ପାକିସ୍ତାନରେ ରହୁଥିବା ସଂଖ୍ୟାଲଘୁ ସଂପ୍ରଦାୟର ଲୋକମାନେ ଦେଶର ଭେଦଭାବ ନୀତି ଯୋଗୁଁ ସରକାରଙ୍କ ଦ୍ବାରା ପ୍ରତାଡ଼ିତ ହେବା ସହିତ ସେଠାକାର ମୌଳବାଦିମାନଙ୍କ ଦ୍ବାରା ଅତ୍ୟାଚାରିତ ହୋଇଆସୁଛନ୍ତି । ପାକିସ୍ତାନରେ ମୋଟ ଜନସଂଖ୍ୟାର ପ୍ରାୟ 30 ଲକ୍ଷ ହିନ୍ଦୁ, ଖ୍ରୀଷ୍ଟିଆନ ଏବଂ ଶିଖ ସଂପ୍ରଦାୟର ଲୋକମାନଙ୍କ ଧର୍ମ ପାଳନ ବିପଦରେ ସର୍ବଦା ରହିଆସିଛି। ସଂଖ୍ୟାଲଘୁମାନଙ୍କ ସହ ଭେଦଭାବ କରୁଥିବା ସବୁଠୁ ଘୃଣ୍ୟ ଆଇନ ହେଉଛି ଈଶ୍ବର ଅବମାନନା ଆଇନ । ଯାହା ବଳରେ ଇସଲାମ ଧର୍ମ ଏବଂ ଦର୍ଶନକୁ ସମାଲୋଚନା କିମ୍ବା ଅବମାନନା କଲେ ଗିରଫ କରାଯାଇଥାଏ।
ଏହି ଆଇନ ଅନ୍ତର୍ଗତ ସଦ୍ୟତମ ମାମଲା ହେଉଛି ସିନ୍ଦୁ ପ୍ରଦେଶରେ ଜଣେ ସଂଖ୍ୟାଲଘୁ ଡାକ୍ତରଙ୍କୁ ଏହି ଆଇନ ବଳରେ ଗିରଫ କରାଯିବା । କିଛି ସପ୍ତାହ ପୂର୍ବେ ପଞ୍ଜାବ ପ୍ରଦେଶରେ ଜଣେ ସଂଖ୍ୟା ଲଘୁ ସଂପ୍ରଦାୟର ଦମ୍ପତ୍ତିଙ୍କୁ ଜଣେ ବ୍ୟକ୍ତି ପାଖକୁ ଏକ ଆପତ୍ତିଜନକ ସନ୍ଦେଶ ପଠାଇଥିବା କାରଣରୁ ଗିରଫ କରାଯିବାର ଖବର ରହିଛି । ଏହା ବ୍ୟତିତ ପାକିସ୍ତାନରେ ରହୁଥିବା ସଂଖ୍ୟାଲଘୁ ସଂପ୍ରଦାୟର ଲୋକମାନେ ସର୍ବଦା ଭୟ ମଧ୍ୟରେ ଜୀବନ ବିତାଉଛନ୍ତି । ଲାହୋରର ଉପକଣ୍ଠରେ ଥିବା ଶିଖ ଧର୍ମ ସ୍ଥାନ ଗୁରୁ ନାନକଙ୍କ ପ୍ରାସାଦକୁ ଭାଙ୍ଗି ଦିଆଯିବା ଏହାର ଜ୍ବଳନ୍ତ ଉଦାହରଣ ।
ଏହା କେବଳ ଗୋଟିଏ ଘଟଣା ନୁହେଁ, ସଂଖ୍ୟାଲଘୁମାନଙ୍କ ଅଧିକାରକୁ ଲଗାତାର ଭାବେ ଲଂଘନ କରାଯାଇ ଆସୁଛି । ଈଶ୍ବର ଅବମାନନା ଆଇନ ବଳରେ ବହୁ ସଂଖ୍ୟକ ସଂଖ୍ୟାଲଘୁ ସଂପ୍ରଦାୟର ଲୋକମାନଙ୍କୁ ଗିରଫ କରାଯାଇଛି । ଆସିଆବିବି ମାମଲା ହେଉଛି ସଦ୍ୟତମ ମାମଲା ଯାହାକୁ ନେଇ ପାକିସ୍ତାନରେ ସଂଖ୍ୟାଲଘୁମାନଙ୍କ ଅଧିକାରକୁ କିପରି ଦଳିମକଚି ଦିଆଯାଉଛି ତାକୁ ନେଇ ବିତର୍କ ଦେଖାଦେଇଛି । ବିଭିନ୍ନ ଦିଗରୁ ସମାଲୋଚନା ସତ୍ତ୍ବେ ମଧ୍ୟ ପାକିସ୍ତାନରେ ଏହି ଘୃଣ୍ୟ ଆଇନ ବଳରେ ଗିରଫ କରାଯିବା ଜାରି ରହିଛି ।
ଏକ ସ୍ଥାନିୟ ମସଜିଦର ଇମାମଙ୍କ ଦ୍ବାରା ଦାୟର ଅଭିଯୋଗକୁ ଭିତ୍ତି କରି ଡାକ୍ତରଙ୍କୁ ହାଜତରେ ରଖାଯାଇଛି । ତାଙ୍କ ଉପରେ ଈଶ୍ବର ଅବମାନନା ନେଇ ଯେଉଁ ଦଫା ଲାଗିଛି ତାହା ପାକିସ୍ତାନରେ କଠିନ ଦଣ୍ତର ଅନ୍ତର୍ଗତରେ ଆସୁଛି । ଏହି ଆଇନ ବଳରେ ସେଠାରେ ସଂଖ୍ୟାଲଘୁମାନଙ୍କୁ ଲୋକମାନେ ମାଡପିଟ ମଧ୍ୟ କରିଥାନ୍ତି । ସିନ୍ଧୁ ପ୍ରଦେଶରେ ଏହି ଡାକ୍ତରଙ୍କୁ ଗିରଫ କରାଯିବା ପରେ ଏକ ନିର୍ଦ୍ଧିଷ୍ଟ ସଂପ୍ରଦାୟର ଦୋକାନଗୁଡିକୁ ଲୋକମାନେ ନିଆଁ ଲଗାଇ ଦେଇଛନ୍ତି । ଏହି ଘୃଣ୍ୟ ଆଇନ ବଳରେ ସଂଖ୍ୟାଲଘୁ ଧର୍ମର ଲୋକମାନଙ୍କ ଉପରେ ଆକ୍ରମଣ କରାଯାଉଛି ଏବଂ ଅନେକ ସମୟରେ ବ୍ୟକ୍ତିଗତ ବିଦ୍ବେଷ କାରଣରୁ ଏହି ଆଇନକୁ ପାଥେୟ କରି ସେମାନଙ୍କୁ ନାମରେ ମିତ୍ୟା ମକଦ୍ଦମା ଚଳାଯାଉଛି ଏବଂ ହଇରାଣ ହରକତ କରାଯାଉଛି ।
ପାକିସ୍ତାନରେ ସଂଖ୍ୟାଲଘୁମାନଙ୍କ ଧାର୍ମିକ ସ୍ଥଳିର ସୁରକ୍ଷା ପାଇଁ କୌଣସି ଗ୍ୟାରେଣ୍ଟି ନାହିଁ । ସେଠାରେ ଅନ୍ୟ ଧର୍ମର ଐତିହାସିକ ଏବଂ ପ୍ରସିଦ୍ଧ ପୀଠଗୁଡିକୁ ମୌଳବାଦିମାନେ ଆକ୍ରମଣ କରୁଛନ୍ତି । ଏହାର ଜ୍ବଳନ୍ତ ଉଦାହରଣ ହେଉଛି ଗୁରୁ ନାନକ ପ୍ରାସାଦକୁ ଭାଙ୍ଗି ଦେବା। ଏପରି ଘୃଣ୍ୟ କାର୍ଯ୍ୟ ପାଇଁ କେହି ପ୍ରତିବାଦ ମଧ୍ୟ କରିନାହାନ୍ତି କି କେହି ପ୍ରଶ୍ନ ମଧ୍ୟ ଉଠାଇ ନାହାନ୍ତି। ଏହା ମଧ୍ୟ ଖବର ଅଛି ଯେ ଏହି ପଞ୍ଚଦଶ ଶତାବ୍ଦିର ଗୁରୁଦ୍ବାରରେ ବ୍ୟବହୃତ ହୋଇଥିବା ମୂଲ୍ୟବାନ କବାଟ, ଝରକା ଏବଂ ଅନ୍ୟ ସାମଗ୍ରୀଗୁଡିକୁ ନେଇ ବଜାରରେ ବିକ୍ରି କରାଯାଇଛି । ଏହି ପ୍ରସଙ୍ଗ ଉପରେ ପ୍ରଶାସନ ମଧ୍ୟ ନିରବ ରହିଛି । ଏହି ଘଟଣା ଶିଖ ସଂପ୍ରଦାୟର ଭାବନାକୁ ଦୃଢ ଆଘାତ ଦେଇଥିବାବେଳେ ଭାରତ ପାକିସ୍ତାନ ମଧ୍ୟରେ ଚାଲିଥିବା କର୍ତ୍ତାରପୁର ସାହିବ କରିଡରକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି । ସ୍ଥାନୀୟ ଲୋକମାନେ ଏହି ଐତିହାସିକ ପୀଠର ଧ୍ବଂସ କରାଯିବା ଉପରେ କାର୍ଯ୍ୟାନୁଷ୍ଠାନ ଦାବି କରିଥିଲେ ମଧ୍ୟ ପ୍ରଶ୍ନ ଉଠୁଛି ଯେ ଅତୀତରେ ଏପରି ଅପରାଧ ପାଇଁ କଣ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ?
ପାକିସ୍ତାନରେ ଅଣ ମୁସଲମାନମାନଙ୍କୁ କାଫିର ବୋଲି କୁହାଯାଇଥାଏ ଏବଂ ସବୁଠୁ ବଡ ସମସ୍ୟା ହେଲା ଯେ ପାକିସ୍ତାନର ସମ୍ବିଧାନ ଏବଂ ରାଷ୍ଟ୍ରୀୟ ଢାଞ୍ଚା ଏହି ନୀତିକୁ ସମର୍ଥନ କରିଥାଏ । ପାକିସ୍ତାନରେ ଯଦିଓ ଶତକଡ଼ା 5 ଭାଗ ଆସନ ପାର୍ଲାମେଣ୍ଟ ପାଇଁ ସଂରକ୍ଷିତ ରହିଛି କିନ୍ତୁ ବାସ୍ତବ ପକ୍ଷେ ସଂଖ୍ୟାଲଘୁମାନଙ୍କର କୌଣସି ପ୍ରକୃତ ପ୍ରତିନିଧିତ୍ବ ନାହିଁ । ସେଠାରେ ମନ୍ଦିର, ଗୁରୁଦ୍ବାର କିମ୍ବା ଚର୍ଚ ପାଇଁ କୌଣସି ସୁରକ୍ଷାର ବ୍ୟବସ୍ଥା ନାହିଁ । ପାକିସ୍ତାନରେ ସଂଖ୍ୟାଲଘୁମାନଙ୍କ ପ୍ରତି ଅତ୍ୟାଚାର କିମ୍ବା ସେମାନଙ୍କ ଧାର୍ମିକ ସ୍ଥଳିକୁ ଭଙ୍ଗାରୁଜା କରୁଥିବା ଅପରାଧିମାନଙ୍କୁ ଦଣ୍ତ ଦେବାର ମଧ୍ୟ କୌଣସି ବ୍ୟବସ୍ଥା ନାହିଁ । ଏହାହିଁ ଦର୍ଶାଉଛି ଯେ ପାକିସ୍ତାନରେ ସିଆ, ହଜାରା ଏବଂ ଅହମଦିଙ୍କ ସମେତ ଅନ୍ୟ ସମସ୍ତ ସଂଖ୍ୟାଲଘୁମାନଙ୍କ ଅଧିକାରକୁ କିପରି ଦଳିମକଚା ଯାଉଛି ।
ମୂଳ ଲେଖା : ଡକ୍ଟର ଜୈନବ ଅଖତର
ଅନୁବାଦ : ରାମଚଂଦ୍ର ନାଥ
ଅନୁବାଦ : ରାମଚଂଦ୍ର ନାଥ
Comments
Post a Comment