ଏଭରେଷ୍ଟ ଶୃଙ୍ଗ ଆରୋହଣ ପାଇଁ ନେପାଳ ନିୟମ କଡାକଡି କରିବ

ନେପାଳରେ 8,848 ମିଟର ଉଚ୍ଚତା ବିଶିଷ୍ଟ ବିଶ୍ଵର ସର୍ବୋଚ୍ଚ ଶୃଙ୍ଗ ମାଉଣ୍ଟ ଏଭରେଷ୍ଟରୁ ପ୍ରତି ବର୍ଷ ପର୍ବତାରୋହଣରୁ ଭଲ ରାଜସ୍ୱ ଆଦାୟ କରାଯାଉଛି | ତେବେ ଚଳିତ ବର୍ଷ ମେ ମାସରେ 11 ଜଣଙ୍କ ଜୀବନହାନି ଘଟିଥିବା ଯୋଗୁଁ ଏହା ଉଦବେଗର କାରଣ ହୋଇପଡିଛି | ସମଗ୍ର ହିମାଳୟ ପାଦଦେଶରେ 2015 ମସିହା ଅପ୍ରେଲ 25 ତାରିଖରେ ଏକ ଉଚ୍ଚ ତୀବ୍ରତା ବିଶିଷ୍ଟ ଭୂମିକମ୍ପ ଅନୁଭୂତ ହୋଇଥିବା ଯୋଗୁଁ 22 ଜଣଙ୍କ ପ୍ରାଣହାନୀ ଘଟିଥିଲା | ଏବର୍ଷ 800 ପର୍ବତାରୋହୀ ଏଭରେଷ୍ଟ ଶୃଙ୍ଗରେ ପହଞ୍ଚିବା ପାଇଁ ଚେଷ୍ଟା କରିଥିଲେ ଏବଂ 8,000 ମିଟର ଉପରେ ଅବସ୍ଥିତ ମୃତ୍ୟୁର ଇଲାକା ବୋଲି କୁହାଯାଉଥିବା ସ୍ଥାନରେ ଘଣ୍ଟା ଘଣ୍ଟା ଧରି ଲାଇନରେ ଛିଡା ହୋଇଥିଲେ | ଅଳ୍ପ ସମୟ ପାଇଁ ପାଣିପାଗ ଭଲ ଥିବା ବେଳେ ସମସ୍ତେ ଶୃଙ୍ଗରେ ପହଞ୍ଚିବା ପାଇଁ ଚେଷ୍ଟା କରିଥିଲେ | ଅତ୍ୟନ୍ତ ହାଲିଆ ହୋଇପଡିଥିବାରୁ ଏବଂ ଅତି ଉଚ୍ଚରେ ରହିଥିବା ଯୋଗୁଁ ଅସୁସ୍ଥ ହୋଇଥିବାରୁ ସେମାନଙ୍କ ମୃତ୍ୟୁ ହୋଇଥିବାର ଖବର ମିଳିଛି | ସରକାରଙ୍କ କହିବାନୁଯାୟୀ ଚଳିତ ବର୍ଷ ମେ ମାସ 22 ତାରିଖରେ ଗୋଟିଏ ଦିନରେ 223 ପର୍ବତାରୋହୀ ପହଞ୍ଚିଥିଲେ ଯାହାକି 2016ରେ 204 ଜଣ ପର୍ବତାରୋହୀ ଏଭରେଷ୍ଟ ଶୃଙ୍ଗରେ ପହଞ୍ଚିବା ରେକର୍ଡକୁ ଭାଙ୍ଗି ଥିଲା|.

ପ୍ରତିବର୍ଷ ପର୍ବତାରୋହଣ ଋତୁରେ ବହୁ ସଂଖ୍ୟକ ପର୍ବତାରୋହୀଙ୍କ ଭିଡକୁ ଦେଖି ନେପାଳ ସରକାର କଡା ନିୟମାବଳୀ ପ୍ରବର୍ତ୍ତନ କରିବାକୁ ଚାହୁଁଛନ୍ତି | ଚଳିତ ବର୍ଷ ସର୍ବାଧିକ 381 ଜଣ ପର୍ବତାରୋହୀଙ୍କୁ ଅନୁମତି ଦିଆଯାଇଥିବାରୁ ପ୍ରବଳ ଭିଡ ଦେଖିବାକୁ ମିଳିଥିଲା | .

ବିଶେଷଜ୍ଞ କମିଟିର ରିପୋର୍ଟ ଆଧାରରେ କେତେକ ନୂଆଁ ନିୟମ ଓ ଆଇନ ପ୍ରସ୍ତୁତ କରାଯାଇଛି ଯାହାକୁ 2020 ପର୍ବତାରୋହଣ ଋତୁରେ କାର୍ଯ୍ୟକାରୀ କରିବାକୁ ସରକାର ଯୋଜନା କରିଛନ୍ତି | ଏହି ନିୟମ ଅନୁଯାୟୀ ନେପାଳରେ 6,500 ମିଟର ପର୍ଯ୍ୟନ୍ତ ପର୍ବତାରୋହଣ କରିଥିବା ଓ ସେମାନଙ୍କୁ 11,000 ଡଲାର ଫି ଦେଇଥିବାର ଏକ ପ୍ରମାଣ ଦାଖଲ କରିବାକୁ ପଡିବ ଓ ଏଥିସହିତ ସେମାନଙ୍କ ଉତ୍ତମ ସ୍ୱାସ୍ଥ୍ୟ ରହିଥିବା ନେଇ ପ୍ରମାଣ ପତ୍ର ମଧ୍ୟ ଦେବାକୁ ପଡିବ | ମୂଳ ଶିବିରରେ ବାଧ୍ୟତା ମୂଳକ ଭାବେ ସ୍ୱାସ୍ଥ୍ୟ ଯାଞ୍ଚ ଲାଗି ମଧ୍ୟ ନେପାଳ ସରକାର ବିବେଚନା କରୁଛନ୍ତି | ସବୁ ପର୍ବତାରୋହୀ ମାନଙ୍କୁ ବାଧ୍ୟତାମୂଳକ ଭାବେ ବୀମା କରିବାକୁ ପଡିବ | ଜୀବନ ବୀମା ବ୍ୟତିରେକ ଯଦି କୌଣସି ପର୍ବତାରୋହୀ ପାହାଡ ଉଚ୍ଚରେ ରହିଯାଇଥାନ୍ତି ତାହେଲେ ସେମାନଙ୍କୁ ଖୋଜିବା, ଉଦ୍ଧାର କରିବା ଓ ଚିକିତ୍ସା ବୀମା ମଧ୍ୟ ଏଥିରେ ସାମିଲ ହେବାର ଆବଶ୍ୟକତା ରହିଛି | ପର୍ବତାରୋହଣ ଲାଗି ଗାଇଡ ମାନଙ୍କ ତିନି ବର୍ଷର ଅଭିଜ୍ଞତା ଥିବା ଅନିବାର୍ଯ୍ୟ |

ବର୍ତ୍ତମାନର ନିୟମାନୁଯାୟୀ ଏଭରେଷ୍ଟ ଶୃଙ୍ଗ ଆରୋହଣକାରୀ ମାନଙ୍କୁ ଏକ ପାସପୋର୍ଟ ର ନକଲ, ସୀମିତ ଶାରୀରିକ ସୂଚୀ ତଥା ସ୍ୱାସ୍ଥ୍ୟ ପ୍ରମାଣ ପତ୍ର ଦେବାକୁ ପଡିଥାଏ | ବିଶେଷଜ୍ଞ କମିଟି ଏକଥା ମଧ୍ୟ କହିଛନ୍ତି ଯେ ପର୍ବତାରୋହଣ ପାଇଁ ଆୟୋଜନକାରୀ କମ୍ପାନୀ ଗୁଡିକୁ 35 ହଜାର ଡଲାର ଫି ଦେବାକୁ ପଡିବ ଏବଂ 8,000 ଉପରକୁ ଚଢିବା କ୍ଷେତ୍ରରେ 20, 000 ଡଲାର ଫି ଦେବାକୁ ପଡିବ | ଭିଡ କମାଇବା ପାଇଁ ନେପାଳ ସରକାର ଆରୋହଣକାରୀ ମାନଙ୍କୁ ଅନୁମତି ପତ୍ର ସଂଖ୍ୟା କମ କରିବା ପାଇଁ ଚିନ୍ତା କରୁଛନ୍ତି କିନ୍ତୁ ଏହା ଦ୍ଵାରା ରାଜସ୍ୱ ହାନି ହେବା ବିଷୟକୁ ମଧ୍ୟ ବିବେଚନା କରାଯାଉଛି |

1953 ମସିହାରେ ଏଡମଣ୍ଡ ହିଲାରୀ ଓ ତେନଜିଙ୍ଗ ନୋରଗେ ପ୍ରଥମ ଆରୋହି ଭାବେ ଏଭରେଷ୍ଟ ଶୃଙ୍ଗ ଆରୋହଣରେ ସଫଳତା ହାସଲ କରିବା ପରେ ଆରୋହଣକାରୀ ମାନଙ୍କ ସଂଖ୍ୟା ବୃଦ୍ଧି ପାଇଛି ଓ 1990 ପରେ ଏହା ଅଧିକ ମାତ୍ରାରେ ବୃଦ୍ଧି ପାଇଛି | ଏତେ ସଂଖ୍ୟକ ଆରୋହି ମାନଙ୍କ ଭିଡ ଯୋଗୁଁ ମଳମୁତ୍ର ତ୍ୟାଗ ସମେତ ବଳକା ଖାଦ୍ୟ, ଚିରା ତମ୍ବୁ , ଦଉଡି, ବ୍ୟବହୃତ ଅକ୍ସିଜନ ସିଲିଣ୍ଡର, ନିଶୁଣି, ପ୍ଲାଷ୍ଟିକ ବୋତଲ ଓ କେନ ଆଦି ଏଭରେଷ୍ଟ ଶୃଙ୍ଗର ସ୍ଲୋପ ଗୁଡିକରେ ପଡି ରହୁଛି | ଚଳିତ ବର୍ଷ ନେପାଳ ସରକାରଙ୍କ ପକ୍ଷରୁ 11 ଟନର ମଇଳା ଓ ଚାରୋଟି ମୃତ ଦେହକୁ ବାହାର କରାଯାଇଛି |

ବିଶ୍ଵ ତାପମାନ ବୃଦ୍ଧି ଯୋଗୁଁ ବହୁ ପରିମାଣରେ ବରଫ ତରଳୁ ଥିବାରୁ ବରଫ ଅତଡା ଓ ମାଟି ଅତଡା ଖସିବା ସାଙ୍ଗକୁ ବିଶ୍ଵର ବିଭିନ୍ନ ଅଞ୍ଚଳରେ ବନ୍ୟା ବିପତ୍ତି ବୃଦ୍ଧି ପାଉଥିବା ସାଙ୍ଗକୁ ଆନ୍ତର୍ଜାତୀୟ ସମୁଦାୟ ଉଦବବେଗ ପ୍ରକାଶ କରିଛି | ଏକ ଅଧ୍ୟୟନରୁ ଜଣାପଡିଛି ଭାରତ, ନେପାଳ ଓ ବଙ୍ଗଳାଦେଶ ସମେତ ଆଫଗାନିସ୍ତାନରୁ ମିଆଁମାର ପର୍ଯ୍ୟନ୍ତ ହିମାଳୟର ଅତିକମରେ ଏକ ତୃତୀୟାନ୍ସ ବରଫ ଚଳିତ ଶତାବ୍ଦୀ ଶେଷ ସୁଦ୍ଧା ତରଳି ଯିବ ବୋଲି ବୈଜ୍ଞାନିକ ମାନେ ସତର୍କ କରାଇଛନ୍ତି |

ଏଭରେଷ୍ଟ ପର୍ବତାରୋହଣ ଲାଗି ନେପାଳର ପଦକ୍ଷେପ ପ୍ରତି ଭାରତ ସ୍ଵାଗତ ଜଣାଇଛି | ହିମାଳୟ ପରିବେଶ ହ୍ରାସ ପାଇଁ ଭାରତ ପଦକ୍ଷେପ ନେଉଥିବାରୁ ଏଭଳି ଘଟଣାବଳୀ ପାଇଁ ନୂଆଦିଲ୍ଲୀ ବାସ୍ତବିକ ଭାବେ ଚିନ୍ତିତ ହେବ ସେଥିରେ ତିଳେ ମାତ୍ର ସନ୍ଦେହ ନାହିଁ| ଭାରତ ଜଳବାୟୁ ସଂକ୍ରାନ୍ତ ଜାତୀୟ କାର୍ଯ୍ୟାନୁଷ୍ଠାନ ଯୋଜନା ଏବଂ ହିମାଳୟ ପରିବେଶ ରକ୍ଷା ପାଇଁ ଜାତୀୟ ମିଶନକୁ କାର୍ଯ୍ୟକାରୀ କରୁଛି | ସିକିମ, ମେଘାଳୟ, ନାଗାଲାଣ୍ଡ ଓ ଉତ୍ତରାଖଣ୍ଡ ସମେତ ହିମାଳୟ ପାଦଦେଶରେ ଥିବା 12 ଟି ରାଜ୍ୟରେ ଗତ ବର୍ଷ ଦେଢ ହଜାର ସ୍ଥାନରେ ହିମାଳୟ ପରିଷ୍କାର କାର୍ଯ୍ୟକୁ କାର୍ଯ୍ୟକାରୀ କରାଯାଇଥିଲା |

ମୂଳ ଲେଖା : ରତ୍ତନ ସାଲଦି, ରାଜନୈତିକ ଭାଷ୍ୟକାର

ଅନୁବାଦ : ରୀତା ଯୋଶୀ