ଭାରତ ଓ ଓମାନ ମଧ୍ୟରେ ସାମରିକ ସମ୍ପର୍କ ବୃଦ୍ଧି

ଓମାନ ତାଠାରୁ ବଡ ଓ ପଡୋଶୀ ଧନୀ ରାଷ୍ଟ୍ର ଗୁଡିକ ତୁଳନାରେ ଅନ୍ତର୍ଜାତୀୟ ସ୍ତରରେ ବିଶେଷ ଦୃଷ୍ଟି ଆକର୍ଷଣ କରିପାରିନଥିଲେ ମଧ୍ୟ ପାରସ୍ୟ ଉପସାଗର ପ୍ରବେଶ ପଥରେ ଥିବା ଏହି ଦେଶ ଭାରତର ପରିବର୍ଦ୍ଧିତ ସାମରିକ ଗୁରୁତ୍ୱପୂର୍ଣ୍ଣ ପଡୋଶୀ ରାଷ୍ଟ୍ର ଭାବେ ବିବେଚନା କରାଯାଉଛି | ଏହି ଦେଶ ଆଭ୍ୟନ୍ତରୀଣ ବିଶ୍ରୂଙ୍ଖଳା ଭିତରେ ବୁଡି ରହିଥିଲା ଏବଂ ଦୀର୍ଘ ସମୟ ପର୍ଯ୍ୟନ୍ତ ଅର୍ଥନୈତିକ ବିକାଶ କ୍ଷେତ୍ରରେ ପଛରେ ପଡିଥିବା ବେଳେ ସୁଲତାନ କ୍ଵାବୁସଙ୍କ ନେତୃତ୍ଵ ଅଧୀନରେ ଗୁରୁତ୍ୱପୂର୍ଣ୍ଣ ପ୍ରଗତି ହାସଲ କରିଛି | 1970 ଦଶକରେ ସେ ଦେଶର ସୁଲତାନ ତୈଳ ସମ୍ପଦ ଜରିଆରେ ଦେଶର ଆର୍ଥିକ ପ୍ରଗତିକୁ ଉପରକୁ ଉଠାଇବା ସଙ୍ଗେ ସଙ୍ଗେ ସେ ଦେଶକୁ ସମୃଦ୍ଧ କରିବାକୁ ସକ୍ଷମ ହୋଇଥିଲେ | ସୁଲତାନ କ୍ଵାବୁସଙ୍କ ଅଧିନରେ ଓମାନ ପଡୋଶୀ ରାଷ୍ଟ୍ର ଗୁଡିକ ସହ ସମ୍ପର୍କରେ ସମତୁଲତା ରକ୍ଷା କରିବା ସହ ବିଖଣ୍ଡିତ ଉପସାଗର ଅଞ୍ଚଳରେ ପଡୋଶୀ ରାଷ୍ଟ୍ର ଗୁଡିକର ଭୂମିକାକୁ ପ୍ରାଧାନ୍ୟ ଦେଇଥିଲେ | ଆଞ୍ଚଳିକ ଉତ୍ତେଜନା ହ୍ରାସ ଏବଂ ବିବାଦୀୟ ସମସ୍ଯା ଗୁଡିକର ସମାଧାନ କରିବା କ୍ଷେତ୍ରରେ ନେପଥ୍ୟରେ କୂଟନୈତିକ ଭୂମିକା ପାଇଁ ଓମାନକୁ ନିଶ୍ଚିତ ଭାବେ ପ୍ରାଧାନ୍ୟ ଦିଆଯିବ |

ଭାରତ ଓମାନକୁ ଏକ ଗୁରୁତ୍ୱପୂର୍ଣ୍ଣ ରାଷ୍ଟ୍ର ଭାବେ ସ୍ବୀକୃତି ଦେଉଛି ଏବଂ ଗତ କେଇ ଦଶନ୍ଧି ହେଲା ସେ ଦେଶ ସହ ମଜବୁତ ଦ୍ଵିପକ୍ଷୀୟ ସମ୍ପର୍କ ସ୍ଥାପନ କରିଛି | ଓମାନ ସହ ରାଜନୈତିକ, କୂଟନୈତିକ ଓ ବାଣିଜ୍ୟିକ ଏବଂ ସାମରିକ ସମ୍ପର୍କକୁ ଭାରତ ପ୍ରାଧାନ୍ୟ ଦେଉଛି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ଵାଧୀନରେ ଉପସାଗରୀୟ ଦେଶ ଗୁଡିକ ସହ ରାଜନୈତିକ ଓ କୂଟନୈତିକ ସମ୍ପର୍କ ସ୍ଥାପନ ଲାଗି ଗୁରୁତ୍ଵ ଦିଆଯାଉଛି | 2014 ମସିହା ଜୁନ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦାୟିତ୍ଵ ଗ୍ରହଣ କରିବା ପରେ ଓମାନର ବୈଦେଶିକ ମନ୍ତ୍ରୀ ଯୁସୁଫ ବିନ ଆଲାୱି ତାଙ୍କୁ ସାକ୍ଷାତ କରିବାରେ ପ୍ରଥମ ବିଦେଶୀ ପ୍ରତିନିଧି ଥିଲେ| 2015 ଫେବୃୟାରି ମାସରେ ସୁଷମା ସ୍ଵରାଜ ସେ ଦେଶ ଗସ୍ତରେ ଯାଇଥିବା ବେଳେ 2016 ମେ ମାସରେ ତତକାଳିନ ପ୍ରତିରକ୍ଷା ମନ୍ତ୍ରୀ ସ୍ଵର୍ଗତ ମନୋହର ପାରିକର ମଧ୍ୟ ସେ ଦେଶ ଗସ୍ତରେ ଯାଇଥିଲେ |

ଓମାନ ସହ ଦ୍ଵିପକ୍ଷୀୟ ସମ୍ପର୍କକୁ ଆହୁରି ବୃଦ୍ଧି କରିବା ପାଇଁ 2018 ଫେବୃୟାରୀ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମସକଟ ଯାଇଥିଲେ ସେଠାରେ ସେ ସୁଲତାନ କ୍ଵାବୁସଙ୍କୁ ସାକ୍ଷାତ କରିଥିଲେ | ଉଭୟ ନେତାଙ୍କ ମଧ୍ୟରେ ଆପୋଷ ସ୍ଵାର୍ଥ ବିଜଡିତ ବିଭିନ୍ନ ଗୁରୁତ୍ୱପୂର୍ଣ୍ଣ ଦ୍ଵିପକ୍ଷୀୟ, ଆଞ୍ଚଳିକ ଓ ଆନ୍ତର୍ଜାତୀୟ ପ୍ରସଙ୍ଗ ଗୁଡିକ ଉପରେ ଆଲୋଚନା ହୋଇଥିଲା | ବାଣିଜ୍ୟ ଓ ପୁଞ୍ଜି ନିବେଶ ଜରିଆରେ ବ୍ୟବସାୟିକ ସମ୍ପର୍କରେ ଉନ୍ନତି ଆଣିବା ଏବଂ ଉଭୟ ଦେଶ ସମ୍ମୁଖୀନ ହେଉଥିବା ସାନ୍ତ୍ରାସବାଦ ଓ ଉଗ୍ରବାଦର ମୁକାବିଲା କରିବା ପାଇଁ ନିରାପତ୍ତା ସମ୍ପର୍କକୁ ମଜବୁତ କରିବା ପାଇଁ ଉଭୟ ନେତାଙ୍କ ମଧ୍ୟରେ ବିଶେଷ ଭାବେ ଆଲୋଚନା ହୋଇଥିଲା | ସାମୁଦ୍ରିକ ନିରାପତ୍ତା କ୍ଷେତ୍ରରେ ମିଳିମିଶି କାମ କରିବାକୁ ଉଭୟ ଦେଶ ସହମତ ହୋଇଥିଲେ ଏବଂ ଭାରତ ମହାସାଗରରେ ପହରା ଦେଉଥିବା ଭାରତୀୟ ନୌଯୁଦ୍ଧ ଗୁଡିକର ରକ୍ଷଣାବେକ୍ଷଣ ପାଇଁ ଡୁକାମ ବନ୍ଦରକୁ ବ୍ୟବହାର ସଙ୍କ୍ରାନ୍ତ ପ୍ରତିରକ୍ଷା ବୁଝାମଣା ପତ୍ରରେ ସ୍ଵାକ୍ଷର କରିବା ପାଇଁ ଉଭୟ ପକ୍ଷ ରାଜି ହୋଇଥିଲେ |

ଦୁଇ ଦେଶ ମଧ୍ୟରେ ଭାଗିଦାରି ସମ୍ପର୍କ ବୃଦ୍ଧି ପାଉଥିବା ବେଳେ ଚଳିତ ସପ୍ତାହରେ ବୈଦେଶିକ ବ୍ୟାପାର ମନ୍ତ୍ରୀ ଡଃ ଏସ ଜୟଶଙ୍କର ଓମାନ ଗସ୍ତରେ ଯାଇଥିଲେ | ଏହି ଗସ୍ତ କାଳରେ ଅନ୍ୟାନ୍ୟ ନେତା ମାନଙ୍କ ସହ ଶ୍ରୀ ଜୟଶଙ୍କର ଓମାନ ପ୍ରତିପକ୍ଷ ୟୁସୁଫ ବିନ ଅଲାୱିଙ୍କୁ ସାକ୍ଷାତ କରି ଆପୋଷ ସ୍ଵାର୍ଥ ସମ୍ପର୍କିତ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଗୁଡିକ ଉପରେ ଆଲୋଚନା କରିଥିଲେ | ନୌ ପରିବହନ ସହଯୋଗ ସଙ୍କ୍ରାନ୍ତ ଏକ ରାଜିନାମାରେ ଉଭୟ ପକ୍ଷ ସ୍ଵାକ୍ଷର କରିଥିଲେ | ମସକାଟ ରେ ରହୁଥିବା ଭାରରତୀୟ ମାନଙ୍କ ସହ ମଧ୍ୟ ଶ୍ରୀ ଜୟଶଙ୍କର ଭାବ ବିନିମୟ କରିଥିଲେ | ପାଖାପାଖି 7 ଲକ୍ଷ 80 ହଜାର ଭାରତୀୟ ସେ ଦେଶର ଆର୍ଥିକ ବିକାଶ କ୍ଷେତ୍ରରେ ବିଶେଷ ଅବଦାନ ରଖିଛନ୍ତି |

ଭାରତ ହେଉଛି ଓମାନର ଏକ ଗୁରୁତ୍ୱପୂର୍ଣ୍ଣ ବ୍ୟବସାୟିକ ଭାଗୀଦାରି ରାଷ୍ଟ୍ର | 2018-19 ବର୍ଷରେ ଦୁଇ ଦେଶ ମଧ୍ୟରେ ବ୍ୟବସାୟ 5 ବିଲିୟନ ଆମେରିକୀୟ ଡଲାରରେ ପହଞ୍ଚିଥିଲା | ଭରତ, ଓମାନ ରୁ ମୁଖ୍ଯତଃ ଶକ୍ତି ଓ ସାର ଆମଦାନୀ କରିଥାଏ |

ଉପସାଗରରେ ଓମାନକୁ ଭାରତ ଏକ ଗୁରୁତ୍ୱପୂର୍ଣ୍ଣ ସାମରିକ ଭାଗୀଦାରୀ ରାଷ୍ଟ୍ର ବୋଲି ବିବେଚନା କରୁଛି ଏବଂ ଡଃ ଜୟଶଙ୍କରଙ୍କ ସେ ଦେଶକୁ ଗସ୍ତ ଦ୍ଵାରା ସେ ଦେଶର ରାଜନୈତିକ ନେତୃତ୍ଵ ସହ ଦ୍ଵିପକ୍ଷୀୟ ଓ ଆଞ୍ଚଳିକ ତଥା ବିଶ୍ଵ ସ୍ତରୀୟ କଥାବାର୍ତ୍ତା ଯୋଗୁଁ ସେହି ଦେଶ ସହ ଓ ସେହି ଅଞ୍ଚଳରେ ଭାରତର ପ୍ରଭାବ ବୃଦ୍ଧି ପାଇଛି | ଏହି ଉଚ୍ଚ ସ୍ତରୀୟ ଗସ୍ତ ଯୋଗୁଁ ଭାରତର କୂଟନୈତିକ ଓ ରାଜନୈତିକ ପହଞ୍ଚ ଆହୁରି ସମ୍ପ୍ରସାରିତ ହୋଇଛି ଏବଂ ଉପସାଗର ଅଞ୍ଚଳରେ ଭାରତର ପ୍ରଭାବ ବିସ୍ତାର ଲକ୍ଷ୍ୟ ସଫଳ ହୋଇଛି |

ଭାରତର ବୈଦେଶିକ ମନ୍ତ୍ରୀଙ୍କ ଏହି ଗସ୍ତ ଦୁଇ ଦେଶ ମଧ୍ୟରେ ରାଜନୈତିକ ଓ କୂଟନୈତିକ ସ୍ତରରେ ଉପସାଗର ଅଞ୍ଚଳରେ ସମ୍ପର୍କ ବିସ୍ତାର ପ୍ରସଙ୍ଗ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି |

ମୂଳଲେଖା : ଡଃ ମହମ୍ମଦ ମୁଦ୍ଦାଶିର କ୍ଵାମର, ପଶ୍ଚିମ ଏସିଆ ଉପରେ ସାମରିକ ବିଶ୍ଳେଷକ

ଅନୁବାଦ : ଜଗନ୍ନାଥ ମଲ୍ଲିକ, ରୀତା ଯୋଶୀ