ଭାରତୀୟ ଅର୍ଥନୀତି ନୂଆ ଉଚ୍ଚତା ଦିଗରେ ଅଗ୍ରସର

ଭାରତ ଚଳିତ ବର୍ଷ ବ୍ରିଟେନକୁ ପଛରେ ପକାଇ ବିଶ୍ବର ପଞ୍ଚମ ବୃହତ୍ତ ଅର୍ଥନୀତିରେ ପହଞ୍ଚିବାର ଅନୁମାନ କରାଯାଉଛି ଏବଂ 2025 ସୁଦ୍ଧା ଜାପାନକୁ ପଛରେ ପକାଇ ଏସିଆ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଦ୍ବିତୀୟ ସ୍ଥାନରେ ପହଞ୍ଚିବାର ଆଶା କରାଯାଉଛି | ଲଣ୍ତନ ଭିତ୍ତିକ ସଂସ୍ଥା ‘IHS Markit’s’ ଭାରତର ସାଧାରଣ ନିର୍ବାଚନରେ ନରେନ୍ଦ୍ର ମୋଦି ଏବଂ ତାଙ୍କ ପାର୍ଟିର ବିପୁଳ ବିଜୟ ଉପରେ ଯେଉଁ ଅନୁଧ୍ୟାନ ରିପୋର୍ଟ ଦେଇଛି ସେଥିରେ ମୋଦି ସରକାରଙ୍କ ଦ୍ବିତୀୟ ପାଳିରେ 2019-2023ରେ ମୋଟ ଘରୋଇ ଉତ୍ପାଦନ ଶତକଡା 7 ଭାଗରେ ପହଞ୍ଚିବାର ପୂର୍ବାନୁମାନ କରିଛି |

ଭାରତ 2019ରେ ବ୍ରିଟେନକୁ ପଛରେ ପକାଇ ବିଶ୍ବର ପଞ୍ଚମ ବୃହତ୍ତ ଅର୍ଥନୀତିରେ ପହଞ୍ଚିବ ଏବଂ ଏହାର ମୋଟ ଜିଡିପି 3 ଟ୍ରିଲିୟନ ଡଲାରକୁ ଟପିଯିବ ଏବଂ 2025 ସୁଦ୍ଧା ଜାପାନକୁ ପଛରେ ପକାଇ ଏସିଆ ପ୍ରଶାନ୍ତ ମହାସାଗରୀୟ ଅଞ୍ଚଳରେ ଦ୍ବିତୀୟ ବୃହତ୍ତ ଅର୍ଥନୀତିରେ ପହଞ୍ଚିବାର ଅନୁମାନ ଏହି ରିପୋର୍ଟରେ କରାଯାଇଛି |

ଭାରତ ବିଶ୍ବର ବୃହତ୍ତ ଅର୍ଥନୀତି ଆଡକୁ ଅଗ୍ରସର ହେଉଥିବା ବେଳେ ବିଶ୍ବ ଜିଡିପିରେ ଏହାର ଭାଗିଦାରୀ ମଧ୍ୟ ବୃଦ୍ଧି ପାଇ ଚାଲିଛି | ଏସିଆରେ ବାଣିଜ୍ୟ ଏବଂ ପୁଞ୍ଜି ନିବେଶ କ୍ଷେତ୍ରରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରି ଭାରତ ଏସିଆ ପ୍ରଶାନ୍ତ ମହାସାଗରୀୟ କ୍ଷେତ୍ରର ଅର୍ଥନୀତିରେ ମଧ୍ୟ ଏହାର ଗୁରୁତ୍ହକୁ ବୃଦ୍ଧି କରିଚାଲିଛି |

ମୋଦିଙ୍କ ଦ୍ବିତୀୟ ପାଳିରେ ଅର୍ଥନୀତି କ୍ଷେତ୍ରରେ ରହିଥିବା ଚ୍ୟାଲେଞ୍ଜକୁ ସମ୍ମୁଖୀନ ହେବାର ଆଶା କରାଯାଉଛି | ଭାରତ ସରକାରଙ୍କୁ ରାଷ୍ଟ୍ରାୟତ ବ୍ୟାଙ୍କଗୁଡିକ ପାଇଁ କେତେକ ସଂଶୋଧନ ଆଣିବାର ଆବଶ୍ୟକତା ରହିଛି ଯେପରିକି ପରିଶୋଧ ହୋଇପାରୁନଥିବା ଋଣ ବୋଝ କମ ହେବ |

ଜିଡିପିରେ ଉତ୍ପାଦନ କ୍ଷେତ୍ରର ଅଂଶ 25 ଭାଗ ଧାର୍ଯ୍ୟ ଲକ୍ଷ୍ୟ ତୁଳନାରେ ଏବେ ମଧ୍ୟ ଶତକଡା 18 ଭାଗ ରହିଛି ଏବଂ ଆଗାମୀ ଦୁଇ ଦଶନ୍ଧି ମଧ୍ୟରେ ବର୍ଷକୁ ସାଡେ ସାତ ମିଲିୟନ କର୍ମନିଯୁକ୍ତି ସୃଷ୍ଟି ହେବାର ଆକଳନ କରାଯାଉଛି |

2015ରୁ 2050 ମଧ୍ୟରେ ଭାରତର ଜନସଂଖ୍ୟା ପ୍ରାୟ 350 ମିଲିୟନରେ ପହଞ୍ଚିବାର ଅନୁମାନ କରାଯାଉଛି ଯାହାଯୋଗୁଁ ସରକାରଙ୍କ ପାଇଁ ଲୋକଙ୍କୁ ବିଦ୍ୟୁତ, ପାଣି, ସୁଲଭ ଗୃହ, ସର୍ଭସାଧାରଣ ପରିବହନ ଆଦି ଯଥେଷ୍ଟ ଭିତ୍ତିଭୂମି ଯୋଗାଇବା ଚ୍ୟାଲେଞ୍ଜପୂର୍ଣ୍ଣ ହେବ |

କର୍ମନିଯୁକ୍ତି ବୃଦ୍ଧି ପାଇଁ ମେକ ଇନ ଇଣ୍ତିଆ ମାଧ୍ୟମରେ ଭାରତର ଶିଳ୍ପ କ୍ଷେତ୍ରକୁ ପ୍ରାଧାନ୍ୟ ଦେବାକୁ ପଡ଼ିବ | 2014ରେ ଯେତେବେଳେ ମେକ ଇନ ଇଣ୍ତିଆ ଆରମ୍ଭ କରାଗଲା ସେତେବେଳେ ଲକ୍ଷ୍ୟ ଥିବା ଏହା ଜିଡିପିରେ ଉତ୍ପାଦନ କ୍ଷେତ୍ରରୁ ଶତକଡା 25 ଭାଗ ଅଂଶ ଗ୍ରହଣ କରିବ କିନ୍ତୁ 2018 ସୁଦ୍ଧା ଜିଡିପିରେ ଏହି ଭାଗିଦାରୀ ଶତକଡା 18 ଭାଗ ରହିଛି |

ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ ସରକାର କାଳରେ ଭିତ୍ତିଭୂମି ବିକାଶ କ୍ଷେତ୍ରରେ ଯଦିଓ ଆଖିଦୃଶିଆ କାମ ହୋଇଛି କିନ୍ତୁ ପରିବହନ ଏବଂ ବିଦ୍ୟୁତ ଶକ୍ତି କ୍ଷେତ୍ରରେ ଭିତ୍ତି ଭୂମିର ଦ୍ରୃତ ବିକାଶ ଏବେ ମଧ୍ୟ ମୁଖ୍ୟ ପ୍ରାଥମିକତା ରହିଛି | ବିଶ୍ବ ବ୍ୟାଙ୍କର 2019ର ସୁଗମ ବାଣିଜ୍ୟ ସୂଚିରେ ଭାରତର ସ୍ଥାନ 190ଟି ଦେଶ ମଧ୍ୟରେ 77ତମ ସ୍ଥାନରେ ରହିଛି |

ଯେହେତୁ ବର୍ତ୍ତମାନର ସରକାର ବିପୁଳ ସଂଖ୍ୟାଗରିଷ୍ଠତା ପାଇଛନ୍ତି ଏଣୁ ମେଣ୍ଟ ଦଳର କୌଣସି ଚାପ ରହିବ ନାହିଁ ଏବଂ ସରକାର ବିନା କୌଣସି ଚାପରେ ଅର୍ଥନୀତିରେ ଅଧିକ ସଂସ୍କାର ଆଣିପାରିବେ |

ପ୍ରଧାନମନ୍ତ୍ରୀ ମୋଦି 2014ରୁ ଦାୟିତ୍ବ ଗ୍ରହଣ କରିବା ପରେ ଜିଡିପିରେ ବୃଦ୍ଧି ଘଟିଛି | 2014ରେ ଏହା 2 ଟ୍ରିଲିୟନ ଡଲାର ଥିବାବେଳେ ମାତ୍ର ପାଞ୍ଚ ବର୍ଷ ମଧ୍ୟରେ 2019ରେ ଏହା 3 ଟ୍ରିଲିୟନ ଡଲାରରେ ପହଞ୍ଚିବାର ଅନୁମାନ କରାଯାଉଛି |

ମୋଦି ସରକାର 2017ରେ ସାମଗ୍ରୀ ଏବଂ ସେବା କର ପ୍ରଣୟନ କରି ଟିକସ ବ୍ୟବସ୍ଥାରେ ଯେଉଁ ସରଳିକରଣ କରିଛନ୍ତି ତାହାଦ୍ବାରା ଅର୍ଥନୀତି ସୁଦୃଢ ହୋଇଛି |

ମୂଳ ଲେଖା: ପଦମ ସିଂହ

ଅନୁବାଦ: ରାମଚଂଦ୍ର ନାଥ