ପାକିସ୍ତାନର “ଡୋଜିଅର୍ ରଣନୀତି”କୁ ପ୍ରତ୍ୟାଖ୍ୟାନ କରିଛି ଭାରତ

ଗତ ସପ୍ତାହରେ ପାକିସ୍ତାନ ଭାରତ ବିରୋଧରେ ଅନେକ ହାସ୍ୟାସ୍ପଦ ଅଭିଯୋଗ ଆଣିଥିଲା। ଇସଲାମାବାଦର ମିଥ୍ୟା ପ୍ରଳାପକୁ କେହିହେଲେ ବିଶ୍ଵାସ କରିନାହାନ୍ତି | ବିଭିନ୍ନ ଅଭିଯୋଗ ନେଇ ତଥାକଥିତ “ଡୋଜିଅର୍” ପାକିସ୍ତାନର ବୈଦେଶିକ ମନ୍ତ୍ରୀ ଶାହା ମେହମୁଦ କୁରେଶି ଏବଂ ଆନ୍ତଃ ସେବା ଜନସମ୍ପର୍କ ବିଭାଗର ମହାନିର୍ଦ୍ଦେଶକ ବାବର ଇଫ୍ଟିଖରଙ୍କ ମିଳିତ ସାମ୍ବାଦିକ ସମ୍ମିଳନୀରେ ଜାରି କରାଯାଇଛି । ଏଥିରେ କୁହାଯାଇଛି ଯେ ଭାରତ, ଆଫଗାନିସ୍ତାନରୁ ପାକିସ୍ତାନକୁ “ଆତଙ୍କବାଦୀ” ପଠାଇବାର କାର୍ଯ୍ୟରେ ଲିପ୍ତ ରହିଛି ଓ ପାକିସ୍ତାନକୁ ଏହାର “ଅକାଟ୍ୟ ପ୍ରମାଣ” ମିଳିଛି । ପାକିସ୍ତାନ ଏହା ମଧ୍ୟ ବୃଥା ଚେଷ୍ଟା କରିଛି ଯେ ଭାରତ ନିଜକୁ ଆତଙ୍କବାଦର ଶିକାର ବୋଲି କହିବୁଲୁଛି । ଏହାର ସ୍ପଷ୍ଟ ଅର୍ଥ ହେଲା ନିଜେ ଦୋଷୀ ହୋଇ ଅନ୍ୟ ମୁଣ୍ଡରେ ଅଠା ବୋଳିବା |

ବିଗତ ଚାରି ଦଶନ୍ଧି ଧରି ପାକିସ୍ତାନର ଏହି କାର୍ଯ୍ୟକଳାପ ବିଶ୍ୱ ପାଇଁ ଉଦବେଗର କାରଣ ପାଲଟିଛି ! ଫଳସ୍ୱରୂପ, କିଛି ବର୍ଷ ପୂର୍ବରୁ ଆମେରିକା ପାକିସ୍ତାନକୁ ଆର୍ଥିକ ସହାୟତା ବନ୍ଦ କରିଦେଇଥିଲା, ଆତଙ୍କବାଦ ପାଣ୍ଠି ଯୋଗାଣ ଉପରେ ବିଶ୍ୱସ୍ତରୀୟ ତଦାରଖକାରୀ ଆର୍ଥିକ କ୍ରିୟାନ୍ଵୟନ ଟାସ୍କ ଫୋର୍ସ ଗତ 2 ବର୍ଷ ଧରି ଇସଲାମାବାଦକୁ 'ଗ୍ରେ ତାଲିକାରେ' ରଖିଛି ଏବଂ ପାକିସ୍ତାନ ଅର୍ଥ ହେରଫେର ଓ ଆତଙ୍କବାଦୀ ଅର୍ଥ ଯୋଗାଣ ରୋକିବା ଲାଗି କୌଣସି ନିୟମ ଅନୁପାଳନ କରିନାହିଁ ବୋଲି ଦର୍ଶାଇ ଏହାର ସର୍ବଶେଷ ବୈଠକରେ କୌଣସି କୋହଳ ଦେବାକୁ ମନା କରିଦେଇଛି | 

ବୈଦେଶିକ ମନ୍ତ୍ରୀ ଡଃ ଜୟଶଙ୍କର ହାଇଦ୍ରାବାଦରେ ଇଣ୍ଡିଆନ୍ ସ୍କୁଲ୍ ଅଫ୍ ବିଜିନେସ୍ ଠାରେ ଆୟୋଜିତ 'ଡେକାନ୍ ଡାଏଲଗ୍'ରେ ଏକ ଭର୍ଚୁଆଲ୍ ମାଧ୍ୟମରେ ସମ୍ବୋଧିତ କରି ଏନେଇ କଡା ପ୍ରତିକ୍ରିୟା ପ୍ରକାଶ କରି ପାକିସ୍ତାନକୁ ସୀମାପାର ଆତଙ୍କବାଦକୁ ପ୍ରୋତ୍ସାହନ ଦେଉଥିବା ରାଷ୍ଟ୍ରର ଏକ ଉଦାହରଣ ବୋଲି କହିଛନ୍ତି। ସେ କହିଛନ୍ତି ବିଶ୍ଵ ଧୀରେ ଧୀରେ ଆନ୍ତର୍ଜାତୀୟ ଆତଙ୍କବାଦର କାର୍ଯ୍ୟକଳାପ ବିଷୟରେ ଅବଗତ ହେଉଛି | ସେ କହିଛନ୍ତି ଯେ ଭାରତ ଏହାର ନିରନ୍ତର ଉଦ୍ୟମ ମାଧ୍ୟମରେ ଆତଙ୍କବାଦ ଅର୍ଥ ଯୋଗାଣ, ଉଗ୍ରବାଦ ଏବଂ ସାଇବର ନିଯୁକ୍ତି କୁ ପ୍ରୋତ୍ସାହନ ଦେଉଥିବା ପାକିସ୍ତାନକୁ ଲୋକଲୋଚନକୁ ଆଣିଛି।

ପାକିସ୍ତାନ ଭାରତ ବିରୋଧରେ ଭିତ୍ତିହୀନ ଅଭିଯୋଗ ଆଣିବା ପରେ ପରେ ଭାରତର ବୈଦେଶିକ ମନ୍ତ୍ରଣାଳୟ ଏହାର ପ୍ରତିକ୍ରିୟାରେ କହିଛି ଯେ ଗତ କିଛି ମାସ ଧରି ଦେଶରେ ଜାରି ରହିଥିବା ଘରୋଇ ସମସ୍ୟାରୁ ଜନସାଧାରଣଙ୍କ ଦୃଷ୍ଟି ହଟେଇବା ପାଇଁ ପାକିସ୍ତାନ ଦ୍ଵାରା ଏହା ଏକ ବିବିଧ କୌଶଳ ବୋଲି ବର୍ଣ୍ଣନା କରାଯାଇଛି । ଏହା ମଧ୍ୟ ଉଲ୍ଲେଖ ଯୋଗ୍ୟ ଯେ ପାକିସ୍ଥାନର ବିରୋଧୀ ଦଳ ଇମ୍ରାନ ଖାଁ ସରକାରଙ୍କୁ ଗାଦିଚ୍ୟୁତ କରିବା ପାଇଁ ଏକ ଆନ୍ଦୋଳନ ଆରମ୍ଭ କରିଛି | ଏହି ସରକାର ଲୋକମାନଙ୍କ ଦ୍ୱାରା “ନିର୍ବାଚିତ” ନୁହେଁ! ବରଂ ସେନା ଦ୍ୱାରା ମନୋନୀତ ହୋଇଛି ବୋଲି ବିରୋଧୀ ପକ୍ଷ ଅଭିଯୋଗ ଆଣିଛନ୍ତି |

ପାକିସ୍ତାନ ଦ୍ଵାରା ଭାରତ ବିରୁଦ୍ଧରେ ଅଭିଯୋଗକୁ ଭାରତ ତୀବ୍ର ନିନ୍ଦା କରିଛି ଏବଂ ଏହାର ବିଶ୍ଵସ୍ତରୀୟ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବା ଲାଗି ଏହାକୁ ତାର ନିରାଶଜନକ ଉଦ୍ୟମ ବୋଲି କହିଛି। ଆଫଗାନିସ୍ତାନ ମଧ୍ୟ ପାକିସ୍ତାନ ବିରୁଦ୍ଧରେ ଏହାର ଦେଶରୁ ଆତଙ୍କବାଦୀ କାର୍ଯ୍ୟକଳାପ ପାଇଁ କାବୁଲ ଅନୁମତି ଦେଇଥିବା ନେଇ ପାକିସ୍ତାନର ଅଭିଯୋଗକୁ ପ୍ରତ୍ୟାଖ୍ୟାନ କରିଛି।

ପାକିସ୍ତାନ ବର୍ତ୍ତମାନ ଭାରତ ବିରୋଧରେ ଏକ ନୂଆ କାହାଣୀ ସୃଷ୍ଟି କରିବା ଆଶାରେ ଅନ୍ୟ ପଡୋଶୀ ଦେଶରେ ଅପପ୍ରଚାର କରିବାକୁ ଚେଷ୍ଟା କରୁଛି | ଏହାର ମୁକାବିଲା ପାଇଁ ନୂଆଦିଲ୍ଲୀ ମଧ୍ୟ ଏକ କୂଟନୈତିକ ଅଭିଯାନ ଆରମ୍ଭ କରିଛି। ଯଦି ପାକିସ୍ତାନ ଭାବୁଛି ଯେ ଏହାର ଡୋସିଅର୍ ନୀତି କାମିଆବ ହେବ, ତେବେ ଏହା ଦିବା ସ୍ଵପ୍ନ ସ୍ୱରୂପ | ଏହା ଏକ ବୃଥା ପ୍ରଚେଷ୍ଟା ମାତ୍ର | ପାକିସ୍ତାନର ରଣନୀତି ବିଷୟରେ ବିଶ୍ୱ ଅବଗତ ଅଛି।

ବିଗତ କିଛି ସମୟ ହେଲା ପାକିସ୍ତାନର କାର୍ଯ୍ୟକଳାପ ଏବଂ ଅଭିବ୍ୟକ୍ତିରେ ଏକ ସ୍ପଷ୍ଟ ନମୁନା ଦେଖିବାକୁ ମିଳିଛି | ଜାମ୍ମୁ କାଶ୍ମୀରରେ ନିୟନ୍ତ୍ରଣ ରେଖା (ଏଲଓସି ) ରେ ବାରମ୍ବାର ଅସ୍ତ୍ରବିରତି ଉଲ୍ଲଂଘନ କରୁଥିବା ପାକିସ୍ତାନ, ଭାରତକୁ ଏକ ଆକ୍ରମଣକାରୀ ଓ ଆତଙ୍କବାଦୀ କାର୍ଯ୍ୟରେ ଲିପ୍ତ ଅଛି ବୋଲି ଭିତ୍ତିହୀନ ଅଭିଯୋଗ କରିବା ହେଉଛି ଏହାର ଏକ ନମୁନା ।

ଉଲ୍ଲେଖନୀୟ କଥା ହେଉଛି, ଆସନ୍ତା ବର୍ଷ ଜାନୁଆରୀରୁ ଭାରତ ଏକ ଅସ୍ଥାୟୀ ସଦସ୍ୟ ଭାବରେ ମିଳିତ ଜାତିସଂଘ ସୁରକ୍ଷା ପରିଷଦରେ ଦାୟିତ୍ଵ ଗ୍ରହଣ କରୁଛି। ଜାତିସଂଘରେ ନୂଆ ପରିସ୍ଥିତିର ମୁକାବିଲା ପାଇଁ ପାକିସ୍ତାନ ପ୍ରସ୍ତୁତ ହେଉଛି ବୋଲି ଜଣାପଡିଛି । କିନ୍ତୁ ଇସଲାମାବାଦ ଆତଙ୍କବାଦକୁ ରାଷ୍ଟ୍ର ନୀତିର ଏକ ଆୟୁଧ ଭାବରେ ବ୍ୟବହାର କରି ବିଶ୍ୱ ଆତଙ୍କବାଦର ଏକ ପେଣ୍ଠସ୍ଥଳୀ ପାଲଟିଥିବା ବିଷୟରେ ବିଶ୍ୱ ଦୃଷ୍ଟିକୋଣକୁ ପ୍ରଭାବିତ କରିବାକୁ ପାକିସ୍ତାନ ଆଶା ସୁଦ୍ଧା କରିପାରିବ ନାହିଁ।

ଇସଲାମାବାଦ ବୋଧେ ଭୁଲିଯାଉଛି ଯେ ଅଲ-କାଏଦା ଆତଙ୍କବାଦୀ ଓସାମା ବିନ୍ ଲାଦେନକୁ ପାକିସ୍ତାନର ଆବଟ୍ଟାବାଦ କ୍ୟାଣ୍ଟନମେଣ୍ଟ ଅଞ୍ଚଳରେ ଠାବ କରାଯାଇଥିଲା ଯେଉଁଠାରେ ସେ ଅତିକମରେ 5 ବର୍ଷ ଧରି ଲୁଚି ରହିଥିଲା । ଏଥିସହ ପାକିସ୍ତାନର ମନ୍ତ୍ରୀ ଫୱାଦ ଚୌଧୁରୀ ଦେଶର ନେସନାଲ ଏସେମ୍ବ୍ଲିରେ ସମ୍ପ୍ରତ୍ତି ସ୍ୱୀକାର କରିଛନ୍ତି ଯେ ଗତ ବର୍ଷ କାଶ୍ମୀରର ପୁଲୱାମାଠାରେ ଭାରତୀୟ ନିରାପତ୍ତା ବାହିନୀ ଉପରେ କରାଯାଇଥିବା ଆକ୍ରମଣ ଇମ୍ରାନ ଖାଁ ସରକାରଙ୍କ ଏକ ପ୍ରମୁଖ ଉପଲବ୍ଧି | ଏହି ଆକ୍ରମଣରେ 42 ଜଣ ଭାରତୀୟ ନିରାପତ୍ତା କର୍ମଚାରୀ ପ୍ରାଣ ହରାଇଥିଲେ। 

ଏହି ଘଟଣା ଗୁଡିକ ପାକିସ୍ତାନକୁ ଏକ ନିରୀହ ଦେଶ ଭାବେ କହି ବୁଲିବାର ସବୁ ଦ୍ୱାର ବନ୍ଦ କରିସାରିଛି। ଅନ୍ତର୍ଜାତୀୟ ସମୁଦାୟକୁ ଘଣ୍ଟ ଘୋଡ଼ାଇବା ପାଇଁ ଶସ୍ତା କୌଶଳ ପ୍ରୟୋଗ କରିବା ପରିବର୍ତ୍ତେ ପାକିସ୍ତାନ ନିଜ ମାଟିରେ ଆତଙ୍କବାଦର ମୂଳପୋଛ କରିବା ଉପରେ ଧ୍ୟାନ ଦେଲେ ହିଁ ଏହାର ହିତସାଧନ ହେବ |

ଆଲେଖ୍ୟ : ଅଶୋକ ହାଣ୍ଡୁ , ରାଜନୈତିକ ଭାଷ୍ୟକାର