ଧାର୍ମିକ ସ୍ୱାଧୀନତା ଉପରେ ଆମେରିକାର ରିପୋର୍ଟକୁ ଭାରତର ଭର୍ତ୍ସନା

ଆମେରିକା, ଧାର୍ମିକ ସ୍ୱାଧୀନତା ଉପରେ ଭାରତର ଆଭିମୁଖ୍ୟକୁ ସମାଲୋଚନା କରି ପୁଣି ଥରେ ଏହାର କପଟ ମନୋଭାବ ଏବଂ ମିଥ୍ୟାଚାରର ପରଦାଫାସ କରିଛି | ଆମେରିକା କିଭଳି ଭାବେ ଅନ୍ୟ ଦେଶ ଗୁଡିକର ଧାର୍ମିକ ସ୍ୱାଧୀନତା ବିଷୟବସ୍ତୁ ଉପରେ ହସ୍ତକ୍ଷେପ କରିବା ନୀତି ଆପଣାଇଥାଏ ତାହା ଆନ୍ତର୍ଜାତୀୟ ଧାର୍ମିକ ସ୍ୱାଧୀନତା ଉପରେ ଆମେରିକୀୟ ସରକାରଙ୍କର ବାର୍ଷିକ ରିପୋର୍ଟରୁ ସ୍ପଷ୍ଟ ପ୍ରତୀୟମାନ ହେଉଛି | 2018 ମସିହା ଯାକ ସଂଖ୍ୟାଲଘୁ ସମ୍ପ୍ରଦାୟଙ୍କ ଉପରେ ଚରମପନ୍ଥୀ ଗୋଷ୍ଠୀଙ୍କର ହିଂସାତ୍ମକ ଆକ୍ରମଣ କରାଯାଇଥିଲା ବୋଲି ସେହି ରିପୋର୍ଟରେ ଉଲ୍ଲେଖ କରାଯାଇଛି | ଭାରତ ସରକାର ଏହି ରିପୋର୍ଟକୁ ଦୃଢ ଭାବେ ଖଣ୍ଡନ କରିଛନ୍ତି ଏବଂ ଆମ ନାଗରିକ ମାନଙ୍କ ସ୍ଥିତି ଉପରେ ମତବ୍ୟକ୍ତ ପାଇଁ ଆମେରିକାର କୌଣସି ହସ୍ତକ୍ଷେପ କରିବା ଅଧିକାର ନଥିବା କହିଛନ୍ତି | ଏଥିରେ ଆହୁରି ମଧ୍ୟ ଉଲ୍ଲେଖ ଅଛି ଯେ "ଭାରତ ଏକ ସର୍ବବୃହତ ଗଣତାନ୍ତ୍ରିକ ରାଷ୍ଟ୍ର ଭାବେ ଏହାର ଧର୍ମନିରପେକ୍ଷ ପରିଚୟ ପାଇଁ ତଥା ଏକ ବହୁଳବାଦୀ ସମାଜ ପାଇଁ ଏବଂ ଏହାର ସହନଶୀଳତା ଓ ସମଷ୍ଟିଗତ ପ୍ରତିଶୃତି ପାଇଁ ସର୍ବଦା ଗୌରବାନ୍ୱିତ |

ବିଚିତ୍ର କଥା ଏହା ଯେ, ଆନ୍ତର୍ଜାତୀୟ ଧାର୍ମିକ ସ୍ୱାଧୀନତା ଉପରେ ଆମେରିକୀୟ କମିଶନ ଅଧ୍ୟକ୍ଷ ତେଞ୍ଜିନ ଦୋର୍ଜି ଏକ ଅସହମତ ବିଚାରଧାରା ବ୍ୟକ୍ତ କରିଛନ୍ତି | ସେ କହିଛନ୍ତି "ଭାରତ ଏକ ଦୃଢ ଗଣତନ୍ତ୍ର ଏବଂ ନ୍ୟାୟିକ ବ୍ୟବସ୍ଥା ସହ ଏକ ଉନ୍ମୁକ୍ତ ସମାଜ" | ଏହି କମିଶନ ଧାର୍ମିକ ସ୍ୱାଧୀନତାର ଘୋର ଲଂଘନ ପାଇଁ ବିଭିନ୍ନ ଦେଶ ଉପରେ ନିୟମିତ ଭାବେ ଏହାର ରିପୋର୍ଟ ପ୍ରସ୍ତୁତ କରିଆସୁଛି | ଧାର୍ମିକ ସ୍ୱାଧୀନତା ଟ୍ରମ୍ପ ପ୍ରଶାସନଙ୍କର ଏକ ଅନ୍ୟତମ ପ୍ରାଥମିକତା ଥିବା ବିଷୟ ଗତବର୍ଷ ୱାଶିଙ୍ଗଟନ ଡିସି ରେ ଆମେରିକାର ଉପ ରାଷ୍ଟ୍ରପତି ମାଇକ ପେନ୍ସ ଏକ ଉଦବୋଧନରେ କହିଥିଲେ |

ମାନବାଧିକାର ହେଉ କିମ୍ବା ଧାର୍ମିକ ସ୍ୱାଧୀନତା ହେଉ କିମ୍ବା ଗଣମାଧ୍ୟମର ସ୍ୱାଧୀନତା ହେଉ, ଖଳ ପ୍ରକୃତିଗତଙ୍କୁ ଧମକାଇବା ଏବଂ ନିଜର ସମର୍ଥକ ମାନଙ୍କ ପ୍ରତି କୋହଳ ମନୋଭାବ ପୋଷଣ କରିବା ବିଷୟ ଉପରେ ଆମେରିକା ବେଶ ଜଣାଶୁଣା | ଏହି ସବୁ ବିଷୟ ଗୁଡିକୁ ନେଇ ଆମେରିକା ଏହାର ବିରୋଧୀ ମାନଙ୍କ ପ୍ରତି କଟୁ ମନୋବୃତି ପୋଷଣ କରୁଥିବାବେଳେ ଯେତେବେଳ ଆମେରିକା କିମ୍ବା ଏହାର ସହଯୋଗୀ ମାନେ ଅପରାଧ କରୁଛନ୍ତି ସେତେବେଳେ ଏହା ନୀରବ ରହୁଛି | ଫ୍ରିଡମ ହାଉସ ନାମକ ଆମେରିକାର ଏକ ସ୍ବେଛାସେବୀ ଅନୁଷ୍ଠାନ ଗଣମାଧ୍ୟମର ସ୍ୱାଧୀନତା ଉପରେ ଆକଳନ କରି ଭାରତକୁ ଅନ୍ୟ କିଛି ଦେଶଗୁଡିକ ସହ ଅନ୍ତର୍ଭୁକ୍ତ କରିଛି ଯେଉଁଠାରେ ଗଣମାଧ୍ୟମର ସ୍ୱାଧୀନତା ସଠିକ ନଥିବା କୁହାଯାଇଛି | ତେବେ ଏଭଳି ରିପୋର୍ଟକୁ ଭିତ୍ତିହୀନ ଏବଂ ଭୂଲ ଭାବେ ବର୍ଣ୍ଣନା କରି ଏହାକୁ ଗୁରୁତର ମନେ ନକରିବାକୁ କୁହାଯାଇଛି |

ଆଗ୍ରହର ବିଷୟ ଏହା ଯେ, ଟ୍ରମ୍ପ ପ୍ରଶାସନ, ଯାହା ଅନ୍ୟ ଦେଶ ଗୁଡିକର ମାନବାଧିକାର ଏବଂ ଗଣତାନ୍ତ୍ରିକ ରେକର୍ଡର ବିଚାରବ୍ୟକ୍ତ କରୁଛି, ତାହା ବର୍ତ୍ତମାନ ସ୍ୱୟଂ ଆମେରିକାର ଫ୍ରିଡମ ହାଉସ ସଂସ୍ଥା ଦ୍ୱାରା ସମାଲୋଚିତ ହୋଇଛି ଏବଂ ଏହାର ରିପୋର୍ଟ ପ୍ରସ୍ତୁତ କରିଛି | ରିପୋର୍ଟରେ କୁହାଯାଇଛି ଆମେରିକାର ଗଣତନ୍ତ୍ର ସୁଦୃଢ ଥିବାବେଳେ ରାଷ୍ଟ୍ରପତି ଟ୍ରମ୍ପଙ୍କ ଶାସନ କାଳରେ ସାମ୍ବାଦିକତା ବିରୁଦ୍ଧରେ ଆଭିମୁଖ୍ୟ ଏବଂ ସାମ୍ବାଦିକତା ବିରୁଦ୍ଧରେ ଅନ୍ୟାନ୍ୟ ନୀତି ଯୋଗୁଁ ଆନ୍ତର୍ଜାତୀୟ ସ୍ତରରେ ଏହାର ମାନ ହ୍ରାସ ପାଇଛି | ଆମେରିକାର ଏଭଳି ମନୋଭାବ ଏବଂ ଆଚରଣ ଗ୍ରହଣଯୋଗ୍ୟ ନୁହେଁ ବୋଲି ମଧ୍ୟ ଫ୍ରିଡମ ହାଉସ ଏହାର ରିପୋର୍ଟରେ ଉଲ୍ଲେଖ କରିଛି |

ଆନ୍ତର୍ଜାତୀୟ ଧାର୍ମିକ ସ୍ୱାଧୀନତା ଉପରେ ଆମେରିକୀୟ କମିଶନ ଭାରତ ଉପରେ 2009 ମସିହାରୁ ନଜର ରଖିଆସିଛି | ଭାରତୀୟ ବୈଦେଶିକ ମନ୍ତ୍ରଣାଳୟ ଆମେରିକାର ଏହି ରିପୋର୍ଟକୁ ସମ୍ପୂର୍ଣ୍ଣ ଭାବେ ଭିତ୍ତିହୀନ ଓ ବେକାର କହିଛି | 2015 ଏବଂ 2016 ମସିହାରେ ସମସ୍ତ ଅଭିଯୋଗକୁ ଏହା ଖଣ୍ଡନ କରିଛି | ରାଷ୍ଟ୍ରପତି ଓବାମା ମଧ୍ୟ ଯେତେବେଳେ ଭାରତ ଗସ୍ତରେ ଆସିଥିଲେ ସେ ଭାରତର ଧାର୍ମିକ ସହନଶୀଳତା ରେକର୍ଡକୁ ଚ୍ୟାଲେଞ୍ଜ କରିଥିଲେ |

କିନ୍ତୁ ଭାରତର, ଏକ ମଜବୁତ ନ୍ୟାୟିକ ବ୍ୟବସ୍ଥା, ମାନବାଧିକାର କମିଶନ, ସଂଖ୍ୟାଲଘୁ ସମ୍ପ୍ରଦାୟ ପାଇଁ ଜାତୀୟ କମିଶନ ଏବଂ ସଂଖ୍ୟାଲଘୁ ବ୍ୟାପାର ମନ୍ତ୍ରଣାଳୟ ସହିତ ଏକ ଦୃଢ ଗଣତନ୍ତ୍ର ରହିଛି | ସେଥି ମଧ୍ୟରୁ ଅଧିକାଂଶ ସଂସ୍ଥା ଗୁଡିକର ତଦନ୍ତ ପାଇଁ ନିର୍ଦ୍ଦେଶ ଦେବା କ୍ଷମତା ରହିଛି |

ମୋଟାମୋଟି ଭାବେ କହିବାକୁ ଗଲେ, ଭାରତରେ ଧାର୍ମିକ ସ୍ୱାଧୀନତା ପ୍ରସଙ୍ଗକୁ ଆମେରିକାରେ ଭୁଲ ଭାବେ ବୁଝାଯାଇଛି | ଏଭଳି ଧରଣର ଅନାବଶ୍ୟକ ରିପୋର୍ଟ ଭାରତର ଆଭ୍ୟନ୍ତରୀଣ ବ୍ୟାପାରରେ କୌଣସି ପ୍ରଭାବ ପକାଇବ ନାହିଁ କିମ୍ବା ହସ୍ତକ୍ଷେପ କରିପାରିବ ନାହିଁ | ଭାରତରେ ଧର୍ମନିରପେକ୍ଷତା ସୁଦୃଢ ରହିଛି | ଭାରତୀୟ ସମ୍ବିଧାନ ଅନୁଯାୟୀ ଭାରତରେ ସଂଖ୍ୟାଲଘୁ ସମ୍ପ୍ରଦାୟର ଲୋକମାନେ ସମ୍ପୂର୍ଣ୍ଣ ସୁରକ୍ଷିତ ରହିଛନ୍ତି | ଅଧିକାଂଶ ଦେଶ ଏହି ଅଧିକାର ସେମାନଙ୍କ ନାଗରିକ ମାନଙ୍କୁ ଦେଇନାହାଁନ୍ତି | "ଭାରତର ଧର୍ମନିରପେକ୍ଷତାକୁ କେହି ବି ଚ୍ୟାଲେଞ୍ଜ କରିପାରିବେ ନାହିଁ" ବୋଲି ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଏକଦା କହିଥିଲେ |

ମୂଳ ଲେଖା : ଡକ୍ଟର ଆଶ ନାରାୟଣ ରୟ, ନିର୍ଦ୍ଦେଶକ, ଆଇ.ଏସ.ଏସ., ଦିଲ୍ଲୀ

ଅନୁବାଦ : ଅନୀଲ କୁମାର ପଟ୍ଟନାୟକ