ଆମେରିକା ପ୍ୟାରିସ ରାଜିନାମାରୁ ଓହରିଯିବା ଏକ ଉଦବେଗର କାରଣ

2015 ପ୍ୟାରିସ ଜଳବାୟୁ ରାଜିନାମାରୁ ଓହରିଯିବା ନେଇ ଯୁକ୍ତରାଷ୍ଟ୍ର ଆମେରିକାର ନିଷ୍ପତ୍ତି କେବଳ ବିଶ୍ଵ ପାଇଁ ନୁହେଁ ବରଂ ତା ନିଜ ପାଇଁ ମଧ୍ୟ ଏକ ବଡ ଉଦବେଗର କାରଣ ପାଲଟିଛି | ଗତ ସୋମବାର ଦିନ ଟ୍ରମ୍ଫ ପ୍ରଶାସନ ଜାତିସଂଘକୁ ଆନୁଷ୍ଠାନିକ ଭାବେ ଜଣେଇବା ପରେ ଏହି ପ୍ରତ୍ୟାହାର ପ୍ରକ୍ରିୟା ଆରମ୍ଭ ହୋଇଯାଇଛି | ବିଜ୍ଞପ୍ତି ଜାରି ହେବାର ଗୋଟିଏ ବର୍ଷ ପରେ ଏହାକୁ ଲାଗୁ କରାଯିବ |

ସ୍ପେନର ମେଡ୍ରିଡରେ ଡିସେମ୍ବର 2 ରୁ 13 ତାରିଖ ପର୍ଯ୍ୟନ୍ତ ହେବାକୁ ଥିବା ଜାତିସଂଘର ଜଳବାୟୁ COP25 ସମ୍ମିଳନୀର ମାତ୍ର ଗୋଟିଏ ମାସ ପୂର୍ବରୁ ଏହି ଘୋଷଣାନାମା ପ୍ରକାଶ ପାଇଛି | ସାଣ୍ଟିଆଗୋରେ ଏହି ବୈଠକର ଆୟୋଜନ କରିବାର ଥିଲା କିନ୍ତୁ ଦେଶୀୟ ତିକ୍ତତା ଯୋଗୁଁ ଚିଲି ଏଥିରୁ ଓହରିଗଲା |

2015ରେ ପ୍ରାୟ 200ଟି ଦେଶ ପ୍ୟାରିସ ରାଜିନାମାରେ ସ୍ଵାକ୍ଷର କରିଥିଲେ | ତାପମାତ୍ରା ବିପଦସ୍ତରରୁ ଯେପରି ଅଧିକ ମାତ୍ରାରେ ବୃଦ୍ଧି ନପାଇବ ସେଥିପାଇଁ ଗ୍ରୀନହାଉସ ଗ୍ୟାସ (ଜିଏଚଜି) ନିର୍ଗମନ ହ୍ରାସ କରିବା ହେଉଛି ଏହାର ମୂଳ ଉଦ୍ଦେଶ୍ୟ | ବିଶ୍ଵର ହାରାହାରି ତାପମାତ୍ରାରେ ବୃଦ୍ଧିକୁ 2 ଡିଗ୍ରୀ ସେଲସିସରୁ ତଳେ ରଖିବା ହେଉଛି ଏହାର ଲକ୍ଷ୍ୟ | ଆମେରିକା ଦ୍ଵାରା ନିଆଯାଇଥିବା ନିଷ୍ପତ୍ତି ଯୋଗୁଁ ବିଶ୍ଵ ଲକ୍ଷ ସାଧନ ଦିଗରେ ସାଂଘାତିକ ବିପଦର ସମ୍ମୁଖୀନ ହୋଇପାରେ |

ଆମେରିକା ହେଉଛି ଏକମାତ୍ର ଦେଶ ଯିଏକି ଚୁକ୍ତିରୁ ଓହରିଯିବା ନେଇ ଘୋଷଣା କରିଛି | ଚୀନ ପରେ ଆମେରିକା ହେଉଛି ବିଶ୍ଵର ଗ୍ରୀନହାଉସ ଗ୍ୟାସର ଦ୍ଵିତୀୟ ସବୁଠୁ ବଡ ନିର୍ଗମକ | ଏହା 2025 ସୁଦ୍ଧା ଜାତୀୟ ଗ୍ରୀନହାଉସ ଗ୍ୟାସ ନିର୍ଗମନକୁ 26ରୁ 28 ପ୍ରତିଶତ ପର୍ଯ୍ୟନ୍ତ ହ୍ରାସ କରିବା ଲାଗି ପ୍ରତିଶ୍ରୁତି ଦେଇଥିଲା | ଆମେରିକା ଓହରିଯିବା ପରେ ଏହି ଚୁକ୍ତି ବୈଶ୍ଵିକ ଗ୍ରୀନହାଉସ ଗ୍ୟାସର ପ୍ରାୟ 80 ପ୍ରତିଶତ ନିର୍ଗମନକୁ ଅନ୍ତର୍ଭୁକ୍ତ କରିବ ଯାହାକି ପୂର୍ବରୁ 97 ପ୍ରତିଶତ ଥିଲା |

କିନ୍ତୁ ଜଳବାୟୁ କ୍ରିୟାନ୍ଵୟନକୁ ସକ୍ଷମ କରିବା ଲାଗି ଆର୍ଥିକ ପ୍ରବାହ ଉପରେ ଅତ୍ୟଧିକ ପ୍ରଭାବ ପଡିପାରେ | କାରଣ ଆମେରିକା ବିଶ୍ଵ ସ୍ତରରେ ଆର୍ଥିକ ସମ୍ବଳ ଯୋଗାଇବାରେ ପ୍ରମୁଖ ଭୂମିକା ଗ୍ରହଣ କରେ | ଜଳବାୟୁ କ୍ରିୟାନ୍ଵୟନ ପାଇଁ ବିକାଶଶୀଳ ଦେଶ ଗୁଡିକ ଲାଗି ଅର୍ଥ ପ୍ରଦାନ କରୁଥିବା ମୁଖ୍ୟ ତନ୍ତ୍ର ଗ୍ରୀନ ଜଳବାୟୁ ପାଣ୍ଠି (ଜିସିଏଫ)କୁ ଟ୍ରମ୍ଫ ପ୍ରଶାସନ ସବୁ ପ୍ରକାରର ଅର୍ଥଦାନକୁ ମଧ୍ୟ ବନ୍ଦ କରିଦେଇଛି |

ଫଳତଃ ଭାରତ, ଚୀନ ଓ ଗ୍ରୀନହାଉସ ଗ୍ୟାସର ଅନ୍ୟାନ୍ୟ ସ୍ରୋତ ଉପରେ ବିଶ୍ଵର ଧ୍ୟାନ କେନ୍ଦ୍ରୀଭୂତ ହେବ | ଏହିସବୁ ଦେଶ ଗୁଡିକରୁ ନିର୍ଗମନ ହ୍ରାସ ଲାଗି ଅଧିକ ପଦକ୍ଷେପ ନେବା ନେଇ ଆଶା କରାଯିବ | ନିର୍ଗମନ ହ୍ରାସ ଲାଗି ଦେଶୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ସେମାନଙ୍କୁ ବିକାଶଶୀଳ ଦେଶ ଗୁଡିକ ପାଇଁ ଆର୍ଥିକ ଓ ଜ୍ଞାନକୌଶଳ କ୍ଷେତ୍ରରେ ରହିଥିବା ବ୍ୟବଧାନକୁ ଦୂର କରିବାକୁ ପଡିବ | 

ଭାରତ ଏହାର ପ୍ୟାରିସ ପ୍ରତିଶୃତିବଦ୍ଧତା ସହ ଅଗ୍ରସର ହେଉଛି | ଭାରତ ଅଂଶୀଦାର ସମ୍ମିଳନୀ (COP 21)ରେ 2030 ପାଇଁ ଧାର୍ଯ୍ୟ କରିଥିବା ଅଧିକାଂଶ ଜଳବାୟୁ ପରିବର୍ତ୍ତନ ଲକ୍ଷ ଆଗାମୀ ଦେଢ ବର୍ଷରେ ହାସଲ କରିବ ବୋଲି ଘୋଷଣା କରିଛି| ପ୍ୟାରିସରେ ଆୟୋଜିତ COP 21 ରେ ଭାରତ ଚାରୋଟି ପ୍ରତିଶୃତି ଦେଇଥିଲା |

ଭାରତ ଜାତୀୟ ନିର୍ଦ୍ଧାରିତ ଅଂଶଦାନ (ଏନଡ଼ିସି)ରେ ଏହାର ଦୁଇଟି ପ୍ରମୁଖ ଲକ୍ଷ ହାସଲ କରିବା ଦିଗରେ ଅଗ୍ରସର ହେଉଥିବା କେତୋଟି ଦେଶମାନଙ୍କ ମଧ୍ୟରେ ଅନ୍ତର୍ଭୁକ୍ତ । ଏହି ଦୁଇଟି ପ୍ରମୁଖ ଲକ୍ଷ୍ୟ ହେଲା ଭାରତ , 2030 ମସିହା ସୁଦ୍ଧା ଏହାର ମୋଟ ଉତ୍ପାଦିତ ବିଜୁଳି ଶକ୍ତିର 40 ପ୍ରତିଶତ ଅଣ ଜୀବାଶ୍ମ ଇନ୍ଧନ ଉତ୍ସରୁ ଉତ୍ପାଦନ କରିବ ଏବଂ 2030 ସୁଦ୍ଧା 2005ର ନିର୍ଗମନ ସ୍ତରରୁ 33 ରୁ 35 ପ୍ରତିଶତ ନିର୍ଗମନକୁ ହ୍ରାସ କରିବ | ତେବେ ଭାରତ 2030 ପୂର୍ବରୁ ଏହି ଲକ୍ଷ ହାସଲ କରିବାର ସମ୍ଭାବନା ରହିଛି | ଭାରତ, ନବୀକରଣ ଶକ୍ତି ସ୍ଥାପନ ମୁଖ୍ୟତଃ ସୌର ଶକ୍ତି କ୍ଷେତ୍ରରେ କାର୍ଯ୍ୟ ତ୍ୱରାନ୍ୱିତ କରୁଛି | ସୌର ଶକ୍ତି କ୍ଷେତ୍ରରେ ବିଦେଶୀ ନିବେଶ ଲାଗି ଯଥେଷ୍ଟ ସମ୍ଭାବନା ରହିଛି ଯାହାକି ‘ମେକ ଇନ ଇଣ୍ଡିଆ’ ଅଭିଯାନକୁ ପ୍ରୋତ୍ସାହିତ କରିବ |

ଆମେରିକାର ଅପସାରଣ ଯଦିଓ ଭାରତ ଉପରେ ସିଧାସଳଖ ପ୍ରଭାବ ପକାଇବ ନାହିଁ ତେବେ ଏହା ଭବିଷ୍ୟତର ଜଳବାୟୁ ନୀତି ଗୁଡିକୁ ପ୍ରଭାବିତ କରିବ | ଭାରତ ଜଳବାୟୁ ପରିବର୍ତ୍ତନ ପାଇଁ ଏକ ସମ୍ବେଦନଶୀଳ ଦେଶ ହୋଇଥିବା ଦୃଷ୍ଟିରୁ ଆଗକୁ ଅନେକ କିଛି କରିବାକୁ ପଡିବ | ଦେଶର ଉନ୍ନୟନମୂଳକ ପ୍ରକଳ୍ପ ଉପରେ ମଧ୍ୟ ଏହାର ପ୍ରଭାବ ପଡିପାରେ |

ଭାରତ ନବୀକରଣ ଶକ୍ତି କ୍ଷେତ୍ରରେ ଏକ ବିଶ୍ଵସ୍ତରୀୟ ନେତା ଭାବେ ଉଭା ହୋଇଛି | ଏହା ଫସିଲ ଇନ୍ଧନ ତୁଳନାରେ ଏଥିରେ ଅଧିକ ନିବେଶ କରୁଛି | ଭାରତ କହିଛି ଯେ ଏହା ଦୀର୍ଘକାଳୀନ ଯୋଜନା ରଣକୌଶଳ ଗୁଡିକୁ ଚୁଡାନ୍ତ କରିବ ଯାହାର ଫଳସ୍ଵରୂପ 2020 ସୁଦ୍ଧା ଅଙ୍ଗାରକାମ୍ଳ ଗ୍ୟାସ ଓ ଅନ୍ୟ ଗ୍ରୀନାହାଉସ ଗ୍ୟାସ ନିର୍ଗମନ ନିମ୍ନ ସ୍ତରରେ ରହିବ | ଏହା ସ୍ଥାୟୀ ବନ ପରିଚାଳନା ଜରିଆରେ ଜଳବାୟୁ ପରିବର୍ତ୍ତନ ପ୍ରଶମନର ପ୍ରସ୍ତାବ ଦେଇଛି | ଜାତୀୟ ବନ ନୀତି ଚିଠା 2018ର ଉଦ୍ଦେଶ୍ୟ ହେଉଛି କଡା ନିୟମ ତଥା ବିଜ୍ଞାନର ସଦୁପଯୋଗ କରି ଭାରତର ମୋଟ ଭୌଗୋଳିକ କ୍ଷେତ୍ରର ଏକ ତୃତୀୟାଂଶକୁ ବନ କ୍ଷେତ୍ରରେ ପରିଣତ କରିବା |

ଜଳବାୟୁ ପରିବର୍ତ୍ତନର ମୁକାବିଲା ଲାଗି ଫ୍ରାନ୍ସ ସହ ଆନ୍ତର୍ଜାତୀୟ ସୌର ମେଣ୍ଟ(ଆଇଏସଏ) ଭଳି ଆନ୍ତର୍ଜାତୀୟ ସ୍ତରରେ ଭାରତକୁ ଅଭିଯାନ ଜାରି ରଖିବାକୁ ପଡିବ | ଭାରତ ଏହାର ମହାତ୍ୱାକାଙ୍ଖି ଲକ୍ଷ ହାସଲ କରିବା ପାଇଁ ଅନେକ କିଛି କରିବାକୁ ବାକି ଥିବାବେଳେ ଭବିଷ୍ୟତର ସ୍ଵଚ୍ଛ ଉର୍ଜ୍ଜା ଦିଗରେ ନିରନ୍ତର ପ୍ରଗତି କରି ଚାଲିଛି |

ମୂଳ ଲେଖା : କେ ଭି ଭେଙ୍କଟସୁବ୍ରମନିୟମ, ବରିଷ୍ଠ ସାମ୍ବାଦିକ

ଅନୁବାଦ: ରୀତା ଯୋଶୀ