2019 ICC ବିଶ୍ବ କପ କ୍ରିକେଟ ଆରମ୍ଭ

ଇଂଲଣ୍ଡ ଏବଂ ୱେଲସ ଦ୍ୱାରା ଆୟୋଜିତ ଦ୍ୱାଦଶ ବିଶ୍ବ କପ କ୍ରିକେଟ ଟୁର୍ଣ୍ଣାମେଣ୍ଟ ମେ 30 ତାରିଖରୁ 14 ଜୁଲାଇ 2019 ପର୍ଯ୍ୟନ୍ତ ଖେଳାଯିବ | ସଭ୍ୟ ପୁରୁଷଙ୍କ ଖେଳ କୁହାଯାଉଥିବା କ୍ରିକେଟ ଖେଳର ମହତ୍ୱ ଓ ମହିମା ବିଶ୍ବ କପ ପ୍ରତିଯୋଗୀତାରେ ପ୍ରତୀୟମାନ ହେବ | ପ୍ରାୟ ଦେଢ଼ ମାସ ଧରି ଚାଲିବାକୁ ଥିବା ଏହି ଟୁର୍ଣ୍ଣାମେଣ୍ଟର ଆନ୍ତର୍ଜାତୀୟ କ୍ରିକେଟ ପରିଷଦ - ICC ଆୟୋଜକ ରହିଛି | ପଞ୍ଚମ ଥର ପାଇଁ ବିଶ୍ବ କପ କ୍ରିକେଟ ପ୍ରତିଯୋଗୀତା ଇଂଲଣ୍ଡ ଏବଂ ୱେଲସରେ ଅନୁଷ୍ଠିତ ହେଉଛି | ଏହା ପୂର୍ବରୁ 1975, 1979, 1983 ଏବଂ 1999 ମସିହାରେ ବିଶ୍ବ କପ କ୍ରିକେଟ ପ୍ରତିଯୋଗୀତା ଏଠାରେ ଖେଳାଯାଇଥିଲା |

ଅଳ୍ପ କିଛି ଦେଶ କ୍ରିକେଟ ଖେଳୁଥିଲେ ମଧ୍ୟ ଏହା ଏକ ଅତି ଲୋକପ୍ରିୟ ଖେଳ | ଦର୍ଶକ ଏବଂ ଖେଳପ୍ରେମୀ ମାନଙ୍କ ସଂଖ୍ୟାକୁ ଦୃଷ୍ଟିରେ ରଖି ଫୁଟବଲ ଓ ଲନ ଟେନିସ ପରେ କ୍ରିକେଟ ର ସ୍ଥାନ ରହିଛି | ଉପମହାଦେଶରେ କ୍ରିକେଟକୁ ପ୍ରାୟ ଏକ ଧର୍ମ ଏବଂ ଗୌଣ-ଦେବତା ଭାବେ ଲୋକମାନେ ବିବେଚନା କରିଥାଆନ୍ତି | ଭାରତ, ଶ୍ରୀଲଙ୍କା ଏବଂ ପାକିସ୍ତାନ ସେମାନଙ୍କ ମଧ୍ୟରେ 4 ଟି ବିଶ୍ବ କପ ବିଜୟୀ ହୋଇସାରିଛନ୍ତି | ଦକ୍ଷିଣ ଏସିଆର ଏକ ଦେଶରେ ଜଣେ ପୂର୍ବତନ କ୍ରିକେଟ ଖେଳାଳୀ ପ୍ରଧାନମନ୍ତ୍ରୀ ହୋଇଥିବାବେଳେ କ୍ରିକେଟରେ କୀର୍ତ୍ତିମାନ ଅର୍ଜନ କରିଥିବା ଅନ୍ୟ ପ୍ରମୁଖ ଦେଶ ଗୁଡିକରେ କିଛି ପୂର୍ବତନ କ୍ରିକେଟ ଖେଳାଳୀ ମନ୍ତ୍ରୀ ଏବଂ ଆଇନ ପ୍ରଣୟନକାରୀ ହେବା ଗୌରବ ହାସଲ କରିଛନ୍ତି |

ଚଳିତ ବିଶ୍ବ କପ କ୍ରିକେଟର ପ୍ରଥମ ମ୍ୟାଚ ଆୟୋଜକ ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦି ଓଭାଲ, ଲଣ୍ଡନରେ ଖେଳାଯିବ ଏବଂ କ୍ରିକେଟର ମକ୍କା କୁହାଯାଉଥିବା ଲର୍ଡସରେ ଫାଇନାଲ ମ୍ୟାଚ ଖେଳାଯିବ |

ଟୁର୍ଣ୍ଣାମେଣ୍ଟରେ ଖେଳୁଥିବା 10 ଟି ଯାକ ଟିମର ଗୋଟିଏ ଗୃପ ରହିଛି ଏବଂ ପ୍ରତ୍ୟେକ ଟିମ ଅନ୍ୟ ପ୍ରତିଦ୍ବନ୍ଦୀ ଟିମ ସହ ଥରେ ଲେଖାଏଁ ମୁକାବିଲା କରିବେ, ଏବଂ ଗୃପ ପର୍ଯ୍ୟାୟର ଶେଷରେ ଶୀର୍ଷ ଚାରୋଟି ଟିମ ସେମି-ଫାଇନାଲକୁ ଉନ୍ନୀତ ହେବେ | ଚଳିତ ବିଶ୍ବ କପ କ୍ରିକେଟ ଟୁର୍ଣ୍ଣାମେଣ୍ଟରେ 10 ଟି ଦେଶ ଅଂଶ ଗ୍ରହଣ କରୁଥିବାବେଳେ ସମସ୍ତ ସହଯୋଗୀ ଟିମ ଗୁଡିକୁ ଟୁର୍ଣ୍ଣାମେଣ୍ଟରେ ସ୍ଥାନ ମିଳିନାହିଁ | 2017 ମସିହା ଜୁନ ମାସରେ ଆଫଗାନିସ୍ତାନ ଏବଂ ଆୟରଲ୍ୟାଣ୍ଡ ଟେଷ୍ଟ ମାନ୍ୟତା ପାଇବା ସହ ଟେଷ୍ଟ ମ୍ୟାଚ ଖେଳୁଥିବା ଦେଶ ଗୁଡି଼କର ସଂଖ୍ୟା 10 ରୁ 12 କୁ ବୃଦ୍ଧି ପାଇଛି |

ଦୁଃଖର ବିଷୟ ଯେ, କ୍ରିକେଟ ଖେଳର ଆବିର୍ଭାବ ହୋଇଥିବା ସ୍ଥାନ ଇଂଲଣ୍ଡ ଏ ପର୍ଯ୍ୟନ୍ତ ବିଶ୍ବ କପ ବିଜୟୀ ହେବାର ସୌଭାଗ୍ୟ ପ୍ରାପ୍ତ କରିପାରିନାହିଁ | ତେବେ ଚଳିତ ବିଶ୍ବ କପର ଆୟୋଜକ ଭାବେ ଏଥର ବିଶ୍ବ କପ ଚମ୍ପିୟାନ ହେବା ପାଇଁ ଇଂଲଣ୍ଡ ଟିମ ସ୍ଥାନୀୟ ଲୋକମାନଙ୍କର ଲୋକପ୍ରିୟ ହୋଇଛି | ତେବେ ଭାରତୀୟ ଟିମ ଉପରେ ମଧ୍ୟ ସମସ୍ତଙ୍କର ନଜର ରହିଛି ଏବଂ ଚଳିତ ବିଶ୍ବ କପ ବିଜୟୀ ହେବାର ଆଶା ରହିଛି | ଭାରତ ଏପର୍ଯ୍ୟନ୍ତ ଦୁଇଥର, 1983 ଏବଂ 2011 ମସିହାରେ ବିଶ୍ବ କପ ବିଜୟୀ ହୋଇପାରିଛି | 2003 ମସିହାରେ ଭାରତ ରନର-ଅପ ହୋଇଥିଲା ଏବଂ 2015 ମସିହାରେ ଅଷ୍ଟ୍ରେଲିଆରେ ଖେଳାଯାଇଥିବା ବିଶ୍ବ କପ କ୍ରିକେଟ ଟୁର୍ଣ୍ଣାମେଣ୍ଟରେ ଭାରତ ସେମି-ଫାଇନାଲ ପର୍ଯ୍ୟାୟକୁ ଉନ୍ନୀତ ହୋଇଥିଲା |

ଭାରତୀୟ ଟିମର ନେତୃତ୍ୱ ବିରାଟ କୋହଲି ନେଉଛନ୍ତି ଯିଏକି ଜଣେ ପ୍ରତିଭାବାନ ଏବଂ ଚିତାକର୍ଷକ ଖେଳାଳୀ | ଭାରତର, ଖେଳର ସମସ୍ତ ବିଭାଗ - ବ୍ୟାଟିଙ୍ଗ, ବୋଲିଙ୍ଗ ଏବଂ ଫିଲଡିଂଗରେ ପାରଦର୍ଶିତା ରହିଛି | ୱିକେଟ କିପର ମହେନ୍ଦ୍ର ସିଂ ଧୋନୀ ମଧ୍ୟ ଟିମର ଜଣେ ବରିଷ୍ଠ ଖେଳାଳୀ ଏବଂ 2011 ଓ 2015 ମସିହାରେ ଭାରତୀୟ ବିଶ୍ବ କପ ଟିମର ଧୋନୀ କ୍ୟାପଟେନ ଥିବା ଦୃଷ୍ଟିରୁ ସେ ଓ ତାଙ୍କର ଅଭିଜ୍ଞତା ଟିମ ପାଇଁ ଗୁରୁତ୍ତ୍ୱପୂର୍ଣ୍ଣ ଭୂମିକା ନିଭାଇବା ଆଶା ରଖାଯାଇଛି | 2011 ମସିହା ବିଶ୍ବ କପ କ୍ରିକେଟର ଫାଇନାଲରେ ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ସେ ଶ୍ରୀଲଙ୍କା ବିରୁଦ୍ଧରେ ବିଜୟ ସୂଚକ ଛକ୍କା ମାରି ଭାରତକୁ ଚମ୍ପିୟାନ କରାଇଥିଲେ | କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକରଙ୍କୁ ତାହା ଏକ ସମ୍ମାନସୂଚକ ପୁରସ୍କାର ଥିବା ମଧ୍ୟ ବିବେଚନା କରାଯାଉଛି |

ଚଳିତ କ୍ରିକେଟ ବିଶ୍ବ କପରେ ଭାରତ ଏହାର ପ୍ରଥମ ମ୍ୟାଚରେ ଜୁନ 5 ତାରିଖରେ ଦକ୍ଷିଣ ଆଫ୍ରିକାକୁ ଭେଟିବ | ସାଉଥାମପ୍ଟନ, ରୋଜ ବାଉଲରେ ଏହି ମ୍ୟାଚ ଖେଳାଯିବ | ଭାରତ, ଏହା ପରେ ଜୁନ 9 ତାରିଖରେ ଅଷ୍ଟ୍ରେଲିଆ ବିରୁଦ୍ଧରେ ଏବଂ ଜୁନ 13 ତାରିଖରେ ନ୍ୟୁଜିଲାଣ୍ଡ ବିରୁଦ୍ଧରେ ପରବର୍ତ୍ତୀ ମ୍ୟାଚ ଖେଳିବ | ଜୁନ 16 ତାରିଖରେ ଓଲ୍ଡ ଟ୍ରାଫର୍ଡ, ମାଞ୍ଚେଷ୍ଟରରେ ଭାରତ ଏହାର ଚିର ପ୍ରତିଦ୍ବନ୍ଦୀ ପାକିସ୍ତାନ ବିରୁଦ୍ଧରେ ମ୍ୟାଚ ଖେଳିବ | ଏହି ମ୍ୟାଚ ପାଇଁ ସମସ୍ତ ଟିକେଟ ବିକ୍ରୟ ଶେଷ ହୋଇଯାଇଛି | ବିଶ୍ବ କପ ପର୍ଯ୍ୟାୟରେ ଭାରତ ଏ ପର୍ଯ୍ୟନ୍ତ ପାକିସ୍ତାନ ଠାରୁ କୌଣସି ମ୍ୟାଚରେ ପରାଜିତ ହୋଇନାହିଁ | ଏହି ବିଜୟ ଅଭିଯାନ ବଜାୟ ରଖି ଭାରତ ଏହାର ରେକର୍ଡ ଜାରି ରଖିବା ଚାହିଁବ | ପରେ ଭାରତ ଏହାର ପରବର୍ତ୍ତୀ ମ୍ୟାଚ ଗୁଡିକରେ ଆଫଗାନିସ୍ତାନ, ୱେଷ୍ଟଇଣ୍ଡିଜ, ଆୟୋଜକ ଇଂଲଣ୍ଡ, ବାଙ୍ଗଲାଦେଶ ଏବଂ ଶ୍ରୀଲଙ୍କା ବିରୁଦ୍ଧରେ ମୁକାବିଲା କରିବ |

ପ୍ରଥମ ସେମି-ଫାଇନାଲ ମ୍ୟାଚ ଜୁଲାଇ 9 ତାରିଖରେ ଟୁର୍ଣ୍ଣାମେଣ୍ଟର ପ୍ରଥମ ଏବଂ ଚତୁର୍ଥ କ୍ୱାଲିଫାୟର ଟିମ ମଧ୍ୟରେ ଓଲ୍ଡ ଟ୍ରାଫର୍ଡ, ମାଞ୍ଚେଷ୍ଟରରେ ଖେଳାଯିବ | ଦ୍ଵିତୀୟ ଏବଂ ତୃତୀୟ କ୍ୱାଲିଫାୟର ଟିମ ମଧ୍ୟରେ ଦ୍ଵିତୀୟ ସେମି-ଫାଇନାଲ ମ୍ୟାଚ ଜୁଲାଇ 11 ତାରିଖରେ ଏଜବାଷ୍ଟନ, ବର୍ମିଙ୍ଗହମରେ ଖେଳାଯିବ | ଫାଇନାଲ ମ୍ୟାଚର ବିଜେତା ଟିମ, ବିଶ୍ବ କପ ଟ୍ରଫି ସହ ନଗଦ 4 ମିଲିୟନ ଡଲାର ପୁରସ୍କାର ରାଶି ବିଜୟୀ ହେବ | କ୍ରିକେଟ ପ୍ରେମୀ ମାନେ ଇଂଲଣ୍ଡରେ ଚଳିତ ବର୍ଷର ଗ୍ରୀଷ୍ମ ଋତୁ ବେଶ ଉତ୍ସାହଜନକ ହେବାର ଆଶା ବାନ୍ଧି ରଖିଛନ୍ତି |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ
ଅନୁବାଦ : ଅନୀଲ କୁମାର ପଟ୍ଟନାୟକ