ପାକିସ୍ତାନରେ ବିରୋଧୀ ପକ୍ଷର କଣ୍ଠରୋଧ

ପାକିସ୍ତାନ ଏକ ରାଜନୈତିକ ଅସ୍ଥିରତା ଦେଇ ଗତି କରୁଛି କାରଣ ପାକିସ୍ତାନର ତେହେରିକ-ଇ-ଇନସାଫ (ପିଟିଆଇ) ସରକାର, ସରକାର ବିରୋଧୀ ସ୍ଵର ଉପରେ ଲଗାମ ଲଗାଇବା ଆରମ୍ଭ କରିଦେଇଛନ୍ତି | ପାକିସ୍ତାନ ପିପୁଲ୍ସ ପାର୍ଟିର ଆସିଫ ଅଲି ଜର୍ଦାରୀ ଓ ପାକିସ୍ତାନ ମୁସଲିମ ଲିଗ-ନୱାଜ ର ହମଜା ଶାହାବାଜଙ୍କୁ ଗିରଫ କରିବା ସହ ପଶତୁନ ତାହାଫୁଜ ମୁଭମେଣ୍ଟ (ପିଟିଏମ) ଭଳି ଗୋଷ୍ଠୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ଇମ୍ରାନ ଖାଁ ସରକାର ରଣନୀତିକ ଭାବେ ବିରୋଧାଭାସ ଗୁଡିକୁ କାବୁ କରିବା ପାଇଁ ପ୍ରୟାସ ଚଳେଇଛନ୍ତି| ବ୍ରିଟିଶ କର୍ତ୍ତୃପକ୍ଷଙ୍କ ଦ୍ଵାରା ସ୍ଵନିର୍ବାସିତ ପାକିସ୍ତାନୀ ରାଜନେତା ତଥା ମୁତ୍ତାହିଦା କାଉମୀ ମୁଭମେଣ୍ଟ (ଏମକିଉଏମ)ନେତା ଅଲତାଫ ହୁସେନଙ୍କୁ ଗିରଫ କରିବା ବିଷୟରୁ ଏହା ପ୍ରତୀତ ହେଉଛି ଯେ ଏହା ପଛରେ ମଧ୍ୟ ପାକିସ୍ତାନ ସରକାରଙ୍କ ହିଁ ହାତ ରହିଛି |ବିଭିନ୍ନ ପକ୍ଷର ସମାଲୋଚନାକୁ ରୋକିବା ନିମନ୍ତେ ଇସଲାମାବାଦ,ପାକିସ୍ତାନ ସେନା ଅନୁସାରେ କାର୍ଯ୍ୟ କରୁଛି |ତେବେ ବିରୋଧୀ ପକ୍ଷର ମୁକାବିଲା ପାଇଁ ଗ୍ରହଣ କରାଯାଉଥିବା କଡା ନୀତି ସରକାରଙ୍କୁ ଭାରି ପଡିପାରେ |

ଜାତୀୟ ଉତ୍ତରଦାୟୀ ବ୍ୟୁରୋ (ଏନଏବି)ର ଆଳରେ ଦୁର୍ନୀତି ମାମଲାରେ ବିରୋଧୀ ନେତା ମାନଙ୍କୁ ଅତ୍ୟନ୍ତ ଚତୁରତାର ସହ ପାକିସ୍ତାନୀ ସଂସଦର ବଜେଟ ଅଧିବେଶନ ସମୟରେ ଗିରଫ କରାଯାଇଥିଲା ଯଦ୍ୱାରା ଅଧିବେଶନ ସମୟରେ ବିରୋଧୀ ପକ୍ଷର ଧ୍ୟାନ ହଟିଯିବ ଓ ବଜେଟକୁ ସୁରୁଖୁରୁରେ ପାସ କରାଯାଇପାରିବ |ବିଶ୍ଳେଷକ ମାନଙ୍କ କହିବାନୁଯାୟୀ ଏନଏବି, ପିଏମଏଲ-ଏନ ର ଦୁଇଜଣ ପ୍ରଭାବଶାଳୀ ନେତା ପୂର୍ବତନ ପ୍ରଧାନମନ୍ତ୍ରୀ ସାହିଦ ଖାକାନ ଅବ୍ବାସି ଓ ପୂର୍ବତନ ଜଳ ଓ ବିଦ୍ୟୁତ ମନ୍ତ୍ରୀ କ୍ଷ୍ୱାଜା ମହମ୍ମଦ ଆସିଫଙ୍କ ଉପରେ କଡା ନଜର ରଖିଛନ୍ତି |ଏହା ଉଲ୍ଲେଖ କରାଯାଇପାରେ ଯେ ପିପିପି ନେତା ବିଲାୱାଲ ଭୁଟ୍ଟୋ ଜର୍ଦାରୀ ଓ ପିଏମଏଲ-ଏନ ର ମାରିୟମ ନୱାଜ ସରିଫ ସ୍ଥିତିର ତର୍ଜମା କରିବା ପାଇଁ ଦୁଇ ଥର ବୈଠକ କରିଥିଲେ ଓ ମିଳିତ ଭାବେ ସମସ୍ଵରରେ ବଜେଟକୁ ଜନବିରୋଧୀ ଓ ଆଇଏମଏଫ ନିର୍ଦ୍ଦେଶିତ ଏକ ଆର୍ଥିକ ଦସ୍ତବେଜ ବୋଲି ବର୍ଣ୍ଣନା କରିଥିଲେ |

ଏହି ବୈଠକ ଏପରି ସମୟରେ ହୋଇଥିଲା ଯେତେବେଳେ ଏନଏବି ଏହି ଦୁଇ ଦଳର ପ୍ରମୁଖ ନେତାଙ୍କ ବିରୁଦ୍ଧରେ ତଦନ୍ତ କରୁଛି ଓ ପିପିପି ର ସହ ଅଧ୍ୟକ୍ଷ ଆସିଫ ଅଲି ଜର୍ଦ୍ଦାରୀ ଓ ତାଙ୍କ ଭଉଣୀ ଫରିୟାଲ ତାଲପୁର ତଥା ପଞ୍ଜାବ ବିଧାନସଭାରେ ବିରୋଧୀ ଦଳ ନେତା ପିଏମଏଲ-ଏନର ହମଜା ଶାହାବାଜ ଙ୍କୁ ଗିରଫ କରାଯାଇଛି | ପିଟିଆଇ ଏହାକୁ ଏକ ସୁବିଧାବାଦୀ ବୈଠକ ବୋଲି କହି ଖାରିଜ କରିଦେଇଛି | କିନ୍ତୁ ଯଦି ଏହି ଦୁଇ ପକ୍ଷ ବିରୋଧୀ ଦଳ ଗୁଡିକୁ ଏକଜୁଟ କରି ବିକ୍ଷୋଭ ପ୍ରଦର୍ଶନ ଆରମ୍ଭ କରିଦେବେ ତେବେ ଖାଁ ସରକାରଙ୍କୁ ରାଜନୈତିକ ସଙ୍କଟର ସାମ୍ନା କରିବାକୁ ପଡିପାରେ | ବିରୋଧୀ ପାର୍ଟି ଗୁଡିକ କହିଛନ୍ତି ଯେ ରାଜନୈତିକ ପ୍ରୋରଚିତରେ ନେତା ମାନଙ୍କୁ ଗିରଫ କରାଯାଇଛି ଓ ଇମ୍ରାନ ଖାଁ, ଦୁର୍ନୀତି ପ୍ରସଙ୍ଗକୁ ବିରୋଧୀ ମାନଙ୍କ ବିରୁଦ୍ଧରେ ଅମୋଘ ଅସ୍ତ୍ର ଭାବେ ବ୍ୟବହାର କରୁଛନ୍ତି ଏବଂ ଏଥିସହିତ ପିଟିଏମ ଭଳି ଗୋଷ୍ଠୀକୁ ଶତ୍ରୁ ର ଏଜେଣ୍ଟ ବୋଲି ଆକ୍ଷେପ କରି ମୋହସିନ ଦାୱାର ଓ ଅଲି ୱାଜିର ଭଳି ଗଣତାନ୍ତ୍ରିକ ଭାବେ ନିର୍ବାଚିତ ହୋଇଥିବା ନେତା ମାନଙ୍କୁ ଗିରଫ କରୁଛନ୍ତି |

ଉତ୍ତର ୱାଜିରୀସ୍ତାନରେ ଏକ ବିକ୍ଷୋଭ ପ୍ରଦର୍ଶନ ସମୟରେ ପିଟିଏମ ର ଦୁଇଜଣ ନେତାଙ୍କୁ ଗିରଫ କରିବା ଓ ସେନା ଦ୍ଵାରା ପିଟିଏମ କର୍ମୀ ମାନଙ୍କୁ ହତ୍ୟା କରିବା ପରେ ଏହି ଅଞ୍ଚଳ ପାକିସ୍ତାନ ସେନା ଅଧିକୃତ ରହିଛି | ସାମାଜିକ ଗଣମାଧ୍ୟମ ଜରିଆରେ ପିଟିଏମ ନେତା ମଞ୍ଜୁର ପାସଥେନ କହିଛନ୍ତି ଯେ “ସ୍ଥାନୀୟ ଲୋକମାନଙ୍କ ପ୍ରତି ଯୁଦ୍ଧ ବନ୍ଦୀ ଭଳି ଦୁର୍ବ୍ୟବହାର କରାଯାଉଛି ଓ କେବଳ ବନ୍ଧୁକ ଧରି ଲୋକମାନେ ସହରରେ ବିଚରଣ କରୁଛନ୍ତି” | କର୍ମୀ ମାନେ ଏକଥା ମଧ୍ୟ କହିଛନ୍ତି ଯେ ସେନା ଦ୍ଵାରା ହିଂସାତ୍ମକ ଘଟଣାରେ ପ୍ରାଣ ହରେଇଥିବା ପ୍ରଦର୍ଶନକାରୀ ମାନଙ୍କୁ ସହାନୁଭୂତିକ କ୍ଷତିପୂରଣ ମଧ୍ୟ ଦିଆଯାଇ ନାହିଁ ଓ ପୀଡିତ ପରିବାର ଗୁଡିକୁ କୁହାଯାଇଛି ଯେ ଏହି ଅନୁକମ୍ପାମୁଳକ ରାଶି ସେତେବେଳେ ଯାଇଁ ପ୍ରଦାନ କରାଯିବ ଯେତେବେଳେ ସେମାନେ ପାକିସ୍ତାନ ସେନାକୁ ଦୋଷ ମୁକ୍ତ କରି ହତ୍ୟା ଘଟଣା ପାଇଁ ପିଟିଏମ ର ଗିରଫ ସଦସ୍ୟ ମାନଙ୍କୁ ଦାୟୀ କରିବେ |

ସମ୍ପ୍ରତ୍ତି ପିଟିଏମ ର ଜଣେ ମହିଳା ନେତା ଗୁଲାଲାଇ ଇସମାଇଲ ଙ୍କୁ ରାଷ୍ଟ୍ର ବିରୋଧୀ ଭାଷଣ ଦେଇଥିବା ଯୋଗୁଁ ପେଶାୱାରରୁ ଗିରଫ କରାଯାଇଥିଲା | ଗୁଲାଲାଇଙ୍କ ବିରୁଦ୍ଧରେ ଆତଙ୍କବାଦ ଅଧିନିୟମ ଅନ୍ତର୍ଗତ ଦୁଇଟି ମାମଲା ରୁଜ୍ଜୁ କରାଯାଇଛି |ଏହା ପୂର୍ବରୁ ମଧ୍ୟ ମିଥ୍ୟା ଅଭିଯୋଗରେ ଗୁଲାଲାଇ ଇସମାଇଲଙ୍କ ନାମ କଳାତାଳିକା ଭୁକ୍ତ କରାଯାଇଥିଲା |ଏହା ପାକିସ୍ତାନୀ ରାଷ୍ଟ୍ର ଦ୍ଵାରା ପଶତୁନ ନରସଂହାରକୁ ଘଣ୍ଟ ଘୋଡାଇବା ଲାଗି ମାନବାଧିକାରର ଲଙ୍ଘନ ଓ ଦେଶରେ ନାଗରିକ ଅଧିକାର ଆନ୍ଦୋଳନର ହନନ ଅଟେ |

ଏନଏବି, ଖାକାନ ଅବ୍ବାସିଙ୍କ ବିରୁଦ୍ଧରେ ଏହାର ତଦନ୍ତ ତ୍ୱରାନ୍ୱିତ କରିଛି ଓ ଏହା ପ୍ରମାଣ କରିବାକୁ ଚାହୁଁଛି ଯେ ପିଟିଏମ ର ଗଣତାନ୍ତ୍ରିକ ଭାବେ ନିର୍ବାଚିତ ନେତା ମାନଙ୍କୁ ସରକାରୀ ବିରୋଧୀ କାର୍ଯ୍ୟକଳାପ ଲାଗି ବାହ୍ୟ ସଂସ୍ଥା ଗୁଡିକ ପାଣ୍ଠି ପ୍ରଦାନ କରୁଛନ୍ତି | ଏହାକୁ ଦୃଷ୍ଟିରେ ରଖି ପିଟିଆଇ ପଶତୁନ ନେତା ମାନଙ୍କର ସଦସ୍ଯତା ଖାରିଜ କରିବା ଲାଗି ଉଦ୍ୟମ ଚଳେଇଛି |ଏହି ପରିପ୍ରେକ୍ଷୀରେ ବିରୋଧୀ ନେତା ମରିୟମ ନୱାଜ ସରିଫ ଓ ବିଲାୱାଲ ଭୁଟ୍ଟୋ-ଜର୍ଦାରୀ ଏକାଠି ହେବା ତଥା ‘ଚାର୍ଟର ଅଫ ଡେମୋକ୍ରାସି’ ବା ‘ଗଣତନ୍ତ୍ର ର ସନନ୍ଦ’ ବୋଲି କୁହାଯାଉଥିବା ଦସ୍ତାବେଜରେ ସ୍ବାକ୍ଷରିତ କରିବା ଦୀର୍ଘକାଳୀନ ପାକିସ୍ତାନୀ ରାଜନୀତିର ସନ୍ଦର୍ଭରେ ଅତ୍ୟନ୍ତ ମହତ୍ବପୂର୍ଣ୍ଣ ଅଟେ , ବିଶେଷକରି ଏଭଳି ସ୍ଥିତିରେ ଯେତେବେଳେ ବିରୋଧୀ ଦଳ ଗୁଡିକ ଇମ୍ରାନ ଖାଁ ସରକାରଙ୍କ ନୀତି ଗୁଡିକ ବିରୁଦ୍ଧରେ ସ୍ବରଉତ୍ତୋଳନ ର ଗତି ବଢେଇବାକୁ ପ୍ରୟାସ କରୁଛନ୍ତି |

ମୂଳ ଲେଖା : ଡଃ ଜାଇନାବ ଅଖତର, ପାକିସ୍ତାନ ଉପରେ ବିଶ୍ଳେଷକ 

ଅନୁବାଦ : ରୀତା ଯୋଶୀ