ହାଫିଜ ସୟିଦକୁ ପାକିସ୍ତାନ ପକ୍ଷରୁ ପୁଣିଥରେ ଜାମିନ

ପାକିସ୍ତାନର ଲାହୋର ସ୍ଥିତ ସନ୍ତ୍ରାସବାଦ ବିରୋଧି ଅଦାଲତ ବେଆଇନ ଘୋଷିତ ଜମାତ ଉଦ ଦାୱାର ମୁଖ୍ୟ ହାଫିଜ ମହମ୍ମଦ ସୟିଦ ଏବଂ ଅନ୍ୟ ତିନି ଜଣଙ୍କୁ ଆଗୁଆ ଜାମିନ ଜାମିନ ପ୍ରଦାନ କରିଛି କିନ୍ତୁ ଖବର ମିଳିଛି ଯେ ପାକିସ୍ତାନ କର୍ତ୍ତୃପକ୍ଷ ସୟିଦକୁ ଗିରଫ କରି ବିଚାର ବିଭାଗୀୟ ହାଜତକୁ ପଠାଇଛି। ଏହା ପୂର୍ବରୁ ସୟିଦ ସହିତ ତାଙ୍କ ଭାଇ ହାଫିଜ ମସୁଦ ଏବଂ ଲସ୍କରେ ତୈବାର ଦୁଇ ଜଣ ସହ ପ୍ରତିଷ୍ଠାତା ଅମୀର ହାମଜା ଏବଂ ମଲ୍ଲିକ ଜଫରକୁ ଅଗଷ୍ଟ 30 ତାରିଖ ଯାଏଁ 50 ହଜାର ଟଙ୍କା ଲେଖାଏଁ ମୁଚାଲିକାରେ ଜାମିନ ପ୍ରଦାନ କରାଯାଇ ଥିଲା।

ଜମାତ ଉଦ ଦାୱା ପାଇଁ ଉଭୟ ହମଜା ଏବଂ ଜାଫର ପାଣ୍ଠି ଯୋଗାଡ କରୁଥିଲେ। କୁହାଯାଉଛି ଯେ ମାର୍ଚ୍ଚ 2018ରେ ହମଜା ଲସ୍କରେ ତୈବାରୁ ଅଲଗା ହୋଇ ଜୈସେ ମଙ୍ଗଫା ନାମରେ ଏକ ସନ୍ତ୍ରାସବାଦି ସଂଗଠନ ଗଠନ କରିଥିଲା।

ପ୍ରକାଶ ଥାଉକି ଜୁଲାଇ ପ୍ରଥମ ସପ୍ତାହରେ ପାକିସ୍ତାନର ସନ୍ତ୍ରାସବାଦ ବିରୋଧି ଅଦାଲତ ନ୍ୟାସନାଲ ସୁରକ୍ଷା କମିଟି ନିର୍ଦେଶରେ କାର୍ଯ୍ୟ ସଂପାଦନ କରିଥାଏ। ଜମାତ ଉଦ ଦାୱାର ନେତାମାନଙ୍କ ବିରୁଦ୍ଧରେ ଲାହୋର, ଗୁଜରନୱାଲା, ମୁଲତାନ, ଫୈଜଲାବାଦ ଏବଂ ସରଗୋଦା ସ୍ଥିତ ସନ୍ତ୍ରାସବାଦ ବିରୋଧି ଅଦାଲତରେ 23ରୁ ଉର୍ଦ୍ଧ ମାମଲା ଦାୟର ହୋଇଥିଲା। ଅଦାଲତ ଏହି ସଂଗଠନର 4 ଜଣ ତୁଙ୍ଗ ନେତାଙ୍କ ସମେତ 13 ଜଣ କର୍ମକର୍ତ୍ତାଙ୍କୁ ଗିରଫ କରିଥିଲା। ମଇ ମାସରେ ସୟିଦର ଭିଣୋଇ ଅବଦ୍ଦୁଲ ରହମାନ ମକ୍କି ସମେତ ଅନ୍ୟ ଜଣେ ବରିଷ୍ଠ ନେତା ମହମ୍ମଦ ଶାହବାଜକୁ ହାଜତକୁ ନିଆଯାଇ ଥିଲା।

ପାକିସ୍ତାନ ଗଣମାଧ୍ୟମ ଖବର ଅନୁଯାୟୀ ବ୍ୟାପକ ତଦନ୍ତ ପରେ ଏନଏସସି ଜମାତ ଉଦ ଦାୱା ଏବଂ ଏହାର ତାଦବ୍ୟ ସଂଗଠନ ଫଲାଇ ଇନସାନିୟତ ଉପରେ କଟକଣା ଜାରି କରିଥିଲା ଏବଂ ନ୍ୟାସନାଲ ସୁରକ୍ଷା କମିଟି ଜାଣିବାକୁ ପାଇଥିଲା ଯେ ଏହି ସଂଗଠନ ବିଭିନ୍ନ ଅଣ ଲାଭକାରୀ ସଂଗଠନ ମାଧ୍ୟମରେ ସନ୍ତ୍ରାସବାଦ ପାଇଁ ଅର୍ଥ ସଂଗ୍ରହ କରୁଥିଲା। କୁହାଯାଉଛି ଯେ ଯେଉଁସବୁ ସଂଗଠନ ଏଥିରେ ସଂପୃକ୍ତ ଥିଲେ ସେମାନଙ୍କୁ ସରକାର ଠାବ କରିଛନ୍ତି।

ଏସବୁ ସତ୍ତ୍ବେ ପାକିସ୍ତାନର ସନ୍ତ୍ରାସବାଦ ବିରୋଧି ଅଦାଲତ ହାଫିଜ ସୟିଦକୁ ଆଗୁଆ ଜାମିନ ଦେବାର ଅର୍ଥ ହେଉଛି ଯେ ଆଇନ କାର୍ଯ୍ୟକାରୀ ସଂସ୍ଥାମାନେ ଆଇନକୁ ପାଳନ କରିବାରେ ଆନ୍ତରିକତା ଦେଖାଉନାହାନ୍ତି କିମ୍ବା ସନ୍ତ୍ରାସବାଦକୁ ରୋକିବା କ୍ଷେତ୍ରରେ ଗୁରୁତ୍ବ ପ୍ରଦର୍ଶନ କରୁନାହାନ୍ତି

ସରକାର ମଧ୍ୟ ନିରବ ରହୁଛି। ଏହା ପ୍ରଥମ ଘଟଣା ନୁହେଁ। ପୂର୍ବରୁ 2017 ନଭେମ୍ବରରେ ଲାହୋର କୋର୍ଟ ମଧ୍ୟ ହାଫିଜକୁ 10 ମାସର ନଜର ବନ୍ଦି ପରେ ମୁକ୍ତ କରିଥିଲା। ହାଫିଜ ମଧ୍ୟ ଜାଣେ ଯେ ସରକାର ତା ପ୍ରତି ଅତି କୋହଳ ମନୋଭାବ ରଖିଛନ୍ତି। ସାମାନ୍ୟ କେତେ ଦିନ ନଜର ବନ୍ଦି ରଖି ପାକିସ୍ତାନ ପ୍ରଚାର କଲା ଯେ ସନ୍ତ୍ରାସବାଦ ପ୍ରତି ସେ ଗମ୍ଭିର ରହିଛି କିନ୍ତୁ ଏସବୁ ଲୋକଦେଖାଣିଆ କୁହାଯାଇ ପାରେ।

ସତ କହିବାକୁ ଗଲେ ପାକିସ୍ତାନ କେବଳ ଆନ୍ତର୍ଜାତୀୟ ଚାପରେ ସୟୀଦ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ଗତମାସ ଆମେରିକାର ଓରଲାଣ୍ତୋରେ ଅର୍ଥନୈତିକ କାର୍ଯ୍ୟାନୁଷ୍ଠାନ ଟାସ୍କ ଫୋର୍ସ ପାକିସ୍ତାନର ଗ୍ରେ ତାଲିକାକୁ ମେ 2019 ପର୍ଯ୍ୟନ୍ତ ଘୁଞ୍ଚାଇ ଥିଲା ଜାନୁୟାରୀର ସମୟ ସୀମା ଅତିବାହିତ ହେବା ପରେ। ବୈଠକରେ କୁହାଯାଇଛି ଯେ ପାକିସ୍ତାନ 2019 ଅକ୍ଟୋବର ସୁଦ୍ଧା ଏହାର କାର୍ଯ୍ୟ ଯୋଜନା ଶେଷ କରୁ ଏବଂ ଯଦି ଏହା ନହୁଏ ତେବେ ପାକିସ୍ତାନ ବିରୁଦ୍ଧରେ ପରବର୍ତ୍ତି ପନ୍ଥା ଗ୍ରହଣ କରାଯିବ। ଯାହାକି କଳା ତାଲିକାଭୁକ୍ତ ହୋଇପାରେ। ଏହାହିଁ ବର୍ତ୍ତମାନ ପାକିସ୍ତାନ ପାଇଁ ଚିନ୍ତାର କାରଣ ହୋଇଛି।

ସୟୀଦ ଏବଂ ଅନ୍ୟ ମାନଙ୍କ ବିରୁଦ୍ଧରେ ଯେଉଁ ମକଦ୍ଦମା କରାଯାଇଛି ତାହା ଅତ୍ୟନ୍ତ ହାଲୁକା ଭାବେ ନିଆଯାଇଛି। ଏହାଦ୍ବାରା ହାଫିଜର ଓକିଲ ଏହା ପ୍ରମାଣିତ କରିପାରେ ଯେ ହାଫିଜ ତସ୍କରେ ତୈବାର ସଦସ୍ୟ ନାହିଁ କାରଣ ସେ ଏହାକୁ 2001ରେ ପରିତ୍ୟାଗ କରିଛି। ଯେତେବେଳେକି 2002ରେ ଯାଇ ଏହି ସଂଗଠନକୁ ବେଆଇନ ଘୋଷଣା କରାଯାଇଥିଲା। ଏସବୁ ହାଫିଜକୁ ଆଇନର ଫାନ୍ଦରୁ ଖସିଯିବାର ପରିକଳ୍ପିତ ଯୋଜନା କୁହାଯାଇ ପାରେ।

କେବଳ ଅର୍ଥନୈତିକ କାର୍ଯ୍ୟାନୁଷ୍ଠାନ ଟାସ୍କ ଫୋର୍ସର ଚାପ ନୁହେଁ ବରଂ ଏଇ ସପ୍ତାହ ଶେଷ ବେଳକୁ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନ ଆମେରିକା ଗସ୍ତ କରୁଥିବାରୁ ସନ୍ତ୍ରାସବାଦ ବିରୁଦ୍ଧରେ ପାକିସ୍ତାନ କାର୍ଯ୍ୟାନୁଷ୍ଠାନ ଗ୍ରହଣ କରୁଛି ବୋଲି ଦେଖାଇବା ପାଇଁ କିଛି ନା କିଛି କାର୍ଯ୍ୟ କରିବାର ବାହାନା କରିବ। ହାଫିଜ ସଇଦ ଏବଂ ଏହାର ସଂଗଠନ ପାକିସ୍ତାନରେ ଏତେ ସୁଦୃଢ ଯେ ତା ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାକିସ୍ତାନ ପାଇଁ ଏତେ ସହଜ ହେବନି।

ମୂଳ ଲେଖା – ଅଶୋକ ବେହୁରିଆ

ଭାବାନୁବାଦ- ରାମଚଂଦ୍ର ନାଥ