ଶ୍ରୀଲଙ୍କାର ରାଷ୍ଟ୍ରପତି କିମ୍ବା ପ୍ରଧାନମନ୍ତ୍ରୀ ତାୱଙ୍କର ପ୍ରଥମ ସରକାରୀ ବିଦେଶ ଯାତ୍ରା ଭାରତକୁ ହୋଇଥାଏ କହିବା ବାହୁଲ୍ୟ ହେବ। ପୂର୍ବରୁ ଅନେକ ଥର ଏମିତି ହୋଇଛି। ଏବେ ଗୋଟାବାୟା ରାଜପକ୍ଷେ ରାଷ୍ଟ୍ରପତି ହେବାର ମାତ୍ର 10 ଦିନ ମଧ୍ୟରେ ତାଙ୍କର ପ୍ରଥମ ବିଦେଶ ଗସ୍ତ ଭାବରେ ଭାରତ ଆସିବା ଜରୁରି ମନେ କରିଛନ୍ତି।
ଶ୍ରୀଲଙ୍କା ଏବଂ ଏହାର ଘନିଷ୍ଠ ପଡୋଶୀ ସହିତ ସଂପର୍କ ମଧୁର ଥିଲେ ମଧ୍ୟ ସାଂପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ଏହାକୁ ବାସ୍ତବିକତା ଅନୁରୂପ କରିବାର ଆବଶ୍ୟକତା ଦୁଇ ପକ୍ଷରୁ ରହିଛି। ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଶ୍ରୀଲଙ୍କା ରାଷ୍ଟ୍ରପତି ନିର୍ବାଚନ ପରେ ପଥମ ବିଦେଶୀ ପ୍ରତିନିଧି ଭାବେ ସେଠାକୁ ଗସ୍ତ କରି ରାଷ୍ଟ୍ରପତିଙ୍କୁ ସାକ୍ଷାତ କରିଥିଲେ। ତାଙ୍କୁ ଶୁଭେଚ୍ଛା ଜଣାଇବା ସହିତ ଭାରତକୁ ଆସିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମନ୍ତ୍ରଣ ପତ୍ର ଦେଇଥିଲେ। ଏହାର ପ୍ରତିଉତ୍ତରରେ ଶ୍ରୀଲଙ୍କା ରାଷ୍ଟ୍ରପତି ପ୍ରଧାନମନ୍ତ୍ରୀ ମୋଦିଙ୍କୁ ମଧ୍ୟ ଶ୍ରୀଲଙ୍କା ଆସିବାକୁ ଆମନ୍ତ୍ରଣ କରିଛନ୍ତି।
ଦୁଇ ଦେଶ ମଧ୍ୟରେ ସଂପର୍କ ଅତିତର ଅବଧାରଣାକୁ ଯେପରି ସୃଷ୍ଟି ନକରୁ ସେଥିପାଇଁ ଦୁଇ ପକ୍ଷ ପରସ୍ପରର ସଂପର୍କକୁ ସୁଦୃଢ କରିବାର ଆବଶ୍ୟକତା ଅନୁଭବ କରିଛନ୍ତି। ଯେତେବେଳେ ଶ୍ରୀଲଙ୍କା ଏଲଟିଟିଇ ସହିତ ଯୁଦ୍ଧ କରୁଥିଲା ସେତେବେଳେ ଏପରି ଅବଧାରଣା ସୃଷ୍ଟି ହୋଇଥିଲା। ସେତେବେଳେ ମହିନ୍ଦ୍ରା ରାଜପକ୍ଷେ ରାଷ୍ଟ୍ରପତି ଏବଂ ଗୋଟାବାୟା ରାଜପକ୍ଷେ ପ୍ରତିରକ୍ଷା ସଚିବ ଥିଲେ। ଭାରତ ସେତେବେଳେ ସେହି ଯୁଦ୍ଧରେ ଶ୍ରୀଲଙ୍କାକୁ ସଂପୂର୍ଣ୍ଣ ସମର୍ଥନ କରିଥିଲା ଏବଂ ସେଠାକାର ତାମିଲ ଅଧିବାସୀଙ୍କ ସ୍ୱାର୍ଥକୁ ସୁନିଶ୍ଚିତ କରିବା ପାଇଁ ଅନୁରୋଧ କରିଥିଲା। ସେତେବେଳେ ଶ୍ୀଲଙ୍କା ଏଲଟିଟିଇ ଉପରେ ବିଜୟ ହାସଲ କରିଥିଲା କିନ୍ତୁ ତାମିଲମାନଙ୍କ ପ୍ରସଙ୍ଗ ସେହିପରି ରହିଯାଇଥିଲା ଯାହାକୁ ଭାରତ ନିୟମିତ ଭାବେ ଶ୍ରୀଲହ୍କା ଆଗରେ ରଖିଆସିଛି। ଶ୍ରୀଲଙ୍କା ରାଷ୍ଟ୍ରପତି ଭାରତର ଚିନ୍ତାକୁ ସକରାତ୍ମକ ଭାବେ ଗ୍ରହଣ କରିଛନ୍ତି । ଏପରିକି ତାଙ୍କର ନିକଟରେ ଦେଇଥିବା ବିବୃତ୍ତିରେ କହିଛନ୍ତି ଯେ ସିଂଘଳି ମାନଙ୍କ ଭୋଟ ଯୋଗୁଁ ସେ ବିଜୟୀ ହୋଇଛନ୍ତି ଏଣୁ ସେମାନଙ୍କ ସମସ୍ୟାର ସମାଧାନ କରିବାକୁ ସେ ପ୍ରାଥମିକତା ଦେବେ।
ସେହିପରି ରାଷ୍ଟ୍ରପତି ରାଜପକ୍ଷେ କହିଛନ୍ତି ଯେ ଚିନ ଏବଂ ପାକିସ୍ତାନ ସହ ଶ୍ରୀଲଙ୍କାର ସଂପର୍କ ଦ୍ୱାରା ଭାରତ ସହିତ ରହିଥିବା ସଂପର୍କ କୁ ସେ ଖରାପ ହେବାକୁ ଦେବେନାହିଁ। ସେ ଏକଥା ମଧ୍ୟ ସ୍ୱୀକାର କରିଛନ୍ତି ଯେ ଚିନକୁ ଦିଆଯାଇଥିବା ବିବାଦୀୟ ହମ୍ୱନତୋତା ପ୍ରକଳ୍ପ ଏକ ଭୁଲ ଥିଲା। ଏଥିରୁ ପ୍ରମାଣିତ ହେଉଛି ଯେ ରାଜପକ୍ଷେ ଏକ ଖୋଲାମନରେ ଭାରତ ସହିତ ସଂପର୍କକୁ ମଜବୁତ କରିବାକୁ ଚାହୁଁଛନ୍ତି।
ଦ୍ୱିପକ୍ଷୀୟ ଆଲୋଚନା ସମୟରେ ଭାରତ ଶ୍ରୀଲଙ୍କାକୁ 450 ମିଲିୟନ ଡଲାର ଋଣ ଆକାରରେ ପ୍ରକଳ୍ପ ସହାୟତା ବାବଦରେ ଦେବ ବୋଲି କହିଛି। ଶ୍ରୀଲହ୍କା ମଧ୍ୟ ଭାରତର ସହାୟତା ଅର୍ଥକୁ ସଠିକ ଭାବେ ବିନିଯୋଗ କରିଆସିଛି। ଶ୍ରୀଲଙ୍କା ଏହା ମଧ୍ୟ ଦେଖିଆସିଛି ଯେ ବଡବଡ ପ୍ରକଳ୍ପ ପାଇଁ ନଗଦି ଋଣ ସେଠାକାର ଅର୍ଥନୀତି ପାଇଁ ମଙ୍ଗଳକର ହୋଇନି। ଯାହାର ଉଦାହରଣ ହେଉଛି ହାମ୍ୱାନତୋତା ବନ୍ଦର ପ୍ରକଳ୍ପ ଏବଂ ମାତାଲେ ଆନ୍ତର୍ଜାତୀୟ ବିମାନ ବନ୍ଦର।
ଥରେ ଦୁଇ ପକ୍ଷ ମଧ୍ୟରେ ସମସ୍ୟାର ସମାଧାନ ହୋଇଗଲେ ଉଭୟ ଭାରତ ଏବଂ ଶ୍ରୀଲଙ୍କାର ସଂପର୍କ ଅତ୍ୟନ୍ତ ସୁଦୃଢ ହୋଇଯିବ। ଶ୍ରୀ ରାଜପକ୍ଷେ କହିଛନ୍ତି ଯେ ତାଙ୍କ କାର୍ଯ୍ୟକାଳ ମଧ୍ୟରେ ଭାରତ ଏବଂ ଶ୍ରୀଲଙ୍କା ମଧ୍ୟରେ ସଂପର୍କ ସୁଦୂର ପ୍ରସାରୀ ହେଉ ବୋଲି ସେ ଚାହାନ୍ତି। କାରଣ ଦୁଇ ଦେଶ ମଧ୍ୟରେ ଐତିହାସୀକ ତଥା ରାଜନୈତିକ କ୍ଷେତ୍ରରେ ଦୀର୍ଘ ଦିନର ସଂପର୍କ ରହିଆସିଛି। ଏଥିରୁ ପ୍ରମାଣିତ ହେଉଛି ଯେ ଶ୍ରୀଲଙ୍କାର ନୂଆ ରାଷ୍ଟ୍ରପତି ଭାରତ ସହିତ ସଂପର୍କକୁ ସତେଜ କରିବାକୁ ଚାହୁଁଛନ୍ତି ଯାହାକି ଏକ ସକରାତ୍ମକ ପଦକ୍ଷେପ।
ଆଲେଖ୍ୟ: ଏମ.କେ. ଟିକୁ
ଭାଷାନ୍ତର: ରାମଚଂଦ୍ର ନାଥ
Comments
Post a Comment