ଚୀନର ଗୁଲେଗ୍ସ –ଉଇଘୁର କାରାରୁଦ୍ଧ ଶିବିର

ଅଗଷ୍ଟ 2018ରେ ଜାତିଗତ ଭେଦଭାବ ଦୂରୀକରଣ ସଙ୍କ୍ରାନ୍ତୀୟ ଜାତିସଂଘ କମିଟି, ଚୀନର ଜିନଜିଆଙ୍ଗ ପ୍ରଦେଶରେ ଏକ ନିୟୁତ ରୁ ଅଧିକ ଉଇଘୁରଙ୍କ କାରାରୁଦ୍ଧକୁ ନେଇ ଉଦବେଗ ପ୍ରକାଶ କରିଥିବା ବେଳେ ଉଇଘୁର ମାନଙ୍କ ପରିସ୍ଥିତି ଏବେ ମଧ୍ୟ ସେତେଟା ଭଲ ଥିବା ପରି ଜଣାପଡୁନାହିଁ | ଅନ୍ୟ ପକ୍ଷରେ ଉଇଘୁରଙ୍କ ବିରୁଦ୍ଧରେ ଗଠନମୂଳକ ହିଂସା ଦିନକୁ ଦିନ ବୃଦ୍ଧି ପାଇବାରେ ଲାଗିଛି |

ଉଇଘୁର ମାନବୀୟ , ଧାର୍ମିକ ତଥା ସାଂସ୍କୃତିକ ଅଧିକାରରେ ଉନ୍ନତି ହେବା ପରିବର୍ତ୍ତେ ପରିସ୍ଥିତି ଖରାପ ଆଡକୁ ଗତି କରୁଥିବା ବିଷୟ ନେଇ ଲଗାତାର ଖବର ମିଳୁଛି | ତେଣେ ଉଇଘୁର ମାନଙ୍କ ଧର୍ମ ଏବଂ ସଂସ୍କୃତି ଉପରେ ଆଧାରିତ କାରାରୁଦ୍ଧ ନେଇ ଚୀନର କାର୍ଯ୍ୟସୂଚୀ ସଂପୂର୍ଣ୍ଣ ଭିନ୍ନ ଥିବା ପରି ମନେକରାଯାଏ |

‘ହାନ’ ସମ୍ପ୍ରଦାୟରର ସ୍ଵପ୍ନ କୁ ସାକାର କରିବା ପାଇଁ ଚୀନ ଏହାର ସଂଖ୍ୟାଲଘୁ ନାଗରିକମାନଙ୍କୁ ପୁଙ୍କାନୁପୁଙ୍ଖ ତର୍ଜମା କରିବା ଆରମ୍ଭ କରିଦେଇଛି | 1982ର ଏହାର ସମ୍ବିଧାନରେ ଧର୍ମ, ସଭା, ବକ୍ତବ୍ୟ ତଥା ଏ ସଙ୍କ୍ରାନ୍ତୀୟ ଅନ୍ୟାନ୍ୟ ଅଧିକାର ବିଷୟରେ ଉଲ୍ଲେଖ ରହିଥିବା ସତ୍ତ୍ୱେ ଚୀନର ପ୍ରକୃତ କାର୍ଯ୍ୟକାରିତା ସନ୍ଦେହାସ୍ପଦ ହୋଇଛି ଏବଂ ଆନ୍ତର୍ଜାତୀୟ ସମୁଦାୟ ଏହା ଉପରେ ତୀକ୍ଷଣ ନଜର ରଖିଛି |

ସର୍ବସାଧାରଣରେ ଉପଲବ୍ଧ ଉପଗ୍ରହ ଚିତ୍ର ଉପଯୋଗ କରି ଚୀନର ଇଣ୍ଟର୍ନମେଣ୍ଟ କ୍ୟାମ୍ପ ପଦ୍ଧତିର ବିସ୍ତୃତ ଅନୁସନ୍ଧାନରେ, ବିଶେଷକରି ପୂର୍ବତନ ବନ୍ଦୀ ମାନଙ୍କ ସହ ଅନେକ ସାକ୍ଷାତକାର କରିବା ପରେ, ବଜଫିଡ ସମ୍ବାଦ ସଂସ୍ଥା କିଛି ବର୍ଷ ମଧ୍ୟରେ ନିର୍ମିତ 260 ରୁ ଅଧିକଟି ଢାଞ୍ଚାର ନିର୍ମାଣ କରାଯାଇଥିଲା ବୋଲି ପ୍ରମାଣ ପାଇଛି, ଯାହାକି ଦୁର୍ଗଭଳି ଅଟକ କେନ୍ଦ୍ରରେ ପରିଣତ ହୋଇଥିଲା | ଜିନଝିଆଙ୍ଗ ପ୍ରଦେଶର ପ୍ରତ୍ୟେକ କାଉଣ୍ଟିରେ ଅତି କମରେ ଗୋଟିଏ ଲେଖାଏଁ ଅଟକ କେନ୍ଦ୍ର ରହିଛି | ଚୀନ, ହଜାର ହଜାର ସଂଖ୍ୟାରେ ଉଇଘୁର, କାଜାକ ଏବଂ ଅନ୍ୟ ମୁସଲମାନ ତଥା ସଂଖ୍ୟାଲଘୁଙ୍କୁ ଅଟକ ରଖିବା ଏବଂ ବନ୍ଦୀ କରିବା ପାଇଁ ଏକ ବିଶାଳ ବ୍ୟବସ୍ଥା ପ୍ରତିଷ୍ଠା କରିଛି ଏବଂ ଦ୍ଵିତୀୟ ବିଶ୍ଵଯୁଦ୍ଧ ପରେ ସଂଖ୍ୟାଲଘୁ ସମ୍ପ୍ରଦାୟଙ୍କୁ ଏତେ ସଂଖ୍ୟାରେ ଅଟକ ରଖିଥିବା ଘଟଣା ଦେଖାଦେଇନଥିଲା |



ସୂଚନା ଯୋଗ୍ୟ ଯେ ଜିନଝିଆଙ୍ଗର ବିଭିନ୍ନ ଭାଗରେ ଥିବା ତଥାକଥିତ “ଧନ୍ଦାମୂଳକ ଶିକ୍ଷା ପ୍ରଶିକ୍ଷଣ କେନ୍ଦ୍ର” ଗୁଡିକୁ କାରାରୁଦ୍ଧ କେନ୍ଦ୍ରରେ ପରିଣତ କରାଯାଇଛି | ଚୀନର କମ୍ୟୁନିଷ୍ଟ ଦଳର ସାମାଜିକ ରି-ଇଞ୍ଜ୍ଣିନିୟରିଙ୍ଗ ପ୍ରକଳ୍ପକୁ ପରିପୂରଣ ଲାଗି ଜିନଝିଆଙ୍ଗରେ ଅଟକ କେନ୍ଦ୍ର ଗୁଡିକର ନିର୍ମାଣ କରାଯାଇଛି |

ଏପଲ, ନାଇକି, ଭୋଲ୍ସ ୱେଗନ ଏବଂ ଅନ୍ୟାନ୍ୟ ବିଶ୍ଵ ସ୍ତରୀୟ ବ୍ରାଣ୍ଡ ପାଇଁ ସାମଗ୍ରୀ ଉତ୍ପାଦନ କରୁଥିବା ଜିନଜିଆଙ୍ଗର କାରଖାନା ଗୁଡିକରେ ଉଇଘୁର ସମ୍ପ୍ରଦାୟର 80, 000ରୁ ଅଧିକ ଲୋକ କାର୍ଯ୍ୟ କରିବାକୁ ବାଧ୍ୟ ହୋଇଛନ୍ତି ବୋଲି ଅଷ୍ଟ୍ରେଲିଆନ ଷ୍ଟ୍ରାଟେଜିକ ପୋଲିସି ଇନଷ୍ଟିଚ୍ୟୁଟର ଅନୁସନ୍ଧାନରୁ ଜଣାପଡିଛି |

ଜିନଝିଆଙ୍ଗରେ ମୂଳ ସ୍ଥିତିରେ ପରିବର୍ତ୍ତନକୁ ଦୃଷ୍ଟିରେ ରଖି ଚୀନ, ଆନ୍ତର୍ଜାତୀୟ ସମାଲୋଚନାର ଶିକାର ହୋଇଛି | ଚଳିତ ବର୍ଷ ଜୁନ 30 ତାରିଖରେ 27ଟି ଦେଶ ଜାତିସଂଘ ମାନବାଧିକାର ପରିଷଦକୁ ତଦନ୍ତ କରିବାକୁ ଆହ୍ଵାନ ଜଣାଇଛନ୍ତି | ଜୁଲାଇରେ ଚୀନ ସଙ୍କ୍ରାନ୍ତୀୟ ଆନ୍ତଃ-ସଂସଦୀୟ ମେଣ୍ଟ ଜିନଝିଆଙ୍ଗରେ ତଦନ୍ତ ପାଇଁ ଜାତିସଂଘ ନିକଟରେ ଦାବି କରିଥିଲା |

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ ଜୁନ 2020ରେ ଉଇଘର ମାନବ ଅଧିକାର ନୀତି 2020 ଅଧିନିୟମକୁ ଅନୁମୋଦନ କରିଛନ୍ତି ଯେଉଁଥିରେ ଉଇଘର ମାନଙ୍କ ଉପରେ ବ୍ୟାପକ ନିଘା ତଥା ଅଟକ ପାଇଁ ଚୀନକୁ ଦଣ୍ଡ ଦେବାର ପ୍ରାବଧାନ ରହିଛି | ଆମେରିକାର ବୈଦେଶିକ ବିଭାଗ ଉଇଘୁର ସମ୍ପ୍ରଦାୟ ର ଜଣେ କର୍ମୀ ସାୟରାଗୁଲ ସାଉତବେଙ୍କୁ 2020ର ଆନ୍ତର୍ଜାତୀୟ ମହିଳା ସାହସିକତା ପୁରସ୍କାରରେ ସମ୍ମାନିତ କରିଛି |

ଆହୁରି ମଧ୍ୟ ଜୁଲାଇ 9, 2020ରେ ଗ୍ଲୋବାଲ ମାଗ୍ନିତସ୍କି ଆଇନ ଅଧୀନରେ ଆମେରିକା, ମାନବାଧିକାର ଲଙ୍ଘନ ପାଇଁ ଜିନଝିଆଙ୍ଗ କମ୍ୟୁନିଷ୍ଟ ଦଳର ସମ୍ପାଦକ ଚେନ କ୍ଵାଙ୍ଗୋ ଏବଂ ଅନ୍ୟ ତିନିଜଣଙ୍କ ବିରୁଦ୍ଧରେ କଟକଣା ଲଗାଇଥିଲେ | ଏହା ପୂର୍ବରୁ ଚେନ 2011 ରୁ 2016 ପର୍ଯ୍ୟନ୍ତ ତିବ୍ବତରେ ପାର୍ଟିର ସମ୍ପାଦକ ଭାବେ କାର୍ଯ୍ୟ କରିଥିଲେ ଆଉ ସେତେବେଳେ ସେ ଦଳାଇ ଲାମାଙ୍କୁ “ଏକ ମେଣ୍ଢାର ପୋଷାକରେ ଏକ ଗଧିଆ” ବୋଲି ସମାଲୋଚନା କରିଥିଲେ | ସେ ପୋଲିସ ଦ୍ୱାରା ନିୟନ୍ତ୍ରଣ କରିବାପାଇଁ ଅନେକ ପଦକ୍ଷେପ ନେଇଥିଲେ | 2016 ମସିହା ଠାରୁ ଜିନଝିଆଙ୍ଗରେ ପାର୍ଟିର ସମ୍ପାଦକ ଭାବେ ଚେନ, ଉଇଘୁର ମାନଙ୍କ ଉପରେ ବ୍ୟାପକ ନଜର ରଖିବା “ନିରୀକ୍ଷଣ ପ୍ରଣାଳୀ” ନୀତି ପ୍ରଣୟନ କରିଥିଲେ |

ଆନ୍ତର୍ଜାତୀୟ ସମୁଦାୟ ଦ୍ଵାରା ବୃଦ୍ଧି ପାଉଥିବା ସମାଲୋଚନାର ସମ୍ମୁଖୀନ ହେଉଥିବା ଚୀନର ରଣନୀତି ହେଉଛି ଉଇଘୁର ସମ୍ପ୍ରଦାୟକୁ ପୃଥକ କରିବା ଜାରି ରଖିବା , ଜିନଝିଆଙ୍ଗରେ ଏହାର ନୀତି ପାଇଁ କ୍ଷ୍ୟମାତାସୀନ ଶାସନ ଠାରୁ ସହାୟତା ଲୋଡିବା, ଏହାର ସ୍ଵତନ୍ତ୍ର ସାର୍ବଭୌମତ୍ଵ ଉପରେ ଗୁରୁତ୍ଵ ଦେବା, ଜିନଝିଆଙ୍ଗକୁ ମଧ୍ୟଏସିଆ ଓ ୟୁରୋପସ ସହ ସଂଯୋଗ କରୁଥିବା ବେଲ୍ଟ ଏଣ୍ଡ ରୋଡ ଇନିସିଏଟିଭ ପ୍ରକଳ୍ପକୁ ଆଗେଇନେବା ଏବଂ ଏହି ଅଞ୍ଚଳର “ବିକାଶମୂଳକ କାର୍ଯ୍ୟସୂଚୀ” ଉପରେ ଧ୍ୟାନ ଦେବା ତଥା ଏହି ଅଞ୍ଚଳରେ ଏହାର ପ୍ରକଳ୍ପ ପାଇଁ ଋଣ ନେବା ସକାଶେ ଆଇଏମଏଫ, ବିଶ୍ଵ ବ୍ୟାଙ୍କ ଏବଂ ଏସୀୟ ବ୍ୟାଙ୍କ ଭଳି ବହୁପକ୍ଷୀୟ ଅନୁଷ୍ଠାନରୁ ସହାୟତା ଲୋଡିବା | ତେବେ ଏହି “ବିକାଶମୂଳକ କାର୍ଯ୍ୟସୂଚୀ” ସତ୍ତ୍ୱେ ଚୀନର ନୀତି ବିରୁଦ୍ଧରେ ଉଇଘୁରର ବିରୋଧ ବୃଦ୍ଧି ପାଉଛି |

ଚୀନର ନୀତି ଗୁଡିକ ବିରୁଦ୍ଧରେ ଉଇଘୁରର ବିରୋଧ ଅନେକ ରୂପରେ ଦେଖା ଦେଉଛି | ଏଥିମଧ୍ୟରେ ପୋଲିସ ଷ୍ଟେସନ, ପାର୍ଟି କ୍ୟାଡର , ସୈନ୍ୟ ଦଳ ଓ ଭିତ୍ତିଭୂମି ପ୍ରକଳ୍ପ ଗୁଡିକୁ ଟାର୍ଗେଟ କରିବା ଅନ୍ତର୍ଭୁକ୍ତ ଅଛି | କୋର୍ଟ ମାମଲାରୁ ଜଣା ପଡିଛି ଯେ ଜିନଝିଆଙ୍ଗରେ ଜାତୀୟ ମାମଲା ତୁଳନାରେ ବିପଦପୂର୍ଣ୍ଣ ରାଜ୍ୟ ସୁରକ୍ଷା ମାମଲା ଯଥେଷ୍ଟ ମାତ୍ରାରେ ବୃଦ୍ଧି ପାଇଛି | ତେଣୁ ସମ୍ପ୍ରତ୍ତି ପାର୍ଟି ଦ୍ଵାରା ଜିନଝିଆଙ୍ଗରେ ଅତିରିକ୍ତ ନ୍ୟାୟିକ ବନ୍ଦୀ କରିବାର ଏକ ପ୍ରବୃତ୍ତି ହୋଇଗଲାଣି |



ମୂଳଲେଖା : ପ୍ରଫେସର ଶ୍ରୀକାନ୍ତ କୋଣ୍ଡାପାଲ୍ଲୀ, ଜେଏନୟୁ