ଶେଷ ହେଲା ଗଣତନ୍ତ୍ରର ମହାପର୍ବ

ଦେଶର 17 ତମ ଲୋକସଭା ନିର୍ବାଚନ 7ଟି ପର୍ଯ୍ୟାୟରେ  ସଫଳତାର ସହ ସମ୍ପୁର୍ଣ୍ଣ ହୋଇଛି |ଚଳିତ ନିର୍ବାଚନରେ ବହୁ ସଂଖ୍ଯାରେ ମତଦାତା ସେମାନଙ୍କ ମତାଧିକାର ସାବ୍ୟସ୍ତ କରିଛନ୍ତି |ମୋଟାମୋଟି ଭାବେ କହିବାକୁ ଗଲେ ଏହି ନିର୍ବାଚନରେ  900 ନିୟୁତ ମତଦାତା  ମଧ୍ୟରୁ ଶତକଡା 66 ଭାଗ ଭୋଟର ମତଦାନ କରିଛନ୍ତି | ଭାରତ, ଅଂଶଗ୍ରହଣ ମୂଳକ ଗଣତନ୍ତ୍ରରେ ଏହାର ଅନ୍ତର୍ନିହିତ ଶକ୍ତି, ଆସ୍ଥା ତଥା  ବିଶ୍ଵାସର ପୁନଃ ପ୍ରତିଷ୍ଠା କରିଛି  |

ବିଶ୍ଵର ସର୍ବ ବୃହତ ଗଣତନ୍ତ୍ର ରେ ବିପୁଳ ସଂଖ୍ଯାରେ ଭୋଟ ଦାନ ହୋଇଛି |ଭାରତ ର ନିର୍ବାଚନ କମିଶନ ଏହି ଭୋଟ ଗ୍ରହଣ ଲାଗି ବରିଷ୍ଠ ନାଗରିକ ଓ ଦିବ୍ୟାଙ୍ଗ ମତଦାତା  ମାନଙ୍କ ପାଇଁ ବ୍ୟାପକ ବନ୍ଦୋବସ୍ତ ଗ୍ରହଣ କରିଥିଲେ | ମଧ୍ୟପ୍ରଦେଶର ଇନ୍ଦୋର ବାସିନ୍ଦା ତିନି ଫୁଟ ଉଚ୍ଚ ବିନୀତା ଜୈନ ଭୋଟ ଦାନ କରି ଗର୍ବ ର ସହ ତାଙ୍କ କାଳି ଯୁକ୍ତ ଆଙ୍ଗୁଳି  ପ୍ରଦର୍ଶନ କରିଥିଲେ | ବିହାର ର ପାଟଣା ରେ ଯୋଡା ଜାଁଆଳା ଭଗ୍ନୀ ସବା ଓ ଫାରା  ପ୍ରଥମ ଥର ଲାଗି ଚଳିତ ନିର୍ବାଚନରେ ଦୁଇଜଣ ପୃଥକ  ଭାବେ ମତଦାନ କରିଥିଲେ | ବିଦେଶରେ ବସବାସ କରୁଥିବା ଭାରତୀୟ ମାନଙ୍କୁ ମଧ୍ୟ ଏହି ଲୋକସଭା ନିର୍ବାଚନ ଗଭୀର ଭାବେ ଅନୁପ୍ରାଣିତ କରିଛି | ଚଳିତ ଭୋଟ  ଗ୍ରହଣ ସମୟରେ ବହୁ ସଂଖ୍ଯାରେ ଭାରତୀୟ କେବଳ ଭୋଟ ଦାନ ପାଇଁ ଭାରତକୁ ଆସି  ନିଜର ମତାଧିକାର ସାବ୍ୟସ୍ତ କରିଥିଲେ | ଦୈନିକ ମଜୁରି କରୁଥିବା ଶ୍ରମିକ ମାନଙ୍କ ସମେତ ବହୁ ସଂଖ୍ଯାରେ ଲୋକ ନିଜ ନିଜ କାର୍ଯ୍ୟସ୍ଥଳୀ ରୁ ଛୁଟି ନେଇ ଭୋଟ ଦେବାକୁ ନିଜ ଜନ୍ମସ୍ଥାନକୁ ଯାଇଥିଲେ | ଭୋଟ ଦେବା ଲାଗି  ସଚେତନତା ସୃଷ୍ଟି ପାଇଁ ଅପ୍ରତ୍ଯାଶିତ ଭାବେ ପ୍ରଚାର ଅଭିଯାନ କରାଯାଇଥିବାରୁ ଚଳିତ ନିର୍ବାଚନରେ ବିପୁଳ  ସଂଖ୍ଯାରେ  ଭୋଟ ରେକର୍ଡ କରାଯାଇଛି | ଚଳିତ ବର୍ଷ 85 ନିୟୁତ ନୂତନ ମତଦାତାଙ୍କ  ନାମ ପଞ୍ଜୀକୃତ ହୋଇଥିବା  ବିଷୟରୁ   ନିର୍ବାଚନ କମିଶନଙ୍କ ବ୍ୟାପକ ପ୍ରସ୍ତୁତି ବିଷୟ ସ୍ପଷ୍ଟ ପ୍ରତୀତ ହେଇଛି |

ରବିବାର ଦିନ ଆଠୋଟି ରାଜ୍ୟରେ 59ଟି ଲୋକସଭା ଆସନ ପାଇଁ ଚୁଡାନ୍ତ ପର୍ଯ୍ୟାୟ ଭୋଟ ଗ୍ରହଣ ହୋଇଥିଲା | ସମସ୍ତ 542ଟି ଲୋକସଭା ଆସନ ପାଇଁ ନିର୍ବାଚନ ସମ୍ପର୍ଣ୍ଣ ହୋଇଛି | ନିର୍ବାଚନ କମିଶନ, ମତଦାତା ମାନଙ୍କୁ ପ୍ରଭାବିତ କରିବା ଲାଗି ଅର୍ଥ ବଳର ବ୍ୟବହାର କରାଯାଉଥିବା ଅଭିଯୋଗ ବିରୁଦ୍ଧରେ କାର୍ଯ୍ୟାନୁଷ୍ଠାନ ସ୍ୱରୂପ ତାମିଲନାଡୁ ର ଭେଲୋର ନିର୍ବାଚନମଣ୍ଡଳୀ ର ନିର୍ବାଚନ ବାତିଲ କରିଦେଇଥିଲେ | ରାଷ୍ଟ୍ରପତି 545 ଆସନ ବିଶିଷ୍ଟ ଲୋକସଭାକୁ  ଦୁଇ ଜଣ ଆଙ୍ଗ୍ଲୋ-ଇଣ୍ଡିଆନ ସମ୍ପ୍ରଦାୟ ର ବ୍ୟକ୍ତି ଙ୍କୁ ମନୋନୀତ କରିଥାନ୍ତି  |

ହିମାଚଳପ୍ରଦେଶର କିନଉର ରେ 102 ବର୍ଷ ବୟସ୍କ ଶ୍ୟାମ ସାରନ ନେଗୀ ଭୋଟ ଦେବାକୁ ଯାଇଥିବା ବେଳେ  ପୋଲିଂ ଅଧିକାରୀ ମାନେ ତାଙ୍କୁ ସାଦରେ ସ୍ଵାଗତ ଜଣାଇଥିଲେ | ସେ କେବଳ ଜଣେ  ବରିଷ୍ଠ ନାଗରିକ ନୁହେଁ ବରଂ ଭାରତ ର ପ୍ରଥମ ମତଦାତା , ତେଣୁ ବାସ୍ତବରେ ସେ ହିଁ ସ୍ଵାଗତ ସମ୍ବର୍ଦ୍ଧନାର ପାତ୍ର ଅଟନ୍ତି  | ଉଲ୍ଲେଖ ଯୋଗ୍ୟ ଯେ ସେ ବିଗତ  1951 ରେ ଅନୁଷ୍ଠିତ ନିର୍ବାଚନରେ ମଧ୍ୟ ନିଜର ମତଦାନ କରିଥିଲେ | ତାଙ୍କ ରାଜ୍ୟ ହିମାଚଳପ୍ରଦେଶ ସହ ବିହାର, ପଶ୍ଚିମବଙ୍ଗ, ପଞ୍ଜାବ, ମଧ୍ୟପ୍ରଦେଶ, ଉତ୍ତରପ୍ରଦେଶ, ଝାଡଖଣ୍ଡ ଓ କେନ୍ଦ୍ରଶାସିତ ଅଞ୍ଚଳ ଚଣ୍ଡିଗଡରେ ସପ୍ତମ ତଥା ଅନ୍ତିମ ପର୍ଯ୍ୟାୟ ଭୋଟ ଗ୍ରହଣ ହୋଇଥିଲା | ଏହି ପର୍ଯ୍ୟାୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ 918ରୁ ଅଧିକ ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନ ରେ ପ୍ରତିଦ୍ୱନ୍ଦିତା କରୁଛନ୍ତି  |ଶେଷ ପର୍ଯ୍ୟାୟ ନିର୍ବାଚନରେ ପ୍ରାୟ 10 ନିୟୁତ ମତଦାତା ସେମାନଙ୍କ ମତ ଦାନ ଲାଗି ଯୋଗ୍ୟ ବିବେଚିତ  ହୋଇଥିବା ବେଳେ ଏଥିରେ 64 ପ୍ରତିଶତ ମତଦାନ   ରେକର୍ଡ କରାଯାଇଛି |

ଚଳିତ  ନିର୍ବାଚନରେ ବିପୁଳ ସଂଖ୍ଯାରେ ଭୋଟ ପଡିଥିବାରୁ ଅବାଧ  ଓ ନିରପେକ୍ଷ ତଥା ଶାନ୍ତିପୂର୍ଣ୍ଣ ଭାବେ ନିର୍ବାଚନ କରେଇଥିବା  ନିର୍ବାଚନ କମିଶନକୁ  ଏହାର ସବୁ ଶ୍ରେୟ ଯାଉଛି |2009 ନିର୍ବାଚନ ସମୟରେ ପୁରୁଷ ଓ ମହିଳା ମତଦାତାଙ୍କ ମଧ୍ୟରେ 9 ପ୍ରତିଶତ ବ୍ଯବଧାନ  ରହିଥିବା ବେଳେ 2014 ରେ ଏହା ହ୍ରାସ ପାଇ 1.4 ପ୍ରତିଶତ ରହିଥିଲା ଓ  ଚଳିତ ନିର୍ବାଚନରେ ଏହି ବ୍ଯବଧାନ ମାତ୍ର 0.4 ପ୍ରତିଶତ ରହିଛି |ଏପରିକି କେତୋଟି ରାଜ୍ୟରେ  ପୁରୁଷ ମାନଙ୍କ ତୁଳନାରେ ଅଧିକ ମହିଳା ମତଦାତା ଭୋଟ ଦେଇଥିବାର ମଧ୍ୟ ଦେଖିବାକୁ ମିଳିଛି |

ନିର୍ବାଚନ ପ୍ରକ୍ରିୟାର ଏହି ଦୀର୍ଘ 38 ଦିନ ମଧ୍ୟରେ ବିଭିନ୍ନ କେନ୍ଦ୍ରୀୟ ତଥା ରାଜ୍ୟ ସରକାରୀ ବିଭାଗ ଗୁଡିକର ବହୁ ସଂଖ୍ଯାରେ କର୍ମଚାରୀ ମାନଙ୍କ ସହାୟତାରେ ନିର୍ବାଚନ କମିଶନ ସୂଚାରୁ ରୂପେ  ଭୋଟ ଗ୍ରହଣ ସମ୍ପର୍ଣ୍ଣ କରିଛି |ଅବାଧ ଓ ନିରପେକ୍ଷ ନିର୍ବାଚନ କରେଇବା ନିମନ୍ତେ ଅର୍ଦ୍ଧସାମରିକ ବାହିନୀ ର ବହୁ ଯବାନ ଙ୍କୁ ମୁତୟନ କରାଯାଇଥିଲା | ନିର୍ବାଚନ କମିଶନ, ନଗଦ ଅର୍ଥ, ମଦ୍ୟ ତଥା ଅନ୍ୟ ପ୍ରକାରର ପ୍ରଲୋଭନ ସାମଗ୍ରୀ ଉପରେ କଡା ନଜର ରଖିଥିଲେ | ଏହି ନିର୍ବାଚନ ସମୟରେ ମୋଟ  3,400 କୋଟି ଟଙ୍କା ସମ୍ବଳିତ ନିଷିଦ୍ଧ ସାମଗ୍ରୀ ଜବତ କରାଯାଇଛି | ଜବତ ହୋଇଥିବାଏହି ସାମଗ୍ରୀ ର ମୂଲ୍ୟ ସରକାରଙ୍କ ଦ୍ଵାରା ନିର୍ବାଚନ ଲାଗି କରାଯାଇଥିବା  ଖର୍ଚ୍ଚରୁ ମଧ୍ୟ  ଅଧିକ ବୋଲି ଜଣାପଡିଛି  |ଜବତ କରାଯାଇଥିବା ଅର୍ଥରାଶିକୁ ଭାରତ ର ସମେକିତ ପାଣ୍ଠି ରେ ଜମା କରାଯିବ ଯାହା ଦ୍ଵାରା କେନ୍ଦ୍ରୀୟ ବଜେଟ ପ୍ରସ୍ତୁତ କରାଯାଇଥାଏ |

ମୋଟ 17ଟି  ଲୋକସଭା ନିର୍ବାଚନରେ  ନବମ ଥର ଲାଗି 60 ପ୍ରତିଶତରୁ ଅଧିକ  ଭୋଟ ପଡିଥିବାରୁ ଏହାର ଶ୍ରେୟ ଦେଶର ଜାଗୃତ ମତଦାତା ମାନଙ୍କୁ ଯାଉଛି | ବିପୁଳ ସଂଖ୍ଯାରେ ଭୋଟଦାନ ଭାରତର ଗଣତାନ୍ତ୍ରିକ ରାଜନୀତି ପ୍ରତି  ଲୋକମାନଙ୍କ ପ୍ରଗାଢ ଆସ୍ଥା ଦର୍ଶାଇଥାଏ |

ମେ 23 ତାରିଖରେ ଭୋଟ ଗଣନା କରାଯିବ ଓ ଏଥି ସହ ଅତିରିକ୍ତ ପଦକ୍ଷେପ ସ୍ୱରୂପ  ଭିଭିପାଟ ଅର୍ଥାତ ନିର୍ବାଚନ କେନ୍ଦ୍ର ଗୁଡିକର  ପେପର  ସ୍ଲିପ ଗୁଡିକ  ସହ  ମିଳାଯିବ   | 2019 ଲୋକସଭା ନିର୍ବାଚନରେ ଏହା  ସ୍ପଷ୍ଟ ହୋଇଛି ଯେ ଭାରତରେ ବାସ୍ତବିକ ଭାବେ ଜନମତରେ ହିଁ ପ୍ରକୃତ  କ୍ଷମତା ନିହିତ ରହିଛି |

ମୂଳ ଲେଖା : ମନୀଷ ଆନନ୍ଦ, ବରିଷ୍ଠ ସ୍ଵତନ୍ତ୍ର ସମ୍ବାଦଦାତା, ନ୍ୟୁ ଇଣ୍ଡିଆନ ଏକ୍ସପ୍ରେସ

ଅନୁବାଦ : ରୀତା ଯୋଶୀ