ସଂସଦର ଉଭୟ ସଭାଗୃହ, ଲୋକସଭା ଓ ରାଜ୍ୟସଭାର ମିଳିତ ଅଧିବେଶନରେ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଭିଭାଷଣ ସହ ପାର୍ଲାମେଣ୍ଟର 2020-21 ବଜେଟ ଅଧିବେଶନ ଆରମ୍ଭ ହୋଇଛି | ଏହାପରେ ଅର୍ଥମନ୍ତ୍ରୀ ନିର୍ମଳା ସିତାରମଣ ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପନ କରିଥିଲେ | ଗୋଟିଏ ଆର୍ଥିକ ବର୍ଷରେ ଦେଶର ବିଭିନ୍ନ ମାନ୍ଦାବସ୍ଥା ତଥା ଅର୍ଥନୈତିକ ଉପଲବ୍ଧି ଗୁଡିକୁ ଦୃଷ୍ଟିରେ ରଖି ଏହି ଅର୍ଥନୈତିକ ସର୍ବେକ୍ଷଣ ରିପୋର୍ଟ ପ୍ରସ୍ତୁତ କରାଯାଇଛି | ନିକଟ କିଛି ମାସ ମଧ୍ୟରେ ଭାରତୀୟ ଆର୍ଥିକ ମାନ୍ଦାବସ୍ଥା ଦେଇ ଗତି କରୁଥିବା ଯୋଗୁଁ ଅର୍ଥନୈତିକ ସର୍ଭେ 2020କୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି | ସଂସଦରେ ଉପସ୍ଥାପିତ 2019-20 ଅର୍ଥନୈତିକ ସର୍ଭେରେ ଚଳିତ ଆର୍ଥିକ ବର୍ଷରେ ଜିଡ଼ିପି ଅଭିବୃଦ୍ଧି ହାର 5 ପ୍ରତିଶତ ରହିବ ବୋଲି ଅନୁମାନ କରାଯାଇଥିବା ବେଳେ 2020-21ରେ ଏହା 6 ପ୍ରତିଶତରୁ 6.5 ପ୍ରତିଶତକୁ ବୃଦ୍ଧି ପାଇବ ବୋଲି ଆକଳନ କରାଯାଇଛି |
ଅର୍ଥନୈତିକ ସର୍ଭେ 2020 କହିଛି ଯେ ଆର୍ଥିକ କ୍ଷେତ୍ରରେ ଭାରତୀୟ ଅର୍ଥନୀତି ଉତ୍ତମ ପ୍ରଦର୍ଶନ କରି 3.3 ପ୍ରତିଶତରେ ସୀମିତ ରହିଥିବା ବେଳେ ମୁଦ୍ରାସ୍ଫୀତି ହାର ନିୟନ୍ତ୍ରଣାଧୀନ ରହି ଖୁଚୁରା ମୁଦ୍ରାସ୍ଫୀତି (ସିପିଆଇ) 4.1 ପ୍ରତିଶତ ଓ ପାଇକାରୀ ମୁଦ୍ରାସ୍ଫୀତି (ଡବ୍ଲ୍ୟୁପିଆଇ) 1.9 ପ୍ରତିଶତ ରହିଛି | ଏହା ବ୍ୟତୀତ ଦେଶର ଅର୍ଥ ପଇଠ ସନ୍ତୁଳନ (ବିଓପି) ଭଲ ସ୍ଥିତିରେ ରହିଛି କାରଣ ଆମଦାନୀ ହ୍ରାସ,ଏଫଡ଼ିଆଇ ଓ ଏଫଆଇଆଇର ନିବେଶ ବୃଦ୍ଧି ତଥା 1.75 କୋଟି ପ୍ରବାସୀ ଭାରତୀୟ ମାନଙ୍କଠାରୁ ଅର୍ଥ ପ୍ରାପ୍ତ ହୋଇଛି | ଚଳିତ ବର୍ଷର ପ୍ରଥମାର୍ଦ୍ଧରେ ବିଦେଶରୁ ଭାରତକୁ 38.4 ବିଲିଅନ ଡଲାର ଅର୍ଥ ପ୍ରେରଣ ହୋଇଛି | ସର୍ଭେ ଅନୁଯାୟୀ ଚଳିତ ବର୍ଷ ଜାନୁଆରୀ 10 ତାରିଖ ସୁଦ୍ଧା ବୈଦେଶିକ ମୁଦ୍ରା ଭଣ୍ଡାର 461 .2 ବିଲିଅନ ଡଲାର ରେ ପହଞ୍ଚିଛି |
ଏହି ସର୍ଭେରେ ଭାରତୀୟ ଅର୍ଥନୀତି ନେଇ ଦୁଇଟି ପ୍ରମୁଖ ଉଲ୍ଲେଖନୀୟ ବିଷୟ ଉପରେ କୁହାଯାଇଛି ଯାହା ଭାରତୀୟ ଅର୍ଥନୀତିରେ ଦେଖିବାକୁ ମିଳିଛି | ପ୍ରଥମଟି ହେଲା ଦେଶର ମୋଟ ନିଯୁକ୍ତିରେ ଆନୁଷ୍ଠାନିକ ନିଯୁକ୍ତିର ଅଂଶ ବୃଦ୍ଧି ପାଇଛି, ଯାହା ଗତ 5 ବର୍ଷରେ 17.6 ପ୍ରତିଶତରୁ ବୃଦ୍ଧି ପାଇ 22.5 ପ୍ରତିଶତ ହୋଇଛି | ଏହିପରି ଭାବେ ଏହା ଦେଶର ରୋଜଗାର ପରିଦୃଶ୍ୟରେ ପରିବର୍ତ୍ତନ ଆଣିଛି | ଦ୍ବିତୀୟଟି ହେଲା ଦେଶର ଷ୍ଟକ ବଜାର, ଯାହା ନୂତନ କମ୍ପାନୀ ଗୁଡିକ ପାଇଁ ଏକ ପ୍ଲାଟଫର୍ମ ଭାବେ ଇଭା ହୋଇଛି | ଷ୍ଟକ ବଜାର ଗୁଡିକ ପ୍ରତି ପାଞ୍ଚ ବର୍ଷରେ ଏହାର ତାଲିକାଭୁକ୍ତ କମ୍ପାନୀ ମଧ୍ୟରୁ ଏକ ତୃତୀୟାଂଶ କମ୍ପାନୀ ସ୍ଥାନରେ ନୂଆ ଫାର୍ମ, ପ୍ରଯୁକ୍ତି ଜ୍ଞାନକୌଶଳ ଓ ଉତ୍ପାଦ ଗୁଡିକୁ ତାଲିକାଭୁକ୍ତ କରିଥାଏ | ସର୍ଭେରେ କୁହାଯାଇଛି ଯେ ଉଦାରିକରଣ ପରେ ଷ୍ଟକ ବଜାର ଯୁଗରେ ଏହା ରଚନାତ୍ମକ ପରିବର୍ତ୍ତନ ଅଟେ | ଏହି ସର୍ଭେରେ ଦେଶର ଉଦ୍ୟମିତା ବିକାଶ ବିଷୟରେ ମଧ୍ୟ ପ୍ରାଧାନ୍ୟ ଦିଆଯାଇଛି |
ବିଶ୍ଵ ବ୍ୟାଙ୍କ କହିବାନୁଯାୟୀ ନୂତନ ଫାର୍ମ ଗଠନ କ୍ଷେତ୍ରରେ ଭାରତ ତୃତୀୟ ସ୍ଥାନରେ ରହିଛି | ଭାରତରେ 2014ରେ 70,000 ନୂଆ ଫାର୍ମ ଗଠନ କରାଯାଇଥିବା ବେଳେ 2018ରେ ପ୍ରାୟ 124,000 ନୂଆ ଫାର୍ମ ସୃଷ୍ଟି କରାଯାଇଛି | 2006-14 ମଧ୍ୟରେ ଗଠିତ ନୂଆ ଫାର୍ମ ଗଠନର ହାର 3.8 ପ୍ରତିଶତ ତୁଳନାରେ 2014-18 ରେ ଏହା ବୃଦ୍ଧି ପାଇ 12.2 ପ୍ରତିଶତ ହୋଇଥିଲା | ଅର୍ଥନୈତିକ ସର୍ଭେ 2020 ଏକ ନୂଆଁ ସ୍ଲୋଗାନ ସହ ଉପସ୍ଥାପିତ କରାଯାଇଛି, ତାହା ହେଲା “ ଏସେମ୍ବଲ ଇନ ଇଣ୍ଡିଆ ଫର ଦ ୱର୍ଲ୍ଡ ” | ଏଥିଯୋଗୁଁ 2025 ସୁଦ୍ଧା ରପ୍ତାନି ବଜାରରେ ଭାରତର ଅଂଶଧନ 3.5 ପ୍ରତିଶତ ଓ 2030 ସୁଦ୍ଧା ଶତକଡା 6 ଭାଗ ବୃଦ୍ଧି ହେବାର ଆକଳନ କରାଯାଇଛି | ଭାରତକୁ ଏକ ପ୍ରମୁଖ ରପ୍ତାନିକାରୀ ଭାବେ ପରିଣତ କରିବା ଲାଗି ଏହି ସର୍ଭେରେ “ନେଟୱର୍କ ଉତ୍ପାଦ” ବିଶେଷଜ୍ଞତା ଓ ମାତ୍ରା ବିସ୍ତାର ଉପରେ ଅଧିକ ଧ୍ୟାନ ଦିଆଯାଇଛି |
ଆସନ୍ତା ପାଞ୍ଚ ବର୍ଷରେ ଭାରତର ଅର୍ଥନୀତିକୁ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବାର ଲକ୍ଷ ହାସଲ ଲାଗି ନରେନ୍ଦ୍ର ମୋଦୀ ସରକାର ପ୍ରତିଶୃତିବଦ୍ଧ ଅଟନ୍ତି | ତେଣୁ ଅର୍ଥନୈତିକ ସର୍ଭେ, ଦେଶରେ ଏକ ନୂତନ ‘ବ୍ୟବସାୟିକ ପ୍ରବଣ’ ପରିବେଶ ସୃଷ୍ଟି ଲାଗି ଏକ ନୂଆଁ ଶୀର୍ଷକ ପ୍ରସ୍ତୁତ କରିଛି | ବ୍ୟବସାୟ ସୁଗମତା କ୍ଷେତ୍ରରେ ମଧ୍ୟ ଭାରତ ପ୍ରଗତି କରିସାରିଛି | କାରଣ ବ୍ୟବସାୟ ସୁଗମତା କ୍ଷେତ୍ରରେ ଭାରତ 2014ରେ 142 ତମ ସ୍ଥାନରେ ରହିଥିବା ବେଳେ ବର୍ତ୍ତମାନ ଅନେକ ସ୍ଥାନ ଉପରକୁ ଉଠି 63 ତମ ସ୍ଥାନରେ ପହଞ୍ଚିଛି| ତେଣୁ ଅର୍ଥନୈତିକ ସର୍ଭେ 2020ରେ ବଜାରକୁ ସକ୍ଷମ କରିବା, ବାଣିଜ୍ୟ ସମର୍ଥକ ନୀତି ଗୁଡିକୁ ପ୍ରୋତ୍ସାହିତ କରିବା ଓ ଭାରତୀୟ ଅର୍ଥବ୍ୟବସ୍ଥାରେ ‘ବିଶ୍ଵାସ’ କୁ ଆହୁରି ମଜବୁତ କରିବା ଉପରେ ଅଧିକ ମହତ୍ଵ ଦିଆଯାଇଛି |
ମୂଳ ଲେଖା : ମନୋହର ମନୋଜ, ସାମ୍ବାଦିକ
ଅନୁବାଦ : ରୀତା ଯୋଶୀ
Comments
Post a Comment