G20 ଅର୍ଥମନ୍ତ୍ରୀ ଏବଂ କେନ୍ଦ୍ରୀୟ ବ୍ଯାଙ୍କ ଗଭର୍ଣ୍ଣର ମାନଙ୍କର ବୈଠକ

G20 ଅର୍ଥମନ୍ତ୍ରୀ ଏବଂ କେନ୍ଦ୍ରୀୟ ବ୍ଯାଙ୍କ ଗଭର୍ଣ୍ଣର ମାନଙ୍କର ଦୁଇ ଦିନିଆ ବୈଠକ ଜାପାନର ଫୁକୁଓକାରେ ଅନୁଷ୍ଠିତ ହୋଇଯାଇଛି | ବିଶ୍ଵ ସ୍ତରରେ ସାମ୍ପ୍ରତିକ ଅର୍ଥନୈତିକ ସଙ୍କଟର ପରିପ୍ରେକ୍ଷୀରେ ଏହି ବୈଠକ ଅନୁଷ୍ଠିତ ହୋଇଛି | ବୈଠକରେ G20 ସଦସ୍ୟ ରାଷ୍ଟ୍ର ମାନଙ୍କର ବିଭିନ୍ନ ବାଣିଜ୍ୟିକ ଏବଂ ଶୁଳ୍କ ସଙ୍କ୍ରାନ୍ତିୟ ପ୍ରସଙ୍ଗ ଉପରେ ବିଚାରବିମର୍ଶ ଏବଂ ଏହାର ସମାଧାନ ଉପରେ ଆଲୋଚନା ହେବା ସହ ଚଳିତ ମାସର ଶେଷାର୍ଦ୍ଧରେ ଓସାକାରେ ଅନୁଷ୍ଠିତ ହେବାକୁ ଥିବା G20 ସମ୍ମିଳନୀର ପ୍ରସ୍ତୁତି କାର୍ଯ୍ୟ ଉପରେ ମଧ୍ୟ ଆଲୋଚନା ହୋଇଛି | ଆମେରିକା ଏବଂ ଚୀନ ଭଳି ଦୁଇଟି ବୃହତ ଅର୍ଥନୈତିକ ସ୍ତରରେ ଉନ୍ନତ ରାଷ୍ଟ୍ର ଦ୍ଵାରା ଗୃହୀତ ସଂରକ୍ଷଣବାଦ ନୀତିର ପୁନର୍ବିଚାର ସକାସେ ମଧ୍ୟ ଏହି ବୈଠକ ମାଧ୍ୟମରେ ଏହାର ପଥ ପରିଷ୍କାର ହୋଇପାରିଛି | ଏତଦ ବ୍ଯତୀତ ଏହି ବୈଠକରେ, ଫେସ୍ବୁକ ଏବଂ ଗୁଗୁଲ ଭଳି ବହୁଦେଶୀୟ ବୈଷୟିକ ଏବଂ ଡିଜିଟାଲ କମ୍ପାନୀ ଗୁଡିକ ପାଇଁ ନୂଆ ଟିକସ ନୀତି ପ୍ରଣୟନ ସକାସେ ମଧ୍ୟ ଆଲୋକପାତ କରାଯାଇଛି | ସମଗ୍ର ବିଶ୍ବରେ ଘଟୁଥିବା ଅର୍ଥ ହେରଫେର ମାମଲା, ବ୍ଯାଙ୍କ ଠକେଇ, ଆର୍ଥିକ ଅପରାଧ ଏବଂ ଅର୍ଥନୈତିକ ଅପରାଧ ଗୁଡିକୁ ନିୟନ୍ତ୍ରଣ କରିବା ପଦକ୍ଷେପ ଗୁଡିକ ଉପରେ ମଧ୍ୟ ଏହି ବୈଠକରେ ବିଚାର ଆଲୋଚନା ହୋଇଛି |

G20 ସଦସ୍ୟ ରାଷ୍ଟ୍ର ଗୁଡିକର ଅର୍ଥମନ୍ତ୍ରୀ ମାନଙ୍କର ଫୁକୁଓକାରେ ଅନୁଷ୍ଠିତ ବୈଠକରେ ଆମେରିକା-ଚୀନ ମଧ୍ୟରେ ଚାଲିଥିବା ବାଣିଜ୍ୟ ବିବାଦ ଉପରେ ମଧ୍ୟ ଗୁରୁତ୍ତ୍ଵ ପ୍ରଦାନ କରାଯାଇଛି | ଏହି ବାଣିଜ୍ୟ ବିବାଦ ଦୁଇ ଦେଶର ଦ୍ଵିପକ୍ଷୀୟ ବାଣିଜ୍ୟ ସମ୍ପର୍କକୁ ବିପଦରେ ପକାଇବା ସହ ବିଶ୍ଵ ସ୍ତରୀୟ ବାଣିଜ୍ୟରେ ମଧ୍ୟ ଅଧିକ ପ୍ରଭାବ ପକାଉଛି | ଏଠାରେ ସୂଚିତ କରାଯିବା ଉଚିତ ଯେ, ଚୀନ ସହ 379 ବିଲିୟନ ଡଲାର ବାଣିଜ୍ୟ ନିଅଣ୍ଟର ମୁକାବିଲା ସକାସେ, ଆମେରିକା ଚୀନ ଆମଦାନୀ ଉପରେ 250 ବିଲିୟନ ଡଲାର ମୂଲ୍ୟର ଅର୍ଥାତ ଶତକଡା 25 ଭାଗ ଅତିରିକ୍ତ ଶୁକ୍ଳ ଲାଗୁ କରିଛି | ଚୀନ ମଧ୍ୟ ଏହାର ପ୍ରତ୍ୟୁତ୍ତରରେ ଆମେରିକାର ଆମଦାନୀ ଉପରେ ପ୍ରାୟ 110 ବିଲିୟନ ଡଲାରରୁ ଉର୍ଦ୍ଧ ମୂଲ୍ୟର ଶୁଳ୍କ ଲାଗୁ କରିଛି |

ଉଭୟ ଦେଶ ମଧ୍ୟରେ ଜାରି ବାଣିଜ୍ୟ ବିବାଦର ପ୍ରଭାବରେ ବିଶ୍ଵ ବାଣିଜ୍ୟ ଅଭିବୃଦ୍ଧି ଉଲ୍ଲେଖନୀୟ ଭାବେ ହ୍ରାସ ପାଇଛି ଏବଂ ଆନ୍ତର୍ଜାତୀୟ ସ୍ତରରେ ଅଭିବୃଦ୍ଧି ହାରରେ ମଧ୍ୟ ଶତକଡା ଅଧା ଭାଗ ହ୍ରାସ ଘଟିଛି | ଆନ୍ତର୍ଜାତୀୟ ମୁଦ୍ରା ପାଣ୍ଠି – IMF 2019 ବର୍ଷ ପାଇଁ ବିଶ୍ଵ ସ୍ତରୀୟ ଅଭିବୃଦ୍ଧି ହାର ଶତକଡା 3.6 ଭାଗରୁ 3.3 ଭାଗ ମଧ୍ୟରେ ରହିବା ଆକଳନ କରିଛି | ଓସାକାରେ ଆଗାମୀ G20 ସମ୍ମିଳନୀରେ ଉଭୟ ଆମେରିକା ଏବଂ ଚୀନ ସେମାନଙ୍କ ମଧ୍ୟରେ ଚାଲିଥିବା ବାଣିଜ୍ୟ ବିବାଦ ଉପରେ ଯଦି ଦ୍ଵିପକ୍ଷୀୟ ଭାବେ ଆଲୋଚନା ନକରନ୍ତି ତେବେ ଏହି ସମସ୍ଯାର ସମାଧାନ ହୋଇପାରିବ ନାହିଁ |

ତେବେ ଫୁକୁଓକା ସମ୍ମିଳନୀରେ ଅଂଶ ଗ୍ରହଣ କରିଥିବା ଆମେରିକାର ଅର୍ଥମନ୍ତ୍ରୀ ଷ୍ଟିଭେନ ମୁଚିନ ଆମେରିକା-ଚୀନ ମଧ୍ୟରେ ଚାଲିଥିବା ବାଣିଜ୍ୟ ବିବାଦ ପ୍ରସଙ୍ଗ ଉପରେ ଆଦୌ ବ୍ୟାକୁଳ ନଥିଲେ | ବରଂ ସେ ମତ ଦେଇଥିଲେ ଯେ ଆମେରିକା ଏବଂ ଚୀନ ଯଦି ସେମାନଙ୍କର ବାଣିଜ୍ୟ ସମ୍ବନ୍ଧୀୟ ସମସ୍ୟା ସମାଧାନ କରିବାରେ ସକ୍ଷମ ହେଉନାହାଁନ୍ତି ତେବେ ଆମେରିକା, ଚୀନର ଅନ୍ୟାନ୍ୟ ଆମଦାନୀ ସାମଗ୍ରୀ ଉପରେ ଆହୁରି 300 ବିଲିୟନ ଡଲାର ମୂଲ୍ୟର ଶୁଳ୍କ ଲାଗୁ କରିବ | ଅଧିକାଂଶ ୟୁରୋପୀୟ ଦେଶରେ ଅର୍ଥନୈତିକ ସ୍ଥିତି ମାନ୍ଦା ଥିବା ସମୟରେ ଆମେରିକା ଅର୍ଥମନ୍ତ୍ରୀ ଏହି ମନ୍ତବ୍ୟ ଦେଇଛନ୍ତି | ଆମେରିକା ଏବଂ ଚୀନ ପରେ ବିଶ୍ବର ତୃତୀୟ ସର୍ବବୃହତ ଅର୍ଥନୈତିକ ରାଷ୍ଟ୍ର ଜାପାନ ପ୍ରଥମ ଥର ପାଇଁ 1999 ମସିହାରେ ଗଠିତ ଏହି ଗୋଷ୍ଠୀ G20 ସମ୍ମିଳନୀର ଆୟୋଜନ କରୁଛି |

G20 ଅର୍ଥମନ୍ତ୍ରୀ ମାନଙ୍କ ବୈଠକର ଭାରତର ଦୃଷ୍ଟିକୋଣ ଅନୁସାରେ ଦ୍ବିପକ୍ଷୀୟ ଅର୍ଥନୈତିକ ସହଯୋଗ ଅଧୀନରେ ଏକ ନୂତନ ଆନ୍ତର୍ଜାତୀୟ ଟିକସ ନୀତି ଉପରେ ପ୍ରାଧାନ୍ୟ ରହିଛି | ଭାରତର ନବନିଯୁକ୍ତ ଅର୍ଥମନ୍ତ୍ରୀ ନିର୍ମଳା ସୀତାରମଣ ଫୁକୁଓକା ବୈଠକରେ ଯୋଗ ଦେବା ପୂର୍ବରୁ ତାଙ୍କର କାର୍ଯ୍ୟସୂଚୀ ପ୍ରସ୍ତୁତ କରିସାରିଥିଲେ |

ଏହି ସବୁ ପଦକ୍ଷେପ ଗୁଡିକର କାର୍ଯ୍ୟକାରୀତା ବିନା ସଦସ୍ୟ ରାଷ୍ଟ୍ର ଗୁଡିକର ରାଜସ୍ବ ଦକ୍ଷତାରେ ବାଧା ଉପୁଜିବ ବୋଲି ଭାରତ ଅନୁଭବ କରୁଛି | ଆମେରିକା-ଚୀନ ବାଣିଜ୍ୟ ବିବାଦ, ଆମେରିକା ସହ ଭାରତର ବାଣିଜ୍ୟ ସମ୍ପର୍କରେ ମଧ୍ୟ ପ୍ରଭାବ ପକାଇଛି |

G20 ସଦସ୍ୟ ରାଷ୍ଟ୍ରରେ ବିଶ୍ବ ଜନସଂଖ୍ୟାର ପ୍ରାୟ ଦୁଇ ତୃତୀୟାଂଶ ଜନସଂଖ୍ୟା ରହିଛି ଏବଂ ମୋଟ ବିଶ୍ବ ବାଣିଜ୍ୟର ଶତକଡା 85 ଭାଗରୁ ଅଧିକ ବାଣିଜ୍ୟ କାରବାର ସେଠାରେ ହେଉଛି | ଫୁକୁଓକା ବୈଠକ ସହ ବିଶ୍ବର 50 ଟି ଦେଶର ବାଣିଜ୍ୟ ଓ ବ୍ୟାପାର ମନ୍ତ୍ରୀ ମାନଙ୍କ ଅନ୍ୟ ଏକ ସମ୍ମିଳନୀ ଆୟୋଜିତ ହୋଇଥିଲା | G20 ଅର୍ଥମନ୍ତ୍ରୀ ମାନେ ଫୁକୁଓକା ବୈଠକରେ, G20 ସଦସ୍ୟ ରାଷ୍ଟ୍ର ନେତୃବୃନ୍ଦଙ୍କ ଆଗାମୀ ଓସାକା ଶିଖର ସମ୍ମିଳନୀର ରୂପରେଖ ପ୍ରସ୍ତୁତ କରିବା ପାଇଁ ଏକ ନୂତନ ମଞ୍ଚ ମଧ୍ୟ ସୃଷ୍ଟି କରିବା ଉଦ୍ୟମ କରିଛନ୍ତି |


ମୂଳ ଲେଖା : ମନୋହର ମନୋଜ, ସାମ୍ବାଦିକ


ଅନୁବାଦ : ଅନୀଲ କୁମାର ପଟ୍ଟନାୟକ