ହାଫିଜ ସୟିଦକୁ ଅଭିଯୁକ୍ତ କରିବା ଏକ ବାସ୍ତବ ନା ପ୍ରହସନ ?

ଜାତିସଂଘ ଦ୍ଵାରା ସନ୍ତ୍ରାସବାଦୀ ଭାବେ ଘୋଷିତ ଜମାତ- ଉଦ -ଦାୱା (ଜେୟୁଡ଼ି)ମୁଖ୍ୟ ତଥା 26/11 ମୁମ୍ବାଇ ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ହାଫିଜ ସୟିଦକୁ ଲାହୋର ର ଏକ ଅଦାଲତ ଦ୍ଵାରା ସନ୍ତ୍ରାସବାଦୀ ମାନଙ୍କୁ ପାଣ୍ଠି ପ୍ରଦାନ ଅଭିଯୋଗରେ ଅଭିଯୁକ୍ତ କରାଯାଇଛି | ଗତ ଜୁଲାଇ ମାସରେ ପଞ୍ଜାବ ପୋଲିସର ସନ୍ତ୍ରାସବାଦୀ ବିରୋଧୀ ବିଭାଗ (ସିଟିଡ଼ି), ସୟିଦ ଓ ତାର ସହଯୋଗୀ ମାନଙ୍କ ବିରୁଦ୍ଧରେ 23 ଟି ମାମଲା ରୁଜ୍ଜୁ କରିବା ସଙ୍ଗେ ସଙ୍ଗେ ସେମାନଙ୍କୁ ବିଚାର ବିଭାଗୀୟ ହାଜତରେ ଲାହୋର ର କୋଟ ଲଖପତ ଜେଲକୁ ପଠେଇଛି | ଏହି ରାୟ ଘୋଷଣା ବେଳେ ସୟିଦ କୋର୍ଟରେ ହାଜର ଥିବାର ଜଣାପଡିଛି | ସୟିଦକୁ ଗତ 11 ତାରିଖ ଦିନ ପାକିସ୍ତାନର ସନ୍ତ୍ରାସବାଦୀ ନିରୋଧୀ ଅଦାଲତ ଅଭିଯୁକ୍ତ କରିଥିବା ଦର୍ଶାଯାଇଛି | ବର୍ତ୍ତମାନ ପ୍ରଶ୍ନ ଉଠୁଛି ଯେ ପ୍ରକୃତରେ କଣ ଅଦାଲତ ସୟିଦ ବିରୁଦ୍ଧରେ ଗୁରୁତର ଭାବେ ମାମଲା ପରିଚାଳନା କରିବ ? ପାକିସ୍ତାନରେ କାର୍ଯ୍ୟକାରୀ କରାଯାଉଥିବା ବର୍ତ୍ତମାନର ବ୍ୟବସ୍ଥା ବିଷୟରେ ଜଣା ଥିବା ପ୍ରତ୍ୟେକ ବ୍ୟକ୍ତିଙ୍କ ମନରେ ଏଭଳି ପ୍ରଶ୍ନ ଉଠିବା ସ୍ଵାଭାବିକ |

ଏଠାରେ ସ୍ମରଣ ଯୋଗ୍ୟ ଯେ ବିଶ୍ଵ ସନ୍ତ୍ରାସବାଦ ପାଣ୍ଠି ନିରୋଧ ସଂସ୍ଥା ଅର୍ଥନୈତିକ କାର୍ଯ୍ୟାନୁଷ୍ଠାନ ଟାସ୍କ ଫୋର୍ସ (ଏଫଏଟିଏଫ) ଦ୍ଵାରା ସନ୍ତ୍ରାସବାଦୀ ଗୋଷ୍ଠୀ ଗୁଡିକୁ ପାଣ୍ଠି ପ୍ରଦାନ ବନ୍ଦ କରିବା ପାଇଁ ପଦକ୍ଷେପ ନିଆଯିବା ପରେ ପାକିସ୍ତାନ ଉପରେ ଆନ୍ତର୍ଜାତୀୟ ଚାପ ବୃଦ୍ଧି ପାଇଛି | ପାକିସ୍ତାନ, ଜାତିସଂଘ ନିରାପତ୍ତା ପରିଷଦ ପକ୍ଷରୁ ଚାପ ଯୋଗୁଁ ସୟିଦ ର ବ୍ୟାଙ୍କ ଜମା ଖାତା ସମେତ ତାର ସମ୍ପତ୍ତି ଗୁଡିକୁ ଅଚଳ କରିଛି | ଏସବୁ ସତ୍ତ୍ୱେ ସୟିଦ ତାର ପରିବାର ଖର୍ଚ୍ଚ ତୁଲାଇବା ପାଇଁ ତାର ବ୍ୟାଙ୍କ ଜମା ଖାତାରୁ ଟଙ୍କା ଉଠାଣ ପାଇଁ ଅନୁମତି ଦିଆଯାଉ ବୋଲି ପାକିସ୍ତାନ ଜାତିସଂଘ ନିରାପତ୍ତା ପରିଷଦକୁ ଅନୁରୋଧ କରିଛି | ଏଫଏଟିଏଫ ପକ୍ଷରୁ ଚାପ ସହ ଭାରତ ମଧ୍ୟ ସୟିଦ ବିରୁଦ୍ଧରେ ପଦକ୍ଷେପ ପାଇଁ ନିରନ୍ତର ଦାବି କରୁଛି | ନୂଆଦିଲ୍ଲୀର କହିବା କଥା ହେଲା ଭାରତ ବିରୁଦ୍ଧରେ ଆକ୍ରମଣ ଲକ୍ଷ୍ୟରେ ସୟିଦ ଧାର୍ମିକ ଅନୁଷ୍ଠାନ ଗୁଡିକ ଜରିଆରେ ସନ୍ତ୍ରାସବାଦୀ ମାନଙ୍କୁ ପାଣ୍ଠି ପ୍ରଦାନ କରୁଛି | ହାଫିଜ ସୟିଦକୁ ଧରେଇ ଦେଲେ 10 ନିୟୁତ ଡଲାର ପୁରସ୍କାର ଦେବାକୁ ଆମେରିକା ପ୍ରସ୍ତାବ ଦେଇଛି |

ସନ୍ତ୍ରାସବାଦୀ ମାନଙ୍କୁ ପାଣ୍ଠି ଯୋଗାଣ ଓ କଳାଧନକୁ ସଂପୂର୍ଣ୍ଣ ମୂଳପୋଛ କରିବା ପାଇଁ ପାକିସ୍ତାନକୁ ଆହୁରି ଅଧିକ ପଦକ୍ଷେପ ନେବାକୁ ପଡିବ ବୋଲି ଗତ ଅକ୍ଟୋବର ମାସରେ ଏଫଏଟିଏଫ ଦ୍ଵାରା ସଦ୍ୟତମ ସମୀକ୍ଷାରେ କୁହାଯାଇଛି | 2020 ମସିହା ଫେବୃୟାରି ମାସ ମଧ୍ୟରେ ପଦକ୍ଷେପ ନେବାକୁ ଏଫଏଟିଏଫ ପକ୍ଷରୁ ସମୟ ଦିଆଯାଇଛି ଏବଂ ସେ ପର୍ଯ୍ୟନ୍ତ ପାକିସ୍ତାନ ଗ୍ରେ ତାଲିକାରେ ରହିବ | ଲାହୋରର ସନ୍ତ୍ରାସବାଦ ବିରୋଧୀ ଅଦାଲତ ଦ୍ଵାରା ସନ୍ତ୍ରାସବାଦୀ ମାନଙ୍କୁ ପାଣ୍ଠି ପ୍ରଦାନ ଅଭିଯୋଗରେ ସୟିଦକୁ ଅଭିଯୁକ୍ତ କରାଯିବା ପାକିସ୍ତାନର ଏକ କୌଶଳ ମଧ୍ୟ ହୋଇପାରେ କାରଣ ଏଫଏଟିଏଫ ର ପରବର୍ତ୍ତୀ ସମୀକ୍ଷା ବୈଠକରେ ପାକିସ୍ତାନକୁ କଳାତାଲିକାଭୁକ୍ତ ନକରିବା ପାଇଁ ଇସଲାମାବାଦ ଏଭଳି ଚାଲ ଚଳେଇଥିବା ବିଷୟକୁ ମଧ୍ୟ ଅସ୍ଵୀକାର କରାଯାଇ ପାରିବ ନାହିଁ |

ସବୁଠାରୁ ମଜାର କଥା ହେଲା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କୁ ଭେଟିବା ପାଇଁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ୱାଶିଙ୍ଗଟନ ଗସ୍ତର ମାତ୍ର କେଇ ସପ୍ତାହ ପୂର୍ବରୁ ହାଫିଜ ସୟିଦକୁ ଅଭିଯୁକ୍ତ କରାଯାଇଛି | ଏକଥା ମଧ୍ୟ ହେଇପାରେ ପାକିସ୍ତାନରୁ ଚାଲି ଥିବା ସନ୍ତ୍ରାସବାଦ କାର୍ଯ୍ୟକଳାପକୁ ଦମନ କରିବା ପାଇଁ ଆମେରିକା ପକ୍ଷରୁ ବର୍ଦ୍ଧିତ ଚାପ ଏବଂ ଗତ କେଇ ବର୍ଷ ହେଲା ସନ୍ତ୍ରାସବାଦ ବିରୁଦ୍ଧରେ ଆମେରିକା ପକ୍ଷରୁ କଡା ଆଭିମୁଖ୍ୟ ପ୍ରକାଶ କରାଯାଉଥିବାରୁ ସୟିଦ ବିରରୁଦ୍ଧରେ ତୁରନ୍ତ ଏଭଳି ପଦକ୍ଷେପ ନେଇ ଆମେରିକା ଆଖିରେ ପାକିସ୍ତାନ ଭଲେଇ ହେବାକୁ ଚାହୁଁଛି |

ଆହୁରି ମଜାର କଥା ହେଲା ଗୋଟିଏ ପଟେ ହାଫିଜ ସୟିଦକୁ ଅଭିଯୁକ୍ତ କରିବା ପାଇଁ ପ୍ରସ୍ତୁତି ଚାଲିଥିବା ବେଳେ ତାର ପୁତ୍ର ଗତ ସପ୍ତାହରେ ଲାହୋର ଉପକଣ୍ଠରେ ଗୋଟିଏ ଦୋକାନ ପାଖରେ ସମବେତ ଜନତାଙ୍କୁ ଉଦବୋଧନ ଦେଉଥିବା ବେଳେ ଏକ ହତ୍ୟା ଉଦ୍ୟମରୁ ବର୍ତ୍ତି ଯାଇଛି | ସେହି ହତ୍ୟା ଉଦ୍ୟମ ବେଳେ ଜଣେ ବ୍ୟକ୍ତିର ମୃତ୍ୟୁ ଘଟିଥିବା ବେଳେ 7 ଜଣ ଲସ୍କର ସନ୍ତ୍ରାସବାଦୀ ଗୁରୁତର ଭାବେ ଆହତ ହୋଇଥିଲେ | ଏଠାରେ ଉଲ୍ଲେଖ ଯୋଗ୍ୟ ଯେ ତଲହା ସୟିଦ ଭବିଷ୍ୟତରେ ଲସ୍କର ମୁଖ୍ୟ ଭାବେ ହାଫିଜ ସୟିଦର ଉତ୍ତରାଧିକାରୀ ହେବ | ଆଉ କେତେକ ଖବରରେ କୁହାଯାଇଛି ଯେ ଲସ୍କର ଗୋଷ୍ଠୀର ପାଣ୍ଠି ତଲହା ନିୟନ୍ତ୍ରଣରେ ରଖିଥିବାରୁ ସେହି ସନ୍ତ୍ରାସବାଦୀ ସଂଗଠନର ବରିଷ୍ଠ ନେତା ମାନେ ଅତ୍ୟନ୍ତ ମାତ୍ରାରେ ରାଗି ଯାଇଛନ୍ତି | ତେଣୁ ଲସ୍କର ଭିତରେ ଆଭ୍ଯନ୍ତରୀଣ ଶକ୍ତି ଲଢେଇକୁ ନେଇ ତଲହା ସୟିଦ ଉପରେ ଆକ୍ରମଣ କରାଯାଇଥିବା କଥା ଅନୁମାନ କରାଯାଉଛି |

ସୟିଦକୁ ଅଭିଯୁକ୍ତ କରାଯିବା ଆମେରିକା ସ୍ଵାଗତ କରିଥିବା ସତ୍ତ୍ୱେ ଭାରତକୁ ଅତି ସତର୍କତାର ସହ ଦ୍ରୁଷ୍ଟି ରଖିବାକୁ ପଡିବ ଏବଂ ପାକିସ୍ତାନର ପୂର୍ବ ସରକାର ଗୁଡିକ ତୁଳନାରେ ଇମ୍ରାନ ଖାଁ ସରକାର ଅଲଗା କି ନୁହେଁ ତାହା ମଧ୍ୟ ଦେଖିବାକୁ ପଡିବ | ହାଫିଜ ସୟିଦକୁ ପୂର୍ବରୁ ବହୁ ବାର ଗିରଫ କରାଯାଇ ଜେଲକୁ ପଠାଯାଇଥିଲା ଏବଂ ବହୁବାର ତାକୁ ଛାଡି ମଧ୍ୟ ଦିଆଯାଇଛି |

ସୟିଦକୁ ଅଭିଯୁକ୍ତ କରିବାର କିଛି ଦିନ ପୂର୍ବରୁ ତାକୁ ଏକ ଜମି ହଡପ ମାମଲାରେ ଜାମିନ ଦିଆଯାଇଥିଲା | ତାବିରୁଦ୍ଧରେ ଏଭଳି ଅନେକ ଜମି ହଡପ ମାମଲା ରହିଛି | ତାକୁ ଗିରଫ କରାଯାଇ ବାରମ୍ବାର ଛଡା ଯାଉଥିବା ଘଟଣା ଏକ ପ୍ରହସନରେ ପରିଣତ ହୋଇଛି ଏଣୁ ସୟିଦ ବିରୁଦ୍ଧରେ ସନ୍ତ୍ରାସବାଦ ମୋକଦ୍ଦମା ଗୁଡିକୁ ପରିଚାଳନା କରିବା କ୍ଷେତ୍ରରେ ପାକିସ୍ତାନ ଗୁରୁତର କି ନୁହେଁ ତାହା ମଧ୍ୟ ବିଶ୍ଳେଷଣ କରିବାକୁ ପଡିବ | ଏଫଏଟିଏଫର 27 ଦଫା ଯୋଜନା କୁ ପାଳନ କରିବା ପାଇଁ ପାକିସ୍ତାନ ପ୍ରସ୍ତୁତ ଅଛି କି ନାହିଁ ତାହା ମଧ୍ୟ ଦେଖିବାକୁ ପଡିବ | ସୟିଦକୁ ଏଭଳି ବାରମ୍ବାର ଛଡା ଯାଉଛି ଏବଂ ଯଦି ଏଥର ମଧ୍ୟ ଛାଡି ଦିଆଯାଏ ତେବେ ସନ୍ତ୍ରାସବାଦୀ ଗୋଷ୍ଠୀ ଗୁଡିକୁ ପାଣ୍ଠି ପ୍ରଦାନ ନିବାରଣ କ୍ଷେତ୍ରରେ ପାକିସ୍ତାନର ବିଫଳତା ପାଇଁ ସେ ଦେଶକୁ ଏଫଏଟିଏଫ କଳା ତାଲିକାଭୁକ୍ତ କରିବ କି ନାହିଁ ତାହା ମଧ୍ୟ ଦେଖିବାକୁ ବାକି ଅଛି |

ମୂଳ ଲେଖା : ଡଃ ଜୈନାବ ଅଖତର, ପାକିସ୍ତାନ ଉପରେ ବିଶ୍ଳେଷକ

ଅନୁବାଦ : ଜଗନ୍ନାଥ ମଲ୍ଲିକ, ରୀତା ଯୋଶୀ