ଅର୍ଥନୈତିକ ସଙ୍କଟ ମଧ୍ୟରେ ପାକିସ୍ତାନର ଦୁର୍ନୀତି ନିବାରଣ ଅଭିଯାନ

ପାକିସ୍ତାନର ପୂର୍ବତନ ରାଷ୍ଟ୍ରପତି ଅସିଫ ଅଲ୍ଲି ଜର୍ଦାରୀ ଜାଲି ବ୍ୟାଙ୍କ ଖାତା ରହିଥିବା ମାମଲାରେ ଜାତୀୟ ଉତ୍ତରଦାୟିତ୍ବ ବ୍ୟୁରୋ(ଏନଏବି) ଦ୍ବାରା ଗିରଫ ହୋଇଛନ୍ତି। ଶ୍ରୀ ଜର୍ଦାରୀ ହେଉଛନ୍ତି ପାକିସ୍ତାନ ପିପୁଲ୍ସ ପାର୍ଟିର ଅଧ୍ୟକ୍ଷ ବିଲୱାଲ ଭୁଟୋ ଜର୍ଦାରୀଙ୍କ ବାପା ଏବଂ ପାକିସ୍ତାନ ଜାତୀୟ ଆସେମ୍ବ୍ଲିର ମଧ୍ୟ ବର୍ତ୍ତମାନର ସଦସ୍ୟ। ଇସଲାମାବାଦ ହାଇକୋର୍ଟ ଜର୍ଦାରୀ ଏବଂ ତାଙ୍କ ଭଉଣୀ ଫରୟାଲ ତଲପୁରଙ୍କ ଗିରଫ ପୂର୍ବର ଜାମିନ ଆବେଦନକୁ ଖାରଜ କରିଦେବା ପରେ ତାଙ୍କୁ ଗିରଫ କରାଯାଇଛି।

2015ରେ ପାକିସ୍ତାନର ସଂଘୀୟ ତଦନ୍ତ ସଂସ୍ଥା(ଏଫଆଇଏ) ଯେତେବେଳେ ନିର୍ଦ୍ଧିଷ୍ଟ ସୂଚନା ଆଧାରରେ ସୁମିତ ବ୍ୟାଙ୍କ, ସିନ୍ଧ୍ ବ୍ୟାଙ୍କ ଏବଂ ୟୁବିଏଲରେ 29ଟି ଜାଲି ବ୍ୟାଙ୍କ ଖାତା ତଥା ରହସ୍ୟମୟ କାରବାର ଉପରେ ତଦନ୍ତ ଆରମ୍ଭ କଲା ସେତେବେଳେ ଏହି ଘଟଣା ସାମ୍ନାକୁ ଆସିଲା । ପ୍ରାଥମିକ ସ୍ତରରେ ଜର୍ଦାରୀ ଏବଂ ତାଙ୍କ ଭଉଣୀଙ୍କ ସମେତ ସାତ ଜଣ ବ୍ୟକ୍ତି ଏହି ଜାଲି ଖାତା ମାଧ୍ୟମରେ ସନ୍ଦେହ ଜନକ କାରବାର କରିଥିବା ଜାଣିବାକୁ ପାଇଲା। ଏହି ଖାତା ଲାଞ୍ଚ ଅର୍ଥକୁ ଗ୍ରହଣ କରିବା ପାଇଁ ବ୍ୟବହାର କରାଯାଉଥିଲା। ପରେ ଏହି ମାମଲର ତଦନ୍ତରେ ବିଳମ୍ବ ପାଇଁ ପାକିସ୍ତାନର ସୁପ୍ରିମ କୋର୍ଟ ନୋଟିସ ପଠାଇବା ସହିତ ତଦନ୍ତ ପାଇଁ ଏକ ମିଳିତ ତଦନ୍ତକାରୀ ଦଳ ଗଠନ କଲେ।

ତଦନ୍ତ ସମୟରେ ମିଳିତ ତଦନ୍ତ ଦଳ ଏହି ମାମଲାରେ ଅନ୍ୟ 33ଟି ଜାଲି ଖାତାକୁ ଠାବ କଲେ ଏବଂ ଏହି ମାମଲାରେ ପ୍ରାୟ 170 ଜଣ ବ୍ୟକ୍ତି ସଂପୃକ୍ତ ଥିବାର ଜଣା ପଡିଲା। ଏନଏବି ଏବଂ ଏଫଆଇଏ ଏକ ଅଦୃଶ୍ୟ କଂପାନିର ଏକ ଜାଲି ଖାତାରେ 4.4 ବିଲିୟନ ପାକିସ୍ତାନି ଟଙ୍କା ଗ୍ରହଣ କରିଥିବା ଏବଂ ଯେଉଁଥିରୁ 30 ମିଲିୟନ ଟଙ୍କା ଦୁଇଥର ଜର୍ଦାରୀ ଗୃପକୁ ପଇଠ କରାଯାଇଥିଲା।

ଏହାପରେ ଏଇଆଇଏ କରାଚିରେ ବ୍ୟାଙ୍କିଙ୍କ କୋର୍ଟରେ ମାମଲା ଦାୟର କଲା ଏବଂ ଏହା ଆଧାରରେ ପୂର୍ବତନ ପାକିସ୍ତାନ ରାଷ୍ଟ୍ରପତି ଜର୍ଦାରୀଙ୍କ ବିରୁଦ୍ଧରେ ଗିରଫ ପରୱାନା ଜାରି କରାଗଲା। ଏହାପରେ ଜର୍ଦାରୀ 2018 ଅଗଷ୍ଟରେ ଇସଲାମାବାଦ ହାଇକୋର୍ଟରେ ଜାମିନ ଆବେଦନ କଲେ। ପରେ ଏହି ମାମଲା କରାଚିସ୍ଥିତ ଉତ୍ତରଦାୟିତ୍ବ ବ୍ୟୁରୋକୁ ହସ୍ତାନ୍ତର ହେଲା। ତଦନ୍ତ କାଳରେ ଦୁୱଇ ଜଣ ଅଭିଯୁକ୍ତ ଜର୍ଦାରୀ ଏବଂ ତଲପୁରଙ୍କ ବିରୁଦ୍ଧରେ ରାଜସାକ୍ଷୀ ହୋଇଗଲେ।

ଜର୍ଦାରୀଙ୍କ ଅନେକ ବଂଧୁ ଏହି ମାମଲାରେ ଗିରଫ ହେଲେ ଏବଂ ଜର୍ଦାରୀ ତଥା ତାଙ୍କ ଭଉଣୀଙ୍କୁ ମିଳିଥିବା ଆଗୁଆ ଜାମିନ ବାରମ୍ବାର ଘୁଞ୍ଚା ଯାଇଥିଲେ ମଧ୍ୟ ସୋମବାର ଏହା ଖାରଜ ହୋଇଥିଲା। ଜର୍ଦାରୀ ଏହି ମାମଲା ବ୍ୟତିତ ଅନ୍ୟ ପ୍ରାୟ ସାତଟି ଦୁର୍ନୀତି ମାମଲାରେ ଜାମିନ ପାଇଛନ୍ତି।

ପାକିସ୍ତାନରେ ଏବେ ରାଜନୈତିକ ଉତ୍ଥାନ ପତ୍ତନ ଚାଲିଥିବାବେଳେ ଇମରାନ ଖାନ ସରକାର ମୂଲ୍ୟ ବୃଦ୍ଧି ଏବଂ ବେକାରୀ ସମସ୍ୟାରୁ ଲୋକମାନଙ୍କର ଧ୍ୟାନ ହଟେଇବା ପାଇଁ ଦୁର୍ନୀତି ମାମଲାକୁ ଆଗକୁ ଆଣିବାକୁ ଚେଷ୍ଟା କରିଛି। ଜର୍ଦାରୀଙ୍କ ଗିରଫ ପରେ ପାକିସ୍ତାନ ପ୍ରଧାନମନ୍ତ୍ରୀ ଦୁର୍ନୀତି ମାମଲାକୁ ଜୋରସୋରରେ ଉଠାଉଛନ୍ତି। ପାକିସ୍ତାନରେ ବଜେଟ ଉପସ୍ଥାପନ ସମୟରେ ଇମରାନ ଖାନ ଦେଶ ଉଦ୍ଧେଶ୍ୟରେ ଦେଇଥିବା ଅଭିଭାଷଣରେ କହିଛନ୍ତି ଯେ ସେ ଦୁର୍ନୀତି ମୁକ୍ତ ପାକିସ୍ତାନ ଗଢିବେ। ସେ ଏକଥା ମଧ୍ୟ କହିଛନ୍ତି ଯେ ପ୍ରାୟ 25 ବର୍ଷ ହେଲା ଦେଶରେ ଅଧିକ ସ୍କୁଲ ଏବଂ ହସପିଟାଲ ସ୍ଥାପନ କରାଯାଇ ନାହିଁ । ସେ ଏକ ନୂଆ ପାକିସ୍ତାନ ଗଢିବେ ଯେଉଁଠି ଆଧୁନିକ ଇସଲାମିକ ଜନକଲ୍ୟାଣକାରୀ ଦେଶ ଭାବେ ପରିଗଣିତ ହେବ। କିନ୍ତୁ ପ୍ରଧାନମନ୍ତ୍ରୀ ସନ୍ତ୍ରାସବାଦମୁକ୍ତ ପାକିସ୍ତାନ ମାମଲାରେ ନିରବତା ଗ୍ରହଣ କରିଛନ୍ତି।

ଶ୍ରୀ ଖାନଙ୍କ ବକ୍ତବ୍ୟ ନିଶ୍ଚିତ ଭାବେ ସାହସୀକତାର କଥା କିନ୍ତୁ ସେ ଭୁଲିଯିବା ଉଚିତ ନୁହେଁ ଯେ ତାଙ୍କ ଦେଶ ଏବଂ ଉତ୍କଟ ଅର୍ଥନୈତିକ ସଂକଟ ଦେଇ ଗତି କରୁଛି। ଆନ୍ତର୍ଜାତୀୟ ମୁଦ୍ରା ପାଣ୍ଠିର ବେଲଆଉଟ ପ୍ୟାକେଜ ଅନେକ ସର୍ତ୍ତ ସହ ସ୍ବଳ୍ପ ଅର୍ଥ ଦେବାକୁ ଚାହୁଁଛି। ପ୍ୟାକେଜ 6 ବିଲିୟନ ଡଲାର ଥିବାବେଳେ ପାକିସ୍ତାନର ଚଳିତ ଆର୍ଥିକ ବର୍ଷରେ ବଜେଟ ଶତକଡା 2.4 ଭାଗକୁ ବୃଦ୍ଧି ପାଇବାର ଆଶା କରାଯାଉଛି। ମୁଦ୍ରାସ୍ଫିତି 11ରୁ 13 ଭାଗ ବୃଦ୍ଧି ପାଇବ ଏବଂ ମୁଦ୍ରା ପାଣ୍ଠିର ସର୍ତ୍ତ ଅନୁଯାଇ ଟିକସ ବୃଦ୍ଧି, ଇନ୍ଧନ ମୂଲ୍ୟରେ ବୃଦ୍ଧି ଆଦି ହୋଇସାରିଛି। ଦେଶର ବଜେଟ ଖର୍ଚ୍ଚ ପାକିସ୍ତାନ ଟଙ୍କା 7 ଟ୍ରିଲିୟନ ହେବାର ଆଶା କରାଯାଉଥିବାବେଳେ ରାଜସ୍ବ ମାତ୍ର 3.5 ଟ୍ରିଲିୟ ଟଙ୍କା ରହିବ। ଅବଶିଷ୍ଟ ଟଙ୍କା କେଉଁଠୁ ଆସିବ ତାହା ପାକିସ୍ତାନର ଅର୍ଥ ମନ୍ତ୍ରୀଙ୍କ ନିକଟରେ ଉତ୍ତର ନାହିଁ।




ମୂଳ ଲେଖା: କୌଶିକ ରାୟ

ଅନୁବାଦ: ରାମଚଂଦ୍ର ନାଥ