ଲକ୍‌ଡାଉନ ପରବର୍ତ୍ତୀ କାଳରେ ଅର୍ଥନୀତିର ଗତି

ଲଗାତାର ଦ୍ୱିତୀୟ (ନଭେମ୍ବର) ମାସରେ ଦ୍ରବ୍ୟ ଏବଂ ସେବା କର (ଜିଏସ୍‌ଟି) ସଂଗ୍ରହ ଏକ ଲକ୍ଷ କୋଟି ଟଙ୍କା ଟପିଛି ଏବଂ ଉନ୍ନତ ଯାତ୍ରୀବାହୀ କାର ବିକ୍ରୟ, ରେଳ ମାଲ ପରିବହନ, ପରିଚାଳକଙ୍କ ପାଇଁ ସୂଚକାଙ୍କ (PMI)ଠାରୁ ଆରମ୍ଭ କରି ସକରାତ୍ମକ ଖବର ନିଶ୍ଚିତ ଭାବରେ ଅର୍ଥନୈତିକ ପରିବର୍ତ୍ତନର ସଙ୍କେତ ଦେଉଛି । କୌତୁହଳର ବିଷୟ, ଦ୍ୱିତୀୟ ତ୍ରୈମାସିକରେ (ଜୁଲାଇ-ସେପ୍ଟେମ୍ବର) 2020-21 ମଧ୍ୟରେ ତ୍ରୈମାସିକ ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧି ହାରରେ 7.5 ପ୍ରତିଶତ ହ୍ରାସ ଘଟିଥିବାବେଳେ ଲକଡାଉନ୍ ପ୍ରଭାବିତ ପ୍ରଥମ ତ୍ରୈମାସିକରେ ପ୍ରାୟ 24 ପ୍ରତିଶତ କମ୍‌ ଥିଲା । ପ୍ରକୃତ କ୍ଷେତ୍ରଗୁଡିକରେ ଅନୁକୂଳ ଅବଶିଷ୍ଟ ତ୍ରୈମାସିକରେ ତୀବ୍ର ପୁନରୁଦ୍ଧାର ହେବାର ଆଶା ସୃଷ୍ଟି କରିଛି । ଅର୍ଥ ମନ୍ତ୍ରଣାଳୟର ଅର୍ଥନୈତିକ ବ୍ୟାପାର ବିଭାଗର ସର୍ବଶେଷ ମୂଲ୍ୟାଙ୍କନ ଅନୁଯାୟୀ ଅନଲକ୍ ପ୍ରକ୍ରିୟା ଦ୍ବାରା ଏହା ଏକ ଭି-ଆକୃତିର ପୁନରୁଦ୍ଧାର ପଥରେ ଦୃଢ଼ ଅଗ୍ରଗତିକୁ ସୂଚାଇ ଦେଇଛି ଯାହା ଅତ୍ୟନ୍ତ ଚମତ୍କାର ଓ ଉତ୍ସାହଜନକ ଫଳାଫଳ ।

ଦ୍ବିିତୀୟ ତ୍ରୈମାସରେ ଉତ୍ପାଦନ ଅଭିବୃଦ୍ଧି 7.5 ପ୍ରତିଶତ ସହିତ ଦୃଢ଼ ଥିଲା, ପୂର୍ବ ବର୍ଷର ସମାନ ଅବଧି ତୁଳନାରେ ଏହା ସମ୍ଭବ ହୋଇପାରିଛି କାରଣ ଉତ୍ପାଦନ କ୍ଷେତ୍ରର ଅଭିବୃଦ୍ଧି ପ୍ରଥମ ତିନିମାସରେ ନକାରାତ୍ମକ 39 ପ୍ରତିଶତରୁ ଦ୍ୱିତୀୟ ତିନିମାସରେ ସକରାତ୍ମକ 0.6 ପ୍ରତିଶତକୁ ବୃଦ୍ଧି ପାଇଛି । ଉତ୍ପାଦନ କ୍ଷେତ୍ର ସ୍ଥିର ତଥା ନିଶ୍ଚିତ ଭାବରେ ଗତି କରିବାରୁ ଏହି ସୁସ୍ଥ ପୁନରୁଦ୍ଧାର ଶିଳ୍ପ ସାମଗ୍ରୀ ଚାହିଦା ପୂରଣ କରିବା ସହ ସଫଳତାର ନୂଆ ନୂଆ ବାଟ ଆପଣାଇ ଥିଲା ।

ଜିଏସ୍‌ଟିରୁ ମୋଟ ଆୟ ନଭେମ୍ବରରେ ପ୍ରାୟ 1.05 ଲକ୍ଷ କୋଟି ଟଙ୍କାରେ ପହଞ୍ଚିଛି, ଯାହାକି ପୂର୍ବ ବର୍ଷ ତୁଳନାରେ ମାତ୍ର 1.4 ପ୍ରତିଶତ ଅଧିକ । କଠୋର ଲକ୍‌ଡାଉନ ପରେ ପ୍ରାରମ୍ଭିକ ମାସରେ ପରିବର୍ତ୍ତନଶୀଳ ଧାରା ଯୋଗୁ ଅକ୍ଟୋବର ଏବଂ ନଭେମ୍ବରରେ ଜିଏସ୍‌ଟି ରାଜସ୍ୱରେ ବୃଦ୍ଧି ଘଟିଥିଲା । ରାଜ୍ୟଗୁଡ଼ିକୁ ଜିଏସ୍‌ଟି କ୍ଷତିପୂରଣର ଅଭାବକୁ ହ୍ରାସ କରିବାରେ ସାହାଯ୍ୟ କରିପାରିବା ପାଇଁ ଅର୍ଥବ୍ୟବସ୍ଥାକୁ ଭାର ବହନ କରିବାକୁ ହେବ । ରାଜ୍ୟମାନେ ଜିଏସ୍‌ଟି ପରିପ୍ରେକ୍ଷୀରେ ଆଦାୟ କର କରିବାକୁ ରାଜି ହେବାରୁ ନଭେମ୍ବରରେ 8242 କୋଟି ସେସ୍ ଭାବରେ ସଂଗ୍ରହ କରାଯାଇଥିଲା ଯାହା କେବଳ ଜିଏସ୍‌ଟି ଲାଗୁ କରିବା ପାଇଁ ରାଜ୍ୟଗୁଡିକୁ କ୍ଷତିପୂରଣ ଦେବା ପାଇଁ ବ୍ୟବହୃତ ହୋଇଥିଲା ।

ଅଧିକ ଉତ୍ସାହଜନକ ଏହି ଯେ ନଭେମ୍ବରରେ ଜିଏସ୍‌ଟି ଅାଦାୟ ବୃଦ୍ଧି ଉପରେ କଣ୍ଟ୍ରୋଲର ଜେନେରାଲ୍ ଅଫ୍ ଆକାଉଣ୍ଟସ୍‌ଙ୍କ ଦ୍ବାରା ପ୍ରକାଶିତ ତଥ୍ୟରୁ ଜଣାପଡିଛି ଯେ ଆର୍ଥିକ ବର୍ଷର ପ୍ରଥମାର୍ଦ୍ଧ ପରେ ଅକ୍ଟୋବରରେ କେନ୍ଦ୍ରର ଟିକସ ସଂଗ୍ରହ ଗତି ବୃଦ୍ଧି କରିଥିଲା । ସଂଗ୍ରହରେ ଉନ୍ନତି ସ୍ୱତନ୍ତ୍ର ଭାବରେ ବ୍ୟାପକ-ଆଧାରିତ, ଅଧିକ ପରୋକ୍ଷ ଟିକସ ଏବଂ ବ୍ୟକ୍ତିଗତ ଆୟକର ଦ୍ବାରା ପ୍ରବର୍ତ୍ତିତ ହୋଇଥିଲା । ସମୁଦାୟ ସ୍ତରରେ, କେନ୍ଦ୍ରର ମୋଟ ସଂଗ୍ରହ ଚଳିତ ବର୍ଷ ଅକ୍ଟୋବରରେ 17% ବୃଦ୍ଧି ପାଇଛି, କାରଣ କେନ୍ଦ୍ରୀୟ ଜିଏସ୍‌ଟି, ଏକ୍ସାଇଜ୍ ଏବଂ କଷ୍ଟମ୍ସରୁ ରାଜସ୍ୱ ସହିତ ଅଧିକ ପରୋକ୍ଷ ଟିକସ ଅାଦାୟ ହେତୁ ଉତ୍ସବ ଋତୁରେ ଉପଭୋକ୍ତାଙ୍କ ଗତିବିଧି ବଢ଼ିଥିଲା ।

ରେଟିଂ ଏଜେନ୍ସି ମୁଡି ଏହାର ସଦ୍ୟତମ ମୂଲ୍ୟାଙ୍କନରେ ଉଲ୍ଲେଖ କରିଛି ଯେ ଚଳିତ ବର୍ଷ ଭାରତୀୟ କମ୍ପାନୀଗୁଡିକ ଅବସ୍ଥା ସୁଧୁରିବ, କାରଣ ଅର୍ଥନୈତିକ କାର୍ଯ୍ୟକଳାପ ଲକଡାଉନ୍ ପରବର୍ତ୍ତୀ କାଳରେ ବୃଦ୍ଧି ପାଇଛି । 2021 ମସିହାରେ ଭାରତୀୟ କର୍ପୋରେଟରମାନଙ୍କ ଆୟକୁ ଦୃଷ୍ଟିରେ ରଖି ବ୍ୟାପକ ଭାବରେ ଚାହିଦା ବଢ଼ିଛି । ସ୍ୱଳ୍ପ ସୁଧ ହାର ବ୍ୟବସ୍ଥା ଏବଂ ପର୍ଯ୍ୟାପ୍ତ ଋଣ ଉପଲବ୍ଧତା ଦୃଢ଼ ଼ ବାଲାନ୍ସ ସିଟ୍ ଥିବା ସଂସ୍ଥାଗୁଡ଼ିକୁ ରିଫାଇନାନ୍ସ ଏବଂ ବୃଦ୍ଧି ପାଇଁ ଅନୁମତି ଦେବ ।

ଅର୍ଥନୀତିର ପ୍ରକୃତ କ୍ଷେତ୍ରର ପୁନରୁଦ୍ଧାରକୁ ପ୍ରତିଫଳିତ କରି କେନ୍ଦ୍ର ବାଣିଜ୍ୟ ଓ ଉଦ୍ୟୋଗ ମନ୍ତ୍ରୀ ପୀୟୁଷ ଗୋୟଲ ଏକ ରୋଚକ ପରିସ୍ଥିତି ଉପରେ ଆଲୋକପାତ କରିଥିଲେ । ବାଣିଜ୍ୟ ବୋର୍ଡ (ବିଓଟି) ବୈଠକର ସଦସ୍ୟମାନଙ୍କୁ ସମ୍ବୋଧିତ କରି ସେ କହିଛନ୍ତି ଯେ ସ୍ୱଚ୍ଛ ତଥା ଅଧିକ ଖୋଲା ଅର୍ଥନୀତିକୁ କ୍ଷେତ୍ର ଯୋଗାଇବା ପାଇଁ ଭାରତ ବିଶ୍ବର ଯୋଗାଣ ଶୃଙ୍ଖଳା ସହିତ ଘରୋଇ ଶିଳ୍ପରେ ସ୍ଥିରତା ହାସଲ କରିଛି ।

ତଥାପି, ଅର୍ଥନୀତିଜ୍ଞମାନେ ଦୁର୍ବଳ ସାମଗ୍ରିକ ଚାହିଦା ବିଷୟରେ ସତର୍କ ରହିବା ଆବଶ୍ୟକ ଯାହା ଅଭିବୃଦ୍ଧିକୁ ଅସ୍ଥାୟୀ କରିପାରେ । ତେଣୁ, ସେମାନେ ଅଧିକ ପ୍ରତ୍ୟକ୍ଷ ଏବଂ ନିର୍ଦ୍ଦିଷ୍ଟ ପଦକ୍ଷେପଗୁଡ଼ିକର ଆବଶ୍ୟକତାକୁ ସୂଚାଇ ଦେଇଛନ୍ତି ଯେ ଭ୍ରମଣ, ପର୍ଯ୍ୟଟନ ଏବଂ ଖୁଚୁରା ବଜାର ଭଳି ନିଯୁକ୍ତି କ୍ଷେତ୍ରଗୁଡିକର ଅଭିବୃଦ୍ଧିର ଗତିକୁ ସୁଗମ କରିବା ଦ୍ବାରା ନିଯୁକ୍ତି କ୍ଷେତ୍ରରେ ଘଟିଥିବା କ୍ଷତି ଭରଣା କରି ଭବିଷ୍ୟତରେ ଅର୍ଥନୈତିକ ପୁନରୁଦ୍ଧାରକୁ ତ୍ବରାନ୍ବିତ କରିବା ପାଇଁ ପ୍ରୟାସ ହେବା ଆବଶ୍ୟକ ।

ଆଲେଖ୍ୟ : ଜି. ଶ୍ରୀନିବାସନ, ବରିଷ୍ଠ ସାମ୍ବାଦିକ