ବିକାଶର ଗତି ବଢାଇବା ଉପରେ ସରକାରଙ୍କ ଧ୍ୟାନ କେନ୍ଦ୍ରିତ

ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡ଼ିଏ) ସରକାର ଲଗାତାର ଦ୍ଵିତୀୟ ଥର ପାଇଁ ବିପୁଳ ଜନସମର୍ଥନ ସହ କେନ୍ଦ୍ରରେ କ୍ଷମତାସୀନ ହେବା ପରେ ନିଯୁକ୍ତି ସୃଷ୍ଟି ଓ ଲୋକମାନଙ୍କ ଜୀବନ ଶୈଳୀରେ ସୁଧାର ଆଣିବା ଆଦି ଦୁଇଟି ପ୍ରମୁଖ ଉଦ୍ଦେଶ୍ୟ ପୂରଣ କରି ଭାରତୀୟ ଅର୍ଥ ବ୍ୟବସ୍ଥାକୁ ଉଚ୍ଚ ବିକାଶ ପଥରେ ଆଗେଇ ନେବା ଲାଗି କାର୍ଯ୍ୟ ତ୍ୱରାନ୍ୱିତ କରିଛନ୍ତି |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ପଷ୍ଟ କରିଛନ୍ତି ଯେ ତାଙ୍କ ସରକାର ବିକାଶର ଗତି ବଢେଇବା ଲାଗି ବ୍ୟାପକ ଅର୍ଥନୈତିକ କାର୍ଯ୍ୟକଳାପରେ ସଂସ୍କାର ଆଣିବା ଲାଗି ସଙ୍କଳ୍ପବଦ୍ଧ | ନୀତି ଆୟୋଗ ଦ୍ଵାରା ଆୟୋଜିତ ଆର୍ଥନୀତିଜ୍ଞ ଓ ବିଶେଷଜ୍ଞ ମାନଙ୍କ ଏକ ଗୋଷ୍ଠୀ ସହ ବାର୍ତ୍ତାଳାପ କରିବା ସମୟରେ ସେ, ପ୍ରତ୍ୟକ୍ଷ ବିଦେଶୀ ପୁଞ୍ଜି ବିନିଯୋଗ(ଏଫଡ଼ିଆଇ) କୁ ଆକୃଷ୍ଟ କରିବା ଲାଗି ଭାରତୀୟ ଅର୍ଥନିତୀକୁ ପ୍ରତିଦ୍ବନ୍ଦିତାମୂଳକ କରିବାର ଆବଶ୍ୟକତା ଉପରେ ଆଲୋକପାତ କରିଥିଲେ |

ଏହି ବୈଠକରେ ଶ୍ରମ ଓ ନିଯୁକ୍ତି, କୃଷି କ୍ଷେତ୍ର, ସ୍ୱାସ୍ଥ୍ୟ ଓ ଶିକ୍ଷା ଆଦି କ୍ଷେତ୍ରର ବିଶେଷଜ୍ଞ ମାନଙ୍କ ସହ ଆଳାପ ଆଲୋଚନା ହୋଇଥିଲା | ଆସନ୍ତା ମାସ 5 ତାରିଖରେ ନୂତନ ସରକାରଙ୍କ ପୂର୍ଣ୍ଣାଙ୍ଗ ବଜେଟ ଉପସ୍ଥାପିତ ହେବାକୁ ଦିନ ଧାର୍ଯ୍ୟ ହୋଇଥିବା ବେଳେ ଏହି ବୈଠକକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି |

ଉଲ୍ଲେଖଯୋଗ୍ୟ ଯେ ନିଯୁକ୍ତି,କୃଷି ଓ ଜଳ ସମ୍ବଳ,ରପ୍ତାନି,ଶିକ୍ଷା ଓ ସ୍ୱାସ୍ଥ୍ୟ ପ୍ରସଙ୍ଗ ଉପରେ ଅଭିନବ ବିଚାରଧାରା ବ୍ୟକ୍ତ କରିବା ଲାଗି ଉପସ୍ଥିତ ବିଶେଷଜ୍ଞ ମାନଙ୍କୁ ପାଞ୍ଚୋଟି ଭିନ୍ନ ଭିନ୍ନ ଗୋଷ୍ଠୀରେ ବିଭକ୍ତ କରାଯାଇଥିଲା | ଉଚ୍ଚ ବିକାଶର ଗତି ଓ ନିଯୁକ୍ତି ସୃଷ୍ଟି ପାଇଁ ଏକ ଫଳପ୍ରଦ ରୂପରେଖ ପ୍ରସ୍ତୁତ କରିବା ଥିଲା ଏହାର ମୁଖ୍ୟ ଉଦ୍ଦେଶ୍ୟ | .

ମୋଦୀ ସରକାରଙ୍କୁ ପ୍ରଥମ କାର୍ଯ୍ୟକାଳ ସମୟରେ ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହାନ ଲାଗି ଅନେକ ଚାଲେଞ୍ଜର ସମ୍ମୁଖୀନ ହେବାକୁ ପଡିଥିଲା | ସରକାର ବିକାଶର ଗତି ତ୍ୱରାନ୍ୱିତ କରିବା ପାଇଁ ଅନେକ ପଦକ୍ଷେପର ଶୁଭାରମ୍ଭ କରି ଉଲ୍ଲେଖନୀୟ କାର୍ଯ୍ୟ କରିଥିଲେ ଏବଂ ଭାରତୀୟ ଅର୍ଥନିତୀକୁ ବିଶ୍ଵର ଦ୍ରୁତ ପ୍ରଗତିଶୀଳ ଅର୍ଥନୀତି ଭାବେ ପରିଣତ କରିବାରେ ସକ୍ଷମ ହେବାର ଗୌରବ ପ୍ରାପ୍ତ କରିଥିଲା |

ଏବେ ପୁଣିଥରେ ଏନଡ଼ିଏ ସରକାରଙ୍କ ଦ୍ଵିତୀୟ କାର୍ଯ୍ୟକାଳ ସମୟରେ ମଧ୍ୟ ଅର୍ଥନିତୀକୁ ଏକ ସ୍ଥାୟୀ ବିକାଶ ପଥରେ ଅବସ୍ଥାପିତ କରିବାର ଚାଲେଞ୍ଜ ରହିଛି ଯାହାକି ବେରୋଜଗାର ଓ ଦାବି ଚକ୍ରର ପୁନରୁଦ୍ଧାର ଭଳି ସମସ୍ୟା ଗୁଡିକ ଲାଗି ଅତ୍ୟନ୍ତ ମହତ୍ବପୂର୍ଣ୍ଣ ଅଟେ | ବିକାଶର ଅଭିବୃଦ୍ଧି ନେଇ ଏବେ ସରକାରଙ୍କ ଆଶା ଓ ଆକାଂକ୍ଷା ବଢି ଯାଇଛି | ଅଭିବୃଦ୍ଧିକୁ ପ୍ରୋତ୍ସାହନ ଦେବା ଲାଗି ଆଗାମୀ ବଜେଟରେ ମୌଳିକ ଢାଞ୍ଚା ଭଳି କ୍ଷେତ୍ରରେ ନିବେଶ ବୃଦ୍ଧି ଲାଗି ସରକାରଙ୍କ ଯୋଜନା ଗୁଡିକ ଉନ୍ମୋଚିତ ହେବାର ଆଶା କରାଯାଉଛି |

ବ୍ୟାଙ୍କର ବିତ୍ତୀୟ ସ୍ଥିତି ସରକାରଙ୍କ ପାଇଁ ଏକ ପ୍ରମୁଖ ପ୍ରସଙ୍ଗ ରହିବ |ଏହି ସ୍ଥିତିକୁ ସୁଦୃଢ କରିବା ପାଇଁ ସରକାର ତାଙ୍କ ପୂର୍ବ କାର୍ଯ୍ୟକାଳ ସମୟରେ ଅସ୍ବଚ୍ଛଳତା ଓ ଦେବାଳିଆ ଆଇନ (ଆଇବିସି) ଲାଗୁ କରିବା ସମେତ ଅନେକ ପଦକ୍ଷେପ ଗ୍ରହଣ କରିଥିଲେ ଓ ଏହାର ପରିଣାମ ଉତ୍ସାହଜନକ ରହିଛି |ତେବେ ଆଶା କରାଯାଉଛି ଯେ ନୂତନ ଅର୍ଥମନ୍ତ୍ରୀ ଏହି ପ୍ରକ୍ରିୟାକୁ ଆହୁରି ମଜବୁତ କରିବେ ଯଦ୍ୱାରା ବ୍ୟାଙ୍କ ର ଋଣ ପ୍ରଦାନ କରିବାର କ୍ଷମତା ସୁଦୃଢ ହେବ |

ଦେଶର ଅର୍ଥନୀତି ଅଭିବୃଦ୍ଧି ହାର ଶତକଡା 7 ଭାଗ ରହିବ ଓ ଭାରତ ବିଶ୍ଵର ଦ୍ରୁତ ପ୍ରଗତିଶୀଳ ପ୍ରମୁଖ ଅର୍ଥନୀତି ଭାବେ ନିଜର ସ୍ଥିତି ବଜାୟ ରଖିବ ବୋଲି ଆକଳନ କରାଯାଇଥିବା ବେଳେ ଭାରତ ସରକାର, ମାନ୍ଦାବସ୍ତା ଦେଇ ଗତି କରୁଥିବା ପ୍ରମୁଖ କ୍ଷେତ୍ର ଗୁଡିକର ବିକାଶ ର ପୁନର୍ଜୀବିତ କରିବା ଲାଗି ଦୃଢ ପଦକ୍ଷେପ ନେବାର ଆଶା କରାଯାଉଛି |
ବିଶେଷଜ୍ଞ ମାନେ ପରାମର୍ଶ ଦେଇଛନ୍ତି ଯେ ସରକାରଙ୍କୁ ପରବର୍ତ୍ତୀ ପିଢୀର ଆର୍ଥିକ ସଂସ୍କାର ଲାଗି ଦ୍ରୁତ ଗତିରେ କାର୍ଯ୍ୟ କରିବାକୁ ପଡିବ |ଏହାକୁ ସାର୍ବଜନୀନ କ୍ଷେତ୍ରରେ ବିନିବେଶ, ଜିଏସଟିର ପୁନଃ ସରଳୀକରଣ, ଉଦ୍ଯୋଗ ଗୁଡିକୁ ସହଜ ଋଣ ଉପଲବ୍ଧ କରାଇବା, ଆମଦାନୀ ଟିକସ ହ୍ରାସ କରିବା ଓ ଆମେରିକା ଚୀନ ବାଣିଜ୍ୟ ବିବାଦ ଦ୍ଵାରା ରପ୍ତାନି ସୁଯୋଗର ଫାଇଦା ଉଠାଇବା ଆଦି ଉପରେ ପ୍ରମୁଖତା ର ସହ କାର୍ଯ୍ୟ କରିବାକୁ ପଡିବ |

ବର୍ତ୍ତମାନ ପରିପ୍ରେକ୍ଷୀରେ ଏହା କୁହାଯାଉଛି ଯେ ସରକାର ବିଶ୍ଵର ପାଞ୍ଚୋଟି ଶୀର୍ଷ ଅର୍ଥନୀତି ମଧ୍ୟରେ ଅନ୍ୟତମ ରାଷ୍ଟ୍ର ଭାବେ ପରିଗଣିତ ହେବା ଲାଗି ସବୁ ମନ୍ତେ ଉଦ୍ୟମ କରିବ |ଏଥିଯୋଗୁଁ ସରକାରଙ୍କୁ ଅଭିନବ ସଂସ୍କାର ଆଣିବାକୁ ପଡିବ |ଏହା ପୂର୍ବରୁ ଭାରତୀୟ ଅର୍ଥବ୍ୟବସ୍ଥାରେ 1991 ରେ ଆର୍ଥିକ ସଂସ୍କାର ଅଣାଯାଇଥିଲା ଓ ବଜାରରେ ଉତ୍ପାଦ ଗୁଡିକ ମଧ୍ୟରେ ପ୍ରତିଦ୍ୱନ୍ଦିତାକୁ ପ୍ରୋତ୍ସାହାନ ଦେବା ଥିଲା ଏହାର ମୂଳ ଉଦ୍ଦେଶ୍ୟ |ସେତେବେଳେ ବେସରକାରୀ କ୍ଷେତ୍ରକୁ ଏହି ସୁଯୋଗ ଦିଆଯାଇଥିଲା|

ଭୂମି,ଶ୍ରମ ଓ ପୁଞ୍ଜି ଭଳି କ୍ଷେତ୍ର ଗୁଡିକରେ ମଧ୍ୟ ସଂସ୍କାର ଆଣିବାର ଆବଶ୍ୟକତା ରହିଛି |ସରକାର ଏବିଷୟରେ ହୃଦବୋଧ କରିସାରିଛନ୍ତି ଯେ ଏହି କ୍ଷେତ୍ରରେ ସଂସ୍କାର ବିନା ଭାରତର ଉତ୍ପାଦନ ଓ ସେବା କ୍ଷେତ୍ର ଆନ୍ତର୍ଜାତୀୟ ସ୍ତରରେ ପ୍ରତିଦ୍ୱନ୍ଦିତା ମୂଳକ ହୋଇପାରିବ ନାହିଁ |

ବିଶେଷଜ୍ଞ ମାନଙ୍କ କହିବାନୁଯାୟୀ ଭୂମି ବଜାରକୁ ମୁକ୍ତ କରିବା ବିନା ଭାରତୀୟ ବିନିର୍ମାଣ କ୍ଷେତ୍ର ଆନ୍ତର୍ଜାତୀୟ ସ୍ତରୀୟ ହୋଇ ପାରିବ ନାହିଁ |ଏହି କ୍ଷେତ୍ରରେ ପରିବର୍ତ୍ତନ ଆଣିବା ସହ ଶ୍ରମ ବଜାରରେ ଉଦାରୀକରଣ ମଧ୍ୟ କରିବାକୁ ପଡିବ |ଏହାଦ୍ୱାରା ବିନିର୍ମାଣ କ୍ଷେତ୍ର ପାଇଁ ଅଧିକ ଶ୍ରମ ଉପଲବ୍ଧ ହେବା ସହ ରୋଜଗାର ବୃଦ୍ଧି ହେବ | ସେହିପରି ଏକ ବଜାର ଭିତ୍ତିକ ନୀତି ଲାଗି ଦାବିକରୁଥିବା କୃଷି କ୍ଷେତ୍ରରେ ମଧ୍ୟ ସଂସ୍କାର ଆଣିବାର ଆବଶ୍ୟକତା ରହିଛି |
ଏହି କ୍ଷେତ୍ର ଗୁଡିକରେ ବ୍ୟାପକ ସଂସ୍କାର ଅଣାଗଲେ କେବଳ ଭାରତର ଅର୍ଥନୀତିର ବିକାଶ ବୃଦ୍ଧି ହେବ ନାହିଁ ବରଂ ନିଯୁକ୍ତି ସୃଷ୍ଟି ପାଇଁ ମଧ୍ୟ ବହୁ ସୁଯୋଗ ପ୍ରଦାନ କରିବ |

ମୂଳ ଲେଖା :ଆଦିତ୍ୟ ରାଜ ଦାସ, ବରିଷ୍ଠ ଅର୍ଥନୈତିକ ସାମ୍ବାଦିକ

ଅନୁବାଦ :ରୀତା ଯୋଶୀ