ଇଣ୍ଡୋନେସିଆରେ ଜୋକୋୱିଙ୍କର କ୍ଷମତାକୁ ପ୍ରତ୍ୟାବର୍ତ୍ତନ

ଇଣ୍ଡୋନେସିଆରେ ପ୍ରାୟ ଏକ ମାସର ପ୍ରତୀକ୍ଷା ପରେ, ଜୋକୋୱି ନାମରେ ଲୋକପ୍ରିୟ ଜୋକୋ ୱିଡୋଡୋ ଇଣ୍ଡୋନେସିଆର ରାଷ୍ଟ୍ରପତି ନିର୍ବାଚନରେ ବିଜୟୀ ହୋଇଥିବା ଘୋଷଣା କରାଯାଇଛି | ଏପ୍ରିଲ ମାସ 17 ତାରିଖରେ ଇଣ୍ଡୋନେସିଆରେ ନିର୍ବାଚନ ଅନୁଷ୍ଠିତ ହୋଇଥିଲା | ରାଷ୍ଟ୍ରପତି ଏବଂ ଉପ ରାଷ୍ଟ୍ରପତି ନିର୍ବାଚନ ସହିତ ପିପୁଲସ କନ୍ସଲଟେଟିଭ ଆସେମ୍ବ୍ଲି ଓ ସ୍ଥାନୀୟ ସ୍ୱାୟତ୍ତ ଶାସନ ସଂସ୍ଥା ଗୁଡିକ ପାଇଁ ମଧ୍ୟ ନିର୍ବାଚନ ଅନୁଷ୍ଠିତ ହୋଇଥିଲା |

ସମସ୍ତ ସ୍ତରର ଏହି ଜଟିଳ ନିର୍ବାଚନ ପ୍ରକ୍ରିୟା ମାତ୍ର ଗୋଟିଏ ଦିନରେ ସମ୍ପୂର୍ଣ୍ଣ ହୋଇଥିଲା, ଯେଉଁଥିରେ 154 ମିଲିୟନ ମତଦାତା ସେମାନଙ୍କର ମତଦାନ ଅଧିକାର ସାବ୍ୟସ୍ତ କରିଥିଲେ | ଏପ୍ରିଲ 17 ତାରିଖରେ ଅନୁଷ୍ଠିତ ମତଦାନର ଫଳାଫଳ ଇଣ୍ଡୋନେସିଆର ସାଧାରଣ ନିର୍ବାଚନ କମିଶନ (KPU) ମେ ମାସ 21 ତାରିଖରେ ଘୋଷଣା କରିଛନ୍ତି |

ଭାରତରେ ନରେନ୍ଦ୍ର ମୋଦିଙ୍କ ନେତୃତ୍ୱରେ ଜାତୀୟ ଗଣତାନ୍ତ୍ରିକ ମେଣ୍ଟ (NDA)ର ବିଜୟ ଏବଂ ଅଷ୍ଟ୍ରେଲିଆରେ ସ୍କଟ ମୋରିସନଙ୍କ ବିଜୟ ସହ ଜୋକୋୱିଙ୍କ ବିଜୟ ସମଗ୍ର ଏସିଆ ଓ ବାହାରେ ଅଧିକ ଆଗ୍ରହ ସୃଷ୍ଟି କରିଛି | ଏହି ତିନୋଟି ପଡୋଶୀ ଗଣତାନ୍ତ୍ରିକ ରାଷ୍ଟ୍ର ସେମାନଙ୍କର ସର୍ବବୃହତ ଗଣତାନ୍ତ୍ରିକ ସମାରୋହ, ନିର୍ବାଚନ ପ୍ରକ୍ରିୟାକୁ ସମ୍ପନ୍ନ କରିଛନ୍ତି ଏବଂ ଏହି ଦେଶର ଲୋକମାନେ ସେମାନଙ୍କର ହୃଦୟର ବାର୍ତ୍ତା ବ୍ୟାଲଟ ମାଧ୍ୟମରେ ପରିପ୍ରକାଶ କରିଛନ୍ତି |

ଉଲ୍ଲେଖନୀୟ ବିଷୟ ହେଉଛି ଯେ, ଏହି ତିନୋଟି ଯାକ ରାଷ୍ଟ୍ରରେ କ୍ଷମତାରେ ଥିବା ତିନିଜଣ ଯାକ ନେତାଙ୍କୁ ନିର୍ବାଚନରେ କଡା ମୁକାବିଲାର ସମୁଖୀନ ହେବାକୁ ପଡିବ ବୋଲି ଅନୁମାନ କରାଯାଉଥିଲା | ତେବେ ଇଣ୍ଡୋନେସିଆରେ ଜୋକୋୱି, ଭାରତରେ ମୋଦି ଏବଂ ଅଷ୍ଟ୍ରେଲିଆରେ ମୋରିସନ ବିପୁଳ ବିଜୟ ହାସଲ କରି ପୁଣି କ୍ଷମତାକୁ ଫେରିଆସିଥିବାରୁ ଏହି ଅନୁମାନ ଠିକ ଥିବା ପ୍ରମାଣିତ କରି ପାରିନାହିଁ |

ଇଣ୍ଡୋନେସିଆରେ ଅନୁଷ୍ଠିତ ନିର୍ବାଚନରେ ଜୋକୋୱି ମୋଟ 85 ମିଲିୟନରୁ ଅଧିକ ଭୋଟ ହାସଲ କରି ଶତକଡା 55 ଭାଗରୁ ଅଧିକ ଭୋଟ ବିଜୟୀ ହୋଇଛନ୍ତି | ତାଙ୍କର ପ୍ରତିଦ୍ବନ୍ଦୀ ତଥା ପୂର୍ବତନ ସ୍ୱତନ୍ତ୍ର ବାହିନୀ କମାଣ୍ଡର ପ୍ରାବୋୱ ସୁବିଅନ୍ତୋଙ୍କୁ କେବଳ ଶତକଡା 45 ଭାଗ ଭୋଟ ମିଳିଛି | 2014 ମସିହା ନିର୍ବାଚନରେ ମଧ୍ୟ ପ୍ରାବୋୱ ସୁବିଅନ୍ତୋ, ଜୋକୋୱିଙ୍କ ବିରୁଦ୍ଧରେ ନିର୍ବାଚନ ଲଢ଼ି ହାରିଯାଇଥିଲେ | ନିର୍ବାଚନରେ ଜୋକୋୱିଙ୍କ ବିଜୟ ଇଣ୍ଡୋନେସିଆରେ ତାଙ୍କର ଲୋକପ୍ରିୟତାକୁ ସ୍ପଷ୍ଟ ପ୍ରମାଣିତ କରିଛି |

ପିପୁଲସ କନ୍ସଲଟେଟିଭ ଆସେମ୍ବ୍ଲି (ନ୍ୟାସନାଲ ଆସେମ୍ବ୍ଲି) ନିର୍ବାଚନରେ ମଧ୍ୟ ଜୋକୋୱିଙ୍କ ନେତୃତ୍ୱାଧୀନ ଇଣ୍ଡୋନେସିଆନ ଡେମୋକ୍ରାଟିକ ପାର୍ଟି ଅଫ ଷ୍ଟ୍ରଗଲ (PDIP) 27 ମିଲିୟନରୁ ଅଧିକ ଭୋଟ ହାସଲ କରି ସଂଖ୍ୟାଗରିଷ୍ଠ ପାର୍ଟି ହୋଇଛି |

ତେବେ, ଜୋକୋୱିଙ୍କ ବିଜୟ ପରେ ପ୍ରାବୋୱ ସୁବିଅନ୍ତୋ ଓ ତାଙ୍କର ସମର୍ଥକ ମାନେ ନିର୍ବାଚନ ପ୍ରକ୍ରିୟାରେ ବ୍ୟାପକ ଅନିୟମିତତା ଓ ଏକତରଫା ହୋଇଥିବା ଦର୍ଶାଇ ଜନାଦେଶକୁ ଗ୍ରହଣ କରିବାକୁ ବାରଣ କରିଥିବାରୁ ବିବାଦ ଉପୁଜିଛି | ଏହାକୁ ନେଇ ପ୍ରାବୋୱଙ୍କ ସମର୍ଥକ ମାନଙ୍କର ଆନ୍ଦୋଳନରେ ଜାକର୍ତ୍ତାରେ ଦଙ୍ଗା ଓ ହିଂସାତ୍ମକ ଘଟଣା ଘଟି 6 ଜଣଙ୍କର ମୃତ୍ୟୁ ଘଟିଛି ଏବଂ 200 ରୁ ଅଧିକ ଆହତ ହୋଇଛନ୍ତି |

ନିର୍ବାଚନର ଫଳାଫଳକୁ ପ୍ରାବୋୱ ସାମ୍ବିଧାନିକ ଅଦାଲତରେ ଚ୍ୟାଲେଞ୍ଜ କରିବାକୁ ସ୍ଥିର କରିଛନ୍ତି | ଗତ ଥରର ନିର୍ବାଚନରେ ମଧ୍ୟ ସେ ଏଭଳି ନିଷ୍ପତି ନେଇ ବିଫଳ ହୋଇଥିଲେ | ନିର୍ବାଚନରେ ହେରାଫେରି ହୋଇଥିବା ନେଇ ବିରୋଧୀଙ୍କ ଦାବିର କୌଣସି ବିଶ୍ୱସନୀୟ ପ୍ରମାଣ ନଥିବା ଦୃଷ୍ଟିରୁ ଏଥର ମଧ୍ୟ ଏହି ପଦକ୍ଷେପର ସମଧରଣର ଫଳାଫଳ ମିଳିବା ଆଶା କରାଯାଉଛି |

ଇଣ୍ଡୋନେସିଆ ରାଷ୍ଟ୍ରପତି ଜୋକୋୱି ଏବଂ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁନଃନିର୍ବାଚିତ ହେବା ସହ ଭାରତ-ଇଣ୍ଡୋନେସିଆ ମଧ୍ୟରେ ସମ୍ପର୍କ ଆହୁରି ସୁଦୃଢ ହେବା ସୁନିଶ୍ଚିତ ହୋଇଛି | ଆଞ୍ଚଳିକ ଶାନ୍ତି ଓ ସ୍ଥିରତା, ଅର୍ଥନୈତିକ ଅଭିବୃଦ୍ଧି ଏବଂ ନିରାପତ୍ତା ପ୍ରସଙ୍ଗ ସମେତ ଉଭୟ ଦେଶର ସ୍ୱାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗ ଉପରେ ଦୃଢ ସହଯୋଗ ସକାଶେ ଭାରତ ଏବଂ ଇଣ୍ଡୋନେସିଆ ଆଗ୍ରହ ପ୍ରକାଶ କରିଛନ୍ତି | ଉଭୟ ରାଷ୍ଟ୍ର ASEAN ସମେତ G20 ଭଳି ଗୁରୁତ୍ତ୍ୱପୂର୍ଣ୍ଣ ଗୋଷ୍ଠୀର ସଦସ୍ୟ ରହିଛନ୍ତି |

2018 ମସିହାରେ ଇଣ୍ଡୋନେସିଆକୁ ଶ୍ରୀ ମୋଦିଙ୍କ ଗସ୍ତ ସମୟରେ ଉଭୟ ଦେଶ ସେମାନଙ୍କର ସମ୍ପର୍କକୁ ବ୍ୟାପକ ସାମରିକ ସହଭାଗୀତାକୁ ଉନ୍ନୀତ କରିପାରିଛନ୍ତି | ଇଣ୍ଡୋନେସିଆର ଆନ୍ତର୍ଜାତୀୟ ସାମୁଦ୍ରିକ ସୁରକ୍ଷା ଏବଂ ଭାରତର 'ଆକ୍ଟ ଇଷ୍ଟ' ନୀତି ଏବଂ SAGAR (ଏହି ଅଞ୍ଚଳରେ ସମସ୍ତଙ୍କ ପାଇଁ ସୁରକ୍ଷା ଓ ବିକାଶ) ଭଳି ପଦକ୍ଷେପ ଉଭୟ ଦେଶ ମଧ୍ୟରେ ସାମରିକ ଓ ଅର୍ଥନୈତିକ ସମ୍ପର୍କକୁ ପ୍ରାଥମିକତା ଦେଇପାରିଛି | ଉଭୟ ଦେଶ ମଧ୍ୟରେ 20 ବିଲିୟନ ଆମେରିକୀୟ ଡଲାରର ଦ୍ବିପକ୍ଷୀୟ ବାଣିଜ୍ୟ ରହିଛି | 2025 ମସିହା ସୁଦ୍ଧା ଏହାକୁ 50 ବିଲିୟନ ଆମେରିକୀୟ ଡଲାରକୁ ବୃଦ୍ଧି କରାଇବା ପାଇଁ ଇଣ୍ଡୋନେସିଆକୁ ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଉଭୟ ଦେଶ ସେମାନଙ୍କର ପ୍ରତିଶୃତିବଦ୍ଧତା ପ୍ରକାଶ କରିଛନ୍ତି |ପୁଣି ଥରେ ପାଞ୍ଚ ବର୍ଷ ପାଇଁ ଜନାଦେଶ ପାଇବା ସହ, ଉଭୟ ରାଜନେତା ଆପୋଷ ସହଯୋଗ ମାଧ୍ୟମରେ ସେମାନଙ୍କର ଦେଶର ସ୍ୱାର୍ଥନିହିତ ପଦକ୍ଷେପ ଓ କାର୍ଯ୍ୟ ଗୁଡିକୁ ଅଗ୍ରସର କରାଇବା ଆଶା କରାଯାଉଛି | ଏଥି ସକାଶେ ବାଣିଜ୍ୟ ଓ ପୁଞ୍ଜିନିବେଶରେ ପ୍ରତିବନ୍ଧକ ହଟାଇବା ଏବଂ ସହଯୋଗ ବୃଦ୍ଧି କରିବାରେ ମିଳିତ ଉଦ୍ୟମର ନିତାନ୍ତ ଆବଶ୍ୟକତା ରହିଛି |

ମୂଳ ଲେଖା    : ଡକ୍ଟର ରାହୁଲ ମିଶ୍ର, ପୂର୍ବ ଏବଂ ଦକ୍ଷିଣ ପୂର୍ବ ଏସିଆ ଉପରେ ସାମରିକ ବିଶ୍ଳେଷକ

ଅନୁବାଦ        : ଅନୀଲ କୁମାର ପଟ୍ଟନାୟକ