍ରୋତ୍ସାହନ ଦେବା ପାଇଁ ଉଚିତ ସମୟରେ ସକ୍ରିୟ ପଦକ୍ଷେପ ଗ୍ରହଣ କରାଯାଉଛି | ବର୍ତ୍ତମାନ ଭାରତର ଅର୍ଥନୀତି 2.8 ଟ୍ରିଲିୟନ ଡଲାର ଅଛି ଯେଉଁଥିରେ ଆଗାମୀ ପାଞ୍ଚ ବର୍ଷ ମଧ୍ୟରେ 8 ପ୍ରତିଶତ ବାର୍ଷିକ ବିକାଶଦର ର ଆବଶ୍ୟକତା ହେବ | ବିଶେଷଜ୍ଞ ମାନଙ୍କ କହିବାନୁଯାୟୀ ଲକ୍ଷ ପ୍ରାପ୍ତି ସେତେଟା ଅସୁବିଧା ହେବ ନାହିଁ କାରଣ ନିକଟ ଅତୀତ ରେ ବିକାଶ ଦର 6 ରୁ 7 ପ୍ରତିଶତ ହାର ରେ ରହିଛି | ବଜେଟ ପୂର୍ବରୁ ଆସିଥିବା ଅର୍ଥନୈତିକ ସର୍ବେକ୍ଷଣରେ ଓ ଅର୍ଥମନ୍ତ୍ରୀ ନିର୍ମଳା ସିତାରମଣ ତାଙ୍କ ବଜେଟ ଭାଷଣ ରେ ନିବେଶ, ରୋଜଗାର, ଉତ୍ପାଦନ, ରପ୍ତାନି ଓ ଅଭିବୃଦ୍ଧି ର ଚକ୍ରକୁ ଗତି ପ୍ରଦାନ କରିବା ନିମନ୍ତେ ଉତ୍ତରଦାୟୀ କାରକ ଗୁଡିକୁ ଆହୁରି ମଜବୁତ କରିବାର ଆବଶ୍ୟକତା ଉପରେ ଜୋର ଦେଇଥିଲେ |

ଭାରତୀୟ ରିଜର୍ବ ବ୍ୟାଙ୍କର ମୌଦ୍ରିକ ନୀତି କମିଟି ଗତ ସପ୍ତାହରେ ଗୃହ ନିର୍ମାଣ କ୍ଷେତ୍ର କୁ ଆଶ୍ଵସ୍ତି ପ୍ରଦାନ କରି ବ୍ୟାଙ୍କକୁ ମିଳିବାକୁ ଥିବା ଋଣ ର ଦରରେ ଏକ ଅଣପାରମ୍ପରିକ ଭାବେ 35 ବେସିସ ପଏଣ୍ଟ ହ୍ରାସ କରିଛି | ଏଥି ସହିତ ସର୍ବୋଚ୍ଚ ବ୍ୟାଙ୍କ ଚଳିତ ବର୍ଷ ଫେବୃଆରୀ ରୁ ଆଜି ମଧ୍ୟରେ ଚାରି ଥର ଦର ହ୍ରାସ କରି ମୋଟ 110 ବେସିସ ପଏଣ୍ଟ କମ କରିସାରିଛି | ଏଥିଯୋଗୁଁ ଉତ୍ପାଦନ କ୍ଷେତ୍ରରେ ପୁଞ୍ଜି ପ୍ରବାହ ବଜାୟ ରଖିବା ପାଇଁ ଏକ ବଡ ପଦକ୍ଷେପ ଗ୍ରହଣ କରାଯାଇଥିବା ବିଷୟ ଏଥିରୁ ପ୍ରତୀୟମାନ ହେଉଛି | ଏହାଦ୍ବାରା ଅର୍ଥନୈତିକ କାର୍ଯ୍ୟକଳାପ ସ୍ଵାଭାବିକ ରହିବ ଓ ବିଶେଷକରି ମୌଳିକଢାଞ୍ଚା କ୍ଷେତ୍ର ଆହୁରି ସୁଦୃଢ ହେବ|

ଦେଶରେ ମୌଳିକଢାଞ୍ଚା କ୍ଷେତ୍ରରେ ନିବେଶ ଓ ଆର୍ଥିକ ବିକାଶ ମଧ୍ୟରେ ଦୃଢ ସମ୍ବନ୍ଧ ରହିଛି | ଜିଡ଼ିପି (ମୋଟ ଦେଶୀୟ ଉତ୍ପାଦ) ପାଇଁ ଅନ୍ତର୍ଦେଶୀୟ, ସଡକ, ରେଳବାଇ ଓ ବିମାନ ବନ୍ଦର ର ମୌଳିକଢାଞ୍ଚା କ୍ଷେତ୍ରରେ ନିବେଶ ର ଅନୁପାତ 0.90 ରୁ ଅଧିକ ରହିବା ଏହା ସୁଚାଇଥାଏ ଯେ ଜିଡ଼ିପି ଓ ମୌଳିକଢାଞ୍ଚା ରେ ନିବେଶ ମଧ୍ୟରେ ଉତ୍ତମ ସମନ୍ଵୟ ରହିଛି | ଏହା ହିଁ ହେଉଛି ମୁଖ୍ୟ କାରଣ ଯେଉଁଥିପାଇଁ ଏନଡ଼ିଏ ସରକାର 2014 ରୁ ମୌଳିକଢାଞ୍ଚା କ୍ଷେତ୍ରରେ ନିବେଶ କରିବା ଉପରେ ଯଥେଷ୍ଟ ଧ୍ୟାନ ଦେଇଆସୁଛନ୍ତି | ପୂର୍ବରୁ ମଧ୍ୟ ବାଜପେୟୀ ସରକାରଙ୍କ ଅମଳରେ ଏନଡ଼ିଏ ର ପ୍ରଥମ କାର୍ଯ୍ୟକାଳ ସମୟରେ ‘ସ୍ଵର୍ଣ୍ଣ ଚତୁର୍ଭୁଜ’ କାର୍ଯ୍ୟକ୍ରମ ଅନ୍ତର୍ଗତ ଜାତୀୟ ରାଜପଥ ର ନିର୍ମାଣ କରିବା ଉପରେ ପ୍ରାଥମିକତା ଦିଆଯାଇଥିଲା |

ଲୋକମାନଙ୍କୁ ସମଷ୍ଟିଗତ ଓ ନିରନ୍ତର ଭିତ୍ତିଭୂମି ପ୍ରଦାନ କରିବା ମୁଖ୍ଯତଃ ଏକ ଅର୍ଥବ୍ୟବସ୍ଥା ର ସାମାଜିକ ଓ ଅର୍ଥନୈତିକ ରୂପାନ୍ତରଣ ଉପରେ ନିର୍ଭର କରୁଥିବାରୁ ଏସଙ୍କ୍ରାନ୍ତୀୟ ନୀତି କୁ ସରକାର ଅନୁକରଣ କରୁଛନ୍ତି | ନିଃସନ୍ଦେହରେ ବିଗତ କିଛି ବର୍ଷ ମଧ୍ୟରେ ଅନ୍ତର୍ଦେଶୀୟ, ସଡକ, ରେଳବାଇ ଓ ବିମାନ ବନ୍ଦର ଆଦି ଭଳି ଦୀର୍ଘଅବଧି ଭିତ୍ତିଭୂମି ପ୍ରକଳ୍ପ ରେ ସର୍ବସାଧାରଣ ନିବେଶ ଓ ବେସରକାରୀ କ୍ଷେତ୍ର ମାଧ୍ୟମରେ ଯଥେଷ୍ଟ ପ୍ରଗତି ପରିଲକ୍ଷିତ ହୋଇଛି |

ମୌଳିକଢାଞ୍ଚା କ୍ଷେତ୍ରରେ ବେସରକାରୀ କ୍ଷେତ୍ରର ନିବେଶକୁ ପ୍ରୋତ୍ସାହନ ଦେବା ଲାଗି ଗ୍ରହଣ କରାଯାଇଥିବା ପଦକ୍ଷେପ ମଧ୍ୟରେ ମୌଳିକଢାଞ୍ଚା ଋଣ ପାଣ୍ଠି, ମୌଳିକଢାଞ୍ଚା ନିବେଶ ଟ୍ରଷ୍ଟ ଓ କୋଠାବାଡି ନିର୍ମାଣ ନିବେଶ ଟ୍ରଷ୍ଟ ଭଳି ଅଭିନବ ବିତ୍ତୀୟ ସୁବିଧାର ଶୁଭାରମ୍ଭ ଓ ବ୍ୟବହାରିକ ପୁଞ୍ଜି ନିବେଶ ମାଧ୍ୟମରେ ମୌଳିକ ଢାଞ୍ଚା କ୍ଷେତ୍ର ସହ ସରକାରୀ-ବେସରକାରୀ ଭାଗୀଦାରୀତାକୁ ମୁଖ୍ୟଧାରା ରେ ସାମିଲ କରାଯାଇଛି |

ମୌଳିକ ଢାଞ୍ଚା କ୍ଷେତ୍ରରେ ନିବେଶ କୁ ପ୍ରୋତ୍ସାହନ ଦେବା ଲକ୍ଷ୍ୟରେ ପ୍ରାୟ 400 ବିଲିୟନ ଡଲାର ପୁଞ୍ଜି ସହ ଜାତୀୟ ନିବେଶ ଓ ଭିତ୍ତିଭୂମି ପାଣ୍ଠି (ଏନଆଇଆଇଏଫ) ର ସ୍ଥାପନା କରାଯାଇଛି | ଏହା ଦେଶରେ ବ୍ୟବସାୟିକ ଭାବେ ବାସ୍ତବିକ ପ୍ରକଳ୍ପ ଗୁଡିକରେ ନିବେଶ ର ସୁଯୋଗ ପ୍ରଦାନ କରିବ | ସମ୍ପ୍ରତ୍ତି ଅଷ୍ଟ୍ରେଲିଆ ର ସବୁଠୁ ବଡ ପେନସନ ପାଣ୍ଠି ଓ କାନାଡା ର ଓଣ୍ଟାରିଓ ପ୍ରଦେଶ ଏନଆଇଆଇଏଫ ପାଣ୍ଠି ସହ ଏକ ବିଲିୟନ ଡଲାର ଲେଖାଏଁ ନିବେଶ କରିବା ଲାଗି ଏକ ରାଜିନାମାରେ ସ୍ଵାକ୍ଷର କରିଛନ୍ତି | ଏହି ନିବେଶ ପ୍ରସ୍ତାବ ଯୋଗୁଁ 2015 ରେ ସ୍ଥାପନା ହୋଇଥିବା ଏନଆଇଆଇଏଫ କୁ ଦୀର୍ଘ ଅବଧି ନିବେଶ ପାଇଁ ପ୍ରୋତ୍ସାହନ ମିଳିବ | ଚଳିତ ବର୍ଷ କେନ୍ଦ୍ର ବଜେଟ ଆସନ୍ତା ପାଞ୍ଚ ବର୍ଷ ମଧ୍ୟରେ ମୌଳିକଢାଞ୍ଚା କ୍ଷେତ୍ରରେ 100 ଲକ୍ଷ କୋଟି ଟଙ୍କାର ନିବେଶ କରିବା ଲକ୍ଷ୍ୟରେ ଭିତ୍ତିଭୂମି ବିକାଶ କୁ ଏକ ନିର୍ଣ୍ଣାୟକ ସହାୟତା ପ୍ରଦାନ କରିଛି |

ମୂଳ ଲେଖା : ଜି ଶ୍ରୀନିବାସନ, ବରିଷ୍ଠ ଅର୍ଥନୈତିକ ସାମ୍ବାଦିକ
ଅନୁବାଦ : ରୀତା ଯୋଶୀ