ଭାରତର ଆକ୍ଟ ଇଷ୍ଟ ନୀତି ଆହୁରି ଦୃଢୀଭୂତ ହେଉଛି

ରାଷ୍ଟ୍ରପତି ରାମନାଥ କୋବିନ୍ଦ ଫିଲିପାଇନ୍ସ ଓ ଜାପାନକୁ ଏକ ଦୁଇ ଦେଶ ଗସ୍ତରେ ଯାଇଥିଲେ | ଭାରତର ‘ଆକ୍ଟ ଇଷ୍ଟ ନୀତି’ ବା ପୂର୍ବ ନୀତିରେ ଏହି ଦୁଇ ଦେଶର ମହତ୍ବପୂର୍ଣ୍ଣ ଭୂମିକା ରହିଛି | ରାଷ୍ଟ୍ରପତି କୋବିନ୍ଦ ତାଙ୍କ ଗସ୍ତର ପ୍ରଥମ ଚରଣରେ କୂଟନୈତିକ ସମ୍ପର୍କର 70 ବର୍ଷ ପୂର୍ତ୍ତି ପାଳନ ଉପଲକ୍ଷେ ଫିଲିପାଇନ୍ସ ଗସ୍ତ କରିଥିଲେ | ଏହାପରେ ଜାପାନ ସମ୍ରାଟ ନରୁହିତୋଙ୍କ ରାଜ୍ୟାଭିଷେକ ଉତ୍ସବ ସମାରୋହରେ ଯୋଗ ଦେବା ଲାଗି ସେ ଜାପାନ ଗସ୍ତରେ ଯାଇଥିଲେ |

ମିଳିତ ମୂଲ୍ଯବୋଧ ଓ ଆପୋଷ ରଣନୀତିକ ସ୍ଵାର୍ଥ ଆଧାରରେ ଫିଲିପାଇନ୍ସ ଭାରତର ‘ଆକ୍ଟ ଇଷ୍ଟ’ ନୀତିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିଭାଉଛି | ଏକ ନିୟମ ଆଧାରିତ ଆନ୍ତର୍ଜାତୀୟ ନିୟମାବଳୀକୁ ପ୍ରୋତ୍ସାହନ କରି ଭାରତ ଓ ଫିଲିପାଇନ୍ସ ଆନ୍ତର୍ଜାତୀୟ ଆଇନ ଓ ଦେଶର ସାର୍ବଭୌମତ୍ଵ ସମାନତା ବଜାୟ ରଖିବାରେ ପ୍ରକୃତ ଭାଗୀଦାର ଅଟନ୍ତି | ଭାରତ ଓ ଫିଲିପାଇନ୍ସ ମଧ୍ୟରେ ସମ୍ପର୍କ ଦକ୍ଷିଣ ଦକ୍ଷିଣ ସହଯୋଗ ଓ ମଜବୂତ ଗଣତାନ୍ତ୍ରିକ ରାଜନୀତି ଉପରେ ଆଧାରିତ | ରାଷ୍ଟ୍ରପତିଙ୍କ ଗସ୍ତ କାଳରେ ସନ୍ତ୍ରାସବାଦ ଓ ମହାକାଶ ଭଳି ପ୍ରମୁଖ କ୍ଷେତ୍ରରେ ଉତ୍ତମ ସହଯୋଗ ସ୍ଥାପନା ନେଇ ମୁଖ୍ଯତଃ ଆଲୋଚନା ହୋଇଥିଲା | ଏହି ଅବସରରେ ସାମୁଦ୍ରିକ କ୍ଷେତ୍ର, ସୁରକ୍ଷା, ପର୍ଯ୍ୟଟନ, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଓ ସଂସ୍କୃତି ଆଦି ଚାରୋଟି ନୂତନ ରାଜିନାମା ଉପରେ ସ୍ବାକ୍ଷରିତ ହେବା ସହ ଭାରତ-ଫିଲିପାଇନ୍ସ ମଧ୍ୟରେ ସମ୍ପର୍କ ଆହୁରି ନିବିଡ ହୋଇଛି | ରାଜନୈତିକ-ସୁରକ୍ଷା-ଅର୍ଥନୈତିକ ଓ ଲୋକମାନଙ୍କ ମଧ୍ୟରେ ଥିବା ସମ୍ପର୍କର ବିବିଧତା ଏହି ଦ୍ଵିପକ୍ଷୀୟ ଭାଗୀଦାରୀତାକୁ ପରିଭାଷିତ କରିଥାଏ | ଶ୍ରୀ କୋବିନ୍ଦ ମଧ୍ୟ କ୍ବିଜନ ସହରରେ ମିରିୟମ କଲେଜରେ ମହାତ୍ମା ଗାନ୍ଧୀଙ୍କ ଏକ ପ୍ରତିମୂର୍ତ୍ତି ଉନ୍ମୋଚନ କରିଥିଲେ | ଇତିମଧ୍ୟରେ ଏକ ମଜବୁତ ଭାରତ-ଆସିଆନ ରଣନୀତିକ ଭାଗୀଦାରୀତା ଦ୍ଵିପକ୍ଷୀୟ ସମ୍ପର୍କକୁ ଆହୁରି ଘନୀଭୂତ କରିଛି | 

ଉଭୟ ଦେଶକୁ ଦ୍ରୁତ ବିକାଶଶୀଳ ଅର୍ଥନୀତି ରାଷ୍ଟ୍ର ଭାବେ ପରିଗଣିତ କରାଯାଉଛି | ଭାରତ ଓ ଫିଲିପାଇନ୍ସ ମଧ୍ୟରେ ବାଣିଜ୍ୟ ଓ ନିବେଶ କ୍ଷେତ୍ରରେ ଯୋଗାଯୋଗ ବୃଦ୍ଧି ଲାଗି ଏକ ଦୃଢ ଆର୍ଥିକ ଭିତ୍ତିଭୂମି ରହିଛି | ଉଭୟ ପକ୍ଷ ସ୍ମାର୍ଟ ସିଟି, ବନ୍ଦର, ବିମାନ ବନ୍ଦର ଓ ଡିଜିଟାଲ କ୍ଷେତ୍ର ସମେତ ଅତ୍ୟାଧୁନିକ ମୌଳିକଢାଞ୍ଚା ଉପରେ ସର୍ବୋଚ୍ଚ ପ୍ରାଥମିକତା ଦେଉଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମେକ ଇନ ଇଣ୍ଡିଆ ଅଭିଯାନ ଓ ଫିଲିପାଇନ୍ସ ରାଷ୍ଟ୍ରପତି ରୋଡରିଗୋ ଡୂତର୍ଟି ଙ୍କ ‘ବିଲ୍ଡ, ବିଲ୍ଡ, ବିଲ୍ଡ” ଅଭିଯାନ ବାଣିଜ୍ୟ ଓ ନିବେଶକ ମାନଙ୍କ ପାଇଁ ଯଥେଷ୍ଟ ସୁଯୋଗ ପ୍ରଦାନ କରିଥାଏ | 

ଭାରତ-ଫିଲିପାଇନ୍ସ ବ୍ୟବସାୟ ସମ୍ମିଳନୀ ତଥା ଚତୁର୍ଥ ଆସିଆନ-ଭାରତ ବ୍ୟବସାୟ ସମ୍ମିଳନୀରେ ଭାରତର ରାଷ୍ଟ୍ରପତି, ଡିଜିଟାଲ ଉଦ୍ଯୋଗ, ନବାଚାର ଓ ଷ୍ଟାର୍ଟଅପ, ସ୍ୱାସ୍ଥ୍ୟ ଓ ଫାର୍ମା ଏବଂ କୃଷି ବିକାଶର ପ୍ରମୁଖ କ୍ଷେତ୍ରରେ ଦ୍ଵିପକ୍ଷୀୟ ସହଯୋଗ ନେଇ ନୂତନ ଦିଗର ଅନ୍ଵେଷଣ କରିବାର ଆବଶ୍ୟକତା ଉପରେ ଆଲୋକପାତ କରିଥିଲେ | ଦ୍ଵିପକ୍ଷୀୟ ବାଣିଜ୍ୟ କାରବାର ଗତ ଦୁଇ ବର୍ଷରେ 17 ପ୍ରତିଶତ ବୃଦ୍ଧି ପାଇ 2.3 ବିଲିୟନ ଡଲାରରେ ପହଞ୍ଚିଛି | ଯେତେବେଳେକି ଭାରତୀୟ କମ୍ପାନୀ ଗୁଡିକ ବୟନ ଶିଳ୍ପ, ସୂଚନା ପ୍ରଯୁକ୍ତି ବିଦ୍ୟା ଓ ଫାର୍ମାଶିଉଟିକାଲ୍ସ ଭଳି କ୍ଷେତ୍ର ଗୁଡିକ ଉପରେ ଅଧିକ ଧ୍ୟାନ ଦେଉଛନ୍ତି ହେଲେ ମୌଳିକ ଢାଞ୍ଚା ବିକାଶ ଓ ପ୍ରତିରକ୍ଷା ଆଧୂନିକୀକରଣ ଭଳି ଅନ୍ୟାନ୍ୟ କ୍ଷେତ୍ର ଗୁଡିକର ମଧ୍ୟ ଗୁରୁତ୍ଵ ରହିଛି | ରାଷ୍ଟ୍ରପତି କୋବିନ୍ଦ ମେକ ଇନ ଇଣ୍ଡିଆ, ଡିଜିଟାଲ ଇଣ୍ଡିଆ, ସ୍କିଲ ଇଣ୍ଡିଆ, ଗଙ୍ଗା ପୁନରୁଦ୍ଧାର ପ୍ରକଳ୍ପ, ସ୍ବଚ୍ଛ ଭାରତ ମିଶନ, ସ୍ମାର୍ଟ ସିଟି ଓ ଜଳ ଜୀବନ ମିଶନ ସମେତ ଭାରତର କଲ୍ୟାଣକାରୀ ଅଭିଯାନରେ ସାମିଲ ହେବା ଲାଗି ଫିଲିପାଇନ୍ସକୁ ଆମନ୍ତ୍ରିତ କରିଥିଲେ |.

ଜାପାନକୁ ତାଙ୍କ ଗସ୍ତର ଦ୍ଵିତୀୟ ଚରଣରେ ଭାରତର ରାଷ୍ଟ୍ରପତି ସମ୍ରାଟ ନାରୁହିତୋଙ୍କ ରାଜ୍ୟାଭିଷେକ ସମାରୋହରେ ଯୋଗ ଦେବା ସହ ସମ୍ରାଟ ଓ ମହାରାଣୀଙ୍କ ଦ୍ଵାରା ଆୟୋଜିତ ଭୋଜି ସଭା ଓ ପ୍ରଧାନମନ୍ତ୍ରୀ ଶିଞ୍ଜୋ ଆବେଙ୍କ ଦ୍ଵାରା ଆୟୋଜିତ ଆନୁଷ୍ଠାନିକ ନୈଶ୍ୟ ଭୋଜି ସଭାରେ ଯୋଗ ଦେଇଥିଲେ | ସଭ୍ୟତାଗତ ସମ୍ପର୍କକୁ ଆହୁରି ନିବିଡ କରିବା ଉଦ୍ଦେଶ୍ୟରେ ରାଷ୍ଟ୍ରପତି କୋବିନ୍ଦ ତ୍ସୁକାଜି ହୋଙ୍ଗୱାଞ୍ଜି ବୌଦ୍ଧ ମନ୍ଦିର ପରିଦର୍ଶନରେ ଯାଇଥିଲେ | ସେ ମଧ୍ୟ ଟୋକିଓରେ ସମ୍ରାଟ ମେଜି ଓ ତାଙ୍କ ଧର୍ମପତ୍ନୀ ମହାରାଣୀ ଶୋକିନଙ୍କ ପ୍ରତି ଉତ୍ସର୍ଗୀକୃତ ମେଜି ଧର୍ମପୀଠର ଦର୍ଶନ କରିଥିଲେ |

ଶ୍ରୀ କୋବିନ୍ଦ କେକଗାୱା ରେ ସିନୋ ସୋତୋ ମନ୍ଦିର ର ଶିଳାନ୍ୟାସ ସମାରୋହରେ ଯୋଗ ଦେଇଥିଲେ | ଭାରତର ରାଷ୍ଟ୍ରପତିଙ୍କ ଜାପାନ ଗସ୍ତରୁ ଭାରତ-ଜାପାନ ମଧ୍ୟରେ ବୃଦ୍ଧି ପାଉଥିବା ଘନିଷ୍ଠ ସମ୍ପର୍କର ସ୍ପଷ୍ଟ ପ୍ରତୀୟମାନ ହେଉଛି | ଉଭୟଙ୍କ ମଧ୍ୟରେ ରଣନୀତିକ, ରାଜନୈତିକ ଓ ଅର୍ଥନୈତିକ ସ୍ଵାର୍ଥ ସହ ଗଣତନ୍ତ୍ର, ସ୍ଵାଧୀନତା ଓ ଆଇନର ଶାସନ କ୍ଷେତ୍ରରେ ମିଳିତ ମୂଲ୍ଯବୋଧ, ଏକ ସ୍ଥାୟୀ ଭାଗିଦାରୀ ପାଇଁ ଏକ ମଜବୁତ ମୂଳଦୁଆ ସ୍ଥାପନ କରିଛି | ଜାପାନ-ଭାରତ ବାର୍ଷିକୀ ଶିଖର ସମ୍ମିଳନୀ ଅନୁଷ୍ଠିତ ହେବା ପୂର୍ବରୁ ଭାରତ, ପ୍ରଥମ ବୈଦେଶିକ ଓ ପ୍ରତିରକ୍ଷା ମନ୍ତ୍ରୀ ସ୍ତରୀୟ ଡାଇଲଗ (2+2) ର ଆୟୋଜନ କରିବ | ଡିସେମ୍ବର 2019 ରେ ଏହି ଶିଖର ବୈଠକ ଆୟୋଜନ କରିବା ଲାଗି ସ୍ଥିରୀକୃତ୍ୟ ହୋଇଛି | ସମ୍ପ୍ରତ୍ତି ଭାରତ ଓ ଜାପାନ ମଧ୍ୟରେ 2+2 ଉପ- ମନ୍ତ୍ରୀସ୍ତରୀୟ ବୈଠକ ଅନୁଷ୍ଠିତ ହୋଇଥିଲା |

ଦକ୍ଷିଣ-ପୂର୍ବ ଓ ପୂର୍ବ ଏସିଆ ଭାରତର ଆକ୍ଟ ଇଷ୍ଟ ନୀତିର କେନ୍ଦ୍ରସ୍ଥଳୀ ହୋଇଥିବାରୁ ଭାରତ ରଣନୀତିକ ଭାଗିଦାରୀକୁ ନୂତନ ଶିଖରରେ ପହଞ୍ଚାଇବା ଲାଗି ରାଜନୈତିକ ଉର୍ଜ୍ଜାକୁ ଉଚ୍ଚ ନେତୃତ୍ଵ ସ୍ତରରେ ଜାରି ରଖିବ | ରାଷ୍ଟ୍ରପତି କୋବିନ୍ଦଙ୍କ ଏହି ଗସ୍ତ ଏହି ଉଦ୍ଦେଶ୍ୟ ସାଧନ କରିବାରେ ସହାୟକ ହେବ | ଭାରତ- ପ୍ରଶାନ୍ତ ମହାସାଗରୀୟ ଅଞ୍ଚଳ ଏହାର ଭୂ-ରାଜନୈତିକ ଓ ରଣନୀତିକ ଦିଗକୁ ଦୃଷ୍ଟିରେ ରଖି ନୀତିଗତ ବ୍ୟବସ୍ଥାରେ ଏହାକୁ ଅଧିକ ପ୍ରାଧାନ୍ଯ ଦେଇଛି |, ଏହି ଅଞ୍ଚଳରେ ରଣନୀତିକ ଭାଗୀଦାରୀତାକୁ ଆହୁରି ମଜବୁତ କରିବା ଲାଗି ଏହା ଉପରେ ବିଚାର କରିବା ଭାରତ ପାଇଁ ଅନିବାର୍ଯ୍ୟ ଅଟେ |

ମୂଳ ଲେଖା : ଡଃ ତିତଲୀ ବାସୁ, ପୂର୍ବ ଓ ଦକ୍ଷିଣ ପୂର୍ବ ଏସିଆ ଉପରେ ରଣନୀତିକ ବିଶ୍ଳେଷକ 

ଅନୁବାଦ: ରୀତା ଯୋଶୀ