ବ୍ରିଟେନର ନୂତନ ପ୍ରଧାନମନ୍ତ୍ରୀ : ବ୍ରେକ୍ସିଟ ଏବଂ ଭବିଷ୍ୟତ

 2016 ମସିହାରେ ଯେତେବେଳେ ବ୍ରେକ୍ସିଟ ପାଇଁ ଜନମତ ସଂଗ୍ରହ ହୋଇଥିଲା ସେତେବେଳେ ବ୍ରିଟେନର ରାଜନୈତିକ ପରିଦୃଶ୍ୟରେ ଅସ୍ଥିରତା ସୃଷ୍ଟି ହୋଇଥିଲା | ଥେରେସା ମେ ବ୍ରେକ୍ସିଟ ବୁଝାମଣା ନେଇ ବିଫଳ ହେବାପରେ  ନିଜ ସାଂସଦ ମାନଙ୍କ ସମର୍ଥନ ହରାଇଥିଲେ | ଏହା ପରେ ସେ ଚଳିତ ବର୍ଷ ଜୁଲାଇ 4 ତାରିଖରେ ଇସ୍ତଫା ଦେବା ବିଷୟ ଘୋଷଣା କରିଥିଲେ |ଏଥିଯୋଗୁଁ କଞ୍ଜରଭେଟିଭ ପାର୍ଟି ର ଟୋରି ନେତୃତ୍ବ ଲାଗି ନିର୍ବାଚନ ହୋଇଥିଲା |ଏହି ନିର୍ବାଚନରେ ବୋରିଶ ଜନସନ ପୂର୍ବତନ ବୈଦେଶିକ ମନ୍ତ୍ରୀ  ଜେରେମୀ ହଣ୍ଟଙ୍କୁ 40,000 ରୁ ଅଧିକ ଭୋଟରେ ପରାସ୍ତ କରିଥିଲେ | ନିର୍ବାଚନରେ ବିଜୟଲାଭ କରିବା ପରେ ପରେ ଶ୍ରୀ ଜନସନ କହିଥିଲେ ଯେ ତାଙ୍କ ପ୍ରାଥମିକତା ଗୁଡିକ ମଧ୍ୟରେ 31 ଅକ୍ଟୋବର ସୁଦ୍ଧା ବ୍ରେକ୍ସିଟ ବୁଝାମଣା କରିବା, ଦେଶକୁ ଐକ୍ୟସୂତ୍ରରେ ବାନ୍ଧିବା ଓ ଲେବର ନେତା ଜେରେମୀ କୋରବୀନଙ୍କୁ ପରାଜିତ କରିବା ସାମିଲ ଅଛି | ସେ ଅଧିକରୁ ଅଧିକ ମହିଳା ଓ ଜାତିଗତ-ସଂଖ୍ୟାଲଘୁ ସାଂସଦ ମାନଙ୍କୁ ସାମିଲ କରି  ଏକ ଆଧୁନିକ ବ୍ରିଟେନର ପ୍ରତିଷ୍ଠା ପାଇଁ ଏକ କ୍ୟାବିନେଟ ଗଠନ କରିବେ ବୋଲି ସେ କହିଥିଲେ |

ବ୍ରିଟେନର ନୂତନ ପ୍ରଧାନମନ୍ତ୍ରୀ ଭାବେ ତାଙ୍କ ସମ୍ମୁଖରେ 27 ୟୁରୋପୀୟ ସଂଘର   ନେତାଙ୍କ ସହ ଅଚଳାବସ୍ଥା ରହିଥିବା ବ୍ରେକ୍ସିଟ ବୁଝାମଣାକୁ ଚୁଡାନ୍ତ କରିବା ଏକ ବଡ ଚାଲେଞ୍ଜ ଭାବେ ଉଭା ହୋଇଛି | ୟୁରୋପୀୟ ସଂଘରୁ ଓହରିବା ନେଇ ବ୍ରେକ୍ସିଟ ବୁଝାମଣା ହେଉ କି ନହେଉ  ସେ ସବୁ ସ୍ଥଳେ ବ୍ରିଟେନ ର ନେତୃତ୍ଵ ନେବା ଲାଗି ପ୍ରତିଶ୍ରୁତି ଦେଇଛନ୍ତି | ବ୍ରେକ୍ସିଟ ଲାଗି ଉତ୍ତମ ଅବସର ପ୍ରଦାନ ନିମନ୍ତେ ୟୁରୋପୀୟ ସଂଘ ପୁନଃ ବୁଝାମଣା କରିବ ବୋଲି ସେ ବିଶ୍ଵାସ ପ୍ରକଟ କରିଛନ୍ତି  | ଅନ୍ୟ ପକ୍ଷରେ ଏପରି କିଛି ସୁବିଧା ପ୍ରଦାନ କରାଯିବ ନାହିଁ ବୋଲି ୟୁରୋପୀୟ ସଂଘ ପକ୍ଷରୁ କୁହାଯାଇଛି | ଯଦି ଏହା କାର୍ଯ୍ୟକାରୀ ନ ହୁଏ ତାହେଲେ ଅକ୍ଟୋବର 31ତାରିଖ ସୁଦ୍ଧା ବ୍ରିଟେନ ୟୁରୋପୀୟ ସଂଘରୁ ଓହରିଯିବା ଉଚିତ ବୋଲି କୁହାଯାଇଛି | ଧାର୍ଯ୍ୟ  ସମୟସୀମା ମଧ୍ୟରେ କଣ ହେବ ତାହା ଦେଖିବାକୁ ଅଛି | ଅପର ପକ୍ଷେ ୟୁରୋପୀୟ ସଂଘ ଦୋହୋରାଇଛି ଯେ ଥେରେସା ମେ ଙ୍କ ସହ ହୋଇଥିବା ଚୁକ୍ତି ଗ୍ରହଣ କରିବାକୁ ପଡିବ ନୋଚେତ ବ୍ରିଟେନକୁ ୟୁରୋପୀୟ ସଂଘରୁ ଓହରିବାକୁ ପଡିବ |

ସଂସଦ ତଥା  ତାଙ୍କ ପାର୍ଟି ମଧ୍ୟରେ ବ୍ରିଟେନର ନୂତନ ପ୍ରଧାନମନ୍ତ୍ରୀଙ୍କୁ ଅନ୍ୟ  ଚାଲେଞ୍ଜ ର ମଧ୍ୟ ସାମନା କରିବାକୁ ପଡୁଛି କାରଣ ସଂସଦର ଅଧିକାଂଶ ସଦସ୍ୟ କୌଣସି ଚୁକ୍ତି ବିନା ୟୁରୋପୀୟ ସଂଘ ରୁ ଓହରିବାକୁ ବିରୋଧ କରୁଛନ୍ତି | ହେଲେ କଞ୍ଜରଭେଟିଭ ପାର୍ଟି ରେ ମଧ୍ୟ କୌଣସି ବୁଝାମଣା ବିନା ବ୍ରେକ୍ସିଟ ପାଇଁ  ସର୍ବ ସହମତି ପ୍ରକାଶ ପାଇପାରୁନାହିଁ | ଇତିମଧ୍ୟରେ ଶ୍ରୀ ଜନସନ ଙ୍କ ‘କର ବା ମର ‘ ଆଭିମୁଖ୍ଯ ପ୍ରତି ଆଶଙ୍କା କରି ପାଉଣ୍ଡ ର ଅନିଶ୍ଚିତତା ଅଧିକ ମାତ୍ରାରେ ବୃଦ୍ଧି ପାଇଛି | ଏହା 31 ଅକ୍ଟୋବର ସୁଦ୍ଧା ଏକ ବୁଝାମଣା ବିନା ବ୍ରେକ୍ସିଟ କାର୍ଯ୍ୟକାରୀ ହେବାର ଇଙ୍ଗିତ କରୁଛି  | ଯଦି ଏପରି ହେବ ତେବେ ବ୍ରିଟେନ ଆର୍ଥିକ ଭାବେ ମହାବିପତ୍ତିର ସମ୍ମୁଖୀନ ହେବ ବୋଲି ଅନୁମାନ କରାଯାଉଛି | ଏପରି ପରିସ୍ଥିତିକୁ ଟାଳିବା ପାଇଁ ଶ୍ରୀ ଜନସନ ବ୍ରେକ୍ସିଟ ସମର୍ଥନକାରୀ ମାନଙ୍କୁ ନିଜ କ୍ୟାବିନେଟରେ ସାମିଲ କରିବା ଲାଗି ପଦକ୍ଷେପ ଗ୍ରହଣ କରି ନିଜ ସ୍ଥିତି ସ୍ଥିର କରିବାକୁ ପ୍ରୟାସ କରିପାରନ୍ତି | 

ଜନସନଙ୍କ ନୂତନ ସରକାରଙ୍କ ଅଧୀନରେ ଭାରତ-ବ୍ରିଟେନ ମଧ୍ୟରେ ସମ୍ପର୍କ ଆହୁରି ମଜବୁତ ହୋଇପାରେ | ଜାନୁଆରୀ 2017ରେ ବ୍ରିଟେନ ର ବୈଦେଶିକ ମନ୍ତ୍ରୀ ଭାବେ ଭାରତକୁ ତାଙ୍କ ପ୍ରଥମ ଆନୁଷ୍ଠାନିକ ଗସ୍ତ ସମୟରେ ବୋରୀସ ଜନସନ ଏସିଆର ତୃତୀୟ ସର୍ବବୃହତ ଅର୍ଥନୀତି ସହ ଏକ ମୁକ୍ତ ବାଣିଜ୍ୟ ରାଜିନାମା ଲାଗି ଇଚ୍ଛା ପ୍ରକଟ କରିଥିଲେ | ଏହି ରାଜିନାମା ମାର୍ଚ୍ଚ 2019 ରେ ୟୁରୋପୀୟ ସଂଘରୁ ବ୍ରିଟେନ ଓହରିଯିବା  ପରେ ନିଶ୍ଚିତ ଭାବେ କାର୍ଯ୍ୟକାରୀ ହୋଇଥାନ୍ତା | ଅନ୍ୟ ଏକ ଘଟଣାରେ ନିକଟ ଅତୀତରେ ନେତୃତ୍ଵ ନିର୍ବାଚନରେ ଭାରତୀୟ ବଂଶୋଦଭବ କଞ୍ଜରଭେଟିଭ ସଦସ୍ୟ ମାନଙ୍କ ସମର୍ଥନ ହାସଲ ଲାଗି ଚିଠି ଲେଖି ସେ କହିଥିଲେ ଯେ ବ୍ରିଟେନ-ଭାରତ ସମ୍ପର୍କ ପାଇଁ ତାଙ୍କ ଦୃଢ ପ୍ରତିଶୃତିବଦ୍ଧତା ରହିଛି ଓ ଏହା ବାଣିଜ୍ୟ, ବସ୍ତୁ ଓ ସେବାର ଆଦାନ ପ୍ରଦାନ ତୁଳନାରେ ଆହୁରି ମଜଭୁତ ହେବା ଉଚିତ | ନିଃସନ୍ଦେହରେ ଏହା ସ୍ପଷ୍ଟ ପ୍ରତୀତ ହେଉଛି ଯେ ନୂତନ ସରକାର ଭାରତ-ବ୍ରିଟେନ ସମ୍ପର୍କର ପୁନର୍ଗଠନ ଲାଗି ପ୍ରବଳ ଆଗ୍ରହୀ ଅଛନ୍ତି  | ଯେତେବେଳେକି ଭାରତ ଏହାର ଲୋକମାନଙ୍କ ପାଇଁ ସରଳ ଦେଶାନ୍ତରିକରଣ ନିୟମାବଳୀ ସହ ଏକ ଚୁକ୍ତି ସ୍ଵାକ୍ଷର କରିବାକୁ ଚାହୁଁଛି | ଅନ୍ୟ ପକ୍ଷରେ ବ୍ରେକ୍ସିଟ ବିଦେଶୀ ମାନଙ୍କ ବଦଳରେ ନିଜ ଲୋକମାନଙ୍କ ପାଇଁ ଅଧିକ ଅବସର ପ୍ରଦାନ କରିବା ପ୍ରତି ସଙ୍କଳ୍ପବଦ୍ଧ ଅଛି |

ବର୍ତ୍ତମାନ ପରିପ୍ରେକ୍ଷୀରେ ରାଜନୈତିକ ରୂପେ ବିଭାଜିତ ୟୁକେ ଅନେକ   ଗୁଡିଏ ଚାଲେଞ୍ଜ ର ସମ୍ମୁଖୀନ ହେଉଛି | ଆଗକୁ ଅଗ୍ରସର ହେବା ସମୟରେ ନିଃସନ୍ଦେହରେ ଲୋକମାନଙ୍କ ସ୍ଵର ସାମିଲ କରାଯିବା  ଉଚିତ ଯିଏ ଦେଶର ହିତକୁ ନିର୍ଣ୍ଣୟ କରିଥାଏ | ଏହି ପରିପ୍ରେକ୍ଷୀରେ ଶ୍ରୀ ଜନସନଙ୍କ ନିଶ୍ଚିତ ରୂପେ ଉଲ୍ଲେଖନୀୟ ଦାୟିତ୍ଵ ରହିଛି କାରଣ ସେ ବ୍ରିଟେନ କୁ ମାର୍ଗଦର୍ଶନ  କରେଇବା ତଥା ସାମାଜିକ-ରାଜନୈତିକ ସ୍ଥିରତା ପ୍ରତିଷ୍ଠା କରିବା ପାଇଁ ବ୍ରେକ୍ସିଟ ଅଚଳାବସ୍ଥା ରୁ ଏହାକୁ ବାହାର କରିବାର ଆବଶ୍ୟକତା ରହିଛି | ଏକ ତତ୍ପର, ନ୍ୟାୟସଙ୍ଗତ ତଥା ସୁବ୍ୟବସ୍ଥିତ ରୂପରେ ଇୟୁ ରୁ ପ୍ରସ୍ଥାନ ବ୍ରିଟେନ କୁ ଅନ୍ତହୀନ ଅସ୍ଥିରତାରୁ ରକ୍ଷା କରିବାରେ ସହାୟତା କରିପାରିବ |  ବ୍ରିଟେନ 2016 ରୁ ଏହି ଅସ୍ଥିରତା ପୂର୍ଣ୍ଣ ଶିକୁଳୀରେ ଜଡୀ ରହିଛି | ଆଗାମୀ ମାସ ଗୁଡିକରେ ଅବଶିଷ୍ଟ ଦୁନିଆ ସହ ବ୍ରିଟେନ ଶ୍ରୀ ଜନସନ ଙ୍କ ଆଭିମୁଖ୍ଯ ପରିବର୍ତ୍ତନ ହେବାର ଦେଖିବ ନତୁବା ତାଙ୍କ ‘କର ବା ମର’ ସ୍ଥିତି ବଜାୟ ରହିବ |

ମୂଳ ଲେଖା : ଡଃ ସଙ୍ଘମିତ୍ରା ଶର୍ମା, ୟୁରୋପୀୟ ବ୍ୟାପାର ଉପରେ ରଣନୀତିକ ବିଶ୍ଳେଷକ 

ଅନୁବାଦ : ରୀତା ଯୋଶୀ