5 ଟ୍ରିଲିୟନ ଡଲାର ଅର୍ଥନୀତି ଅଭିମୁଖେ ଭାରତ ଅଗ୍ରସର

ଭାରତୀୟ ଅର୍ଥନିତୀ 2024 ମସିହା ସୁଦ୍ଧା 5 ଟ୍ରିଲିୟନ ଡଲାର ହାସଲ କରିବା ସଂକ୍ରାନ୍ତୀୟ ରୂପରେଖ ଉପରେ ଭାରତର ଅର୍ଥମନ୍ତ୍ରୀ ନିର୍ମଳା ସୀତାରମଣ 2019 ବର୍ଷର ବଜେଟରେ ପ୍ରାଧାନ୍ୟ ଦେଇଛନ୍ତି | ଅର୍ଥନୈତିକ ଅଭିବୃଦ୍ଧି ଏବଂ ପୁଞ୍ଜିନିବେଶକୁ ଗୁରୁତ୍ୱ ଦେଇ ଅନେକ ସଂଖ୍ୟକ ନୀତିଗତ ପଦକ୍ଷେପ ଥିବା "ଦଶନ୍ଧି ପାଇଁ ଏକ ଭିଜନ" ର ସେ ଘୋଷଣା କରିଛନ୍ତି | 

ବିଭିନ୍ନ ନୀତିଗତ ପଦକ୍ଷେପ ମଧ୍ୟରେ ଭୌତିକ ଏବଂ ସାମାଜିକ ଭିତ୍ତିଭୂମିର ସୁଦୃଢ଼ୀକରଣ, ଡିଜିଟାଲ ବ୍ୟବସ୍ଥା ମାଧ୍ୟମରେ ଆର୍ଥିକ ପ୍ରଣାଳୀରେ ସମସ୍ତଙ୍କୁ ସାମିଲ ପ୍ରକ୍ରିୟା ଉନ୍ନତ କରିବା, ମହିଳା ଓ ଶିଶୁ ମାନଙ୍କ ପାଇଁ ପୁଷ୍ଟିକର ଖାଦ୍ୟ ଏବଂ ଉତ୍ତମ ସ୍ୱାସ୍ଥ୍ୟ ବ୍ୟବସ୍ଥା, ଜଳ ସଂରକ୍ଷଣ ଓ ସଠିକ ପରିଚାଳନା, ମହାକାଶ ଉପରେ ବିଭିନ୍ନ କାର୍ଯ୍ୟକ୍ରମ, "ମେକ ଇନ ଇଣ୍ଡିଆ" ଓ "ଆୟୁଷ୍ମାନ ଭାରତ" ଯୋଜନା ଇତ୍ୟାଦିକୁ ଆହୁରି ସୁଦୃଢ କରିବା ପାଇଁ ନୀତିଗତ ପଦକ୍ଷେପ ଗୁଡିକ ଅନ୍ତର୍ଭୁକ୍ତ ରହିଛି | ଏହି ପ୍ରକ୍ରିୟାରେ ପ୍ରତ୍ୟେକ ଭାରତୀୟ ଏକ ଅଂଶୀଦାର ରହିବେ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି |

ତେବେ 2024 ମସିହା ସୁଦ୍ଧା ଭାରତୀୟ ଅର୍ଥନିତୀକୁ 5 ଟ୍ରିଲିୟନ ଡଲାରରେ ପହଞ୍ଚାଇବା ସକାଶେ ଉଦ୍ଦିଷ୍ଟ ଢାଞ୍ଚାଗତ ସଂସ୍କାର ପ୍ରାୟତଃ ସମ୍ପୂର୍ଣ୍ଣ ହୋଇଛି | ଭାରତର ଉଚ୍ଚ ଅଭିବୃଦ୍ଧି ହାରରେ ସାମାନ୍ୟ ହ୍ରାସ ପାଇବାର ସମ୍ଭାବନାକୁ ନେଇ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ଉପଦେଷ୍ଟା ପରିଷଦର ସଦସ୍ୟ ରତୀନ ରାୟ ସଚେତନ କରାଇଛନ୍ତି |

ଅଭିବୃଦ୍ଧି ହାସଲ ସକାସେ ପୁଞ୍ଜିନିବେଶକୁ ଆକର୍ଷଣ କରାଇବା ମୋଦି ସରକାରଙ୍କର ପ୍ରାଧାନ୍ୟ ରହିଛି | ଭାରତୀୟ ଅର୍ଥନୀତିରେ ପୁଞ୍ଜିନିବେଶ ସକାଶେ ନିବେଶକ ମାନଙ୍କ ଆସ୍ଥାଭାଜନ ହେବା ଉପରେ ମଧ୍ୟ ଗୁରୁତ୍ତ୍ଵ ଦିଆଯାଉଛି | ଆର୍ଥକ ଦୃଢ଼ୀକରଣ ଉପରେ ଭାରତକୁ ସଚେତନ ରହିବା ନିହାତି ଆବଶ୍ୟକ; ଅର୍ଥନୈତିକ ଅଭିବୃଦ୍ଧି ପାଇଁ ଏହା ଯେଭଳି ବାଧକ ନହେବା ଉଚିତ | ଆର୍ଥିକ ସୁଦୃଢ଼ୀକରଣ ପଦକ୍ଷେପ ଓ ଅଭିବୃଦ୍ଧିରେ ସରକାରୀ ଖର୍ଚ୍ଚ ଅପେକ୍ଷା ଟିକସ ଆଦାୟକୁ ଉଲ୍ଲେଖନୀୟ ବିବେଚନା କରାଯାଉଛି |

ଅର୍ଥନୈତିକ ଅଭିବୃଦ୍ଧି ପାଇଁ ଟିକସ ଆଦାୟ ଏକ ବଳିଷ୍ଠ ପଦକ୍ଷେପ ସଦୃଶ | ଟିକସ ସଂସ୍କାର ପଦକ୍ଷେପରେ ଉଦ୍ୟୋଗ ଜଗତରୁ ଟିକସ ଆଦାୟ ହେଉଛି ସବୁଠାରୁ ଉଲ୍ଲେଖନୀୟ ପଦକ୍ଷେପ | 400 କୋଟି ଟଙ୍କା ପର୍ଯ୍ୟନ୍ତ ବ୍ୟବସାୟ ଥିବା ସମସ୍ତ କମ୍ପାନୀ ଗୁଡିକର ଉଦ୍ୟୋଗ ଟିକସ ହାରକୁ ଶତକଡା 25 ଭାଗ ହ୍ରାସ କରାଯାଇଛି | GST ରୁ ଅଧିକ ରାଜସ୍ବ ସଂଗ୍ରହ ପାଇଁ ରିଟର୍ଣ୍ଣ ଦାଖଲ ପ୍ରକ୍ରିୟାରେ ସରଳୀକରଣର ଆବଶ୍ୟକତା ରହିଛି |

କୃଷି ଭିତ୍ତିକ ସମସ୍ୟା ଗୁଡିକର ମୁକାବିଲା ପାଇଁ ମଧ୍ୟ ଭାରତକୁ ନୀତି ନିର୍ଦ୍ଧାରଣ କରିବାକୁ ପଡିବ | ଆଜି ମଧ୍ୟ ଭାରତରେ ଶସ୍ୟ ଉତ୍ପାଦନ ଏବଂ ଅଧିକାଂଶ ଫସଲ କମ ବର୍ଷା ଯୋଗୁଁ କ୍ଷତିଗ୍ରସ୍ତ ହୋଇଛି ଏବଂ ଯଦି ଖରାପ ମୌସୁମୀ ଓ କମ ବର୍ଷା ଜାରି ରହେ ତେବେ ଶସ୍ୟ ହାନି ଦ୍ୱାରା କୃଷକ ମାନେ ଋଣଗ୍ରସ୍ତ ହୋଇପାରନ୍ତି | 

କୃଷି କ୍ଷେତ୍ରରେ ପୁଞ୍ଜିନିବେଶର ନିହାତି ଆବଶ୍ୟକତା ରହିଛି | ସମସ୍ତଙ୍କୁ ସମାନ ଅଧିକାର ଓ ସମାନ ସୁବିଧା ଉପଲବ୍ଧ କରାଇବାକୁ ଦ୍ଵିତୀୟ ଥର କ୍ଷମତାକୁ ଆସିଥିବା ମୋଦି ସରକାରଙ୍କର ପ୍ରଧାନ ଉଦ୍ଦେଶ୍ୟ ରହିଛି ଏବଂ ଏଥି ସକାଶେ "ଲିଭ ନୋ ୱାନ ବିହାଇଣ୍ଡ" (LNOB) କିମ୍ବା କେହି ଯେଭଳି ବଞ୍ଚିତ ହେବେନାହିଁ ନୀତି ଘୋଷଣା କରାଯାଇଛି | 

ଗରିବ ଲୋକ ମାନଙ୍କୁ ବିଦ୍ୟୁତ ଓ ଶକ୍ତି ଯୋଗାଇଦେବା ଲକ୍ଷ୍ୟରେ ଉଜ୍ଜ୍ଵଳା, ଉଦୟ ଇତ୍ୟାଦି ଯୋଜନା ଗୁଡିକ ସରକାରଙ୍କର ଉଲ୍ଲେଖନୀୟ ପଦକ୍ଷେପ ମଧ୍ୟରୁ ଅନ୍ୟତମ | ଏହି କାର୍ଯ୍ୟକ୍ରମ ଗୁଡିକ ମଧ୍ୟରୁ ଉଦୟ ଯୋଜନା ବିଦ୍ୟୁତ ବିତରଣ କମ୍ପାନୀ ଗୁଡିକୁ ଆର୍ଥିକ ଓ ପରିଚାଳନା ଗତ ଭାବେ ସଶକ୍ତ କରାଇଛି |

ଅଭିବୃଦ୍ଧି ହାସଲ ସକାଶେ ବିଭିନ୍ନ ପ୍ରମୁଖ କ୍ଷେତ୍ର ଗୁଡିକରେ ବିଦେଶୀ ପ୍ରତ୍ୟେକ୍ଷ ପୁଞ୍ଜିନିବେଶ (FDI) ଜରିଆରେ ଭାରତୀୟ ଅର୍ଥନୀତିକୁ ବିଦେଶୀ ପୁଞ୍ଜିନିବେଶ ଆକର୍ଷଣ କରି ଉଲ୍ଲେଖନୀୟ ପଦକ୍ଷେପ ଗ୍ରହଣ କରାଯାଇଛି | ତେବେ ବିଦେଶୀ ପୁଞ୍ଜିନିବେଶ ସୀମା ଉପରେ ଏହାର ବର୍ଦ୍ଧିତ ସୁଧ ହାରକୁ ଦୃଷ୍ଟିରେ ରଖି ସଜାଗ ରହିବା ଆବଶ୍ୟକ | ବାଣିଜ୍ୟ ବ୍ୟବସାୟ ପରିପ୍ରେକ୍ଷୀରେ ଚଳିତ ବଜେଟରେ କିଛିଟା ସାମଗ୍ରୀ ଉପରେ ଆମଦାନୀ ଶୁଳ୍କ ବୃଦ୍ଧି କରାଯିବା ବିଷୟ ଘୋଷଣା କରାଯାଇଛି | ଆମେରିକା-ଚୀନ ମଧ୍ୟରେ ଚାଲିଥିବା ବାଣିଜ୍ୟ ବିବାଦ ସମୟରେ ଭାରତ, ଏହାର ବାଣିଜ୍ୟ ନୀତିକୁ ବିବେକପୂର୍ଣ୍ଣ ଭାବେ ପ୍ରସ୍ତୁତ କରିବା ଉଚିତ |

ଭାରତ ବର୍ତ୍ତମାନ 2.8 ଟ୍ରିଲିୟନ ଡଲାର ସମ୍ପନ୍ନ ଏକ ଅର୍ଥନୀତି | ଯଦି ଆମେ ସାଧାରଣ ଭାବେ ବାର୍ଷିକ ଶତକଡା 10 ଭାଗ ଅଭିବୃଦ୍ଧି ହାସଲ କରି ଅଗ୍ରସର ହେବା ତେବେ ଯାଇ 2024 ମସିହା ସୁଦ୍ଧା 5 ଟ୍ରିଲିୟନ ଡଲାର ଅର୍ଥନୀତି ହାସଲ ହୋଇପାରିବ | ଏହି ଲକ୍ଷ୍ୟ ହାସଲ କରିବା ପାଇଁ ବିଭିନ୍ନ କ୍ଷେତ୍ରରେ ପୁଞ୍ଜିନିବେଶ ବୃଦ୍ଧି ତଥା ସ୍ଥାନୀୟ ଓ ରାଜ୍ୟ ସ୍ତରରେ ପୁଞ୍ଜିନିବେଶର ମଧ୍ୟ ନିତାନ୍ତ ଆବଶ୍ୟକତା ରହିଛି |

ମୂଳ ଲେଖା : ଡକ୍ଟର ଲେଖା ଚକ୍ରବର୍ତ୍ତୀ, ପ୍ରଫେସର, NIPF 

ଅନୁବାଦ : ଅନୀଲ କୁମାର ପଟ୍ଟନାୟକ