ପ୍ରଧାନମନ୍ତ୍ରୀ ମୋଦିଙ୍କ ଶପଥ ଗ୍ରହଣ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଭାରତର ଭୂମିକାକୁ ଦର୍ଶାଉଛି

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦ୍ବିତୀୟ ଥର ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ ଅବସରରେ ବିମଷ୍ଟେକ, ସାଂଘାଇ ସହଯୋଗ ସଂଗଠନ ଏବଂ ଭାରତ ମହାସାଗରୀୟ ଅଞ୍ଚଳର ଦେଶମାନଙ୍କର ନେତାମାନଙ୍କୁ ନିମନ୍ତ୍ରଣ କରି ଏହା ଦର୍ଶାଇଛନ୍ତି ଯେ ଭାରତ ପ୍ରଶାନ୍ତ ମହାସାଗରୀୟ ଅଞ୍ଚଳରେ ଭାରତ ଏକ ପ୍ରମୁଖ ଶକ୍ତି ଭାବେ ଭୂମିକା ଗ୍ରହଣ କରିବ |

ବାଙ୍ଗଲାଦେଶ ରାଷ୍ଟ୍ରପତି ଅବଦ୍ଦୁଲ ହମିଦ ଶପଥ ଗ୍ରହଣ ସମାରୋହରେ ଯୋଗ ଦେଇଥିଲେ | ଭାରତ ସହିତ ବାଙ୍ଗଲାଦେଶର ମଧୁର ସଂପର୍କର ପରିଚାୟକ ଭାବେ ସେ ନିଜ ସହିତ ଏକ ପ୍ରତିନିଧିମଣ୍ତଳିକୁ ମଧ୍ୟ ଆଣିଥିଲେ | ବିମଷ୍ଟେକର ଅନ୍ୟ ଦେଶର ମୁଖ୍ୟମାନେ ମଧ୍ୟ ଶପଥ ଗ୍ରହଣ ସମାରୋହରେ ଯୋଗଦେଇଥିଲେ ଏବଂ ଔପଚାରିକତା ଭାବେ ପ୍ରଧାନମନ୍ତ୍ରୀ ମୋଦିଙ୍କ ସହିତ ଆଲୋଚନା କରିଥିଲେ | ପ୍ରଧାନମନ୍ତ୍ରୀଙ୍କ ଦ୍ବିତୀୟ କାର୍ଯ୍ୟକାଳରେ ଏହି ନେତାମାନଙ୍କ ସହିତ ପ୍ରଧାନମନ୍ତ୍ରୀ ଅଧୁନା ରହିଥିବା ଦ୍ବିପକ୍ଷୀୟ ସଂପର୍କ ଉପରେ ସମୀକ୍ଷା କରିଥିଲେ |

ସମାରୋହରେ ନେପାଳର ପ୍ରଧାନମନ୍ତ୍ରୀ କେ.ପି ଶର୍ମା ଓଲି ଏବଂ ଭୁଟାନର ପ୍ରଧାନମନ୍ତ୍ରୀ ଲୋଟେ ସେରିଙ୍ଗ ଯୋଗଦେଇଥିବାବେଳେ ଶ୍ରୀଲଙ୍କାର ରାଷ୍ଟ୍ରପତି ମୈତ୍ରିପାଳ ସିରିସେନା ଯୋଗଦେଇଥିଲେ | ଶ୍ରୀଲଙ୍କାରେ ଗତ ବର୍ଷ ଦେଖାଦେଇଥିବା ରାଜନୈତିକ ସଂକଟ ଏବଂ ଇଷ୍ଟରରେ ହୋଇଥିବା ଆକ୍ରମଣ ଭାରତକୁ ଚିନ୍ତିତ କରିଥିଲା | ପ୍ରଧାନମନ୍ତ୍ରୀ ମୋଦି ସିରିସେନାଙ୍କ ସହିତ ଅନ୍ୟ ପ୍ରସଙ୍ଗ ସମେତ ନିରାପତ୍ତା ଭାଗିଦାରୀ ଉପରେ ଅଧିକ ଗୁରୁତ୍ବ ଦେଇଥିଲେ | 2015ରେ ରାଷ୍ଟ୍ରପତି ଭାବେ ନିର୍ବାଚିତ ହେବା ପରଠାରୁ ସିରିସେନା ଭାରତୀୟ ପ୍ରଧାନମନ୍ତ୍ରୀଙ୍କ ସହିତ ଉତ୍ତମ ସଂପର୍କ ରଖିଆସିଛନ୍ତି | ମ୍ୟାଁମାରର ରାଷ୍ଟ୍ରପତି ଉଇନ ମିଣ୍ଟ ମଧ୍ୟ ସମାରୋହରେ ଯୋଗଦେବା ସହିତ ପ୍ରଧାନମନ୍ତ୍ରୀଙ୍କ ସହିତ ଅନୌପଚାରିକ ଆଲୋଚନା କରିଛନ୍ତି |

ଥାଇଲ୍ୟାଣ୍ତର ପ୍ରଧାନମନ୍ତ୍ରୀ ମଧ୍ୟ ସେହି ଏକାଦିନରେ ଶପଥ ନେଇଥିବାରୁ ସେ ତାଙ୍କର ଜଣେ ସ୍ବତନ୍ତ୍ର ପ୍ରତିନିଧିଙ୍କୁ ଭାରତ ପଠାଇଥିଲେ | ପ୍ରଧାନମନ୍ତ୍ରୀ ମୋଦି ନଭେମ୍ବରରେ ଥାଇଲ୍ୟାଣ୍ତରେ ହେବାକୁ ଥିବା ଭାରତ-ଆସିଆନ ଏବଂ ପୂର୍ବ ଏସିଆ ସମ୍ମିଳନୀରେ ଯୋଗଦେବାକୁ ଯାଇପାରନ୍ତି | ପାକିସ୍ତାନର ବ୍ୟବହାରକୁ ଦେଖି ପ୍ରଧାନମନ୍ତ୍ରୀ ମୋଦି ବିମଷ୍ଟେକକୁ ଅଧିକ ଗୁରୁତ୍ବ ଦେଉଛନ୍ତି | 2016 ଅକ୍ଟୋବରରେ ଗୋଆରେ ହୋଇଥିବା ବ୍ରିକ୍ସ ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ମୋଦି ବିମଷ୍ଟେକର ଏକ ଅନୌପଚାରିକ ବୌଠକର ଆୟୋଜନ କରିଥିଲେ ଏବଂ 2017 ପରଠାରୁ ବିମଷ୍ଟେକର ଜାତୀୟ ସୁରକ୍ଷା ପରାମର୍ଶଦାତା ବୈଠକ ନିୟମିତ ଭାବେ ଆନ୍ତଦେଶୀୟ ଅପରାଧ ଏବଂ ସନ୍ତ୍ରାସବାଦର ମୁକାବିଲା ପାଇଁ କରାଯାଉଛି | ଦକ୍ଷିଣ ଏବଂ ଦକ୍ଷିଣ ପୂର୍ବ ଏସିଆରେ ଆଞ୍ଚଳିକ ସଂଯୋଗ ଲକ୍ଷ୍ୟରେ ବିମଷ୍ଟେକ ମୋଟର ଯାନ ବୁଝାମଣା କରାଯାଇଛି |

ସୀମାପାର ସନ୍ତ୍ରାସବାଦ ବନ୍ଦ କରିବା ଏବଂ ସଂଯୋଗ ଯୋଜନାରେ ସାମିଲ ହେବାକୁ ମସହମତ କାରଣରୁ ସାର୍କ ସଂଗଠନ ନିଷ୍କ୍ରୀୟ ହେବାରୁ ମୋଦି ସରକାର ନିୟମିତ ଭାବେ ବିମଷ୍ଟେକକୁ ଗୁରୁତ୍ବ ଦେଇଆସିଛି | ଭାରତର ଆକ୍ଟ ଇଷ୍ଟ ନୀତି ଏବଂ ଚୀନର ସଡ଼କ ସଂଯୋଗକୁ ଦୃଷ୍ଟିରେ ରଖି ଦକ୍ଷିଣ ଏବଂ ଦକ୍ଷିଣ ପୂର୍ବ ଏସିଆ ତଥା ବଙ୍ଗୋପସାଗରୀୟ ଦେଶମାନଙ୍କ ମଧ୍ୟରେ ସଂଯୋଗ ସ୍ଥାପନ ନିମନ୍ତେ ବିମଷ୍ଟକ ଭାରତ ପାଇଁ ଏକ ବଡ ସୁଯୋଗ ସୃଷ୍ଟି କରିଛି | ବାଣିଜ୍ୟ ପାଇଁ ବିମଷ୍ଟେକର ମଧ୍ୟ ଅନେକ ଗୁରୁତ୍ବ ରହିଛି | ଭବିଷ୍ୟତର ବାଣିଜ୍ୟ ପାଇଁ ଶତକଡା 25 ଭାଗ ବଙ୍ଗୋପସାଗରୀୟ ଅଞ୍ଚଳର ପଥଦେଇ ହେବ ଏଣୁ ସେ ଦୃଷ୍ଟିରୁବିମଷ୍ଟେକ ସଦସ୍ୟ ଦେଶମାନଙ୍କ ସହିତ ଭାରତର ସଂପର୍କରେ ମଧ୍ୟ ସୁଦୃଢତା ଆସିଛି |

ସେହିପରି ସାଂଘାଇ ସହଯୋଗ ସଂଗଠନର ବର୍ତ୍ତମାନର ଅଧ୍ୟକ୍ଷ କିରଗୀଜସ୍ଥାନକୁ ଆମନ୍ତ୍ରଣ କରି ଭାରତ ମଧ୍ୟ ଏସିଆ ଏବଂ ୟୁରେସିଆରେ ନିଜର ଉପସ୍ଥିତି ଜାହିର କରିବାର ଉଦ୍ଧେଶ୍ୟ ରଖିଛି ଯେଉଁଠି ପୂର୍ବରୁ ମଧ୍ୟ ଚୀନର ଉପସ୍ଥିତି ରହିଛି | ମରିସସର ପ୍ରଧାନମନ୍ତ୍ରୀ ପ୍ରବିନ୍ଦ ଜଗନ୍ନାଥ ଶପଥ ଗ୍ରହଣ ସମାରୋହରେ ଯୋଗଦେଇଥିଲେ | ଏହାମଧ୍ୟ ପଶ୍ଚିମ ଭାରତ ମହାସାଗରୀୟ ଅଞ୍ଚଳରେ ମରିସସ ସହିତ ଭାରତର ସୁ ସଂପର୍କକୁ ଦର୍ଶାଉଛି | ଏ ସମସ୍ତ କଥାକୁ ପର୍ଯ୍ୟାଲୋଚନା କଲେ ଜଣାପଡୁଛି ଯେ ଏହିସବୁ ଅଞ୍ଚଳରେ ଭାରତର ଦୃଢ ସ୍ଥିତି ସହିତ ନିରାପତ୍ତା ଗୁରୁତ୍ବପୂର୍ଣ୍ଣ ରହିଛି |

ମୂଳ ଲେଖା : ଦୀପଞ୍ଜନ ରାୟ ଚୌଧୁରୀ

ଅନୁବାଦ : ରାମଚଂଦ୍ର ନାଥ