ରାଷ୍ଟ୍ରପତିଙ୍କ ଅଭିଭାଷଣରେ ନୂଆ ଭାରତ ପାଇଁ ଆହ୍ବାନ

ଭାରତର 73ତମ ସ୍ବାଧୀନତା ଦିବସ ଉପଲକ୍ଷେ ରାଷ୍ଟ୍ରପତି ରାମନାଥ କୋବିନ୍ଦ ଦେଶ ଉଦ୍ଧେଶ୍ୟରେ ଅଭିଭାଷଣ ଦେଇ କହିଛନ୍ତି ଯେ ସ୍ବାଧୀନ ଦେଶ ଭାବେ 72 ବର୍ଷର ଆମର ଏହି ଯାତ୍ରା ଆଜି ଏକ ବିଶେଷ ସ୍ଥାନରେ ଆସି ପହଞ୍ଚିଛି | ଅକ୍ଟୋବର 2ରେ ଆମେ ଜାତିର ପିତା ମହାତ୍ମା ଗାନ୍ଧିଙ୍କ 150ତମ ଜୟନ୍ତି ପାଳନ କରିବା ଯିଏକି ଆମ ସ୍ବାଧୀନତା ସଂଗ୍ରାମର ମହାନାୟକ ଥିଲେ ଏବଂ ସେ ସମାଜରୁ ପ୍ରତ୍ୟେକ ପ୍ରକାର ଅନ୍ୟାୟରୁ ମୁକ୍ତ କରିବା ପାଇଁ ଆମର ମାର୍ଗଦର୍ଶକ ମଧ୍ୟ ଥିଲେ | ଗାନ୍ଧିଜୀଙ୍କ ମାର୍ଗଦର୍ଶନର ପ୍ରାସଙ୍ଗିକତା ଆଜି ମଧ୍ୟ ରହିଛି | ଗାନ୍ଧିଜୀ କହୁଥିଲେ ଯେ ଆମକୁ ପ୍ରକୃତିର ସମ୍ବଳକୁ ବିବେକପୂର୍ଣ୍ଣ ଭାବେ ବ୍ୟବହାର କରିବା ଉଚିତ ଯାହା ଫଳରେ ବିକାଶ ଏବଂ ପ୍ରକୃତିର ସନ୍ତୁଳନ ବଜାୟ ରହିବ | ରାଷ୍ଟ୍ରପତି କହିଥିଲେ ଯେ ଅନେକ କଲ୍ୟାଣକାରୀ କାର୍ଯ୍ୟକ୍ରମ ମାଧ୍ୟମରେ ଆମ ଦେଶବାସୀଙ୍କ ଜୀବନକୁ ଉନ୍ନତ କରାଯାଉଛି | ସୌର ଶକ୍ତିର ଉପଯୋଗକୁ ବୃଦ୍ଧି କରିବା ଉପରେ ଗାନ୍ଧିଜୀ ବିଶେଷ ଗୁରୁତ୍ବ ଦେଉଥିଲେ |

ରାଷ୍ଟ୍ରପତି କହିଥିଲେ 2019 ହେଉଛି ଗୁରୁ ନାନକଦେବଜୀଙ୍କର 550ତମ ଜୟନ୍ତି ବର୍ଷ ଗୁରୁ ନାନକ ଶିଖ ପନ୍ଥର ସଂସ୍ଥାପକ ଥିଲେ ଏବଂ ସେ କେବଳ ଶିଖ ଭାଇ ଭଉଣିଙ୍କ ଗୁରୁ ନୁହନ୍ତି ବରଂ ସମଗ୍ର ମାନବ ସମାଜ ତାଙ୍କ ପ୍ରତି ଘଭିର ଆସ୍ଥା ରଖିଛନ୍ତି | ସେ କହିଥିଲେ ଯେଉଁ ମହାନ ବିଭୁତିମାନେ ଦେଶକୁ ସ୍ବାଧୀନତା ଦେଇଛନ୍ତି ସେମାନଙ୍କ ଉଦ୍ଧେଶ୍ୟ ଦେଶକୁ କେବଳ ରାଜନୈତିକ କ୍ଷମତା ହାସଲ ମଧ୍ରେ ସିମିତ ନଥିଲା ବରଂ ପ୍ରତ୍ୟେକ ବ୍ୟକ୍ତିଙ୍କ ଜୀବନ ଏବଂ ସମାଜକୁ ଉନ୍ନତ କରିବା ମଧ୍ୟ ଥିଲା |

ରାଷ୍ଟ୍ରପତି କହିଛନ୍ତି ଏହି ବର୍ଷ ଗ୍ରୀଷ୍ମରେ ସବୁ ଦେଶବାସୀ ସପ୍ତଦଶ ସାଧାରଣ ନିର୍ବାଚନରେ ଭାଗ ନେଇ ବିଶ୍ବର ସବୁଠୁ ବଡ ଗଣତାନ୍ତ୍ରୀକ ପ୍ରକ୍ରିୟାକୁ ସଂପନ୍ନ କରିଛନ୍ତି | ଦେଶର ନାଗରିକମାନେ ଏହି ନିର୍ବାଚନରେ କେବଳ ନିଜର ମତଦାନ ସାବ୍ୟସ୍ତ କରିନାହାନ୍ତି ତାହା ସହିତ ନିର୍ବାଚନ ସହିତ ଜଡିତ ନିଜର ଦାୟିତ୍ବ ମଧ୍ୟ ପାଳନ କରିଛନ୍ତି |

ରାଷ୍ଟ୍ରପତି କହିଛନ୍ତି ଯେ ମୋତେ ଦେଶର ବିଭିନ୍ନ ଅଞ୍ଚଳକୁ ଯାତ୍ରା କରିବାର ଅବସର ମିଳିଛି | ଏହି ଯାତ୍ରା କାଳରେ ବିଭିନ୍ନ କାର୍ଯ୍ୟକ୍ଷେତ୍ର ସହ ଜଡିତ ଦେଶବାସୀଙ୍କ ସହ ମିଶିଛି | ସେ କହିଛନ୍ତି ଯେ ଭାରତର ଲୋକମାନଙ୍କ ରୁଚି ଏବଂ ଅଭ୍ୟାସ ଭିନ୍ନ ଭିନ୍ନ ଥିଲେ ମଧ୍ୟ ସମସ୍ତଙ୍କର ସ୍ବପ୍ନ ଏକାପରି | 1947 ପୂର୍ବରୁ ସବୁ ଭାରତୀୟଙ୍କର ସ୍ବପ୍ନ ଥିଲା ଦେଶକୁ ସ୍ବାଧୀନ କରିବା ଆଉ ଆଜି ଆମର ଲକ୍ଷ୍ୟ ହେଉଛି ଦେଶକୁ ବିକଶିତ କରି ଶାସନ ବ୍ୟବସ୍ଥା କୁଶଳ ଏବଂ ପାରଦର୍ଶି କରିବା ଫଳରେ ଲୋକମାନଙ୍କ ଜୀବନ ଉନ୍ନତ ହୋଇପାରିବ | ରାଷ୍ଟ୍ରପତି କହିଛନ୍ତି ଯେ 130 କୋଟି ଭାରତବାସୀ ନିଜର କୌଶଳ, ପ୍ରତିଭା, ଉଦ୍ୟମ ତଥା ଅଭିନବତା ଜରିଆରେ ବହୁତ ବ୍ୟାପକ ଭାବରେ ବିକାଶର ଆହୁରି ଅଧିକ ସୁଯୋଗ ସୃଷ୍ଟି କରିପାରିବେ | ଏହି କ୍ଷମତା ବଳରେ ଆମ ଦେଶ ହଜାର ହଜାର ବର୍ଷ ଧରି ଆଗକୁ ବଢି ଚାଲିଛି ଏବଂ ଆମ ସଭ୍ୟତା ବିକଶିତ ହୋଇଚାଲିଛି | ଭାରତ ଇତିହାସରେ ଆମ ଦେଶବାସୀ ଅନେକ ଥର ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି କିନ୍ତୁ ବିପରିତ ପରିସ୍ଥିତିର ସାମ୍ନା କରି ମଧ୍ୟ ଆଗକୁ ବଢିଛନ୍ତି | କିନ୍ତୁ ଏବେ ପରିସ୍ଥିତି ବଦଳି ଯାଇଛି ସରକାର ଲୋକମାନଙ୍କ ଆଶା ଆକାଂକ୍ଷାକୁ ପୁରା କରିବାରେ ସହାୟତା କରିବା ପାଇଁ ଉନ୍ନତ ମୌଳିକ ସୁବିଧା ଏବଂ ସାମର୍ଥ ଉପଲବ୍ଧ କରାଉଛନ୍ତି |

ରାଷ୍ଟ୍ରପତି କହିଛନ୍ତି ଯେ ଆମର ସ୍ବାଧୀନତା ଆନ୍ଦୋଳନକୁ ସ୍ବର ଦେଉଥିବା ମହାନ କବି ସୁବ୍ରମଣ୍ୟମ ଭାରତୀ ଶହେ ବର୍ଷ ପୂର୍ବରୁ ଭାବି ଭାରତର ଯେଉଁ କଳ୍ପନା କରିଥିଲେ ତାହା ଆଜି ଆମ ପ୍ରୟାସରେ ସାକାର ରୂପ ନେଇଛି | ସେ କହିଥିଲେ-

ଆମେ ଶାସ୍ତ୍ର ଏବଂ କାର୍ଯ୍ୟକୁଶଳତା ଉଭୟ ଶିଖିବା

ଆମେ ଆକାଶ ଆଉ ମହାସାଗରର ସୀମା ଟପିବା

ଆମେ ଚନ୍ଦ୍ରମାର ପ୍ରକୃତିକୁ ଗଭିରତାରେ ଜାଣିବା

ଆମେ ସର୍ବତ୍ର ସ୍ବଚ୍ଛତା ରଖିବାର କଳା ଶିଖିବା

ରାଷ୍ଟ୍ରପତି କାମନା କରିଛନ୍ତି ଯେ ଆମର ସମାବେଶି ସଂସ୍କୃତି, ଆମର ଆଦର୍ଶ, ଆମର କରୁଣା, ଆମର ଜିଜ୍ଞାସା ଏବଂ ଆମର ଭାତୃତ୍ବ ସର୍ବଦା ବଜାୟ ରହୁ ଏବଂ ଆମେ ସମସ୍ତେ ଏହି ମୂଲ୍ୟବୋଧର ଛାୟା ତଳେ ଆଗକୁ ବଢୁ |

ଆଲେଖ୍ୟ: ଶିବାଜୀ ସରକାର

ଭାବାନୁବାଦ: ରାମଚଂଦ୍ର ନାଥ