ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି ଯେ ଲୋକମାନଙ୍କ ଆଶା ଆକାଂକ୍ଷା ପୂରଣ କରିବା ପାଇଁ ଏକ ମଜବୁତ,ନିରାପଦ,ସମୃଦ୍ଧ ଏବଂ ସମଷ୍ଟିଗତ ଭାରତ ଗଠନ ଦିଗରେ ଭାରତୀୟ ଜନତା ପାର୍ଟି ନେତୃତ୍ଵାଧୀନ ଏନଡ଼ିଏ ସରକାର ଅଗ୍ରସର ହେଉଛନ୍ତି | ସେ କହିଛନ୍ତି ସବ କା ସାଥ, ସବ କା ବିକାଶ ଏବଂ ସବ କା ବିଶ୍ଵାସର ମୂଳମନ୍ତ୍ରରେ ଅନୁପ୍ରାଣିତ ହୋଇ ସରକାର ଏହି ଯାତ୍ରାପଥରେ ଆଗେଇ ଚାଲିଛନ୍ତି | ପାର୍ଲିଆମେଣ୍ଟର ସେଣ୍ଟ୍ରାଲ ହଲରେ ଉଭୟ ଲୋକସଭା ଓ ରାଜ୍ୟସଭାର ମିଳିତ ଅଧିବେଶନରେ ଉଦାବୋଧନ ଦେବା ବେଳେ ଶ୍ରୀ କୋବିନ୍ଦ କହିଛନ୍ତି ଯେ ସରକାର ପ୍ରଥମ ଦିନରୁ ହିଁ ଲୋକମାନଙ୍କର ଦୁଃଖ ଦୁର୍ଦ୍ଦଶା ଦୂର କରି ଓ କୁଶାସନ ହଟାଇ ସବୁ ପ୍ରକାରର ଅତ୍ୟାବଶ୍ୟକୀୟ ସୁବିଧା ସୁଯୋଗ ସହ ଦେଶବାସୀଙ୍କ ଜୀବନ ଶୈଳୀରେ ଉନ୍ନତି ଆଣିବା ନିମନ୍ତେ ସରକାର ଦୃଢ ପ୍ରତିଶ୍ରୁତିବଦ୍ଧତା ବ୍ୟକ୍ତ କରିଛନ୍ତି ।
ରାଷ୍ଟ୍ରପତି ମହୋଦୟ କହିଛନ୍ତି ଯେ ସରକାରଙ୍କ ପ୍ରଥମ ଦଫାର ଉପଲବ୍ଧିକୁ ମୂଲ୍ୟାଙ୍କନ କଲାପରେ ଲୋକମାନେ ଲୋକସଭା ନିର୍ବାଚନରେ ଦ୍ଵିତୀୟ ଥର ଲାଗି ମଧ୍ୟ ଦୃଢ ସମର୍ଥନ ଦେଇଛନ୍ତି | ସେ କହିଛନ୍ତି ଯେ ଅର୍ଦ୍ଧାଧିକ ସାଂସଦ ପ୍ରଥମ ଥର ପାଇଁ ନିର୍ବାଚିତ ହୋଇଛନ୍ତି ଓ ବହୁ ସଂଖ୍ୟକ ମହିଳା ସାଂସଦ ନିର୍ବାଚିତ ହୋଇ ଏଥର ରେକର୍ଡ ସୃଷ୍ଟି କରିଛନ୍ତି | ସେ ଆହୁରି ମଧ୍ୟ କହିଛନ୍ତି ଗ୍ରାମୀଣ ଭାରତକୁ ମଜବୁତ କରିବା ଉପରେ ସରକାର ପ୍ରାଧାନ୍ୟ ଦେଉଛନ୍ତି | ମହିଳା ସଶକ୍ତିକରଣକୁ ସରକାର ସର୍ବୋଚ୍ଚ ପ୍ରାଥମିକତା ଦେଉଥିବା ବିଷୟ ଦର୍ଶାଇ ସେ କହିଛନ୍ତି ଯେ ଏହା ଦ୍ଵାରା ସମାଜ ଓ ଅର୍ଥନୀତିରେ ବିକାଶ ସାଧନ ହୋଇପାରିବ | ସରକାରଙ୍କ ପଦକ୍ଷେପ ଗୁଡିକ ସମ୍ବନ୍ଧରେ ଉଲ୍ଲେଖ କରିବାକୁ ଯାଇ ସେ କହିଛନ୍ତି ଦେଶର ପ୍ରତ୍ୟେକ କୃଷକଙ୍କୁ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଗାଇ ଦେବାକୁ ନିଷ୍ପତ୍ତି ନିଆଯାଇଛି | ସେ କହିଛନ୍ତି ଯେ 2022 ସୁଦ୍ଧା କୃଷକ ମାନଙ୍କ ଆୟ ଦ୍ଵିଗୁଣିତ କରିବା ପାଇଁ ସରକାର ଗତ ପାଞ୍ଚ ବର୍ଷ ମଧ୍ୟରେ ବହୁ ପଦକ୍ଷେପ ଗ୍ରହଣ କରିଛନ୍ତି | ଛୋଟ ଓ ଖୁଚୁରା ଦୋକାନୀ ମାନଙ୍କ ପାଇଁ ସରକାରଙ୍କ ପେନସନ ଯୋଜନାର ସେ ଭୂୟସୀ ପ୍ରସଂଶା କରିଛନ୍ତି |
“ଏକ ରାଷ୍ଟ୍ର - ଏକ ନିର୍ବାଚନ” ପ୍ରସ୍ତାବ ଉପରେ ବିବେଚନା କରିବା ଲାଗି ରାଷ୍ଟ୍ରପତି ସାଂସଦ ମାନଙ୍କୁ ପରାମର୍ଶ ଦେଇଛନ୍ତି | ଦେଶର ସବୁ ଭଉଣୀ ତଥା ଝିଅ ମାନଙ୍କୁ ସମାନ ଅଧିକାର ନିଶ୍ଚିତ କରିବା ଲାଗି ପ୍ରଚଳିତ ଟ୍ରିପଲ ତଲାକ (ଛାଡପତ୍ର) ଓ ‘ନିକାହ ହଲାଲା’ ପ୍ରଥାକୁ ତୁରନ୍ତ ଉଚ୍ଛେଦ କରିବା ଉପରେ ସେ ଜୋର ଦେଇଛନ୍ତି | ସରକାରଙ୍କ ପାଞ୍ଚ ସପ୍ତାହ ବ୍ୟାପୀ ବଜେଟ ଅଧିବେଶନ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ଵାରା ବିରୋଧୀ ପାର୍ଟି ଗୁଡିକୁ ସପ୍ତଦଶ ଲୋକସଭାରେ ସଦସ୍ୟ ସଂଖ୍ୟା କମଥିବା ଯୋଗୁଁ ବ୍ୟସ୍ତ ବିବ୍ରତ ନ ହୋଇ କାର୍ଯ୍ୟ କରିବା ପାଇଁ ନିବେଦନ ପରେ ଆରମ୍ଭ ହୋଇଥିଲା । ସେ କହିଛନ୍ତି ଯେ ଦେଶର ସ୍ଵାର୍ଥ କୁ ଦୃଷ୍ଟିରେ ରଖି ଜନକଲ୍ୟାଣକାରୀ ପ୍ରସଙ୍ଗ ଗୁଡିକ ଲାଗି ଏକ ନିରପେକ୍ଷ ଆଭିମୁଖ୍ଯ ଗ୍ରହଣ ସକାଶେ ସବୁ ମନ୍ତେ ଉଦ୍ୟମ କରାଯିବ | ସେ କହିଛନ୍ତି ଯେ ଏକ ଦୃଢ ଗଣତନ୍ତ୍ର ପ୍ରତିଷ୍ଠା ଲାଗି ବିରୋଧୀ ମାନଙ୍କ ସକ୍ରିୟ ଅଂଶ ଗ୍ରହଣ ଓ ଫଳପ୍ରଦ ମତାମତ ନିହାତି ଆବଶ୍ୟକ | ସପ୍ତଦଶ ଲୋକସଭାର ପ୍ରଥମ ଅଧିବେଶନ ର ଉଦଘାଟନୀ ଦିବସରେ ସେ ଏହି ମନ୍ତବ୍ୟ ଦେଇଥିଲେ |
ଶ୍ରୀ ମୋଦୀ କହିଛନ୍ତି ଯେ ବିରୋଧୀ ପକ୍ଷର ପ୍ରତ୍ୟେକ ଟି ଶବ୍ଦ ମୂଲ୍ୟବାନ | ସେ ମଧ୍ୟ କହିଛନ୍ତି ଗତ ମାସ ନିର୍ବାଚନ ଫଳାଫଳରୁ ପ୍ରତୀତ ହୋଇଛି ଯେ ଚଳିତ ନିର୍ବାଚନରେ ଦେଶ ସ୍ଵାଧୀନ ହେବା ପରଠୁ ସର୍ବାଧିକ ମତଦାନ ହୋଇଛି, ମହିଳା ମତଦାତାଙ୍କ ସଂଖ୍ୟା ବୃଦ୍ଧି ପାଇଛି ଏବଂ ସଂସଦରେ ଅଧିକ ମହିଳା ପ୍ରତିନିଧି ଅଛନ୍ତି | ନବ ନିର୍ବାଚିତ ସାଂସଦ ମାନଙ୍କୁ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଛନ୍ତି ଯେ ଦେଶ ସେବା କରିବା ଲାଗି ଏମାନଙ୍କ ସହ ଏକ ନୂତନ ଆଶା, ନୂତନ ଆକାଂକ୍ଷା ଓ ଏକ ନୂତନ ସଙ୍କଳ୍ପବଦ୍ଧତା ଜାଗୃତ ହୋଇଛି |
ପୂର୍ବରୁ ସଭାଗୃହର କାର୍ଯ୍ୟ ଧାରା ଆରମ୍ଭ ହେବା କ୍ଷଣି ଅସ୍ଥାୟୀ ବାଚସ୍ପତି ଡଃ ବିରେନ୍ଦ୍ର କୁମାର ନିର୍ବାଚିତ ସାଂସଦ ମାନଙ୍କୁ ଶପଥ ପାଠ କରାଇଥିଲେ | ପ୍ରଧାନମନ୍ତ୍ରୀ ଶ୍ରୀ ମୋଦୀ ସର୍ବପ୍ରଥମେ ଶପଥ ଗ୍ରହଣ କରିଥିଲେ | ବୁଧବାର ଦିନ ସଦନରେ ସପ୍ତଦଶ ଲୋକସଭାର ବାଚସ୍ପତି ଭାବେ ରାଜସ୍ଥାନ ର କୋଟା-ବୁନ୍ଦି ରୁ ଦ୍ଵିତୀୟ ଥର ଲାଗି ନିର୍ବାଚିତ ବିଜେପି ସାଂସଦ ଶ୍ରୀ ଓମ ବିର୍ଲାଙ୍କୁ ସର୍ବସମ୍ମତି କ୍ରମେ ନିର୍ବାଚିତ କରାଯାଇଥିଲା | ପ୍ରଧାନମନ୍ତ୍ରୀଙ୍କ ଦ୍ଵାରା ଏହି ପ୍ରସ୍ତାବ ଆଗତ କରାଯାଇଥିବା ବେଳେ କେନ୍ଦ୍ରମନ୍ତ୍ରୀ ଶ୍ରୀ ଅମିତ ଶାହ, ଶ୍ରୀ ରାଜନାଥ ସିଂ ଓ ଶ୍ରୀ ନିତିନ ଗଡକାରୀ ଏହାକୁ ସମର୍ଥନ କରିଥିଲେ |
ପ୍ରଧାନମନ୍ତ୍ରୀ, ଗୁଜରାଟ ଓ ଉତ୍ତରାଖଣ୍ଡରେ ପ୍ରଳୟଙ୍କାରୀ ଭୂମିକମ୍ପ ସମୟରେ ଶ୍ରୀ ବିର୍ଲାଙ୍କ ଉଲ୍ଲେଖନୀୟ କାର୍ଯ୍ୟ ବିଷୟରେ ବର୍ଣ୍ଣନା କରିଥିଲେ | ଏହାପରେ ସଦନର ସବୁ ସଦସ୍ୟ ନୂତନ ବାଚସ୍ପତିଙ୍କୁ ଅଭିନନ୍ଦନ ଜଣାଇଥିଲେ | ବିଭିନ୍ନ ନେତାଙ୍କ ଠାରୁ ଅଭିବାଦନ ଗ୍ରହଣ କରିବା ପରେ ସେ ସୁଚାରୁରୂପେ ତାଙ୍କ ଦାୟିତ୍ଵ ତୁଲାଇବେ ବୋଲି କହି ଉଭୟ ପକ୍ଷରୁ ସହଯୋଗ ଲୋଡିଥିଲେ | ଭାରତ ମାତା କି ଜୟ ଓ ଜୟ ହିନ୍ଦ ସ୍ଲୋଗାନ ମଧ୍ୟରେ ପ୍ରଧାନମନ୍ତ୍ରୀ ଶ୍ରୀ ମୋଦୀ ଶ୍ରୀ ବିର୍ଲା ଙ୍କୁ ବାଚସ୍ପତି ଆସନ ଯାଏଁ ପାଛୋଟି ନେଇଥିଲେ | ପ୍ରଧାନମନ୍ତ୍ରୀ ମଧ୍ୟ ତାଙ୍କ ମନ୍ତ୍ରିବୃନ୍ଦଙ୍କୁ ସଭାଗୃହରେ ପରିଚୟ କରାଇଥିଲେ |
ମୂଳ ଲେଖା : ଭି. ମୋହନ ରାଓ, ସାମ୍ବାଦିକ
ଅନୁବାଦ:ରୀତା ଯୋଶୀ
Comments
Post a Comment