ପାର୍ଲାମେଣ୍ଟରେ ଚଳିତ ସପ୍ତାହ

ପାର୍ଲାମେଣ୍ଟର ଶୀତକାଳୀନ ଅଧିବେଶନରେ ନାଗରିକତା ସଂଶୋଧନ ବିଲ, 2019 ପାସ ହୋଇଯାଇଛି | ଉଭୟ ସଭାଗୃହରେ ଏହି ବିଲ ଅନୁମୋଦନ ଲାଭ କରିଛି | ବୁଧବାର ଦିନ ରାଜ୍ୟସଭାରେ ଏହି ବିଲ ଉପସ୍ଥାପନ କରି ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହ କହିଥିଲେ ଯେ ପାକିସ୍ତାନ, ବାଙ୍ଗଲାଦେଶ ଓ ଆଫଗାନିସ୍ତାନ ଭଳି ପଡୋଶୀ ରାଷ୍ଟ୍ରରେ ସଂଖ୍ୟାଲଘୁ ସମ୍ପ୍ରଦାୟର ଲୋକମାନେ ଯେଉଁ ଦୁଃଖ କଷ୍ଟରେ ଅଛନ୍ତି ତାହା ଦୂର କରିବା ପଇଁ ଏହି ଐତିହାସିକ ବିଲର ଆବଶ୍ୟକତା ଥିଲା | ସେ କହିଥିଲେ ଯେ ଧର୍ମ ଭିତ୍ତିରେ ବିଭାଜନ ପରେ ସଂଖ୍ୟାଲଘୁ ସଂପ୍ରଦାୟର ଲୋକ ମାନେ ଏହି ସବୁ ଦେଶ ଗୁଡିକରେ ନିର୍ଯ୍ୟାତିତ ହୋଇ ଆସୁଛନ୍ତି| 1955 ନାଗରିକତା ଆଇନରେ ସଂଶୋଧନ କରାଯିବା ଦ୍ଵାରା ପାକିସ୍ତାନ, ବାଙ୍ଗଲାଦେଶ ଓ ଆଫଗାନିସ୍ତାନରୁ ପଳାଇ ଆସିଥିବା 6ଟି ସଂପ୍ରଦାୟର ଅବୈଧ ଶରଣାର୍ଥୀ ମାନଙ୍କୁ ଭାରତର ନାଗରିକତ୍ଵ ପ୍ରଦାନ କରିବା ଏହି ବିଲର ଲକ୍ଷ | ସେହି ସବୁ ଦେଶ ଗୁଡିକର ସଂଖ୍ୟାଲଘୁ ସମ୍ପ୍ରଦାୟ ହିନ୍ଦୁ, ଶିଖ, ବୌଦ୍ଧ, ଜୈନ, ପାର୍ସି ତଥା ଖ୍ରୀଷ୍ଟିୟାନ ନାଗରିକ ମାନଙ୍କୁ ଭାରତୀୟ ନାଗରିକତା ହାସଲ କରିବାରେ ଏହି ବିଲ ସମର୍ଥ ହେବ |

ଶ୍ରୀ ଶାହ ଏହାର ସମ୍ବିଧାନିକତା ଉପରେ ଜବାବ ଦେଇ କହିଥିଲେ ଯେ ଏହି ବିଲରେ ସର୍ତ୍ତ ଗୁଡିକୁ ପୂରଣ କରିବା ପାଇଁ ଯୁକ୍ତିଯୁକ୍ତ ବର୍ଗୀକରଣ କରାଯାଇଛି | ସେ କହିଥିଲେ ଗତ ପାଞ୍ଚ ବର୍ଷରେ ଭାରତରେ ସେହି ଦେଶ ଗୁଡିକର ମୁସଲମାନ ସଂପ୍ରଦାୟର 566 ଜଣ ଲୋକଙ୍କୁ ନାଗରିକତା ପ୍ରଦାନ କରାଯାଇଛି | ସେ ଆହୁରି ମଧ୍ୟ କହିଥିଲେ ଯେ ଏହି ବିଲକୁ ତରବାରିଆ ଭାବେ ବା ବିରୋଧୀ ପାର୍ଟି ଦ୍ଵାରା ଉତଥାପନ କରାଯାଉଥିବା ପ୍ରସଙ୍ଗରୁ ଧ୍ୟାନ ହଟେଇବା ଲାଗି ଆଗତ କରାଯାଇନାହିଁ | ସେ କହିଥିଲେ ପୂର୍ବରୁ ଶ୍ରୀଲଙ୍କା ଓ ଉଗାଣ୍ଡା ର ଲୋକମାନଙ୍କୁ ନାଗରିକତା ପ୍ରଦାନ କରାଯାଉଥିଲା | ପ୍ରଧାନମନ୍ତ୍ରୀ ଏକ ଟୁଇଟ କରି କହିଛନ୍ତି ଯେ ଭାରତ ଓ ଦେଶର ଲୋକ ମାନଙ୍କ କରୁଣା ଓ ଭାତୃତ୍ୱଭାବ ପାଇଁ ଏହା ଏକ ଉଲ୍ଲେଖନୀୟ ଦିବସ | ସେ କହିଛନ୍ତି ଯେ ଏହି ବିଲ ଦୀର୍ଘ ଦିନରୁ ଉତ୍ପୀଡନର ଶିକାର ହେଉଥିବା ଲୋକମାନଙ୍କର ଦୁଃଖ ଦୁର୍ଦ୍ଦଶା ଦୂର କରିବ |

ସମ୍ବିଧାନର ୧୨୬ତମ ସଂଶୋଧନ ବିଲ 2019 ଗୁରୁବାର ଦିନ ସଂସଦରେ ପାସ ହୋଇଥିଲା | ସୂଚନାଯୋଗ୍ୟ ଯେ, ପୂର୍ବରୁ ଲୋକସଭା ଦ୍ଵାରା ଅନୁମୋଦିତ ଏହି ବିଲକୁ ଗୁରୁବାର ଦିନ ରାଜ୍ୟସଭାର ଅନୁମୋଦନ ମିଳିଛି । ଏହି ବିଲରେ ଲୋକସଭା ଓ ରାଜ୍ୟ ବିଧାନସଭା ଗୁଡିକରେ ତଫସିଲଭୁକ୍ତ ଜାତି ଓ ଜନଜାତି ପାଇଁ 25 ଜାନୁୟାରୀ 2030 ପର୍ଯ୍ୟନ୍ତ ଆଉ ଦଶ ବର୍ଷ ଲାଗି ସ୍ଥାନ ସଂରକ୍ଷଣ ଦେବାର ପ୍ରସ୍ତାବ ରହିଛି | ଆଇନ ଓ ନ୍ୟାୟ ମନ୍ତ୍ରୀ ରବି ଶଙ୍କର ପ୍ରସାଦ ବିତର୍କ ବେଳେ ଉତ୍ତର ଦେଇ କହିଥିଲେ ସରକାର ତଫସିଲଭୁକ୍ତ ଜାତି ଓ ଜନଜାତି ସମ୍ପ୍ରଦାୟର ସ୍ଵଚ୍ଛଳ ବର୍ଗଙ୍କ ପାଇଁ ସ୍ଥାନ ସଂରକ୍ଷଣରେ କୌଣସି ମାନଦଣ୍ଡ ପ୍ରସ୍ତୁତ କରୁନାହାନ୍ତି | ସେ କହିଥିଲେ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡ଼ିଏ) ସରକାର ଏହି ଦୁଇ ସମୁଦାୟର କଲ୍ୟାଣ ନିମନ୍ତେ ଅନେକ ପଦକ୍ଷେପ ଗ୍ରହଣ କରିଛନ୍ତି | ସେ କହିଥିଲେ ସରକାର ଶିକ୍ଷା ଓ ସଶସ୍ତ୍ର ବାହିନୀ କ୍ଷେତ୍ରରେ ଏଙ୍ଗ୍ଲୋ-ଇଣ୍ଡିଆନ ସମୁଦାୟର ଅବଦାନ ଲାଗି ଏହାର ପ୍ରଶଂସା କରିଛନ୍ତି |

ସ୍ବରାଷ୍ଟ୍ର ବିଭାଗ ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାୟ ଲୋକସଭାରେ ସୂଚନା ଦେଇଛନ୍ତି ଯେ ଅକ୍ଟୋବର 2019 ପର୍ଯ୍ୟନ୍ତ ଆସାମରେ ବିଭିନ୍ନ ବିଦେଶୀ ମାନଙ୍କ ନ୍ୟାୟାଧିକରଣ ଦ୍ଵାରା 1.29 ଲକ୍ଷରୁ ଅଧିକ ଲୋକଙ୍କୁ ବିଦେଶୀ ନାଗରିକ ଭାବେ ଘୋଷଣା କରାଯାଇଛି | ସେ କହିଛନ୍ତି ଯେ ଏହାକୁ ଚାଲେଞ୍ଜ କରିଥିବା 1.14 ଲକ୍ଷ ଲୋକଙ୍କୁ ମଧ୍ୟ ଭାରତୀୟ ନାଗରିକ ଭାବେ ଘୋଷଣା କରାଯାଇଛି |

ତେଣେ ଦେଶ ମଧ୍ୟରେ ତାଙ୍କ ଆନୁଷ୍ଠାନିକ ଗସ୍ତ ସମୟରେ ପ୍ରଧାନମନ୍ତ୍ରୀ ଗ୍ରହଣ କରିଥିବା ସ୍ମୃତି ଚିହ୍ନ ଗୁଡିକର ନିଲାମ କରାଯାଇ 15 କୋଟିରୁ ଅଧିକ ଅର୍ଥ ପ୍ରାପ୍ତି ହୋଇଛି ବୋଲି ସଂସ୍କୃତି ମନ୍ତ୍ରୀ ପ୍ରହ୍ଲାଦ ପଟେଲ ରାଜ୍ୟସଭାରେ ସୂଚନା ଦେଇଛନ୍ତି |

ସ୍ବରାଷ୍ଟ୍ର ବିଭାଗ ରାଷ୍ଟ୍ରମନ୍ତ୍ରୀ ଜି କିଶନ ରେଡ୍ଡୀ ଏକ ଲିଖିତ ଉତ୍ତର ମାଧ୍ୟମରେ ଲୋକସଭାରେ କହିଛନ୍ତି ଯେ ଅଗଷ୍ଟ 5 ତାରିଖରେ ଜାମ୍ମୁ ଓ କାଶ୍ମୀରରେ 370 ଧାରା ଊଚ୍ଛେଦ ହେବା ପରଠୁ ନିୟନ୍ତ୍ରଣ ସୀମାରେଖାରେ ସନ୍ତ୍ରାସବାଦୀ ମାନଙ୍କ ଦ୍ଵାରା 85ଟି ଅନୁପ୍ରବେଶ ଉଦ୍ୟମ ହୋଇଥିବା ବେଳେ 59ଜଣ ଆତଙ୍କବାଦୀ ଅନୁପ୍ରବେଶ କରିଥିବାର ଅନୁମାନ କରାଯାଉଛି । ମନ୍ତ୍ରୀ ମହୋଦୟ କହିଛନ୍ତି ଯେ 1990 ମସିହାରୁ ଅକ୍ଟୋବର 2019 ମଧ୍ୟରେ ଅନୁପ୍ରବେଶ ଉଦ୍ୟମ ବେଳେ ଜାମ୍ମୁ ଓ କାଶ୍ମୀରରେ ପ୍ରାୟ 22,557 ସନ୍ତ୍ରାସବାଦୀଙ୍କୁ ମାରି ଦିଆଯାଇଛି | ସେ କହିଛନ୍ତି 2005 ରୁ ଅକ୍ଟୋବର 31 2019 ମଧ୍ୟରେ ଅନୁପ୍ରବେଶ କରିଥିବା 1,011 ଜଣ ସନ୍ତ୍ରାସବାଦୀଙ୍କୁ ମାରି ଦିଆଯାଇଥିବା ବେଳେ 42 ଜଣଙ୍କୁ ଗିରଫ କରାଯାଇଥିଲା ଓ 2,253 ଜଣଙ୍କୁ ବିତାଡିତ କରାଯାଇଥିଲା |

ବୈଦେଶିକ ବିଭାଗ ରାଷ୍ଟ୍ରମନ୍ତ୍ରୀ ଭି. ମୁରଲୀଧରନ ଲୋକସଭାରେ ଜଣାଇଛନ୍ତି ଯେ ପାକିସ୍ତାନର ହାଜତରେ 292 ଜଣ ଭାରତୀୟ ବନ୍ଦୀ ଅଛନ୍ତି ଓ ସେମାନଙ୍କ ମଧ୍ୟରେ ଭାରତର ବେସାମରିକ ତଥା ମତ୍ସ୍ୟଜୀବୀ ଅଛନ୍ତି | ସେ କହିଛନ୍ତି 1 ଜୁଲାଇ 2019 ରେ ପ୍ରକାଶ କରାଯାଇଥିବା ତାଲିକା ଅନୁଯାୟୀ ପାକିସ୍ତାନ, ଭାରତର 52ଜଣ ବେସାମରିକ ନାଗରିକ ଓ 209 ଜଣ ମତ୍ସ୍ୟଜୀବୀ ସେଠାକାର ହାଜତରେ ବନ୍ଦୀ ଥିବା ବିଷୟ ସ୍ଵୀକାର କରିଛି | ସେ ମଧ୍ୟ କହିଛନ୍ତି ଯୁଦ୍ଧ ବନ୍ଦୀ ସମେତ 83 ଜଣ ପ୍ରତିରକ୍ଷା କର୍ମଚାରୀ ନିଖୋଜ ହୋଇଥିବା ବିଷୟ ଏକ ଉଦବେଗର କାରଣ ହୋଇଛି | ଏମାନେ ହାଜତରେ ଥିବା ବିଷୟ ଇସଲାବାଦ ମଧ୍ୟ ଏଯାଏଁ ସ୍ପଷ୍ଟ କରିନାହିଁ | ମନ୍ତ୍ରୀ ମହୋଦୟ କହିଥିଲେ ନୂଆଦିଲ୍ଲୀ ପକ୍ଷରୁ ନିରନ୍ତର ଉଦ୍ୟମର ଫଳାଫଳ ସ୍ୱରୂପ ସରକାର 2014 ପରଠୁ ପାକିସ୍ତାନ ହାଜତରୁ ମତ୍ସ୍ୟଜୀବୀ ମାନଙ୍କ ସମେତ 2,112 ଭାରତୀୟଙ୍କୁ ଖଲାସ କରିବା ବା ସ୍ଵଦେଶ ପ୍ରତ୍ୟାବର୍ତ୍ତନ କରେଇବାରେ ସଫଳ ହୋଇଛନ୍ତି| ସେ କହିଛନ୍ତି ଯେ ଏମାନଙ୍କ ମଧ୍ୟରୁ 364 ଜଣ ଭାରତୀୟ ଚଳିତ ବର୍ଷ ପ୍ରତ୍ୟାବର୍ତ୍ତନ କରିଛନ୍ତି |

ମୂଳ ଲେଖା : ଭି. ମୋହନ ରାଓ, ସାମ୍ବାଦିକ

ଅନୁବାଦ : ରୀତା ଯୋଶୀ