ପ୍ରଧାନମନ୍ତ୍ରୀଙ୍କ ବିକାଶ କାର୍ଯ୍ୟସୂଚୀ ଉପରେ ଗୁରୁତ୍ଵପ୍ରଦାନ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଦ୍ଵିତୀୟ କାର୍ଯ୍ୟକାଳ ସମୟରେ ସମଗ୍ର ବିଶ୍ଵକୁ ଏହି ସନ୍ଦେଶ ଦେଇଛନ୍ତି ଯେ ଗରିବ ମାନଙ୍କ କଲ୍ୟାଣ ଓ ଅତ୍ୟାଧୁନିକ ମୌଳିକଢାଞ୍ଚାର ବିକାଶ ତାଙ୍କ ସରକାରଙ୍କ ଦୁଇଟି ପ୍ରମୁଖ କାର୍ଯ୍ୟସୂଚୀ ହେବ |ପାର୍ଲିଆମେଣ୍ଟ ସଦନର ମିଳିତ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣ ସଂକ୍ରାନ୍ତ ଧନ୍ୟବାଦ ପ୍ରସ୍ତାବ ଉପରେ ଉଦବୋଧନ ଦେବା ବେଳେ ପ୍ରଧାନମନ୍ତ୍ରୀ ଏକଥା କହିଥିଲେ | ଦେଶ ତଥା ଲୋକମାନଙ୍କ ସ୍ଵାର୍ଥକୁ ସୁହାଇଲା ଭଳି ସବୁ ପ୍ରସଙ୍ଗ ନେଇ ସେ ବିସ୍ତୃତ ଭାବେ ବର୍ଣ୍ଣନା କରିଛନ୍ତି |

କେନ୍ଦ୍ରସରକାରଙ୍କ ଦୃଷ୍ଟିକୋଣ ଉପରେ ରେଖାଙ୍କିତ କରିବାକୁ ଯାଇ ପ୍ରଧାନମନ୍ତ୍ରୀ କହିଥିଲେ ଯେ ସରକାର ଜନ କଲ୍ୟାଣ ଓ ଆଧୁନିକ ମୌଳିକଢାଞ୍ଚା ଉପରେ ବିଶ୍ଵାସ କରନ୍ତି |ସେ କହିଛନ୍ତି ସରକାର କେବେବି ବିକାଶ ପଥରୁ ବିଚ୍ୟୁତ ହୋଇନାହିଁ କି ବିକାଶ ଏଜେଣ୍ଡାରୁ ଓହରି ନାହିଁ | ସେ ଆହୁରି ମଧ୍ୟ କହିଛନ୍ତି ଯେ “ଏହା ମହତ୍ବପୂର୍ଣ୍ଣ ଯେ ଦେଶ ର ପ୍ରଗତି ହେଉ, ପ୍ରତୀଟି ଭାରତୀୟ ସଶକ୍ତ ହୁଅନ୍ତୁ ଓ ଆମ ଦେଶରେ ଆଧୁନିକ ମୌଳିକ ଢାଞ୍ଚାର ବିକାଶ ହେଉ”|

ଗତ ପାଞ୍ଚ ବର୍ଷ ମଧ୍ୟରେ କୃଷକ ତଥା ଅଣ ସଂଗଠିତ କ୍ଷେତ୍ରରେ କାମ କରୁଥିବା କର୍ମଚାରୀ ମାନଙ୍କ ଲାଗି ଅନେକ ଯୋଜନାର ଶୁଭାରମ୍ଭ କରାଯାଇଛି ଓ ସରକାର ଭାରତକୁ ଆଧୂନିକୀକରଣ ପଥରେ ମଧ୍ୟ ଆଗେଇ ନେଇଛନ୍ତି |ଅଖିଳ ଭାରତ ଭେଷଜ ସଂସ୍ଥା ବା ଏମ୍ସ ର ସଂଖ୍ୟା ଆଗାମୀ ପାଞ୍ଚ ବର୍ଷ ମଧ୍ୟରେ 6 ରୁ 20କୁ ବୃଦ୍ଧି କରିବା ଲାଗି ଯୋଜନା କରାଯାଉଥିବା ବେଳେ 150ଟି ଜିଲ୍ଲା ହସ୍ପିଟାଲକୁ ମେଡିକାଲ କଲେଜ ବା ହସ୍ପିଟାଲର ପାହ୍ୟା ବୃଦ୍ଧି ଲାଗି ମଧ୍ୟ ପ୍ରସ୍ତୁତି ଚାଲିଛି |

ସେହିପରି 7ଟି ନୂଆଁ ଆଇଆଇଟି,14ଟି ଆଇଆଇଆଇଟି,ଗୋଟିଏ ଏନଆଇଟି ଓ 4ଟି ଏନଆଇଡ଼ି ସ୍ଥାପିତ କରାଯାଉଥିବା ବେଳେ 7ଟି ନୂଆଁ ଆଇଆଇଏମ ପ୍ରତିଷ୍ଠାନ ମଧ୍ୟ ଖୋଲା ଯିବାର ଯୋଜନା ରହିଛି | ଏପରି କୌଣସି କ୍ଷେତ୍ର ନାହିଁ ଯେଉଁଠି ଆଧୁନୀକିକରଣ କରାଯାଇନାହିଁ |ପ୍ରାରମ୍ଭିକ ସୁନାମୀ ଚେତାବନୀ ଦେବାରେ ଭାରତ ବିଶ୍ଵର ଚତୁର୍ଥ ସ୍ଥାନରେ ରହିଥିବା ବେଳେ ପାଣିପାଗ ପୂର୍ବାନୁମାନ କରିବା ଅଗ୍ରଣୀ ଦେଶ ଗୁଡିକ ମଧ୍ୟରେ ଅନ୍ୟତମ ରାଷ୍ଟ୍ର ଭାବେ ସ୍ଥାନ ହାସଲ କରିଛି |ଭାରତ 2022 ସୁଦ୍ଧା ଏକ ମାନବ ରହିତ ମହାକାଶଯାନ ପ୍ରେରଣ କରିବା ଲାଗି ପ୍ରୟାସ ଚଳେଇଛି | ଏହା କାର୍ଯ୍ୟକାରୀ ହେଲେ ଆମେରିକା,ରୁଷ ଓ ଚୀନ ପରେ ମହାକାଶକୁ ଏକ ମାନବ ରହିତ ମିଶନ ପ୍ରେରଣ କରିବାରେ ଭାରତ ଚତୁର୍ଥ ଦେଶ ଭାବେ ଗୌରବ ଅର୍ଜନ କରିବ| ଉଲ୍ଲେଖଯୋଗ୍ୟ ଯେ ଭାରତର ପ୍ରତିଷ୍ଠିତ ମହାକାଶ ସଂସ୍ଥା ଇସ୍ରୋ ଏହାର ନିଜର ମହାକାଶ ଷ୍ଟେସନ ସ୍ଥାପନା ଲାଗି ପ୍ରସ୍ତୁତି ଚଳେଇଛି |

ଭାରତ ଏହାର ମୌଳିକଢାଞ୍ଚାକୁ ମଜବୁତ କରିବା ଓ ଆଧୂନିକୀକରଣ ଲାଗି ଏହାର ଶକ୍ତିର ସମାନ ଭାବେ ବିନିଯୋଗ ଲାଗି ଇଚ୍ଛା ଜାହିର କରିଛି |ରାଷ୍ଟ୍ରପତିଙ୍କ ଅଭିଭାଷଣର ଧନ୍ୟବାଦ ପ୍ରସ୍ତାବ ଉପରେ ଉତ୍ତର ଦେବା ବେଳେ ପ୍ରଧାନମନ୍ତ୍ରୀ ରାଜପଥ, ଜଳପଥ,ରେଳବାଇ, ସଡକପଥ, ବିମାନ ଚଳାଚଳ, ଷ୍ଟାର୍ଟ ଅପ ଓ ଅଭିନବ ଭଳି କ୍ଷେତ୍ର ର ଆଧୂନିକୀକରଣର ଆବଶ୍ୟକତା ଉପରେ ଆଲୋକପାତ କରିଥିଲେ | ଏହା ହୃଦୟଙ୍ଗମ କରିବା ଜରୁରୀ ଯେ ବର୍ତ୍ତମାନ ପରିପ୍ରେକ୍ଷୀରେ ଆଧୁନିକ ଓ ଦ୍ରୁତ ପରିବହନ ପ୍ରଣାଳୀର ଅତ୍ୟନ୍ତ ଆବଶ୍ୟକତା ରହିଛି | ଯେଉଁ ଦେଶ ଗୁଡିକ ସମୟର ତାଳ ଦେଇ ଚାଲି ନାହାନ୍ତି ସେମାନେ ଆର୍ଥିକ ଭାବେ ବିଫଳ ହୋଇଛନ୍ତି କିମ୍ବା ଅନାବଶ୍ୟକ ଓ ନିରର୍ଥକ ଭାବେ ଘୋଷିତ ହେବାକୁ ଯାଉଛନ୍ତି |

ପ୍ରଧାନମନ୍ତ୍ରୀ 2024 ସୁଦ୍ଧା ଭାରତକୁ ଏକ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବା ଲାଗି ଆହ୍ଵାନ ଜଣାଇଛନ୍ତି|ବର୍ତ୍ତମାନ ଭାରତ ବିଶ୍ବର ଷଷ୍ଠ ଶକ୍ତିଶାଳୀ ଅର୍ଥନୀତି ରାଷ୍ଟ୍ର ଭାବେ ସ୍ଥାନିତ ଅଛି |ଏହାର 2.8 ଟ୍ରିଲିଅନ ଡଲାର ଅର୍ଥବ୍ୟବସ୍ଥା ଦ୍ରୁତ ପ୍ରଗତିଶୀଳ ରହିଛି | 2024 ସୁଦ୍ଧା ଏକ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିର ଲକ୍ଷ ହାସଲ କରିବାକୁ ହେଲେ ଭାରତକୁ 2024 ପର୍ଯ୍ୟନ୍ତ ଆଗାମୀ ପାଞ୍ଚ ବର୍ଷର ଅବଧିରେ ବର୍ତ୍ତମାନ ର ଅଭିବୃଦ୍ଧି ହାର ଶତକଡା 6.7 ଭାଗରୁ ଶତକଡା 10-11 ଭାଗ କରିବାକୁ ପଡିବ |ଏହି ଲକ୍ଷ ପ୍ରାପ୍ତି ଲାଗି ଅନେକ ଚାଲେଞ୍ଜ ର ସମ୍ମୁଖୀନ ହେବାକୁ ପଡିବ କିନ୍ତୁ ଭରାତ ଏହାର ମୁକାବିଲା କରିବା ଲାଗି ବେଶ ସକ୍ଷମ |

ପ୍ରଧାନମନ୍ତ୍ରୀ ମହାତ୍ମାଗାନ୍ଧୀଙ୍କ 150ତମ ଜନ୍ମ ବାର୍ଷିକୀ ଓ ଦେଶ ସ୍ଵାଧୀନର 75 ବର୍ଷ ପୂର୍ତ୍ତି ହେବା ଅବସରକୁ ଭାରତ ଇତିହାସର ଐତିହାସିକ ଅବସର ବୋଲି ବର୍ଣ୍ଣନା କରି ଏହାକୁ ଅତ୍ୟନ୍ତ ହର୍ଷ ଉଲ୍ଲାସର ସହ ପାଳିତ କରିବା ପାଇଁ ଦେଶବାସୀଙ୍କୁ ନିବେଦନ କରିଛନ୍ତି |ସେ କହିଛନ୍ତି ଯେ ଏକଦା ଆମ ସ୍ଵାଧୀନତା ସଂଗ୍ରାମୀ ମାନେ ଯେଉଁ ସୁନାର ଭାରତ ଗଠନ ଲାଗି ସ୍ଵପ୍ନ ଦେଖିଥିଲେ ତାହା ସାକାର କରିବା ପାଇଁ ଦେଶର ନାଗରିକ ମାନେ କଠିଣ ପରିଶ୍ରମ କରିବା ଉଚିତ ଓ ଦେଶ ପାଇଁ ହିଁ ନିଜ ଜୀବନ ଉତ୍ସର୍ଗୀକୃତ କରିବା ଉଚିତ |

ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ ଯେ କେନ୍ଦ୍ରସରକାର ଦାୟିତ୍ଵ ଗ୍ରହଣ କରିବାର କିଛି ସପ୍ତାହ ମଧ୍ୟରେ ଲୋକମାନଙ୍କ ହିତସାଧନ ନିମନ୍ତେ ଅନେକ ନିଷ୍ପତ୍ତି ନେଇସାରିଛନ୍ତି | ସେ କହିଛନ୍ତି ଯେ ତାଙ୍କ ସରକାରଙ୍କ ଦ୍ଵାରା ଗ୍ରହଣ କରାଯାଇଥିବା ପଦକ୍ଷେପ ଗୁଡିକ ଯୋଗୁଁ କୃଷକ, ବ୍ୟବସାୟୀ, ଯୁବାପିଢି ତଥା ସମାଜର ବିଭିନ୍ନ ବର୍ଗର ଲୋକ ମାନେ ବହୁ ମାତ୍ରାରେ ଉପକୃତ ହେବେ | ସରକାର ଦେଶବାସୀ ଙ୍କୁ ଦେଇଥିବା ପ୍ରତିଶ୍ରୁତି ଗୁଡିକ ପୂରଣ କରିବା ଆରମ୍ଭ କରିଦେଇଛନ୍ତି ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି |

ଦେଶର ଅନେକ ଭାଗ ଘୋର ଜଳ ସଙ୍କଟ ଦେଇ ଗତି କରୁଥିବା ଯୋଗୁଁ ଜଳ ସଂରକ୍ଷଣ ଉପରେ ଅତ୍ୟଧିକ ମହତ୍ଵ ପ୍ରଦାନ କରିବା ଲାଗି ପ୍ରଧାନମନ୍ତ୍ରୀ ଲୋକମାନଙ୍କୁ ଆହ୍ଵାନ ଜଣାଇଛନ୍ତି |”ଜଳ ଶକ୍ତି ମନ୍ତ୍ରଣାଳୟ” ସ୍ଥାପିତ କରିବା ପଦକ୍ଷେପ ପ୍ରତ୍ୟେକ ଘରକୁ ଜଳ ଯୋଗାଇବା ଲାଗି ସରକାରଙ୍କ ପ୍ରତିଶୃତିବଦ୍ଧତା ଦର୍ଶାଇଥାଏ | ସଂସଦର ଉଭୟ ସଦନରେ ପ୍ରଧାନମନ୍ତ୍ରୀ ଉତ୍ତର ଦେବା ବେଳେ 2022 ସୁଦ୍ଧା ‘ନବ ଭାରତ’ ଗଠନର ସ୍ଵପ୍ନ କୁ ସାକାର କରିବା ଲାଗି ସବୁ ରାଜନୈତିକ ପାର୍ଟି ମିଳିମିଶି କାମ କରିବା ଉଚିତ ବୋଲି ଜୋର ଦେଇ କହିଛନ୍ତି |

ମୂଳ ଲେଖା : ଶଙ୍କର କୁମାର, ସାମ୍ବାଦିକ

ଅନୁବାଦ: ରୀତା ଯୋଶୀ