ଓସାକାରେ ଭାରତ-ଆମେରିକା କଥାବାର୍ତ୍ତା

ଓସାକାରେ ଅନୁଷ୍ଠିତ G20 ଶୀଖର ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନଅଟି ଦ୍ଵିପକ୍ଷୀୟ ବୈଠକ କରିଥିଲେ | ଅଷ୍ଟ୍ରେଲିଆ, ବ୍ରାଜିଲ, ଜର୍ମାନୀ, ଇଣ୍ଡୋନେସିଆ, ଜାପାନ, ଦକ୍ଷିଣ କୋରିଆ, ସାଉଦି ଆରବ, ତୁର୍କୀ ଏବଂ ଆମେରିକାର ଶୀଖର ନେତୃବୃନ୍ଦଙ୍କ ସହ ଦ୍ଵିପକ୍ଷୀୟ କଥାବାର୍ତ୍ତା କରିଥିବାବେଳେ ଦୁଇଟି ତ୍ରିପକ୍ଷୀୟ (ଜାପାନ, ଭାରତ, ଆମେରିକା ଏବଂ ରୁଷ, ଭାରତ, ଚୀନ) କଥାବାର୍ତ୍ତା କରିଛନ୍ତି | ତିନି ଦିନ ମଧ୍ୟରେ ସେ BRICS ସଦସ୍ୟ ରାଷ୍ଟ୍ରର ଶୀଖର ନେତୃବୃନ୍ଦଙ୍କ ସହ ମଧ୍ୟ ଏକ ଅଣ-ଆନୁଷ୍ଠାନିକ ବୈଠକରେ କଥାବାର୍ତ୍ତା କରିଥିଲେ | 

ବିଶ୍ଵ ସ୍ତରୀୟ ଅର୍ଥନୀତି ଏବଂ ବାଣିଜ୍ୟ ଓ ଏହାର ଆନ୍ତଃ ସମ୍ପର୍କ ବିଷୟରେ ଆଲୋଚନା, G20 ଶୀଖର ସମ୍ମିଳନୀର ମୁଖ୍ୟ କାର୍ଯ୍ୟସୂଚୀ ରହିଥିଲା | ଭାରତ ଏବଂ ଆମେରିକା ମଧ୍ୟରେ ବ୍ୟାପାର ଏକ ମୁଖ୍ୟ ଉଦବେଗର ବିଷୟ ବସ୍ତୁ ରହିଛି | ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ମଧ୍ୟରେ ଅନୁଷ୍ଠିତ ଦ୍ଵିପକ୍ଷୀୟ ବୈଠକରେ ବ୍ୟାପାର ସମ୍ବନ୍ଧୀୟ ପ୍ରସଙ୍ଗ ଗୁଡିକ ଉପରେ ଆଲୋଚନା ହୋଇଛି |

G20 ଶୀଖର ସମ୍ମିଳନୀର ଏକ ମୁଖ୍ୟ ପରିଣାମ ହେଉଛି ଚୀନ ଏବଂ ଆମେରିକା ମଧ୍ୟରେ ଚାଲିଥିବା ବାଣିଜ୍ୟ ବିବାଦର ସମାଧାନ କରି ଦୁଇ ଦେଶ ମଧ୍ୟରେ ସମ୍ପର୍କରେ ସୁଧାର ଆଣିବା | ଉଭୟ ଦେଶ ମଧ୍ୟରେ ବୁଝାମଣା ଉପରେ ଭାରତ ତୀକ୍ଷଣ ଦ୍ରୁଷ୍ଟି ରଖିଥିବା ସହ ଆମେରିକୀୟ ସାମଗ୍ରୀ ଉପରେ ଲାଗୁ ଶୁଳ୍କ ପ୍ରସଙ୍ଗ ଉପରେ ଉପଜିଥିବା ମତଭେଦ ସମାଧାନ କରିବାକୁ ମଧ୍ୟ ଭାରତ ଉଦ୍ୟମ ଜାରି ରଖିଛି | 

ଭାରତର ଅଧିକ ଶୁଳ୍କ ଲାଗୁ ବିଷୟ ଉପରେ ରାଷ୍ଟ୍ରପତି ଟ୍ରମ୍ପ ଏହି ନିଷ୍ପତିର ସମାଲୋଚନା କରିଛନ୍ତି ଏବଂ ନୂଆଦିଲ୍ଲୀ ଏହାର ବାଣିଜ୍ୟ ଭାର ହ୍ରାସ କରିବାକୁ ଚାହିଁଛନ୍ତି | ଭାରତ 28 ଟି ସାମଗ୍ରୀ ଉପରେ ଶୁଳ୍କ ବୃଦ୍ଧି କରିଛି ଏବଂ ଏହାର ପ୍ରତ୍ୟୁତ୍ତରରେ ଆମେରିକା ମଧ୍ୟ ସେଠାରୁ ରପ୍ତାନି ହେଉଥିବା ଅନେକ ସାମଗ୍ରୀ ଉପରେ ଶୁଳ୍କ ବୃଦ୍ଧି କରିଛି | G20 ସମ୍ମିଳନୀ ପୂର୍ବରୁ ଆମେରିକା ବୈଦେଶିକ ମନ୍ତ୍ରୀ ମାଇକ ପୋମ୍ପିଓଙ୍କ ଭାରତ ଗସ୍ତ ସମୟରେ ମଧ୍ୟ ଏହି ପ୍ରସଙ୍ଗ ଉପରେ ଆଲୋଚନା ହୋଇଥିଲା | ଏହି ପ୍ରସଙ୍ଗର ସମାଧାନ ସକାଶେ ଉଭୟ ଦେଶର ବାଣିଜ୍ୟ ମନ୍ତ୍ରୀ ଯଥାଶୀଘ୍ର ବୈଠକ କରି ଆଲୋଚନା କରିବେ ବୋଲି ଦୁଇଦେଶ ନିଷ୍ପତି ନେଇଛନ୍ତି |

ବାଣିଜ୍ୟ ବ୍ୟତୀତ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ମଧ୍ୟରେ 5-G ଟେକ୍ନୋଲୋଜି, ପ୍ରତିରକ୍ଷା ସମ୍ପର୍କ ଏବଂ ଇରାନ ପ୍ରସଙ୍ଗ ଉପରେ ମଧ୍ୟ ଆଲୋଚନା ହୋଇଛି | ପାରସ୍ୟ ଉପସାଗରୀୟ ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରଖିବା ଭାରତର ପ୍ରାଧାନ୍ୟ ରହିଛି | ଭାରତକୁ ତୈଳ ଯୋଗାଣ ବ୍ୟବସ୍ଥା ଯେଭଳି ପ୍ରଭାବିତ ନହୁଏ ତାହା ସୁନିଶ୍ଚିତ କରାଇବାକୁ ପ୍ରତି ଆମେରିକା ପ୍ରତିଶୃତି ଦେଇଛି | 

5-G ଟେକ୍ନୋଲୋଜି ସକାଶେ ହୁଏଇ ସହିତ ବ୍ୟବସାୟ କରିବାକୁ ଆମେରିକୀୟ କମ୍ପାନୀ ଗୁଡିକୁ ଆମେରିକା ଅନୁମତି ଦେଇଥିବାରୁ ଏହାକୁ ଉଲ୍ଲେଖନୀୟ ବିବେଚନା କରାଯାଉଛି ଭାରତର ମେକ ଇନ ଇଣ୍ଡିଆ ଅଭିଯାନରେ ମଧ୍ୟ 5-G ଟେକ୍ନୋଲୋଜି ଏବଂ ଏହାର ବିକଶିତ ବିଭିନ୍ନ ପ୍ରକ୍ରିୟା ସାମିଲ କରିବା ଆଗ୍ରହ ପ୍ରକାଶ ପାଇଛି | ଏହା ଉଭୟ ଦେଶ ମଧ୍ୟରେ ସମ୍ପର୍କ ସୁଦୃଢ କରିବା ସହ ବ୍ୟବସାୟ ବୃଦ୍ଧି କରିବାରେ ସହାୟକ ହେବ |

ପ୍ରତିରକ୍ଷା କ୍ଷେତ୍ରରେ ସହଯୋଗ ବୃଦ୍ଧି ମଧ୍ୟ ଦୁଇ ଦେଶ ମଧ୍ୟରେ ଆଉ ଏକ ଗୁରୁତ୍ତ୍ୱପୂର୍ଣ୍ଣ ପ୍ରସଙ୍ଗ ରହିଛି | ଭାରତ, ଆମେରିକା ସହ ଏହାର ପ୍ରତିରକ୍ଷା ସମ୍ପର୍କ ସୁଦୃଢ କରିବା ବିଭିନ୍ନ ପଦକ୍ଷେପ ଜାରିରଖିଛି  | ଓସାକାରେ ଭାରତୀୟ ପ୍ରଧାନମନ୍ତ୍ରୀ, ଜାପାନ ପ୍ରଧାନମନ୍ତ୍ରୀ ଏବଂ ଆମେରିକା ରାଷ୍ଟ୍ରପତିଙ୍କ ମଧ୍ୟରେ JAI (ଜାପାନ-ଆମେରିକା-ଭାରତ) ତ୍ରିପକ୍ଷୀୟ କଥାବାର୍ତ୍ତା ଅନୁଷ୍ଠିତ ହୋଇଛି | ତ୍ରିପକ୍ଷୀୟ କଥାବାର୍ତ୍ତାରେ ତିନୋଟି ଯାକ ଦେଶ ସାମୁଦ୍ରିକ କ୍ଷେତ୍ରରେ ଏବଂ ଭାରତୀୟ ମହାସାଗର ଅଞ୍ଚଳରେ ଆପୋଷ ସହଯୋଗ ବୃଦ୍ଧି କରିବାକୁ ଏକ ବାର୍ଷିକ ସମ୍ମିଳନୀ କରାଇବାକୁ ସହମତ ହୋଇଛନ୍ତି |

ମୂଳ ଲେଖା :  ଡକ୍ଟର ସ୍ତୁତି ବାନାର୍ଜୀ, ଆମେରିକୀୟ ବ୍ୟାପାର ଉପରେ ସାମରିକ ବିଶ୍ଳେଷକ  

ଅନୁବାଦ     : ଅନୀଲ କୁମାର ପଟ୍ଟନାୟକ