ପାକିସ୍ତାନର ଗୁରୁତର ଆର୍ଥିକ ସଙ୍କଟ

ପାକିସ୍ତାନରେ ଅହେତୁକ ମୁଦ୍ରାସ୍ଫୀତି ହାର ବୃଦ୍ଧି ବିରୁଦ୍ଧରେ ଆନ୍ଦୋଳନ ତେଜିଛି | ସନ୍ତ୍ରାସବାଦର କୁପ୍ରଭାବ ସହ ପାକିସ୍ତାନ ଗୁରୁତର ଆର୍ଥିକ ସଙ୍କଟ ମଧ୍ୟରେ ଗତି କରୁଛି | ମୁଦ୍ରାସ୍ଫୀତି ହାର ଖୁବ ଶୀଘ୍ର ଦୁଇ ଅଙ୍କକୁ ବୃଦ୍ଧି ପାଇବା ଅନୁମାନ କରାଯାଉଛି | ଏହାର ମୁଖ୍ୟ କାରଣ ହେଉଛି ଖାଦ୍ୟ ସାମଗ୍ରୀ ଏବଂ ଶକ୍ତି ଦରରେ ଅତ୍ୟଧିକ ମୂଲ୍ୟ ବୃଦ୍ଧି ଯାହାର ପ୍ରଭାବ ଅନ୍ୟାନ୍ୟ ସାମଗ୍ରୀ ଉପରେ ପଡିଛି | ପାକିସ୍ତାନର ଆମଦାନୀ ବୃଦ୍ଧି ପାଉଛି ଏବଂ ବୈଦେଶିକ ମୁଦ୍ରା ମହଜୁଦ ପରିମାଣ 8 ବିଲିୟନ ଡଲାରକୁ ହ୍ରାସ ପାଇଛି | ଏହି ପରିମାଣ ଦ୍ଵାରା କେବଳ ଦୁଇ ମାସ ପାଇଁ ବିଭିନ୍ନ ଦେୟ ପଇଠ କରିହେବ | ପାକିସ୍ତାନୀ ଟଙ୍କାର ବିନିମୟ ମୂଲ୍ୟ ଗୋଟିଏ ଆମେରିକୀୟ ଡଲାର ତୁଳନାରେ 150 ହୋଇଯାଇଛି | ବିଗତ ତିନି ବର୍ଷ ମଧ୍ୟରେ ଏହାର ମୂଲ୍ୟ ପ୍ରାୟ 20 ଥର ହ୍ରାସ ପାଇ ଶତକଡା ପ୍ରାୟ 20 ଭାଗ ହ୍ରାସ ପାଇଥିବା କୁହାଯାଇଛି |

ଯେହେତୁ ପାକିସ୍ତାନ ଏହାର ତୈଳ ଆବଶ୍ୟକତାର ଅଧିକାଂଶ ଭାଗ ଏବଂ ଅନ୍ୟାନ୍ୟ ବହୁ ଦୈନନ୍ଦିନ ସାମଗ୍ରୀ ଆମଦାନୀ କରୁଛି, ମୁଦ୍ରାସ୍ଫୀତି ହାର ବୃଦ୍ଧି ଯୋଗୁଁ ଲୋକ ମାନଙ୍କ ଆୟ ପ୍ରାୟ ଅଧା ହୋଇଯାଇଛି | ଏଥି ଯୋଗୁଁ ପାକିସ୍ତାନରେ ବ୍ୟାପକ ଗଣ ଆନ୍ଦୋଳନ ଦେଖାଦେଇଛି | ପେଶାୱାର ଏବଂ ଅନ୍ୟାନ୍ୟ ସ୍ଥାନରେ ଜମାତ-ଏ-ଇସ୍ଲାମି ନେତୃତ୍ବରେ ଇମ୍ରାନ ଖାନ ସରକାରଙ୍କ ବିରୁଦ୍ଧରେ ସଡକରେ ଆନ୍ଦୋଳନ ଚାଲିଛି | ଇମ୍ରାନ ଖାନ ସରକାର କ୍ଷମତାକୁ ଆସିବା ପରେ ଚାକିରୀ ଦେବା, ଦାରିଦ୍ର୍ଯ ଦୂରୀକରଣ ଏବଂ ଏକ ଇସ୍ଲାମିକ କଲ୍ଯାଣ ଦେଶ ପ୍ରତିଷ୍ଠା କରିବା ପ୍ରତିଶୃତି ଦେଇଥିଲେ |

ଏଭଳି ପରିସ୍ଥିତିର ମୁକାବିଲା କରିବାକୁ ପାକିସ୍ତାନ ସରକାରଙ୍କ ପଦକ୍ଷେପ ଯଥେଷ୍ଟ ଏବଂ ଦୃଢ ନୁହେଁ | ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF) ରୁ ଏକ ଋଣ ସହାୟତା ପାଇବା ପରେ ଗୁରୁତର ଆର୍ଥିକ ସଙ୍କଟ ବିଷୟ ଦେଶବାସୀଙ୍କୁ ଅବଗତ କରାଯାଇଛି | IMF ଋଣ ପରିଶୋଧ ଏବଂ ପରିସ୍ଥିତିର ମୁକାବିଲା ସକାଶେ ପାକିସ୍ତାନ ପରବର୍ତ୍ତୀ ବଜେଟରେ ଏହାର ନିଜ ରାଜସ୍ବ ପରିମାଣକୁ ଶତକଡା 40 ଭାଗ ବୃଦ୍ଧି କରିବାକୁ ପଡିବ | ଅର୍ଥାତ ଏଥି ପାଇଁ ଟିକସ ଦର ଏବଂ ଟିକସ ଆଦାୟ ବଢାଇବାକୁ ପଡିବ ଯାହା ଲୋକମାନଙ୍କ ପାଇଁ ଆଉ ଏକ କଠିନ ସମସ୍ୟା ସୃଷ୍ଟି କରିବ ଏବଂ ଲୋକମାନେ ଅସୁବିଧାର ସମ୍ମୁଖୀନ ହେବେ | ପାକିସ୍ତାନର ଚିରାଚରିତ ବନ୍ଧୁ ରାଷ୍ଟ୍ର ଉପସାଗରୀୟ ଦେଶ, ସାଉଦି ଆରବ ଏବଂ ଚୀନ ମଧ୍ୟ ଏହି ଆର୍ଥିକ ସଙ୍କଟ ଦୂର କରିବାରେ ସମର୍ଥ ହୋଇପାରିନାହାଁନ୍ତି |

ପାକିସ୍ତାନକୁ IMFର ଋଣ ପ୍ରଦାନକୁ ଆମେରିକା ବିରୋଧ କରୁଥିବାରୁ ପାକିସ୍ତାନ ପାଇଁ ଆର୍ଥିକ ସମସ୍ୟା ଆହୁରି ଗୁରୁତର ହୋଇପଡିଛି | ଚୀନ ପାକିସ୍ତାନ ଅର୍ଥନୈତିକ କରିଡର (CPEC) ପ୍ରକଳ୍ପ ପାଇଁ ପାକିସ୍ତାନ IMFରୁ ଋଣ ନେଇ ଚୀନର ଋଣ ପରିଶୋଧ କରିବାକୁ ଚାହୁଁଥିବା ୱାଶିଂଗଟନ ବିବେଚନା କରିଛି |

ପ୍ୟାରିସ ଭିତ୍ତିକ ଆର୍ଥିକ କ୍ରିୟାନୁଷ୍ଠାନ ଟାସ୍କ ଫୋର୍ସ (FATF) ଏହାର ତାଲିକାରେ ପାକିସ୍ତାନକୁ ଗ୍ରେ ତାଲିକାଭୁକ୍ତ କରିଛି | ପାକିସ୍ତାନରେ ବିଭିନ୍ନ ସନ୍ତ୍ରାସବାଦୀ ଗୋଷ୍ଠୀ ଗୁଡିକୁ ଆର୍ଥକ ସହାୟତା ପ୍ରଦାନ ରୋକିବା ଦିଗରେ ପାକିସ୍ତାନ ବିଫଳ ହୋଇଥିବାରୁ FATF ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି | ଏହା ଦ୍ୱାରା ଅନ୍ୟ ଦେଶ କିମ୍ବା ଆନ୍ତର୍ଜାତୀୟ ଅନୁଷ୍ଠାନ ଗୁଡିକ ଠାରୁ ଆର୍ଥିକ ସାହାଯ୍ୟ ପ୍ରାପ୍ତ ନିଷିଦ୍ଧ ହୋଇଯିବ |

ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF), 6 ବିଲିୟନ ଆମେରିକୀୟ ଡଲାର ଋଣ ସହାୟତା ଦେବାକୁ ରାଜି ହେବା ପରେ ଚଳିତ ବର୍ଷ ପାକିସ୍ତାନର ଅଭିବୃଦ୍ଧି ହାର ଶତକଡା 2.8 ଭାଗ ହେବା ଆକଳନ କରିଛି | ନେପାଳର ଅଭିବୃଦ୍ଧି ହାର ଶତକଡା 7.5 ଭାଗ, ବାଙ୍ଗଲାଦେଶର ଅଭିବୃଦ୍ଧି ହାର ଶତକଡା 7.5 ଭାଗ ତୁଳନାରେ ଚଳିତ ବର୍ଷ ପାକିସ୍ତାନର ଅଭିବୃଦ୍ଧି ହାର ଶତକଡା 2.8 ଭାଗ ହେବା IMF ଆକଳନ କରିଛି | ଇମ୍ରାନ ଖାନ ସରକାର ଗୁରୁତର ସମସ୍ୟାର ସମୁଖୀନ ହୋଇଛନ୍ତି ଏବଂ ଅର୍ଥନୀତିକୁ ସଠିକ ସ୍ତରକୁ ଆଣିବା ସକାଶେ କଠୋର ମୁକାବିଲାର ସାମନ୍ନା କରିବାକୁ ପଡ଼ିବ | ଥାର ଅଞ୍ଚଳରେ ମଧ୍ୟ କ୍ରମାଗତ ଭାବେ ଚତୁର୍ଥ ବର୍ଷ ପାଇଁ ମରୁଡି ଦେଖାଦେଇଛି | ଏହାର ଫଳସ୍ୱରୂପ ସିନ୍ଧ ପ୍ରଦେଶରେ ଖାଦ୍ୟ ଶସ୍ୟ ଉତ୍ପାଦନ ହ୍ରାସ ପାଇଛି |

ପାକିସ୍ତାନର ଲେଖକ ତଥା ସାମ୍ବାଦିକ ଇମଦାଦ ଜାଫର କହିଛନ୍ତି, ଏହା ଦେଶ ପାଇଁ ସ୍ୱୟଂ-ସୃଷ୍ଟିକାରୀ ସମସ୍ୟା | ସନ୍ତ୍ରାସବାଦୀ ସଙ୍ଗଠନ ଗୁଡିକ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରି ଦେଶକୁ ସୁରକ୍ଷିତ ରଖିବାକୁ ସମଗ୍ର ବିଶ୍ବ ବର୍ଷ ବର୍ଷ ଧରି ପାକିସ୍ତାନକୁ କହିଆସିଛି | ଦେଶର କୃଷି, ଶିଳ୍ପ, ଶିକ୍ଷା ଏବଂ ବୈଜ୍ଞାନିକ ବିକାଶର ଅବନ୍ନତି ଘଟୁଥିବାବେଳେ ପାକିସ୍ତାନ ସନ୍ତ୍ରାସବାଦକୁ ଗୁରୁତ୍ତ୍ଵ ଦେଉଛି | ଏହାର ଫଳସ୍ୱରୂପ ଆଜି ଏହି ଦୁର୍ଦ୍ଦଶା ଘଟିଛି |


ମୂଳ ଲେଖା : ଅଶୋକ ହାଣ୍ଡୁ, ରାଜନୈତିକ ଭାଷ୍ୟକାର

ଅନୁବାଦ : ଅନୀଲ କୁମାର ପଟ୍ଟନାୟକ