ବ୍ରିକ୍ସ ବୈଦେଶିକ ମନ୍ତ୍ରିବୃନ୍ଦଙ୍କ ବୈଠକ

ବିଶ୍ଵ ଇତିହାସ ବର୍ତ୍ତମାନ ପରିପ୍ରେକ୍ଷୀରେ ତୀବ୍ର ଗତିରେ ପଟ ପରିବର୍ତ୍ତନ କରୁଛି | କ୍ଷମତା ପରିବର୍ତ୍ତନ ପଶ୍ଚିମରୁ ପୂର୍ବ ଓ ଉତ୍ତର ରୁ ଦକ୍ଷିଣ ଆଡକୁ ଗତି କରୁଛି | ଏହି ପରିବର୍ତ୍ତନ କୌଣସି ପରିବର୍ତ୍ତନ ତୁଳନାରେ ଅତ୍ୟନ୍ତ କ୍ଷିପ୍ର ଓ ଏହା ଏକ ଐତିହାସିକ ପରିବର୍ତ୍ତନ ଅଟେ | ଆଧୁନିକ ଯୁଗରେ ପ୍ରଥମ ଥର ଲାଗି ବିଭବ ଓ ବିଶ୍ଵ ଜନସଂଖ୍ୟା ସମାନ ସ୍ଥାନରେ କେନ୍ଦ୍ରୀଭୂତ ହୋଇଛି | ଏହା ହେଉଛି ସେହି ପରିବର୍ତ୍ତନ ଯଦ୍ୱାରା ବ୍ରିକ୍ସ ର ଆବିର୍ଭାବ ହୋଇଥିଲା | ବିଶ୍ଵ ଦ୍ରୁତ ଗତିରେ ପରିବର୍ତ୍ତନ ଆଡକୁ ମୁହାଁଊ ଥିବାରୁ ଏଥିରେ ଜଡିତ ସବୁ ପକ୍ଷ ମଧ୍ୟ ଏହିସ୍ଥିତି ଅନୁଯାୟୀ ଅଗ୍ରସର ହେଉଛନ୍ତି | ବ୍ରିକ୍ସ ଉପରେ ଏବେ ସମଗ୍ର ଦୁନିଆର ନଜର ରହିଛି |

ତେବେ ଏହି ଗୋଷ୍ଠୀ ଅନ୍ୟ ଗୋଷ୍ଠୀ ଭଳି ନୁହେଁ | ଏଥିରେ ଏକ ପୂର୍ବତନ ମହାଶକ୍ତି, ଭବିଷ୍ୟତର ମହାଶକ୍ତି ଓ ଏସିଆ, ଆଫ୍ରିକା ତଥା ଲାଟିନ ଆମେରିକାରେ ଉଭା ହୋଇଥିବା ମହାଶକ୍ତି ମାନେ ସାମିଲ ଅଛନ୍ତି | ବ୍ରିକ୍ସ ଏକ ବିକଳ୍ପ ତଥା ପ୍ରତିଯୋଗିତାମୂଳକ ପରିବେଶ ପ୍ରଦାନ କରିଛି | ସବୁଠୁ ମହତ୍ବପୂର୍ଣ୍ଣ କଥା ହେଲା ଏହା ବୈଶ୍ଵିକ ଅର୍ଥବ୍ୟବସ୍ଥା ର ସ୍ଥିରତା ଓ ସମୃଦ୍ଧି ପାଇଁ ଅତ୍ୟନ୍ତ ଗୁରୁତ୍ଵପୂର୍ଣ୍ଣ ଓ ଉଭା ହେଉଥିବା ଶକ୍ତି ମାନଙ୍କ କ୍ଷେତ୍ରରେ ମଧ୍ୟ ମୁଖ ଭୂମିକା ନିଭାଇଛି | ବ୍ରିକ୍ସ ଆନ୍ତର୍ଜାତୀୟ ସମ୍ପର୍କରେ ଏକ ନୂତନ କ୍ଷେତ୍ର ଅଟେ | ଏହାର ଜି7 ତୁଳନାରେ ଅଧିକ ପ୍ରତିନିଧି ଅଛନ୍ତି | ବ୍ରିକ୍ସ ଏହାର ଦ୍ଵିତୀୟ ଦଶନ୍ଧିର ଯାତ୍ରା ଆରମ୍ଭ କରିଛି |

ଗତ ସପ୍ତାହରେ ରିଓ ଦେ ଜାନେରିଓ ରେ ଅନୁଷ୍ଠିତ ବ୍ରିକ୍ସ ବୈଦେଶିକ ମନ୍ତ୍ରୀ ସ୍ତରୀୟ ବୈଠକରେ ବହୁପକ୍ଷବାଦ ପାଇଁ ସର୍ବସମ୍ମତିରେ ଓ ଏକତରଫା ସମର୍ଥନ ଓ ଆନ୍ତର୍ଜାତୀୟ ବ୍ୟାପାରରେ ଜାତିସଂଘର ମୁଖ୍ୟ ଭୂମିକାକୁ ଏହି ବୈଠକର ଦୃଷ୍ଟିକୋଣରେ ପ୍ରଦର୍ଶିତ କରାଯାଇଛି |କେତୋଟି ପଶ୍ଚିମ ଦେଶରେ ସାଧାରଣତଃ କରାଯାଉଥିବା ବୈଶ୍ଵିକ ଶାସନ ସଂସ୍ଥାନ କୁ ବିଫଳ କରେଇବା ପରିବର୍ତ୍ତେ ବ୍ରିକ୍ସ, ଜାତିସଂଘ, ବିଶ୍ଵ ବାଣିଜ୍ୟ ସଂଗଠନ ଓ ଆନ୍ତର୍ଜାତୀୟ ମୁଦ୍ରା ପାଣ୍ଠି ଭଳି ପ୍ରତିଷ୍ଠାନର ସଂସ୍କାର ପାଇଁ ସ୍ପଷ୍ଟ ଆଭିମୁଖ୍ଯ ରଖିଛି | ବିଶ୍ଵ ବାଣିଜ୍ୟ ସଂଗଠନକୁ ଆହୁରି ମଜବୁତ କରିବା ଲାଗି ବିଭିନ୍ନ ଉପାୟ ନେଇ ସଦସ୍ୟ ରାଷ୍ଟ୍ର ମାନଙ୍କ ମଧ୍ୟରେ ବ୍ୟାପକ ଆଲୋଚନା ହୋଇଛି | ମନ୍ତ୍ରୀଗଣ ଜାତିସଂଘକୁ ଏହାର ନିୟମାବଳୀ ଲାଗୁ କରିବାରେ ଅଧିକ ଫଳପ୍ରଦ ଓ ଦକ୍ଷତାପୂର୍ଣ୍ଣ କରିବା ପାଇଁ ନିରନ୍ତର ପ୍ରୟାସର ମହତ୍ବକୁ ପ୍ରାଧାନ୍ୟ ଦେଇଛନ୍ତି |

ବୈଦେଶିକ ମନ୍ତ୍ରୀ ମାନେ ଏହି ବୈଠକରେ ଜାତିସଂଘର ତତ୍ତ୍ଵାବଧାନରେ ସନ୍ତ୍ରାସବାଦ ବିରୁଦ୍ଧରେ ସଂଗ୍ରାମ ଲାଗି ଆନ୍ତର୍ଜାତୀୟ ଆଇନ ଅନ୍ତର୍ଗତ କଠୋର କାର୍ଯ୍ୟାନୁଷ୍ଠାନ ଗ୍ରହଣ ଲାଗି ଆହ୍ଵାନ ଜଣାଇଛନ୍ତି | ଭାରତ ଆନ୍ତର୍ଜାତୀୟ ଓ ଆଞ୍ଚଳିକ ଆତଙ୍କବାଦ ଦ୍ଵାରା ସୃଷ୍ଟ ବିପଦ ବିଷୟରେ ସଦା ସର୍ବଦା ସ୍ଵର ଉତ୍ତୋଳନ କରିଆସୁଛି | ଭାରତ ଭଳି କୌଣସି ଦେଶ ବୋଧେ ବିଦେଶୀ ଆତଙ୍କବାଦର ଶିକାର ହୋଇନାହିଁ | ନୂଆଦିଲ୍ଲୀ ଏପରି ସମସ୍ୟାର ମୁକାବିଲା କରିବା ଲାଗି ଏକ ପାଞ୍ଚ ସୂତ୍ରୀ ବୈଶ୍ଵିକ ରଣନୀତି ପ୍ରସ୍ତୁତ କରିଛି | ସମୟାନୁଯାୟୀ ଓ କାର୍ଯ୍ୟାନୁଷ୍ଠାନ ଯୋଗ୍ୟ ଗୁଇନ୍ଦା ସୂଚନା ଆଦାନ ପ୍ରଦାନ କରିବା, ବେସରକାରୀ କ୍ଷେତ୍ରର ସହଯୋଗରେ ଆଧୁନିକ ଯୋଗାଯୋଗର ଅପବ୍ୟବହାରକୁ ରୋକିବା, ସୀମା ନିୟନ୍ତ୍ରଣର ସୁଧାର ଲାଗି କ୍ଷମତା ବିକାଶ, ସୀମାପାର ଯାତ୍ରୀ ମାନଙ୍କ ଯାତାୟାତ ସଙ୍କ୍ରାନ୍ତୀୟ ସୂଚନା ଆଦାନ ପ୍ରଦାନ କରିବା ଓ ଆନ୍ତର୍ଜାତୀୟ ସନ୍ତ୍ରାସବାଦ ବିରୁଦ୍ଧରେ ସଂଗ୍ରାମ ଲାଗି ସନ୍ତ୍ରାସବାଦ-ବିରୋଧୀ କେନ୍ଦ୍ରର ପ୍ରତିଷ୍ଠା ଲାଗି ଏହି ରଣନୀତି ପ୍ରସ୍ତୁତ କରାଯାଇଛି |

ମନ୍ତ୍ରୀମାନେ ସନ୍ତ୍ରାସବାଦୀ ଆକ୍ରମଣର ଭର୍ସନା କରିବା ସହ ସବୁ ପ୍ରକାରର ଆତଙ୍କବାଦର ତୀବ୍ର ନିନ୍ଦା କରିଛନ୍ତି | ସନ୍ତ୍ରାସବାଦ ନିରୋଧୀ ସଙ୍କ୍ରାନ୍ତୀୟ ବ୍ରିକ୍ସ କାର୍ଯ୍ୟକାରୀ ଗୋଷ୍ଠୀ ଜରିଆରେ ସନ୍ତ୍ରାସବାଦର ମୁକାବିଲା କରିବା ଲାଗି ବ୍ରିକ୍ସ ସହଯୋଗର ପ୍ରଗତି ନେଇ ମଧ୍ୟ ନେତୃବୃନ୍ଦ ଆନନ୍ଦ ପ୍ରକଟ କରିଛନ୍ତି | ରିଓ ବୈଠକରେ ଭାରତର ପ୍ରତିନିଧିତ୍ଵ କରିଥିବା ସଡକ,ପରିବହନ ଓ ରାଜପଥ ରାଷ୍ଟ୍ର ମନ୍ତ୍ରୀ ଜେନେରାଲ ଭି. କେ ସିଂ, ପଳାତକ ଆର୍ଥିକ ଅପରାଧି ମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ଓ ସମ୍ପତ୍ତି ଆଦାୟ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଙ୍କ 9ସୂତ୍ରୀ କାର୍ଯ୍ୟସୂଚୀ ବିଷୟ ଉଲ୍ଲେଖ କରିଥିଲେ |

ବ୍ରିକ୍ସ ବୈଦେଶିକ ମନ୍ତ୍ରୀ ମାନେ ମଧ୍ୟ ପୂର୍ବ ଓ ଉତ୍ତର ଆଫ୍ରିକାରେ ଜାରି ରହିଥିବା ତିକ୍ତତା ପରିସ୍ଥିତି ନେଇ ଉଦବେଗ ପ୍ରକାଶ କରିଥିଲେ ଯାହାର ଆଞ୍ଚଳିକ ଓ ଆନ୍ତର୍ଜାତୀୟ ପରିସ୍ଥିତି ଉପରେ କୁପ୍ରଭାବ ପଡୁଛି | ନୂଆଦିଲ୍ଲୀର ଉଦବେଗକୁ ଦୃଷ୍ଟିରେ ରଖି ମନ୍ତ୍ରୀଗଣ “ଆଫଗାନ -ନେତୃତ୍ଵ, ଆଫଗାନ-ପରିଚାଳିତ “ ଶାନ୍ତି ଓ ପୁନଃବ୍ୟବସ୍ଥା ପ୍ରକ୍ରିୟା ଉପରେ ଜୋର ଦେଇଥିଲେ | ଏହାଦ୍ବାରା ଏକ ଶାନ୍ତିପୂର୍ଣ୍ଣ, ସୁରକ୍ଷିତ, ଐକ୍ୟବଦ୍ଧ, ସ୍ଥିର ଓ ସମଷ୍ଟିଗତ ଆଫଗାନିସ୍ତାନ ନିଶ୍ଚିତ ହୋଇପାରିବ ଓ ଏହା ନିଜ ପଡୋଶୀ ରାଷ୍ଟ୍ର ଗୁଡିକ ସହ ସଦ୍ଭାବ ସ୍ଥାପନ କରିପାରିବ ବୋଲି ମନ୍ତ୍ରୀଗଣ ମତ ବ୍ୟକ୍ତ କରିଥିଲେ ||

ତେବେ ଏହି ବୈଠକ ସମୟରେ ଭେନେଜୁଏଲା ଉପରେ ଆଲୋଚନା ବେଳେ ବ୍ରିକ୍ସ ସଦସ୍ୟ ରାଷ୍ଟ୍ର ମାନଙ୍କ ମଧ୍ୟରେ ଭିନ୍ନ ଭିନ୍ନ ମତ ରହିଥିବାର ପରିଦୃଶ୍ୟ ହୋଇଥିଲା |ରୁଷ ବାହାରୁ ହସ୍ତକ୍ଷେପ ପ୍ରତି ନିଜର ଆପତ୍ତି ଦୋହୋରାଇଥିବା ବେଳେ ବ୍ରାଜିଲ ଭେନେଜୁଏଲା ସଙ୍କଟର ଅବସାନ ଘଟାଇବାଲାଗି ବ୍ରିକ୍ସକୁ ନିବେଦନ କରିଥିଲା |ତେବେ ଭେନେଜୁଏଲାରେ ଜାରିଥିବା ରାଜନୈତିକ ଅଚଳାବସ୍ଥାକୁ ଶାନ୍ତିପୂର୍ଣ୍ଣ ଭାବେ ସମାଧାନ କରିବା ଲାଗି ସର୍ବସହମତି ପ୍ରକାଶ ପାଇଥିଲା |

ବ୍ରାଜିଲ ର ନୂଆଁ ରାଷ୍ଟ୍ରପତି ଚଳିତ ବର୍ଷ ପହିଲାରେ ପଦଦାୟିତ୍ଵ ଗ୍ରହଣ କରିବା ବେଳେ ତାଙ୍କ ବିଷୟରେ ଅନିଶ୍ଚିତତା ଲାଗିରହିଥିଲା | ବହୁଜଣ ଆଶା କରୁଛନ୍ତି ଯେ ରାଷ୍ଟ୍ରପତି ବୋଲ୍ସୋନାରୋ ଆନ୍ତର୍ଜାତୀୟ ସ୍ତରରେ ବିକାଶଶୀଳ ଦେଶ ଠାରୁ ଦୂରରେ ରହି ପଶ୍ଚିମ ନେତା ବିଶେଷକରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ ଙ୍କ ନୀତି ଗୁଡିକୁ ଅନୁକରଣ କରିବେ | କିନ୍ତୁ ସେ ବ୍ରିକ୍ସ ଓ ଏହାର କାର୍ଯ୍ୟସୂଚୀକୁ ଅନ୍ତର୍ମନରୁ ସମର୍ଥନ କରିଛନ୍ତି | ରାଷ୍ଟ୍ରପତି ବୋଲ୍ସୋନାରୋଙ୍କ ନୀତିରେ ଶକ୍ତି, ଶାନ୍ତି, ନିରାପତ୍ତା, ଅଭିନବ ଓ ଆର୍ଥିକ ବିକାଶ ପ୍ରମୁଖ ଭାବେ ବ୍ରିକ୍ସ କାର୍ଯ୍ୟସୂଚୀ ସହ ଉତ୍ତମ ତାଳମେଳ ରଖିଛି | ନ୍ୟୁୟର୍କରେ ସେପ୍ଟେମ୍ବର ମାସରେ ଜାତିସଂଘ ସାଧାରଣ ସଭା ର 74 ତମ ଅଧିବେଶନ ସମୟରେ ବ୍ରିକ୍ସ ବୈଦେଶିକ ମନ୍ତ୍ରୀ ମାନଙ୍କ ପରବର୍ତ୍ତୀ ବୈଠକ ଅନୁଷ୍ଠିତ ହେବ |

ମୂଳଲେଖା : ଆଶ ନାରାୟଣ ରାୟ, ନିର୍ଦ୍ଦେଶକ, ସାମାଜିକ ବିଜ୍ଞାନ ପ୍ରତିଷ୍ଠାନ, ଦିଲ୍ଲୀ

ଅନୁବାଦ : ରୀତା ଯୋଶୀ