ଏକ ଦୃଢ ସରକାର ପାଇଁ ଜନାଦେଶ

ଭାରତୀୟ ଜନତା ପାର୍ଟି (BJP) ନେତୃତ୍ଵାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (NDA)କୁ 900 ନିୟୁତରୁ ଅଧିକ ମତଦାତାଙ୍କ ଏକ ସ୍ପଷ୍ଟ ତଥା ଏକ ନିର୍ଣ୍ଣାୟକ ଜନାଦେଶ ମିଳିଛି | ବିଗତ 35 ବର୍ଷରେ ପ୍ରଥମ ଥର ଲାଗି ଭାରତ ସରକାରଙ୍କ ଜନ ପ୍ରତିନିଧି ସଦନ ଲୋକସଭାରେ ଏକମାତ୍ର ପାର୍ଟି ବିଜେପି 303 ଆସନ ଦାଖଲ କରି ଏକକ ସଂଖ୍ୟା ଗରିଷ୍ଠ ଦଳର ମାନ୍ୟତା ପାଇଛି | ଏହି ମହାବିଜୟର ମହାନାୟକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ସୁରକ୍ଷା ଓ ବିକାଶ ପ୍ରସଙ୍ଗ ନେଇ ଦଳୀୟ ମନ୍ତ୍ର ସହ ଲଗାତାର ଦ୍ଵିତୀୟ ଥର ଲାଗି ବିଜୟ ହାସଲ କରିଛନ୍ତି |କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଙ୍କ ନେତୃତ୍ବରେ ପୁଣି ଆଉ ପାଞ୍ଚ ବର୍ଷ ପାଇଁ ଜନତା ରାୟ ଦେଇଛନ୍ତି|.

ସପ୍ତଦଶ ଲୋକସଭା ଗଠନ ଲାଗି ଅନୁଷ୍ଠିତ ସାତ ପର୍ଯ୍ୟାୟ ବିଶିଷ୍ଟ ନିର୍ବାଚନରେ ଭାରତୀୟ ମତଦାତା ମାନେ ବିପୁଳ ସଂଖ୍ଯାରେ ଭୋଟ ଦେଇ ବିଜେପିକୁ ଭାରି ସମର୍ଥନ ଦେଇଛନ୍ତି ଓ ଉଣେଇଶ ଜନାଦେଶ ସ୍ଥିତାବସ୍ଥା ସପକ୍ଷରେ ଯାଇଛି | ପୂର୍ବରୁ ଅଳ୍ପ ମାତ୍ର ସ୍ଥିତି ରହିଥିବା ପଶ୍ଚିମବଙ୍ଗ ଓ ତେଲେଙ୍ଗନା ଭଳି ରାଜ୍ୟରେ ମଧ୍ୟ ବିଜେପି ନିଜର ସ୍ଥିତି ସୁଦୃଢ କରିବାରେ ସଫଳ ହୋଇଛି | ତେଣେ ଇଣ୍ଡିଆନ ନେସନାଲ କଂଗ୍ରେସ (ଆଇଏନଏସ) ନେତୃତ୍ଵାଧୀନ ବିରୋଧୀ ପାର୍ଟି ଶୋଚନୀୟ ଭାବେ ପରାଜୟ ବରଣ କରିଛି |

ଗତ ପାଞ୍ଚ ବର୍ଷ ମଧ୍ୟରେ 133 ଟି ଉନ୍ନୟନ ମୂଳକ ପ୍ରକଳ୍ପ ଉନ୍ମୋଚିତ କରି ଏନଡ଼ିଏ ସରକାର ଉଲ୍ଲେଖନୀୟ କାର୍ଯ୍ୟ କରିଛନ୍ତି | ସ୍ବଚ୍ଛତା ,ରନ୍ଧନ ଗ୍ଯାସ, ସବସିଡି ପ୍ରଦାନ, ବ୍ଯାଙ୍କ ଖାତା ନଥିବା ବହୁ ସଂଖ୍ଯାରେ ଲୋକ ମାନଙ୍କ ଲାଗି ବ୍ୟାଙ୍କ ଖାତା ଖୋଲିବା ଆଦି ଭଳି ଅନେକ ମୂଳ ସ୍ତରର ପ୍ରସଙ୍ଗ ଉପରେ ଏନଡ଼ିଏ ର ମହତ୍ବପୂର୍ଣ୍ଣ କାର୍ଯ୍ୟକୁ ଦେଶବାସୀଙ୍କ ଦ୍ଵାରା ଉଚ୍ଛ୍ଵସିତ ଭାବେ ସାଦରେ ଗ୍ରହଣ କରାଯାଇଥିଲା |

ଏନଡ଼ିଏ ସରକାର ଜାତୀୟ ସୁରକ୍ଷା କ୍ଷେତ୍ରରେ ଦୃଢ ତଥା ଅତ୍ୟନ୍ତ ସାହସିକ ପଦକ୍ଷେପ ଗ୍ରହଣ କରିଛନ୍ତି | ସନ୍ତ୍ରାସବାଦ କୁ ଆଦୌ ବରଦାସ୍ତ କରାଯିବ ନାହିଁ ବୋଲି ଏହି ସରକାର ସ୍ପଷ୍ଟ ବାର୍ତ୍ତା ଦେଇଛନ୍ତି |ସନ୍ତ୍ରାସବାଦର ମୂଳୋତ୍ପାଟନ ଲାଗି ବିଶେଷକରି ସୀମା ପାର ସନ୍ତ୍ରାସବାଦ ର ମୂଳୋପୋଛ ପାଇଁ ସଂଗ୍ରାମ ଦିଗରେ ଭାରତୀୟ ନିରାପତ୍ତାବାହିନୀ ଉଚ୍ଚ ସଫଳତା ହାସଲ କରିଛନ୍ତି | ସେମାନେ ଜାମ୍ମୁ ଓ କାଶ୍ମୀର ରେ ଉତ୍ପାତ କରୁଥିବା ସନ୍ତ୍ରାସବାଦୀ ମାନଙ୍କ ଉପରେ ଉଚିତ ଲଗାମ ଲଗେଇଛନ୍ତି | ଏହା ବ୍ଯତୀତ ପୁଲୱାମା ସନ୍ତ୍ରାସବାଦୀ ଆକ୍ରମଣ ପରେ ପାକିସ୍ତାନ ଅଧିକୃତ କାଶ୍ମୀର ର ବାଲାକୋଟ, ଚକଉଟି ଓ ମୁଜାଫରାବାଦ ରେ ଜେସ –ଏ-ମହମ୍ମଦ(JeM) ର ଶିବିର ଉପରେ ଭାରତର ପାଲଟା ଆକ୍ରମଣ ଏକ ଦୃଷ୍ଟାନ୍ତ ସ୍ୱରୂପ | ଏଥିସହିତ ପାକିସ୍ତାନ ଅଞ୍ଚଳରେ ଦୁର୍ଘଟଣା ଗ୍ରସ୍ତ ହୋଇଥିବା ଭାରତୀୟ ବିମାନ ବାହିନୀ ୱିଙ୍ଗ କମାଣ୍ଡର ଅଭିନନ୍ଦନ ବର୍ତ୍ତମାନଙ୍କୁ ନିରାପଦରେ ମୁକୁଳେଇବାରେ ମଧ୍ୟ ମୋଦୀ ସରକାର ସକ୍ଷମ ହୋଇଥିଲେ |

ପ୍ରଧାନମନ୍ତ୍ରୀ ମୋଦୀ ଭାରତ ର ବିଦେଶୀ ନୀତି କୁ ମଧ୍ୟ ଏକ ନୂତନ ଦିଗ ଦେବାରେ ସଫଳ ହୋଇଛନ୍ତି | ଭାରତର ପୂର୍ବାଞ୍ଚଳ ପଡୋଶୀ ରାଷ୍ଟ୍ର ଗୁଡିକ ସହ ସମନ୍ଵୟ ରକ୍ଷା ପାଇଁ ତାଙ୍କର ‘ଆକ୍ଟ ଇଷ୍ଟ’ ନୀତି ମହତ୍ବପୂର୍ଣ୍ଣ ଭୂମିକା ନିଭାଇଛି | ସଫଳତା ର ସହ ଡୋକଲାମ ଅଚଳାବସ୍ଥା ର ପରିସମାପ୍ତି ଘଟିଥିବାରୁ ଆମେରିକା, ରୁଷ,ଚୀନ,ସାଉଦି ଆରବ, ଇରାନ ଓ ଇସ୍ରାଏଲ ସହ ଘନିଷ୍ଠ ସମ୍ପର୍କ ସ୍ଥାପନ ଭାରତୀୟ ମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଥିଲା |

ଉଣେଇଶ ନିର୍ବାଚନ ହେଉଛି ଏକ ଆଶା ଓ ଆକାଂକ୍ଷା ଭରା ଜନାଦେଶ | ମତଦାତା ମାନେ ଜାତି, ଧର୍ମ, ଭାଷା, ଲିଙ୍ଗ ତଥା ବର୍ଣ୍ଣ ନିର୍ବିଶେଷରେ ଶ୍ରୀ ମୋଦୀଙ୍କୁ ସ୍ପଷ୍ଟ ବହୁମତ ଦେଇଥିବା ବେଳେ ଜାତିଗତ ମେଣ୍ଟକୁ ପ୍ରତ୍ୟାକ୍ଷାନ କରିଛନ୍ତି | ଭୋଟର ମାନେ ଏକ ଉତ୍ତମ ଜୀବନ ମାନର ଆକାଂକ୍ଷା ରଖିଛନ୍ତି ଓ ଶ୍ରୀମୋଦୀ ଙ୍କ ଭଳି ଜଣେ ଟାଣୁଆ ନେତା ହିଁ ଏହି ଆଶା ପୂରଣ କରିପାରିବେ ବୋଲି ଦେଶବାସୀ ବିଶ୍ଵାସ କରନ୍ତି |

ଏବେ ପ୍ରଧାନମନ୍ତ୍ରୀ ଙ୍କ ପାଇଁ କାର୍ଯ୍ୟ ଆହୁରି ଜଟିଳ ହୋଇପଡିବ | କାରଣ ଭୋଜନ,ନଗଦ ସହାୟତା, ବାସଗୃହ ତଥା ଶୌଚଳୟ ଭଳି ସୁବିଧା ପାଉଥିବା ଗରିବ ତଥା ନିଃସହାୟ ଲୋକଙ୍କ ଆଶା ଆକାଂକ୍ଷା ଆହୁରି ବଢିଯିବ |ଭାରତ ପ୍ରାୟ 2,000 ଡଲାର ପ୍ରତି ବ୍ୟକ୍ତି ଆୟ ସହ ମଧ୍ୟବିତ୍ତ ଆୟ ବର୍ଗରେ ସାମିଲ ହେବାକୁ ଯାଉଛି | ଅଳ୍ପ ଦାବି କରୁଥିବା ଗ୍ରାମୀଣ ଯୁବକ ମାନେ ମଧ୍ୟ ରୋଜଗାର ମାମଲା ନେଇ ସହରୀ ଯୁବକ ମାନଙ୍କ ସହ ତାଳ ଦେଇ ଚାଲିବାକୁ ଚେଷ୍ଟା କରିବେ |

ଭାରତୀୟ ଅର୍ଥବ୍ୟବସ୍ଥାକୁ ମଧ୍ୟ ମଜବୁତ କରିବାର ଆବଶ୍ୟକତା ରହିଛି | ଗତ ପାଞ୍ଚ ବର୍ଷ ମଧ୍ୟରେ ଏକ ଅନୁକୂଳ ବାତାବରଣ ସୃଷ୍ଟି ହୋଇଥିବାରୁ ଖାଦ୍ୟ ସାମଗ୍ରୀରେ ସାମାନ୍ୟ ବୃଦ୍ଧି ପାଇଛି | ଏବେ ଆନ୍ତର୍ଜାତୀୟ ଅର୍ଥନୈତିକ ମାନ୍ଦାବସ୍ଥା ହ୍ରାସ ପାଇବାକୁ ଯାଉଛି |ବର୍ତ୍ତମାନ ସ୍ଥିତିରେ ବୈଶ୍ଵିକ ବାଣିଜ୍ୟ ବିବାଦ ଜାରି ରହିଥିବା ବେଳେ ଏହି ବିବାଦ ଆହୁରି ଘନୀଭୂତ ହେବାର ଅନୁମାନ କରାଯାଉଛି |

ପରବର୍ତ୍ତୀ ସରକାରଙ୍କୁ ନିଯୁକ୍ତି ସୃଷ୍ଟି କରିବା ନେଇ ପ୍ରମୁଖତାର ସହ କାର୍ଯ୍ୟ କରିବାକୁ ପଡିବ |ଦେଶର କୋଟି କୋଟି ବେରୋଜଗାର ଯୁବପିଢିଙ୍କୁ ନିଯୁକ୍ତି ଦେବା ସେତେଟା ସହଜ ସାଧ୍ୟ ହେବ ନାହିଁ |’ସ୍କିଲ ଇଣ୍ଡିଆ’ ଓ ‘ମୁଦ୍ରା’ ଋଣ ଯୋଜନା ଭଳି ଯୋଜନାକୁ ଅଧିକ ପ୍ରୋତ୍ସାହିତ କରିବାର ଆବଶ୍ୟକତା ଅଛି ତେଣୁ ବର୍ତ୍ତମାନ ଶିକ୍ଷା ଓ ବିନିର୍ମାଣ କ୍ଷେତ୍ର ଉପରେ ଅଧିକ ଜୋର ଦେବାକୁ ପଡିବ |

ଟିକସ ବ୍ୟବସ୍ଥାରେ ସଂସ୍କାର ଆଣିବାର ଆବଶ୍ୟକତା ରହିଛି କାରଣ ଏକ ରାଷ୍ଟ୍ର ଯୁକ୍ତ ଜିଏସଟି ଲାଗୁ ହୋଇସାରିଛି କିନ୍ତୁ ଏବେ ମଧ୍ୟ ଏହାକୁ ସରଳୀକରଣ କରିବାର ଜରୁରୀ ରହିଛି | ଏହାକୁ କାର୍ଯ୍ୟକାରୀ କରିବା ଏତେ ସହଜ କଥା ନୁହେଁ କାରଣ ଲୋକମାନଙ୍କ କ୍ରୟ କ୍ଷମତା ବୃଦ୍ଧି କରିବା ସହ ସରକାରଙ୍କ ରାଜସ୍ୱ ମଧ୍ୟ ବୃଦ୍ଧି କରିବାକୁ ପଡିବ |

2014 ତୁଳନାରେ ବର୍ତ୍ତମାନ ଲୋକଙ୍କ ଆହୁରି ଆଶା ବଢି ଯାଇଛି | ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଶ୍ଚିତ ରୂପରେ ଏହି ସବୁ ସମସ୍ଯାର ସମାଧାନ କରିବେ ଓ ଭାରତକୁ ଏକ ପ୍ରମୁଖ ଅର୍ଥନୀତିରେ ପରିଣତ କରିବେ ବୋଲି ଦେଶବାସୀଙ୍କ ପ୍ରଗାଢ ବିଶ୍ଵାସ ରହିଛି | ଆଗାମୀ ପାଞ୍ଚ ବର୍ଷ ମଧ୍ୟରେ ଭାରତ ଏକ ନୂତନ ଶିଖର ଛୁଇଁବ ବୋଲି ପ୍ରତୀଟି ଭାରତୀୟଙ୍କ ଆଶା ଉଜ୍ଜୀବିତ ହୋଇଛି |

ଦ୍ଵିତୀୟ ଥର ପାଇଁ ନିରଙ୍କୁଶ ସଂଖ୍ୟା ଗରିଷ୍ଠତା ହାସଲ କରି କ୍ଷମତାର ଶୀର୍ଷ ଆସନ ଅଳଙ୍କୃତ କରିବାକୁ ଯାଉଥିବା ମହାନ ନେତା ଶ୍ରୀ ନରେନ୍ଦ୍ର ମୋଦୀଙ୍କୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ସମେତ ବହୁ ବିଶ୍ଵ ନେତାଙ୍କ ଅଭିନନ୍ଦନର ସୁଅ ଛୁଟିଛି |ଏକ ସୁବ୍ୟବସ୍ଥିତ ବିଶ୍ଵ ଗଠନ ଲାଗି ତାଙ୍କ ସହ ମିଳି ମିଶି କାର୍ଯ୍ୟ କରିବାକୁ ସେମାନେ ଇଚ୍ଛା ବ୍ୟକ୍ତ କରିଛନ୍ତି |


ମୂଳ ଲେଖା : ପ୍ରୋଫେସର ଶିବାଜୀ ସରକାର, ରାଜନୈତିକ ଭାଷ୍ୟକାର

ଅନୁବାଦ : ରୀତା ଯୋଶୀ