ଏଫଏଟିଏଫ ରେ ପାକିସ୍ତାନର ଅବମାନନା ଜାରି

ଆମେରିକାର ଓରଲାଣ୍ଡୋରେ ଛ-ଦିନ-ବ୍ୟାପୀ ଆର୍ଥିକ କ୍ରିୟାନ୍ଵୟନ ଟାସ୍କ ଫୋର୍ସ (ଏଫଏଟିଏଫ)ର ଅଧିବେଶନ ଗତ ସପ୍ତାହରେ ଅନୁଷ୍ଠିତ ହୋଇଯାଇଛି | ଏହି ଅଧିବେଶନରେ, ପାକିସ୍ତାନ ଅକ୍ଟୋବର ସୁଦ୍ଧା ଆନ୍ତର୍ଜାତୀୟ ଆର୍ଥିକ ସଂସ୍ଥାକୁ ଦେଇଥିବା ପ୍ରତିଶ୍ରୁତି ଗୁଡିକୁ ପାଳନ କରିବାକୁ ପଡିବ ନଚେତ ଏହାକୁ ପ୍ରଚଳିତ ‘ଗ୍ରେ ତାଲିକା’ ରୁ ‘କଳା ତାଲିକାଭୁକ୍ତ କରିଦିଆଯିବ ବୋଲି ଚେତାବନୀ ଦିଆଯାଇଛି  |

ପାକିସ୍ତାନ, ଅର୍ଥ ବିରୋଧୀ ହେରଫେର (ଏଏମଟି) ଓ ସନ୍ତ୍ରାସବାଦ ବିରୋଧୀ ଅର୍ଥ ଯୋଗାଣ (ସିଟିଏଫ) ବ୍ୟବସ୍ଥାକୁ ଆହୁରି ମଜବୁତ କରିବା ସହ ଏହାର ରଣନୀତିକ ସନ୍ତ୍ରାସବାଦ ବିରୋଧୀ ଆର୍ଥିକ ସହାୟତା ଜନିତ ଅନିୟମିତତା ଗୁଡିକୁ ମୁକାବିଲା କରିବା ଲାଗି ଏଫଏଟିଏଫ ଓ ଏସିଆ ପ୍ରଶାନ୍ତ ଗୋଷ୍ଠୀ (ଏପିଜି) ସହ କାମ କରିବା ପାଇଁ ବର୍ଷେ ପୂର୍ବରୁ ପ୍ରତିଶ୍ରୁତିବଦ୍ଧତା ଜାହିର କରିଥିଲା|ଏସଂକ୍ରାନ୍ତରେ ଇସଲାମାବାଦ ର ପଦକ୍ଷେପ ନିରାଶଜନକ ରହିଛି |ମାତ୍ର କେତୋଟି ଲୋକ ଦେଖାଣିଆ ପଦକ୍ଷେପ ଗ୍ରହଣ କରିବା ଛଡା ଏହାର ଦେଶ ମାଟିରୁ ଚଲାଯାଉଥିବା ସନ୍ତ୍ରାସବାଦୀ କାର୍ଯ୍ୟକଳାପ ବିରୁଦ୍ଧରେ ଏଯାଏଁ  କୌଣସି ଉଲ୍ଲେଖନୀୟ ପଦକ୍ଷେପ ଗ୍ରହଣ କରିନାହିଁ|

ଉଲ୍ଲେଖ ଯୋଗ୍ୟ ଯେ ଏଫଏଟିଏଫ ଏହାର ପ୍ରତିଷ୍ଠାର 30 ତମ ବାର୍ଷିକୀ ପାଳନ କରିଛି ଓ ଏକ ନୂତନ, ଖୋଲା ମନୋଭାବାପନ୍ନ ତଥା ଜନାଦେଶ ସହ ଏକ ସମୟାନୁଯାୟୀ, ଲକ୍ଷାଭିମୁଖୀ ଓ ଫଳପ୍ରଦ ପ୍ରଣାଳୀରେ କାମ କରିବା ଲାଗି ପ୍ରତିବଦ୍ଧତା, ଅର୍ଥ ହେରେଫର ଓ ସନ୍ତ୍ରାସବାଦୀକୁ ଅର୍ଥ ଯୋଗାଣ ବିରୁଦ୍ଧରେ ଆନ୍ତର୍ଜାତୀୟ କାର୍ଯ୍ୟାନୁଷ୍ଠାନ କ୍ଷେତ୍ରରେ ଏକ ଅଗ୍ରଣୀ ଗୋଷ୍ଠୀ ଭାବେ ଏହାର ପ୍ରାସଙ୍ଗିକତା ବୃଦ୍ଧି ପାଇଛି  |

ଏଟିଏଫ କହିବାନୁଯାୟୀ କୌଣସି ନିୟମ ପାଳନ କରୁନଥିବା ପାକିସ୍ତାନକୁ ଆଗାମୀ ଦିନରେ ଅର୍ଥ ହେରଫେର ବିରୋଧୀ ଓ ସନ୍ତ୍ରାସବାଦ ବିରୋଧୀ ଅର୍ଥଯୋଗାଣ (ଏଏମଏଲ/ସିଟିଏଫ) ଆଦି କ୍ଷେତ୍ରରେ କାର୍ଯ୍ୟ କରିବା ପାଇଁ ଏହାର ସୀମିତ ବନ୍ଧୁ ରାଷ୍ଟ୍ର ଓ ହିତାକାଙ୍ଖୀ ମାନେ ମଧ୍ୟ ଏହା ଉପରେ  ଭରସା କରିବା ଅତ୍ୟନ୍ତ କଷ୍ଟକର ହୋଇପଡିବ | କାରଣ ସନ୍ତ୍ରାସବାଦ ବିରୋଧୀ ବିତ୍ତୀୟ ଯୋଗାଣ (ଏଏମଏଲ/ସିଟିଏଫ)କୁ ବିଶ୍ୱବ୍ୟାପି ଆତଙ୍କବାଦୀ ଆକ୍ରମଣ ର ସବୁଠୁ ମହତ୍ଵପୂର୍ଣ୍ଣ ଉତପ୍ରେରକ ବୋଲି କୁହାଯାଇଥାଏ |

ଫେବୃୟାରୀ 2019ରେ ପୁଲୱାମା ଆକ୍ରମଣ ଘଟଣା  ପରେ ଆନ୍ତର୍ଜାତୀୟ ସଂସ୍ଥା କେବଳ ଏହି ଜଘନ୍ୟ ସନ୍ତ୍ରାସବାଦୀ ଆକ୍ରମଣର ତୀବ୍ର  ନିନ୍ଦା କରିନଥିଲେ ବରଂ ଏଭଳି ଘୃଣ୍ୟ ଆକ୍ରମଣ ଆର୍ଥିକ ସହାୟତା ବିନା ସମ୍ଭବ ନୁହେଁ ବୋଲି ମଧ୍ୟ ଦୃଢ ସ୍ଵରରେ କହିବା ସହ  ସନ୍ତ୍ରାସବାଦୀ ସମର୍ଥକ ମାନେ ଏହି ଅର୍ଥ ଯୋଗାଉଛନ୍ତି ବୋଲି ମଧ୍ୟ କହିଥିଲେ |

ଜୁନ 2019ର ସବିଶେଷ ଅନୁପାଳନ ରିପୋର୍ଟରେ ଏଫଏଟିଏଫ ସ୍ପଷ୍ଟ ଭାବେ କହିଛି ଯେ ଗତ ବର୍ଷ ଏଫଟିଏଫ ସହ ଏକ କ୍ରିୟାନ୍ଵୟନ ଯୋଜନା ବିକଶିତ କରିବା ସତ୍ତ୍ୱେ ପାକିସ୍ତାନ ରଣନୀତିକ ଏଏମଏଲ/ସିଏଫଟି ମାମଲା ନେଇ କୌଣସି ପଦକ୍ଷେପ ନେଇନାହିଁ | ପ୍ରତ୍ୟକ୍ଷ ଭାବେ ଏହାର ସମାଲୋଚନା କରି ଏଫଏଟିଏଫ ଉଲ୍ଲେଖ କରିଛି ଯେ ଯଦିଓ ପାକିସ୍ତାନ ଏହାର ଏଏମଏଲ/ସିଏଫଟି ବ୍ୟବସ୍ଥାରେ ସୁଧାର ଆଣିବା ଦିଗରେ କେତୋଟି ପଦକ୍ଷେପ ନେଇଛି ତେବେ ମଧ୍ୟ ଏହାର  ମୁକାବିଲା ଲାଗି ଉପଯୁକ୍ତ ପଦକ୍ଷେପ ଗ୍ରହଣ କରିନାହିଁ |

                                                                                                              

ଏଫଏଟିଏଫ ସହ ପ୍ରସ୍ତୁତ କରାଯାଇଥିବା ଏହାର ଦଶ ସୂତ୍ରୀ କ୍ରିୟାନ୍ଵୟନ ଯୋଜନାକୁ  ଜାନୁଆରୀ ଓ ମେ 2019 ଆଦି ଦୁଇଟି ସମୟସୀମା ମଧ୍ୟରେ ସଂପୂର୍ଣ୍ଣ କରିବାରେ ପାକିସ୍ତାନ ର ବିଫଳତା ପାଇଁ ଏଫଏଟିଏଫ ଉଦବେଗ ପ୍ରକାଶ କରିଛି |ସେ  ପାକିସ୍ତାନକୁ ଚେତାବନୀ ଦେଇଛି ଯେ ଯଦି ସେ ସ୍ଵନିର୍ଦ୍ଧାରିତ ଅକ୍ଟୋବର 2019 ସମୟ ସୀମା ସୁଦ୍ଧା ଏହାର ପ୍ରତିଶ୍ରୁତି ଗୁଡିକୁ ପାଳନ ନକରେ ତେବେ ଏହା ବିରୁଦ୍ଧରେ ପରବର୍ତ୍ତୀ ଯୁକ୍ତିଯୁକ୍ତ ପଦକ୍ଷେପ ନିଆଯିବ | ଆନ୍ତର୍ଜାତୀୟ ସଂସ୍ଥା ଏହାର ରିପୋର୍ଟ ରେ ଦର୍ଶାଇଛି ଯେ ଏହି ସମୟ ସୀମା ମଧ୍ୟରେ ଏକ୍ଷେତ୍ରରେ କୌଣସି ପ୍ରଗତି ନହେଲେ ଏଫଏଟିଏଫ ପରବର୍ତ୍ତୀ ପଦକ୍ଷେପ ଗ୍ରହଣ କରିବ |

ତେଣେ ପାକିସ୍ତାନ ସରକାର ନିଜ ତରଫରୁ ପ୍ରେସ ଇସ୍ତାହାର ଜାରି କରି ନିଜ ଲୋକଙ୍କ ସହ ସମଗ୍ର ବିଶ୍ଵର ଲୋକଙ୍କୁ ମଧ୍ୟ ଭୁଆଁ ବୁଲାଇବା ପାଇଁ ଚେଷ୍ଟା କରିଛନ୍ତି|  ପାକିସ୍ତାନର ପ୍ରେସ ବିବୃତ୍ତିରେ ଏହା ଅବଗତ କରାଇବାକୁ ଉଦ୍ୟମ କରାଯାଇଛି ଯେ ଏହାର ଏଏମଏଲ/ସିଏଫଟି ବ୍ୟବସ୍ଥାରେ ସୁଧାର ଆଣିବା ଓ  କାର୍ଯ୍ୟକାରୀ ଯୋଜନାର କାର୍ଯ୍ୟକାରିତା ଦିଗରେ  ପ୍ରଗତି ପାଇଁ ଏଫଏଟିଏଫ ସେମାନଙ୍କୁ ପ୍ରଶଂସା କରିଛି ଓ ଆଗାମୀ ଦିନରେ ଏକ୍ଷେତ୍ରରେ ଆହୁରି ପଦକ୍ଷେପ ନେବା ଲାଗି ପ୍ରୋତ୍ସାହନ କରିଛି |

ଭାରତୀୟ ବୈଦେଶିକ ମନ୍ତ୍ରଣାଳୟ କହିଛି ଯେ ପାକିସ୍ତାନ ଠାରୁ ଏହା ଆଶା କରାଯାଉଛି ଯେ ସେ  ଏଫଏଟିଏଫ ପ୍ରତି ଏହାର ପ୍ରତିଶ୍ରୁତିବଦ୍ଧତା ପାଳନ କରୁ ଓ ନିଜ ନିୟନ୍ତ୍ରଣାଧୀନ କୌଣସି ଅଞ୍ଚଳରୁ ସନ୍ତ୍ରାସବାଦ ଓ ସନ୍ତ୍ରାସବାଦୀ ମାନଙ୍କୁ ଅର୍ଥ ସହାୟତା ପ୍ରଦାନ କରିବା ସଙ୍କ୍ରାନ୍ତୀୟ ଆନ୍ତର୍ଜାତୀୟ ଉଦବେଗ ଗୁଡିକର  ଦୂରୀକରଣ ଲାଗି ଏକ ବିଶ୍ଵସନୀୟ,ସଠିକ, ଅପରିବର୍ତ୍ତନୀୟ ତଥା ସ୍ଥାୟୀ ପଦକ୍ଷେପ ଗ୍ରହଣ କରୁ |

ଘୋର ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନ କେତୋଟି ପାରମ୍ପରିକ ବନ୍ଧୁ ରାଷ୍ଟ୍ର, ଯେଉଁମାନେ କି ଏଫଏଟିଏଫ ର ସଦସ୍ୟ ମଧ୍ୟ ଅଛନ୍ତି, ସେମାନଙ୍କ ଠାରୁ  ପ୍ରାୟ ତିନି ମାସ ଲାଗି ସହାୟତା ନେବା ପାଇଁ ପ୍ରୟାସ କରିଥାଇପାରେ |ତେବେ ଇସଲାମାବାଦ ନିୟମ ପ୍ରଣେତା ମାନଙ୍କ ପାଖରେ ବହୁତ କମ ବିକଳ୍ପ ରହିଛି ଓ ସେମାନଙ୍କୁ ସନ୍ତ୍ରାସବାଦ  ଅର୍ଥ ଯୋଗାଣ ଓ ଅର୍ଥ ହେରେଫର ବିରୁଦ୍ଧରେ କଡା ପଦକ୍ଷେପ ନିହାତି ଗ୍ରହଣ କରିବାକୁ ପଡିବ ବୋଲି ଏଫଏଟିଏଫ କହିଛି| ପାକିସ୍ତାନ ଏବେ ପର୍ଯ୍ୟନ୍ତ ଦକ୍ଷିଣ ଏସୀୟ ଅଞ୍ଚଳରେ ଅସ୍ଥିରତା ସୃଷ୍ଟି କରିବା ଲାଗି ସକ୍ରିୟ ସନ୍ତ୍ରାସବାଦୀ ଗୋଷ୍ଠୀକୁ ସହାୟତା କରୁଛି|                                                                                              

ମୂଳ ଲେଖା : ଡଃ ଅଶୋକ ବେହୁରିଆ , ଆବାହକ, ଦକ୍ଷିଣ ଏସିଆ କେନ୍ଦ୍ର,ଆଇଡ଼ିଏସଏ

ଅନୁବାଦ: ରୀତା ଯୋଶୀ