ଭାରତୀୟ ପ୍ରଧାନମନ୍ତ୍ରୀଙ୍କ କିରଗିଜସ୍ଥାନ ଗସ୍ତ

ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦ୍ଵିତୀୟ ଥର ନିର୍ବାଚିତ ହେବା ପରେ ଚଳିତ ମାସ 13 ଓ 14 ତାରିଖରେ କିରଗିଜସ୍ଥାନର ବିଶକେକ ଗସ୍ତ କରିଥିଲେ | ଏହି ଗସ୍ତ ସମୟରେ ସେ ଏକ ଦ୍ଵିପକ୍ଷୀୟ ବୈଠକରେ କିରଗିଜସ୍ଥାନ ରାଷ୍ଟ୍ରପତି ସୋରୋନବେ ଜିନବେକୋଭଙ୍କ ସହ ସାକ୍ଷାତ ଆଲୋଚନା  କରିଥିଲେ |

ରାଷ୍ଟ୍ରପତି ଜିନବେକୋଭଙ୍କ ସହ ଭାରତୀୟ ପ୍ରଧାନମନ୍ତ୍ରୀଙ୍କ   ବୈଠକକୁ ସ୍ଵତନ୍ତ୍ର ଓ ଏକ କୂଟନୈତିକ ବୈଠକ ଭାବେ ବିଚେଚନା କରାଯାଉଛି |ଗତ ମାସ 30 ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶପଥ ଗ୍ରହଣ ଉତ୍ସବ ସମାରୋହରେ  ବହୁ ପ୍ରତିଷ୍ଠିତ ଅତିଥି ମାନଙ୍କ ମଧ୍ୟରେ ରାଷ୍ଟ୍ରପତି ଜିନବେକୋଭ ମଧ୍ୟ ଉପସ୍ଥିତ ଥିଲେ |

ବିଶକେକରେ ଅନୁଷ୍ଠିତ ଶିଖର ବୈଠକ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ରାଷ୍ଟ୍ରପତି ଜିନବେକୋଭଙ୍କ ସହ ମିଳିତ ଭାବେ ପ୍ରଥମ ଭାରତ-କିରଗିଜସ୍ଥାନ ବ୍ୟବସାୟ ଫୋରମ ବୈଠକରେ ଉଦବୋଧନ ଦେଇଥିଲେ |ଏହି ବୈଠକ ଅତ୍ୟନ୍ତ ସଫଳ ଓ ଉଲ୍ଲେଖନୀୟ ହୋଇଥିବା ଦର୍ଶାଯାଇଛି |

ଭାରତ ଓ କିରଗିଜସ୍ଥାନ ଦ୍ଵେତ ଟିକସ ଫାଙ୍କି ରାଜିନାମା (ଡ଼ିଟିଏଏ) ଓ ଦ୍ଵିପକ୍ଷୀୟ ପୁଞ୍ଜିବିନିଯୋଗ ଚୁକ୍ତିର ଚୁଡାନ୍ତ ରୂପରେଖ ପ୍ରସ୍ତୁତ କରୁଛନ୍ତି |ଏହା ଦ୍ଵିପକ୍ଷୀୟ ବାଣିଜ୍ୟ କାରବାର ପାଇଁ ଏକ ଅନୁକୂଳ ବାତାବରଣ ସୃଷ୍ଟି କରିବାରେ ସହାୟକ ହେବ |ଏହି ଦ୍ଵିପକ୍ଷୀୟ ପୂଞ୍ଜିନିବେଶ ଚୁକ୍ତି ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କ ବୃଦ୍ଧି ଲାଗି ଏକ ପଞ୍ଚ ବାର୍ଷିକୀ ରୂପରେଖ ପ୍ରସ୍ତୁତ ଲାଗି ସହାୟକ ହେବ |2016-17 ରେ ଭାରତ ଓ କିରଗିଜସ୍ଥାନ ମଧ୍ୟରେ ଦ୍ଵିପକ୍ଷୀୟ ବାଣିଜ୍ୟ କାରବାର 24.98 ନିୟୁତ ଆମେରିକୀୟ ଡଲାର ରହିଥିଲା | କିରଗିଜସ୍ଥାନକୁ ଭାରତର ରପ୍ତାନୀ 22.66 ନିୟୁତ ଆମେରିକୀୟ ଡଲାର ତୁଳନାରେ କିରଗିଜସ୍ଥାନ ଭାରତକୁ ରପ୍ତାନୀ ପାଖାପାଖି 2.32 ନିୟୁତ ଆମେରିକୀୟ ଡଲାର କରୁଛି |ତେବେ ଉଭୟ ଦେଶ ଏହି ରପ୍ତାନୀ ପରିମାଣ ବୃଦ୍ଧି କରିବାଲାଗି ମନସ୍ଥ କରିଛନ୍ତି |

ଦୁଇ ନେତା ଆଶା ବ୍ୟକ୍ତ କରିଛନ୍ତି ଯେ ଇରାନରେ ଚାବାହାର ବନ୍ଦର ନୂଆଦିଲ୍ଲୀ ଓ ବିଶକେକ ମଧ୍ୟରେ ବାଣିଜ୍ୟ ବୃଦ୍ଧି କରିବାରେ ବହୁ  ସୁବିଧା ପ୍ରଦାନ କରିବ | ଉଭୟ ଦେଶ ମଧ୍ୟ ଆନ୍ତର୍ଜାତୀୟ ଉତ୍ତର-ଦକ୍ଷିଣ କୋରିଡର (ଆଇଏନଏସଟିସି) ଉପରେ କାର୍ଯ୍ୟ କରୁଛନ୍ତି ଯାହାକି ଆନ୍ତର୍ଜାତୀୟ ବାଣିଜ୍ୟ କ୍ଷେତ୍ରରେ ଏକ ଗେମ ଚେଞ୍ଜର ଭାବେ ଭୂମିକା ନିଭାଇ ପାରିବ |

ଭାରତ-କିରଗିଜସ୍ଥାନ ମିଳିତ ଫୋରମ ବୈଠକରେ ଶ୍ରୀ ମୋଦୀ ଭାରତରେ କାରବାର ଲାଗି କିରଗିଜସ୍ଥାନର ଉଦ୍ଯୋଗୀ ମାନଙ୍କୁ ଆହ୍ଵାନ ଜଣାଇଥିଲେ| ଭାରତରେ ଅନୁକୂଳ ପରିବେଶ, ଯୋଗାଯୋଗ ଓ ବାଣିଜ୍ୟ କ୍ଷେତ୍ରରେ ଆଦାନ ପ୍ରଦାନ ଆଦି ତିନୋଟି ଊତପ୍ରେରକ ରହିଛି ଯାହାକି ଦ୍ଵିପକ୍ଷୀୟ ବାଣିଜ୍ୟ ବୃଦ୍ଧି କ୍ଷେତ୍ରରେ ମୁଖ୍ୟ ପରିଚାୟକ ବୋଲି ଶ୍ରୀ ମୋଦୀ ବ୍ୟାଖ୍ୟା କରିଛନ୍ତି|                   

ପ୍ରଧାନମନ୍ତ୍ରୀ କହିଛନ୍ତି ଯେ ଭାରତ ଜୈବିକ ଉତ୍ପାଦ କ୍ଷେତ୍ର, ପାର୍ବତୀୟ ମହୁ,ଅଖରୋଡ, ଦୁଗ୍ଧଜାତ ସାମଗ୍ରୀ,ବସ୍ତ୍ର,ରେଳବାଇ,ଜଳ ବିଦ୍ୟୁତ,ଖଣି ଓ ଖଣିଜ ଅନୁସନ୍ଧାନରେ କିରଗିଜସ୍ଥାନରେ ନିବେଶ କରିପାରେ |ଭାରତୀୟ ପ୍ରଧାନମନ୍ତ୍ରୀ ଭାରତରେ ନିବେଶ କରିବା ଲାଗି କିରଗିଜସ୍ଥାନ ବ୍ୟବସାୟୀ ମାନଙ୍କୁ ଆମନ୍ତ୍ରଣ କରିଛନ୍ତି ଯାହାକି ମଧ୍ୟ ଏସିୟ ଦେଶ ପାଇଁ ଏକ ପ୍ରଗତିଶୀଳ ବଜାର ଭାବେ ଉଭା ହୋଇଛି | ଭାରତ ଏକ କୁଶଳ କାର୍ଯ୍ୟ ବଳ,ବ୍ୟବସାୟ ସୁଗମତା ଓ ଦ୍ଵେତ ଟିକସ ଫାଙ୍କି ବ୍ଯତୀତ ବାଣିଜ୍ୟ ଓ ନିବେଶକୁ ସମୃଦ୍ଧ କରିବା ପାଇଁ ଉପଯୁକ୍ତ ଯୋଗାଯୋଗ ପ୍ରଦାନ କରିଥାଏ ବୋଲି ସେ ମତବ୍ୟକ୍ତ କରିଛନ୍ତି  |ଶ୍ରୀ ମୋଦୀ ଆସନ୍ତା ପାଞ୍ଚ ବର୍ଷ ମଧ୍ୟରେ ଭାରତକୁ ପାଞ୍ଚ ଟ୍ରିଲିୟନ ଡଲାର ଅର୍ଥବ୍ୟବସ୍ଥାରେ ପରିଣତ କରିବା ନେଇ ବିଶ୍ଵାସ ବ୍ୟକ୍ତ କରିଛନ୍ତି |ଯୁବ ପିଢୀ ଓ ନିବେଶକ ମାନଙ୍କ ଉପରେ ଦିଆଯାଉଥିବା ପ୍ରାଥମିକତା ଭାରତକୁ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିର ଲକ୍ଷ ହାସଲ କରିବାରେ ସହାୟତା କରିବ ବୋଲି ମଧ୍ୟ ସେ ଜଣାଇଛନ୍ତି |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କହିବାନୁଯାୟୀ ଭାରତରେ ଅର୍ଥନୈତିକ ସ୍ଥିତିରେ ବୃଦ୍ଧି ଓ ଅତ୍ୟାଧୁନିକ ଜ୍ଞାନ କୌଶଳ ରେ ପ୍ରଗତି ହେଲେ କିରଗିଜସ୍ଥାନର ବିକାଶରେ ମଧ୍ୟ ଏହା ସହାୟତା କରିବ | ତେଣୁ କିରଗିଜସ୍ଥାନ ସହ ଭାରତର ପାଞ୍ଚ ବାର୍ଷିକୀ ଯୋଜନା ମଧ୍ୟ ଭାରତ ର ପାଞ୍ଚ ଟ୍ରିଲିୟନ ଡଲାର  ଅର୍ଥନୀତିର ଏକ ଅଂଶ ବିଶେଷ ହେବ ଓ ଉଭୟ ଦେଶ ପାଇଁ ଆପୋଷ ବୃଦ୍ଧି ଓ ହିତକାରୀ ହେବାରେ ସହାୟକ ହେବ |

ଭାରତ ସମସ୍ତ ପାଞ୍ଚଟି ଯାକ ମଧ୍ୟ ଏସିୟ  ଦେଶ ଗୁଡିକ ସହ ଉତ୍ତମ ସମ୍ପର୍କ ଆଦାନ ପ୍ରଦାନ  କରେ ଓ ଦ୍ଵିପକ୍ଷୀୟ ବାଣିଜ୍ୟ ଓ ନିବେଶ ଜରିଆରେ ଏହାର ଅଭିବୃଦ୍ଧିରେ ଏହି ଦେଶ ଗୁଡିକୁ ସାମିଲ କରିବାକୁ ଚାହେଁ | ଭାରତ ପାଇଁ ମଧ୍ୟ ଏସିଆର ମହତ୍ଵ ସେତେବେଳେ ସ୍ପଷ୍ଟ ପ୍ରତୀୟମାନ ହୋଇଥିଲା ଯେତେବେଳେ ପ୍ରଧାନମନ୍ତ୍ରୀ ଶ୍ରୀ ମୋଦୀ ଏକ ‘ନମସ୍କାର ୟୂରାସିଆ’ ବାଣିଜ୍ୟ ମେଳା ବିଷୟ ଉଲ୍ଲେଖ କରିଥିଲେ | ଚଳିତ ବର୍ଷ ବିଶକେକ ରେ ଏହି ମେଳାର ଆୟୋଜନ କରାଯିବ | ଏହି ମେଳା ଭାରତ ଓ ମଧ୍ୟ ଏସିଆ ଦେଶ ଗୁଡିକ  ମଧ୍ୟରେ ବ୍ୟବସାୟ କ୍ଷେତ୍ରରେ ରୀତିମତ ବୈଠକ କରିବାରେ ସହାୟକ ହେବ |ୟୂରାସୀୟ ଅର୍ଥନୈତିକ ସଂଘ ରେ କିରଗିଜସ୍ଥାନ ସମେତ ଏହି ପାଞ୍ଚୋଟି ଦେଶର ସଦସ୍ଯତା ଭାରତ ପାଇଁ ଅତ୍ୟନ୍ତ ମହତ୍ବପୂର୍ଣ୍ଣ |

ଭାରତ ଓ କିରଗିଜସ୍ଥାନ ମଧ୍ୟରେ ପ୍ରତିରକ୍ଷା,ବାଣିଜ୍ୟ ଓ ପୁଞ୍ଜି ନିବେଶ ତଥା  ସ୍ୱାସ୍ଥ୍ୟ କ୍ଷେତ୍ରରେ 15ଟି ରାଜିନାମା ସ୍ଵାକ୍ଷରିତ ହୋଇଛି | ଏଥି ସହିତ ସାମରିକ ଭାଗିଦାରୀତା ଉପରେ ଦୁଈ ଦେଶ ମଧ୍ୟରେ ଏକ ମିଳିତ ଘୋଷଣାନାମାରେ  ମଧ୍ୟ ସ୍ବାକ୍ଷରିତ ହୋଇଛି | ଭାରତ କିରଗିଜସ୍ଥାନର ଉନ୍ନୟନ ପ୍ରକଳ୍ପ ଗୁଡିକ ପାଇଁ 200 ନିୟୁତ ଆମେରିକୀୟ ଡଲାର ଋଣ ଆକାରରେ ପ୍ରଦାନ ଲାଗି ମଧ୍ୟ ଘୋଷଣା କରିଛି | ଉଭୟ ଦେଶ 2021 ବର୍ଷକୁ ସାଂସ୍କୃତିକ ଓ ବନ୍ଧୁତ୍ଵ ର ବର୍ଷ ଭାବେ ପାଳନ କରିବାକୁ ସହମତି ପ୍ରକାଶ କରିଛନ୍ତି|

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କିରଗିଜସ୍ଥାନ ଗସ୍ତ ଅତ୍ୟନ୍ତ ସଫଳ ଓ ଫଳପ୍ରଦ ରହିଛି |ତାଙ୍କର ଏହି ଗସ୍ତ କାଳରେ ସ୍ବାକ୍ଷରିତ ସବୁ ରାଜିନାମା ଗୁଡିକୁ କାର୍ଯ୍ୟକାରୀ କରିବା ଦୁଇ ଦେଶ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ |

ମୂଳ ଲେଖା : ଡଃ ଇନ୍ଦ୍ରାଣୀ ତାଲୁକଦାର, ରୁଷ ଓ ସିଆଇଏସ ଉପରେ ସାମରିକ ବିଶ୍ଳେଷକ

ଅନୁବାଦ : ରୀତା ଯୋଶୀ