ବିଜ୍ଞାନ ସାଧାରଣତଃ ପ୍ରୟୋଗଶାଳା ମଧ୍ୟରେ ଆବଦ୍ଧ ରହିଥାଏ କିନ୍ତୁ ଭାରତରେ ଏବେ ଏହା ସାମାଜିକ କ୍ଷେତ୍ରରେ ପ୍ରାସଙ୍ଗିକତା ହୋଇ ଦେଶର ବିକାଶ କ୍ଷେତ୍ରରେ ସହାୟକ ହେବା ଦିଗରେ ଆଗେଇଛି | ନିକଟରେ ସଂପନ୍ନ ହୋଇଥିବା 107ତମ ଭାରତୀୟ ବିଜ୍ଞାନ କଂଗ୍ରେସରେ ଭାରତର ଜାତୀୟ ନେତାମାନେ ବିଜ୍ଞାନକୁ ପ୍ରୟୋଗଶାଳା ଏବଂ କାର୍ଯ୍ୟକ୍ଷେତ୍ର ମଧ୍ୟରେ ରହିଥିବା ତାରତମ୍ୟକୁ ଦୂର କରିବାରେ ସେତୁ ସାବ୍ୟସ୍ତ କରିବାକୁ ଆହ୍ଵାନ ଦେଇଛନ୍ତି |
ଚଳିତ ବର୍ଷ ଭାରତୀୟ ବିଜ୍ଞାନ କଂଗ୍ରେସର ବିଷୟବସ୍ତୁ ଥିଲା ବିଜ୍ଞାନ ଏବଂ ଜ୍ଞାନ କୌଶଳ ଓ ଗ୍ରାମାଞ୍ଚଳ ବିକାଶ | ଜ୍ଞାନକୌଶଳ ସରକାର ଏବଂ ସାଧାରଣ ଲୋକମାନଙ୍କ ମଧ୍ଯରେ ଏକ ସେତୁବଦ୍ଧ | ଜ୍ଞାନକୌଶଳ ହେଉଛି ଦ୍ରୁତ ବିକାଶ ଏବଂ ପ୍ରକୃତ ବିକାଶ ମଧ୍ୟରେ ଭାରସାମ୍ୟ ରକ୍ଷା କରିଥାଏ | ଜ୍ଞାନକୌଶଳର କୌଣସି ପାତର ଅନ୍ତର ନଥାଏ କିମ୍ଵା କୌଣସି ପକ୍ଷଭକ୍ତ ହୋଇନଥାଏ ବରଂ ଏହା ସ୍ଵାଭାବିକ ହୋଇଥାଏ | ବେଙ୍ଗାଲୁରୁରେ ଭାରତୀୟ ବିଜ୍ଞାନ କଂଗ୍ରେସକୁ ଉଦଘାଟନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ଜ୍ଞାନକୌଶଳ ଯେତେବେଳେ ମାନବୀୟ ସମ୍ଵେଦନଶୀଳତା ଏବଂ ଆଧୁନିକ ଜ୍ଞାନକୌଶଳ ମଧ୍ୟରେ ସମନ୍ଵୟ ସ୍ଥାପନ କରେ ସେତେବେଳେ ଅଦ୍ଭୁତପୂର୍ବ ଫଳ ମିଳିଥାଏ |
ଜଳବାୟୁ ପରିବର୍ତ୍ତନ ଏବଂ ବିଶ୍ଵ ତାପମାନ ଯୋଗୁଁ ବିଶ୍ଵର ଅସ୍ତିତ୍ଵ ସଂକଟରେ | ଅଷ୍ଟ୍ରେଲିଆ ଏବଂ ଆମାଜନ ଜଙ୍ଗଲରେ ହୋଇଥିବା ବ୍ୟାପକ ଅଗ୍ନୀକାଣ୍ତ ମଣିଷର ଦାୟିତ୍ଵହୀନତା ବୋଲି କୁହାଯାଉଥିଲେ ମଧ୍ୟ ବୈଜ୍ଞାନିକମାନେ ଏହାକୁ ଜଳବାୟୁ ପରିବର୍ତ୍ତନର ସ୍ପଷ୍ଟ ଇଙ୍ଗିତ ବୋଲି କହିଛନ୍ତି |
ଆମେ ବନ୍ୟା ବାତ୍ୟା ମରୁଡ଼ି ଏବଂ ଅଗ୍ନୀକାଣ୍ତ ପରି ପ୍ରକୃତିର କରାଳ ରୂପ ଦେଖିଛନ୍ତି | ଏଣୁ ଆମ ସମସ୍ତଙ୍କୁ ଜଳବାୟୁ ପରିବର୍ତ୍ତନର ସମାଧାନ ଖୋଜିବା ଆବଶ୍ୟକ ବୋଲି ଉପ ରାଷ୍ଟ୍ରପତି ଏମ. ଭେଙ୍କିଯା ନାଇଡୁ ବିଜ୍ଞାନ କଂଗ୍ରେସର ଉଦଯାପନୀ ଉତ୍ସବରେ ଅଭିଭାଷଣ ଦେଇ କହିଛନ୍ତି |
ବିଶ୍ଵରେ ଯେପରି ଦୁର୍ବିପାକ ଦେଖାଦେଉଛି ସେନେଇ ଭାରତ କେବେ ନିରବ ରହିପାରିବ ନାହିଁ | ବିଜ୍ଞାନ ଏବଂ ବିଶ୍ଵ ବିଭିନ୍ନ ଭାବରେ ପରସ୍ପର ସହ ସଂଯୁକ୍ତ ଏବଂ ଜଳବାୟୁ ପରିବର୍ତ୍ତନକୁ ଆଉ ଅଣଦେଖା କରିହେବନି | କାରଣ ଏହା ଏବେ ଦ୍ଵାର ଦେଶରେ ପହଞ୍ଚି ସାରିଛି ବୋଲି ଉପ ରାଷ୍ଟ୍ରପତି କହିଛନ୍ତି |
ଭାରତ ଭଳି ଏକ ବିଶାଳ ଦେଶର ବିକାଶ ଲକ୍ଷ୍ୟକୁ ଧାନ୍ୟରେ ରଖି ଏବଂ ପରିବେଶର ସୁରକ୍ଷା ପାଇଁ ସମାଧାନ ବିହାର କରିବାକୁ ବୈଜ୍ଞାନିକମାନେ ଏକତ୍ର ଆଗେଇ ଆସିବାର ଆବଶ୍ୟକତା ରହିଛି | ଭାରତରେ ଅନେକ ଜାତୀୟ ପ୍ରସଙ୍ଗ ରହିଛି ଯାହା ପ୍ରତି ତୁରନ୍ତ ବୈଜ୍ଞାନିକମାନଙ୍କର ଧ୍ୟାନ ଦେବା ଆବଶ୍ୟକ ତେଣିକି ତାହା କୃଷି ହେଉ କିମ୍ଵା ସ୍ଵାସ୍ଥ୍ୟ ସେବା | କୃଷି ସଂକଟ ଦୂର କରିବାର ତୁରନ୍ତ ଆବଶ୍ୟକତା ରହିଛି |
ଜ୍ଞାନକୌଶଳ ଦ୍ଵାରା ସାମାଜିକ ଯୋଜନା, କୃଷି ପଦ୍ଧତି ଏବଂ ସ୍ଵାସ୍ଥ୍ଯସେବାର ଉନ୍ନତିକରଣ ହୋଇଛି କିନ୍ତୁ ଏହାର ସୁଫଳ ଗରିବରୁ ଗରିବ ଲୋକ ତଥା ଅଗମ୍ୟ ଅଞ୍ଛଳ ଯାଏଁ ପହଞ୍ଚିବା ଦରକାର | ଏହାହିଁ ହେଉଛି ପ୍ରଶାସକ ଏବଂ ବୈଜ୍ଞାନିକମାନଙ୍କ ପାଇଁ ଚ୍ୟାଲେଞ୍ଜ | ଶ୍ରୀ ନାଇଡୁ କହିଛନ୍ତି ଗବେଷଣା ନିବନ୍ଧଗୁଡିକ ପ୍ରକୃତରେ ମାନବ ଜାତିର କଲ୍ୟାଣରେ ଲାଗୁଛି କି ନାହିଁ ତାହା ଅନୁଧ୍ୟାନ କରାଯିବା ଦରକାର |
ଭାରତର ବୈଜ୍ଞାନିକମାନେ ବିଶ୍ଵରେ ଏକ ସ୍ଵତନ୍ତ୍ର ପରିଚୟ ସୃଷ୍ଟି କରିଛନ୍ତି | ସେମାନଙ୍କ ମଧ୍ୟରୁ ସି.ଭି. ରମଣ, ମେଘନାଦ ଶାହ, ଶ୍ରୀନିବାସ ରାମାନୁଜନ, ହୋମି ଜେ. ଭାବା ଏବଂ ଜଗଦୀଶ ଚନ୍ଦ୍ର ବୋଷ ଆଦି ଅନେକ | ଆମର ମୌଳିକ ସମସ୍ୟାର ଦୂରିକରଣରେ ବିଜ୍ଞାନ ଏବଂ ଜ୍ଞାନକୌଶଳ ଯେପରି ସହାୟକ ହେବ ସେନେଇ କାର୍ଯ୍ୟ କରିବାକୁ ପ୍ରଧାନମନ୍ତ୍ରୀ ବୈଜ୍ଞାନିକମାନଙ୍କୁ ଆହ୍ଵାନ ଦେଇଛନ୍ତି |
ଆଲେଖ୍ୟ: ଏନ. ଭଦ୍ରନ ନାୟର
ଭାବାନୁବାଦ: ରାମଚଂଦ୍ର ନାଥ
Comments
Post a Comment