ଓସାକାରେ ବ୍ରିକ୍ସ ନେତୃବୃନ୍ଦଙ୍କ ଅଣଆନୁଷ୍ଠାନିକ ବୈଠକ

ବ୍ରାଜିଲ, ରୁଷ, ଭାରତ, ଚୀନ ଓ ଦକ୍ଷିଣ ଆଫ୍ରିକା (ବ୍ରିକ୍ସ) ର ରାଷ୍ଟ୍ର ମୁଖ୍ୟ ତଥା ସରକାର ମୁଖ୍ୟ ମାନେ ଜି20 ଶିଖର ସମ୍ମିଳନୀ ଅବସରରେ ସାକ୍ଷାତ ଆଲୋଚନା କରିଛନ୍ତି | ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ବ୍ରାଜିଲ ରାଷ୍ଟ୍ରପତି ଯାଇର ବୋଲଶୋନାର, ରୁଷ ରାଷ୍ଟ୍ରପତି ବ୍ଳାଦିମିର ପୁତିନ, ଚୀନ ରାଷ୍ଟ୍ରପତି ସି ଜିନପିଙ୍ଗ ଓ ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ ରାମାଫୋସା ଜାପାନକୁ ଜି20 ର ଅଧ୍ୟକ୍ଷତା କରିଥିବା ଯୋଗୁଁ ଶୁଭେଚ୍ଛା ଜଣାଇଛନ୍ତି ଓ ବାଣିଜ୍ୟ, ବିଜ୍ଞାନ, ପ୍ରଯୁକ୍ତି ବିଦ୍ୟା ଓ ନବାଚାର, ମୌଳିକଢାଞ୍ଚା, ଜଳବାୟୁ ପରିବର୍ତ୍ତନ, ସାର୍ବଭୌମିକ ସ୍ୱାସ୍ଥ୍ୟ ପରିସ୍ଥିତି , ଜନସଂଖ୍ୟା ଓ ନିରନ୍ତର ବିକାଶ ଆଦି ପ୍ରସଙ୍ଗ ଗୁଡିକୁ ପ୍ରାଥମିକତା ଆଧାରରେ ଜାପାନ ଦ୍ଵାରା ବଛା ଯାଇଥିବା ଯୋଗୁଁ ଏହାର ପ୍ରଶଂସା କରିଛନ୍ତି |

ବ୍ରିକ୍ସ ନେତାମାନଙ୍କ କହିବାନୁଯାୟୀ ଆନ୍ତର୍ଜାତୀୟ ଅର୍ଥନୈତିକ ଅଭିବୃଦ୍ଧି ସ୍ଥିର ରହିବ ଓ ଚଳିତ ବର୍ଷ ଶେଷ ଆଡକୁ ଏଥିରେ ସାମାନ୍ୟ ବୃଦ୍ଧି ଘଟି 2020 ବେଳକୁ ଅଭିବୃଦ୍ଧିରେ ବିକାଶ ହେବାର ଆକଳନ କରାଯାଉଛି | ତେବେ ବୃଦ୍ଧି ପାଉଥିବା ବାଣିଜ୍ୟ ଓ ଭୂ-ରାଜନୈତିକ ତିକ୍ତତା, ଅତ୍ୟାବଶ୍ୟକୀୟ ସାମଗ୍ରୀ ର ଦର ବୃଦ୍ଧିରେ ଅସ୍ଥିରତା, ଅସମାନତା ଓ ଅପର୍ଜ୍ୟାପ୍ତ ସମଷ୍ଟିଗତ ବିକାଶ ଓ କଡା ଆର୍ଥିକ ସ୍ଥିତି ଯୋଗୁଁ ଅଭିବୃଦ୍ଧିର ବିକାଶ ଅନିଶ୍ଚିତତା ମଧ୍ୟରେ ରହିଛି | ଆନ୍ତର୍ଜାତୀୟ ବାଣିଜ୍ୟର ନିରନ୍ତର ବିକାଶ ପାଇଁ ଏକ ଅନୁକୂଳ ବୈଶ୍ଵିକ ଅର୍ଥନୈତିକ ପରିବେଶ ସୃଷ୍ଟି କରିବାର ମହତ୍ଵ ଉପରେ ବ୍ରିକ୍ସ ବୈଠକରେ ଜୋର ଦିଆଯାଇଛି |

ବ୍ରିକ୍ସ ଦେଶ ଗୁଡିକ ବିଗତ ଦଶନ୍ଧିରେ ଆନ୍ତର୍ଜାତୀୟ ବିକାଶର ପ୍ରମୁଖ ପରିଚାଳକ ଭାବେ କାର୍ଯ୍ୟ କରିଛନ୍ତି ଓ ବର୍ତ୍ତମାନ ସମୟରେ ମଧ୍ୟ ମୋଟ ବୈଶ୍ଵିକ ଉତ୍ପାଦନରେ ବ୍ରିକ୍ସ ସଦସ୍ୟ ଦେଶ ଗୁଡିକର ଭାଗିଦାରୀ ଏକ ତୃତୀୟାଂସ ରହିଛି | ଆକଳନରୁ ଜଣାପଡୁଛି ଯେ 2030 ପର୍ଯ୍ୟନ୍ତ ଆନ୍ତର୍ଜାତୀୟ ଅର୍ଥନୈତିକ ବିକାଶରେ ବ୍ରିକ୍ସ ଦେଶର ଭାଗିଦାରୀ ଅଧାରୁ ଅଧିକ ହେବ | ଢାଞ୍ଚାଗତ ସଂସ୍କାରର ନିରନ୍ତର କାର୍ଯ୍ୟକାରିତା ଯୋଗୁଁ ବ୍ରିକ୍ସର ବିକାଶ କ୍ଷମତା ମଧ୍ୟ ବୃଦ୍ଧି ହେବ | ଏଥିସହିତ ବ୍ରିକ୍ସ ସଦସ୍ୟ ମାନଙ୍କ ମଧ୍ୟରେ ସନ୍ତୁଳିତ ବାଣିଜ୍ୟ ସମ୍ପ୍ରସାରଣ ଆନ୍ତର୍ଜାତୀୟ ବାଣିଜ୍ୟ କାରବାରକୁ ଆହୁରି ମଜବୁତ କରିବାରେ ସହାୟତା କରିବ |

ବ୍ରିକ୍ସ ନେତୃବୃନ୍ଦ ମୁକ୍ତ ବଜାର, ଦୃଢ ଅର୍ଥବ୍ୟବସ୍ଥା, ଆର୍ଥିକ ସ୍ଥିରତା ଓ ସମନ୍ଵିତ ସମଷ୍ଟି ଅର୍ଥନୈତିକ ନୀତି, ସରକାରୀ-ବେସରକାରୀ ଭାଗିଦାରୀତା (ପିପିପି) ଆଦିର ମହତ୍ଵ ଉପରେ ଗୁରୁତ୍ଵ ପ୍ରଦାନ କରିଛନ୍ତି | ବ୍ରିକ୍ସ ନେତାମାନେ ପାରଦର୍ଶୀ, ଅଣ-ଭେଦଭାବପୂର୍ଣ୍ଣ, ଖୋଲା, ମୁକ୍ତ ଓ ସମଷ୍ଟିଗତ ଆନ୍ତର୍ଜାତୀୟ ବାଣିଜ୍ୟ ଲାଗି ପ୍ରତିଶୃତିବଦ୍ଧ | ସଂରକ୍ଷଣାବାଦ ଓ ଏକତରଫାବାଦ ବିଶ୍ଵ ବାଣିଜ୍ୟ ସଂଗଠନ ର ମୂଳ ଭାବନା ଓ ନୀତି ନିୟମ ବିରୁଦ୍ଧରେ ଅଟେ | ବ୍ରିକ୍ସ ନେତାମାନେ ବହୁପକ୍ଷବାଦ ଓ ଆନ୍ତର୍ଜାତୀୟ ନିୟମ ପ୍ରଣାଳୀ ନେଇ ନିଜର ପ୍ରତିବଦ୍ଧତା ବିଷୟ ସ୍ପଷ୍ଟ କରି ବିଶ୍ଵ ବାଣିଜ୍ୟ ସଂଗଠନ (ଡବ୍ଲ୍ୟୁଟିଓ) ର ନିୟମ ଆଧାରିତ ବହୁପକ୍ଷୀୟ ବାଣିଜ୍ୟ ବ୍ୟବସ୍ଥାର ପୂର୍ଣ୍ଣ ସମର୍ଥନ କରିବାକୁ ଦୃଢୋକ୍ତି ପ୍ରକାଶ କରିଛନ୍ତି | ତେବେ ଡବ୍ଲ୍ୟୁଟିଓର କୌଣସି ବି ସଂସ୍କାର ଆଣିବା ସମୟରେ ବିଶ୍ଵ ବାଣିଜ୍ୟ ସଂଗଠନର କେନ୍ଦ୍ରିୟତା, ମୂଳ ମୂଲ୍ୟ ଓ ମୂଳ ସିଦ୍ଧାନ୍ତ ଗୁଡିକୁ ସଂରକ୍ଷିତ ରଖିବାକୁ ପଡିବ | କଥାବାର୍ତ୍ତାର କାର୍ଯ୍ୟସୂଚୀ ସନ୍ତୁଳିତ ହେବା ସହିତ ଏକ ଖୋଲା, ସ୍ବଚ୍ଛ ତଥା ସମଷ୍ଟିଗତ ପ୍ରଣାଳୀରେ ଆଲୋଚନା ହେବା ଉଚିତ |

ମୌଳିକଢାଞ୍ଚା ପାଇଁ ଆର୍ଥିକ ସହାୟତା ଓ ନିରନ୍ତର ବିକାଶ କ୍ଷେତ୍ରରେ ନ୍ୟୁ ଡେଭେଲପମେଣ୍ଟ ବ୍ଯାଙ୍କ (ଏନଡ଼ିବି) ର ଭୂମିକା ପ୍ରତି ବ୍ରିକ୍ସ ନେତାମାନେ ପ୍ରଶଂସା କରିଛନ୍ତି ଏବଂ ଏକ ମଜବୁତ, ସନ୍ତୁଳିତ ଓ ଉଚ୍ଚ ଗୁଣବତ୍ତା ପୂର୍ଣ୍ଣ ପ୍ରକଳ୍ପର ନିର୍ମାଣ ଲାଗି ପ୍ରୋତ୍ସାହନ ଓ ନିରନ୍ତର ପ୍ରୟାସର ଆବଶ୍ୟକତା ଉପରେ ଜୋର ଦେଇଛନ୍ତି | ବ୍ରିକ୍ସ ଗୋଷ୍ଠୀର ସଦସ୍ୟ ମାନେ ମୌଳିକଢାଞ୍ଚା ବିକାଶ କ୍ଷେତ୍ରରେ ନିବେଶ ଲାଗି ଅସୁବିଧାର ସମ୍ମୁଖୀନ ହେଉଥିବା ସଦସ୍ୟ ଦେଶ ଗୁଡିକର ସମସ୍ୟା ଦୂର କରିବା ଉପରେ ଗୁରୁତ୍ଵାରୋପ କରିଛନ୍ତି | ଏନଡ଼ିବି କୁ ଆହୁରି ମଜବୁତ କରିବା ପାଇଁ ଆଞ୍ଚଳିକ କାର୍ଯ୍ୟଳୟ ଗୁଡିକ ସ୍ଥାପିତ କରାଯିବ ବୋଲି ଏହି ବୈଠକରେ ସହମତି ପ୍ରକାଶ ପାଇଛି | ଏନଡ଼ିବିର ସବୁ ସଦସ୍ୟ ମାନଙ୍କୁ ଦେଶୀୟ ମୁଦ୍ରାରେ ସମ୍ବଳ ନିୟୋଜିତ କରିବାର ପ୍ରତିବଦ୍ଧତା ପ୍ରତି ବ୍ରିକ୍ସ ସ୍ଵାଗତ ଜଣାଇଛି | ଏନଡ଼ିବି ଏହି ପ୍ରଚେଷ୍ଟା ଚୀନରେ ଆରମ୍ଭ କରୁଛି ଏବଂ ବଣ୍ଡ କାର୍ଯ୍ୟକ୍ରମ ଜରିଆରେ ଦକ୍ଷିଣ ଆଫ୍ରିକା ଓ ରୁଷରେ ମଧ୍ୟ ନିକଟ ଭବିଷ୍ୟତରେ ଆରମ୍ଭ କରିବ ।

ବ୍ରିକ୍ସ ନେତୃବୃନ୍ଦ ସନ୍ତ୍ରାସବାଦର ସବୁ ରୂପ ଓ ଅଭିବ୍ୟକ୍ତିର ଦୃଢ ନିନ୍ଦା କରିଛନ୍ତି | ସନ୍ତ୍ରାସବାଦୀ ଆକ୍ରମଣ ଯିଏ ଯେଉଁଠି କରିଥାଉ ବା ଯାହାଦ୍ୱାରା କରାଯାଇଥାଉ ତାହା ଅତ୍ୟନ୍ତ ଘୃଣିତ ଓ ଅତ୍ୟନ୍ତ ନିନ୍ଦନୀୟ ବୋଲି ସେମାନେ କହିଛନ୍ତି | ଏକ ଦୃଢ ଆନ୍ତର୍ଜାତୀୟ ନିୟମ ଆଧାରରେ ଜାତିସଂଘର ତତ୍ତ୍ଵାବଧାନରେ ସନ୍ତ୍ରାସବାଦର ମୁକାବିଲା କରିବା ଲାଗି ସାମୁହିକ ଉଦ୍ୟମ ଓ ଏକ ବ୍ୟାପକ ଆଭିମୁଖ୍ୟ ଗ୍ରହଣ କରିବା ଲାଗି ସେମାନେ ନିବେଦନ କରିଛନ୍ତି | ସନ୍ତ୍ରାସବାଦୀ ନେଟୱର୍କକୁ ବିତ୍ତୀୟ ସହୟତା ବନ୍ଦ କରିବା ଓ ନିଜ ଦେଶ ମାଟିରୁ ଆତଙ୍କବାଦୀ କାର୍ଯ୍ୟକଳାପ ର ମୂଳପୋଛ କରିବା ହେଉଛି ସବୁ ରାଷ୍ଟ୍ରର ଦାୟିତ୍ଵ ବୋଲି ବ୍ରିକ୍ସ ନେତୃବୃନ୍ଦ ଦୃଢ ସ୍ଵରରେ ଦୋହୋରାଇଛନ୍ତି |

ବ୍ରିକ୍ସ ଅଧିକ ସ୍ବଚ୍ଛ ଓ ନମନୀୟ ଶକ୍ତି ବ୍ୟବସ୍ଥା କ୍ଷେତ୍ରରେ ସହଯୋଗ ର ଗୁରୁତ୍ୱପୂର୍ଣ୍ଣ ଭୂମିକା ରହିଥିବା ବିଷୟ କହିଛି, ଯାହାକି ଗ୍ରୀନହାଉସ ଗ୍ୟାସ ନିର୍ଗମନ ହ୍ରାସ ସହ ବିକାଶକୁ ଯୋଡୁଥିବା ବେଳେ ଶକ୍ତି ସୁରକ୍ଷା, ଶକ୍ତିର ସୁଗମ, ନିରନ୍ତରତା ଓ ସ୍ଥିରତା ନିଶ୍ଚିତ କରିଥାଏ | ବ୍ରିକ୍ସ ର ସବୁ ସଦସ୍ୟ ମାନେ ପ୍ୟାରିସ ରାଜିନାମା ର ସଂପୂର୍ଣ୍ଣ କାର୍ଯ୍ୟକାରିତା ପାଇଁ ପ୍ରତିବଦ୍ଧ ଅଟନ୍ତି ଯାହାକୁ ୟୁଏନଏଫସିସିସି (UNFCCC) ର ନିୟମ ଅଧୀନରେ ପ୍ରଣୟନ କରାଯାଇଛି | ଏଥିରେ ବିଭିନ୍ନ ଜାତୀୟ ପରିସ୍ଥିତି କୁ ଦୃଷ୍ଟିରେ ରଖି ସାଧାରଣ ନିୟମ, ବିଭେଦିତ ଦାୟିତ୍ଵ ତଥା ସମ୍ବନ୍ଧିତ କ୍ଷମତା ର ନିୟମ ଗୁଡିକ ସାମିଲ ଅଛି | ଚଳିତ ବର୍ଷ ସେପ୍ଟେମ୍ବରରେ ଆୟୋଜିତ ହେବାକୁ ଥିବା ଜାତିସଂଘ ଜଳବାୟୁ କ୍ରିୟାନ୍ଵୟନ ଶିଖର ବୈଠକରେ ଆଲୋଚନା ସକାରାତ୍ମକ ହେବ ବୋଲି ବ୍ରିକ୍ସ ଗୋଷ୍ଠୀ ଆଶା ପ୍ରକାଶ କରିଛି |

ଚଳିତ ବର୍ଷର ବାର୍ଷିକୀ ବ୍ରିକ୍ସ ଶିଖର ବୈଠକ ବ୍ରାଜିଲ, ବ୍ରାସିଲିଆ ଠାରେ ଆୟୋଜନ କରିବ | ଏହି ଶିଖର ସମ୍ମିଳନୀ ର ଶୀର୍ଷକ ହେଉଛି “ଏକ ଅଭିନବ ଭବିଷ୍ୟତ ପାଇଁ ଅର୍ଥନୈତିକ ବିକାଶ” | ନବାଚାର ବିକାଶର ଏକ ପ୍ରମୁଖ ପ୍ରେରଣାର ଶକ୍ତି ବୋଲି ବ୍ରିକ୍ସ ନେତୃବୃନ୍ଦ ବିଶ୍ଵାସ କରନ୍ତି | ଡିଜିଟାଲିକରଣ ଓ ଆଧୁନିକ ଜ୍ଞାନ କୌଶଳର ଅଧିକରୁ ଅଧିକ ଲାଭ ଲୋକମାନଙ୍କ ନିକଟରେ ପହଞ୍ଚାଇବା ଲାଗି ସେମାନଙ୍କ ସଙ୍କଳ୍ପବଦ୍ଧତା ନେଇ ବ୍ରିକ୍ସ ସଦସ୍ୟ ମାନେ ପୁନର୍ବାର ଦୋହୋରାଇଥିଲେ | ବ୍ରିକ୍ସ, ଇଣ୍ଟର୍ନେଟ ପରିଚାଳିତ ଦାରିଦ୍ର୍ୟ ଦୂରୀକରଣ ଓ ଉଦ୍ୟୋଗିକ କ୍ଷେତ୍ରର ଡିଜିଟାଲ ରୂପାନ୍ତରଣ ଉପରେ ମତ ଆଦାନ ପ୍ରଦାନ ଲାଗି ମିଳିତ ପ୍ରୟାସକୁ ପ୍ରୋତ୍ସାହିତ କରିଥାଏ ବ୍ରିକ୍ସ ନେତାମାନେ ନ୍ୟୁ ଇଣ୍ଡଷ୍ଟ୍ରିଆଲ ରିଭଲ୍ଯୁସନ ବା ନୂତନ ଉଦ୍ୟୋଗିକ କ୍ରାନ୍ତି ରେ ବ୍ରିକ୍ସର ଭାଗିଦାରୀତା , ଅଭିନବ ବ୍ରିକ୍ସ (iBRICS) ନେଟୱର୍କ, ବ୍ରିକ୍ସ ଇନଷ୍ଟିଚ୍ୟୁଟ ଅଫ ଫ୍ୟୁଚର ନେଟୱର୍କ ଓ ୟଙ୍ଗ ସାଇଣ୍ଟିଷ୍ଟ ଫୋରମ ବା ଯୁବ ବୈଜ୍ଞାନିକ ମଞ୍ଚ ସମେତ ସଦସ୍ୟ ରାଷ୍ଟ୍ର ମଧ୍ୟରେ ନିରନ୍ତର ବୈଜ୍ଞାନିକ, ଯାନ୍ତ୍ରିକ , ନବାଚାର ଓ ଉଦ୍ୟୋଗିକ କ୍ଷେତ୍ରରେ ଦୃଢ ସହଯୋଗ ଉପରେ ଜୋର ଦେଇଛନ୍ତି |

ମୂଳ ଲେଖା : ପଦମ ସିଂ, ଆକାଶବାଣୀ ସମ୍ବାଦ ବିଶ୍ଳେଷକ

ଅନୁବାଦ : ରୀତା ଯୋଶୀ