ବ୍ରାସିଲିଆ ଠାରେ ଏକାଦଶ ବ୍ରିକ୍ସ ଶିଖର ସମ୍ମିଳନୀ

ବ୍ରାସିଲିଆରେ ବ୍ରିକ୍ସ ଶିଖର ସମ୍ମିଳନୀର ସଫଳ ସମାପନ ବ୍ରିକ୍ସ ସଦସ୍ୟ ରାଷ୍ଟ୍ର ସମୂହର ଗତିଶୀଳତା ଓ ବୃଦ୍ଧି ପାଉଥିବା ପ୍ରାସଙ୍ଗିକତାର ଏକ ନିଦର୍ଶନ | ଏହି ଶିଖର ବୈଠକ ପରେ ଜାରୀ ମିଳିତ ବିବୃତ୍ତିରେ କୁହାଯାଇଛି ଯେ ବ୍ରିକ୍ସ ରାଷ୍ଟ୍ର ସମୂହ ବିଗତ ଦଶନ୍ଧିରେ ବୈଶ୍ଵିକ ଅଭିବୃଦ୍ଧି କ୍ଷେତ୍ରରେ ପ୍ରମୁଖ ପ୍ରେରକ ଭାବେ ଭୂମିକା ନିଭାଇଛି | ବ୍ରିକ୍ସର ଆବିର୍ଭାବ ଉଭା ହୋଇଥିବା ବିଶ୍ଵସ୍ତରୀୟ ଅର୍ଥବ୍ୟବସ୍ଥାରେ ପରିବର୍ତ୍ତନକୁ ପ୍ରତିଫଳିତ କରିଥାଏ | ବ୍ରିକ୍ସ କେବଳ ପଶ୍ଚିମର ପ୍ରଭାବ ବିସ୍ତାର ଉପରେ ସ୍ଵର ଉତଥାପନ କରିନାହିଁ ବରଂ ଏହା ଏକ ନୂତନ ଚିନ୍ତାଧାରା ଓ ଏକ ନୂତନ ବିଶ୍ଵ ଦୃଷ୍ଟିକୋଣର ଆକାର ଦେବାକୁ ପ୍ରୟାସ କରୁଛି | ଏକାଦଶ ବ୍ରିକ୍ସ ଶିଖର ସମ୍ମିଳନୀର ଶୀର୍ଷକ ଥିଲା “ ଏକ ଅଭିନବ ଭବିଷ୍ୟତ ପାଇଁ ଆର୍ଥିକ ବିକାଶ” | ଅଭିନବତାର ଇତିହାସ ବିଚାରଧାରାର କାହାଣୀ ଉପରେ ଆଧାରିତ | ଆମେ ଯଦି ଅଭିନବତା କ୍ଷେତ୍ରରେ ଆଗେଇବା ନାହିଁ ତେବେ ଆମକୁ ଅନିଶ୍ଚିତତା ଦେଇ ଗତି କରିବାକୁ ପଡିବ |

ବ୍ରିକ୍ସ ନେତୃବୃନ୍ଦଙ୍କ ଦ୍ଵାରା ଜାରି ମିଳିତ ବିବୃତ୍ତିରେ ଜାତିସଂଘ ତଥା ବିଶ୍ଵ ବାଣିଜ୍ୟ ସଂଗଠନ ଓ ଆନ୍ତର୍ଜାତୀୟ ମୁଦ୍ରା ପାଣ୍ଠି ସମେତ ଅନ୍ୟାନ୍ୟ ବହୁପକ୍ଷୀୟ ସଂଗଠନ ଗୁଡିକୁ ଆହୁରି ମଜବୁତ କରିବା ସହ ଏଥିରେ ସଂସ୍କାର ଆଣିବା ଲାଗି ଆବଶ୍ୟକତା ଉପରେ ଆହ୍ଵାନ ଦିଆଯାଇଛି | ବହୁପକ୍ଷୀୟବାଦକୁ ବିଭିନ୍ନ ଆନ୍ତର୍ଜାତୀୟ କ୍ଷେତ୍ରରୁ ସମାଲୋଚନାର ସମ୍ମୁଖୀନ ହେଉଥିବା ସମୟରେ ବ୍ରିକ୍ସର ବହୁପକ୍ଷୀୟବାଦ ପ୍ରତି ପ୍ରତିଶୃତିବଦ୍ଧତା ଅସାଧାରଣ ସ୍ୱରୂପ ଅଟେ | ଏହା ସର୍ବବିଦିତ ଯେ ‘ବ୍ରେଟନ ଉଡ୍ସ’ ବିଚାରଧାରା ଅଧୀନରେ ବହୁପକ୍ଷବାଦ କେବେ ମଧ୍ୟ ଆଶାନୁରୂପ ନଥିଲା | ତେବେ ବିଡମ୍ବନାର କଥା ହେଲା ବର୍ତ୍ତମାନ ଯେଉଁମାନେ ବହୁପକ୍ଷବାଦ ପ୍ରତି ସମାଲୋଚନା କରୁଛନ୍ତି ସେମାନେ ଗୋଟିଏ ସମୟରେ ଏହି ପ୍ରତିଷ୍ଠାନ ଗୁଡିକର ପ୍ରତିଷ୍ଠାତା ଥିଲେ | ଏବେ ଯେତେବେଳେ ବିକାଶଶୀଳ ଦେଶ ଗୁଡିକ ବୈଶ୍ଵୀକରଣକୁ ଆପଣେଇଛନ୍ତି ସେତେବେଳେ ସେମାନଙ୍କୁ ବୈଶ୍ଵୀକରଣରୁ ଓହରିବା ଲାଗି କୁହାଯାଉଛି|

ବ୍ରିକ୍ସକୁ ସମର୍ଥନ କରୁଥିବା ନୂତନ ବହୁପକ୍ଷବାଦକୁ ମିଳିତ ସମୃଦ୍ଧି ଭାବେ ଦେଖାଯିବା ଉଚିତ | ମିଳିତ ବିବୃତ୍ତିରେ ବହୁପକ୍ଷବାଦକୁ ଅଧିକ ମହତ୍ଵ ଦିଆଯାଇଛି କାରଣ ଏହା ଶାନ୍ତି ଓ ସୁରକ୍ଷା, ସ୍ଥାୟୀ ବିକାଶକୁ ପ୍ରୋତ୍ସାହନ ଦେବା ଓ ମାନବାଧିକାରର ସୁରକ୍ଷା ଓ ସମସ୍ତଙ୍କ ପାଇଁ ମୌଳିକ ସ୍ଵାଧୀନତା ନିଶ୍ଚିତ କରିବା ଲାଗି ମହତ୍ବପୂର୍ଣ୍ଣ ଅଟେ |

ବିଗତ କିଛି ବର୍ଷରେ ଭାରତ, ଆତଙ୍କବାଦ ଭଳି ମହାବିପତ୍ତି ବିରୁଦ୍ଧରେ ଏକ ଆନ୍ତର୍ଜାତୀୟ ଜନମତ ସଂଗ୍ରହ ଲାଗି ମହତ୍ବପୂର୍ଣ୍ଣ ଭୂମିକା ନିଭାଇଛି | ଭାରତ, ରୁଷ ଓ ଚୀନ ଭଳି ବ୍ରିକ୍ସ ଦେଶ ଗୁଡିକ ଆତଙ୍କବାଦର ଶିକାର ହୋଇଛନ୍ତି | ତେଣୁ ବ୍ରାସିଲିଆ ସମ୍ମିଳନୀରେ ସବୁ ପ୍ରକରାର ସନ୍ତ୍ରାସବାଦର ତୀବ୍ର ନିନ୍ଦା କରାଯାଇଛି |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦଘାଟନୀ ଅଧିବେଶନରେ ଉଦବୋଧନ ଦେବା ବେଳେ ସନ୍ତ୍ରାସବାଦର କଡା ନିନ୍ଦା କରିଥିଲେ | ସେ, ବିକାଶ, ଶାନ୍ତି ଓ ସମୃଦ୍ଧି କ୍ଷେତ୍ରରେ ଆତଙ୍କବାଦ ଏକ ବଡ ବିପଦ ଭାବେ ଉଭା ହୋଇଛି ବୋଲି ବର୍ଣ୍ଣନା କରିଥିଲେ | ଆତଙ୍କବାଦ ଯୋଗୁଁ ବିଶ୍ଵ ଅର୍ଥବ୍ୟବସ୍ଥାରେ 1 ଟ୍ରିଲିୟନ ଡଲାର ର କ୍ଷତି ପହଞ୍ଚିଥିବା ବେଳେ ବିକାଶଶୀଳ ଦେଶ ଗୁଡିକରେ ଆର୍ଥିକ ଅଭିବୃଦ୍ଧି ହାରରେ 1.5 ପ୍ରତିଶତ ହ୍ରାସ ପାଇଛି ବୋଲି ସେ ଅଭିହିତ କରିଥିଲେ |

ବିଶ୍ଵ ବାଣିଜ୍ୟ ମାତ୍ର 15 ପ୍ରତିଶତ ବ୍ୟବସାୟ ବ୍ରିକ୍ସ ରାଷ୍ଟ୍ର ଗୁଡିକ ମଧ୍ୟରେ ହେଉଥିବାରୁ ଏହାର ପରିମାଣକୁ ବୃଦ୍ଧି କରିବାକୁ ଶ୍ରୀମୋଦୀ ଆହ୍ଵାନ ଦେଇଥିଲେ | ମିଳିତ ବିବୃତ୍ତିରେ ବ୍ରିକ୍ସ ବ୍ୟବସାୟ ଫୋରମ ବୈଠକକୁ ସ୍ଵାଗତ କରାଯାଇଛି କାରଣ ଆର୍ଥିକ ଓ ବାଣିଜ୍ୟକୁ ପ୍ରୋତ୍ସାହନ ଦେବା କ୍ଷେତ୍ରରେ ଏହାର ମହତ୍ବପୂର୍ଣ୍ଣ ଭୂମିକା ରହିଛି | ଘୋର ଜଳବାୟୁ ସଙ୍କଟ ସମୟରେ ମିଳିତ ବିବୃତ୍ତିରେ, ନିରନ୍ତର ବିକାଶ ଲାଗି 2030 କାର୍ଯ୍ୟସୁଚିକୁ ଲାଗୁ କରିବା କରିବା ପାଇଁ ବ୍ରିକ୍ସ ସମୂହର ପ୍ରତିଶୃତିବଦ୍ଧତା ଦୋହୋରାଯାଇଛି | ଏଥିରେ ଜଳବାୟୁ ପରିବର୍ତ୍ତନ ଉପରେ ଜାତିସଂଘ ଢାଞ୍ଚା ସମ୍ମିଳନୀର ସିଦ୍ଧାନ୍ତ ଅନୁଯାୟୀ ଗୃହିତ ପ୍ଯାରିସ ରାଜିନାମାର କାର୍ଯ୍ୟକାରିତାକୁ ମଧ୍ୟ ସମର୍ଥନ କରାଯାଇଛି |

ବ୍ରାଜିଲ, ରୁଷ ଓ ଚୀନ ରାଷ୍ଟ୍ରପତିଙ୍କ ସହ ଭାରତର ପ୍ରଧାନମନ୍ତ୍ରୀଙ୍କ ଦ୍ଵିପକ୍ଷୀୟ ବୈଠକ ଫଳପ୍ରଦ ହୋଇଛି | ଭାରତରେ ଆଗାମୀ ସାଧାରଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ଯୋଗ ଦେବା ଲାଗି ବ୍ରାଜିଲ ରାଷ୍ଟ୍ରପତି ଜୈର ବୋଲଶୋନାରୋ ଭାରତର ଆମନ୍ତ୍ରଣକୁ ସାଦରେ ଗ୍ରହଣ କରିଛନ୍ତି | ଲାଟିନ ଆମେରିକା ସହ ଭାରତର ସମ୍ବନ୍ଧକୁ ଆହୁରି ମଜବୁତ କରିବା ଦିଗରେ ଏହା ହେଉଛି ଏକ ସ୍ଵାଗତ ଯୋଗ୍ୟ ପଦକ୍ଷେପ | 

ଏକ ନୂଆ ଉନ୍ନୟନ ବ୍ଯାଙ୍କ ଗଠନ ଲାଗି ବ୍ରିକ୍ସ ରାଷ୍ଟ୍ର ପକ୍ଷରୁ ଯେଉଁ ନିରନ୍ତର ଉଦ୍ୟମ ଚାଲିଛି ସେଥିପ୍ରତି ସମସ୍ତଙ୍କ ସମର୍ଥନ ପ୍ରାପ୍ତ ହୋଇଛି | ବ୍ରାସିଲିଆ ଶିଖର ବୈଠକରେ ସଦସ୍ୟ ଦେଶ ଗୁଡିକରେ ଏନଡ଼ିବି ର ଆଞ୍ଚଳିକ ଅଫିସ ଖୋଲିବାକୁ ସ୍ଵାଗତ କରାଯିବା ସହ ଏହାର ସଦସ୍ଯତାର ବୃଦ୍ଧି କରିବା ଦିଗରେ ଏନଡ଼ିବି ଦ୍ଵାରା କରାଯାଇଥିବା ପ୍ରଗତି ଉପରେ ସନ୍ତୋଷ ବ୍ୟକ୍ତ କରାଯାଇଛି | ଏହି ପରିଦୃଶ୍ୟରେ ବିଜ୍ଞାନ, ପ୍ରଯୁକ୍ତିବିଦ୍ୟା ଓ ଅଭିନବତା ଉପରେ ଆଧାରିତ ଅଭିନବତା ବ୍ରିକ୍ସ ନେଟୱର୍କର ସ୍ଥାପନା ବ୍ରିକ୍ସକୁ ବୈଧତା ଦେବା ଲାଗି ଏକ ମହତ୍ବପୂର୍ଣ୍ଣ ପଦକ୍ଷେପ |

କୌଣସି ଉଦ୍ଯୋଗୀ ସଂଗଠନ ବା ସମୂହକୁ କେବଳ କଳ୍ପନାର ଆବଶ୍ୟକତା ହୋଇନଥାଏ ବରଂ ଏଥିପ୍ରତି ନିରନ୍ତର ଧ୍ୟାନ ଦେବାର ମଧ୍ୟ ଆବଶ୍ୟକତା ହୋଇଥାଏ | ସମାଜକୁ ସୁହାଇଲାଭଳି ଏକ ଅର୍ଥନୀତି ଲାଗି କାମ କରିବା ପାଇଁ ବ୍ରିକ୍ସ ସମୂହ ସଙ୍କଳ୍ପବଦ୍ଧତା ପ୍ରକାଶ କରିବା ଉଚିତ | 

ମୂଳ ଲେଖା : ଡଃ ଆଶ ନାରାୟଣ ରାୟ, 

ଅନୁବାଦ : ରୀତା ଯୋଶୀ