ଉତ୍ତର କୋରିଆର କ୍ଷେପଣାସ୍ତ୍ର ପରୀକ୍ଷଣ ପୁଣି ଉତ୍ତେଜନା ବୃଦ୍ଧି କରାଇଛି

କୋରିଆ ଉପଦ୍ବୀପରେ ଶାନ୍ତି ପ୍ରତିଷ୍ଠାକୁ ଆଉ ଏକ ଶକ୍ତ ଧକ୍କା ଦେଇ ଉତ୍ତର କୋରିଆ ଗତ ସପ୍ତାହରେ ଦୁଇଟି ବାଲିଷ୍ଟିକ କ୍ଷେପଣାସ୍ତ୍ର ପରୀକ୍ଷଣ କରିଛି | ଉତ୍ତର କୋରିଆ ଅଧ୍ୟକ୍ଷ କିମ ଜଙ୍ଗ-ଉନ ଏବଂ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ମଧ୍ୟରେ ଉଭୟ କୋରିଆର ସୈନ୍ୟ ବିହୀନ ଅଞ୍ଚଳରେ ଅନୁଷ୍ଠିତ ବୈଠକର ମାତ୍ର ମାସକ ମଧ୍ୟରେ ଏହି କ୍ଷେପଣାସ୍ତ୍ର ପରୀକ୍ଷଣ କରାଯାଇଛି | ଉଭୟ ନେତା ସେମାନଙ୍କ ମଧ୍ୟରେ ଅନୁଷ୍ଠିତ ବୈଠକରେ ବିଭିନ୍ନ ପ୍ରସଙ୍ଗ ଗୁଡିକର ଏକ ବ୍ୟାପକ ସମାଧାନ ଉପରେ କାର୍ଯ୍ୟରତ ହେବାକୁ ପ୍ରତିଶ୍ରୁତି ଦେଇଥିଲେ | 

ଉତ୍ତର କୋରିଆର ପୂର୍ବ ଉପକୂଳସ୍ଥିତ ୱନସାନରୁ ଦୁଇଟି କ୍ଷେପଣାସ୍ତ୍ର ପରୀକ୍ଷଣ କରାଯାଇଛି | ଉଭୟ ଉତ୍ତର କୋରିଆ ଏବଂ ଦକ୍ଷିଣ କୋରିଆର ସମ୍ବନ୍ଧୀୟ ସଂସ୍ଥା ଗୁଡିକ ଏହି କ୍ଷେପଣାସ୍ତ୍ର ପରୀକ୍ଷଣ ହୋଇଥିବା ସୁନିଶ୍ଚିତ କରାଇଛନ୍ତି | ଏହା ଅଧିକ ଗତିଶୀଳ, ସହଜରେ ବହନ କରାଯାଇପାରୁଥିବା ଏବଂ ଲୁଚାଯାଇପାରୁଥିବା ତଥା ଏହାକୁ ଖୋଜିବା ଅଧିକ କଷ୍ଟସାଧ୍ୟ ଥିବା ବିଷୟ ସେହି ସଂସ୍ଥା ଗୁଡିକ କହିଛନ୍ତି | ଏହି କ୍ଷେପଣାସ୍ତ୍ର ପରୀକ୍ଷଣ ଦ୍ଵାରା ଏହାର ନିରାପତ୍ତା ସଙ୍କ୍ରାନ୍ତିୟ ପ୍ରଭାବ ଆମେରିକା ଅପେକ୍ଷା କୋରିଆ ଉପଦ୍ଵୀପ ଉପରେ ଅଧିକ ପଡିବାର ବିପଦ ରହିଛି | 

କ୍ଷେପଣାସ୍ତ୍ର ପରୀକ୍ଷଣ ପରେ ଜାରି ଏକ ବିବୃତୀରେ ଉତ୍ତର କୋରିଆ ନେତା କିମ ଜଙ୍ଗ-ଉନ କହିଛନ୍ତି ଉତ୍ତର କୋରିଆର ନିରାପତ୍ତା ପ୍ରତି ବିପଦ ଥିବା ଦୃଷ୍ଟିରୁ ଏହାକୁ ପ୍ରତିହତ କରିବା ଉଦ୍ଦେଶ୍ୟରେ ଏହି କ୍ଷେପଣାସ୍ତ୍ର ପରୀକ୍ଷଣ କରାଯାଇଛି | ସେ ଦକ୍ଷିଣ କୋରିଆ ଉପରେ ଦୋଷାରୋପ କରି ଏହାର ପ୍ରରୋଚନାରୁ ଏହି ପଦକ୍ଷେପ ନିଆଯାଇଥିବା ମତବ୍ୟକ୍ତ କରିଛନ୍ତି | ଉଭୟ ଦକ୍ଷିଣ କୋରିଆ ଏବଂ ଆମେରିକା ସେମାନଙ୍କ ମଧ୍ୟରେ ଅନେକ ବର୍ଷରୁ ଜାରି ରହିଥିବା ମିଳିତ ସମରାଭ୍ୟାସ ପରିଚାଳନାକୁ ଜାରି ରଖିବାକୁ ଦୃଢ ରହିଛନ୍ତି | ତେବେ ଆମେରିକା ସହ ଯେଭଳି କୌଣସି ମତଭେଦ ଅଧିକ ନହୁଏ, ତାହା ଦୃଷ୍ଟିରେ ରଖି କିମ ଜଙ୍ଗ-ଉନ, ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ପ୍ରତି କୌଣସି ମତବ୍ୟକ୍ତ କରିନାହାନ୍ତି | 

ଉତ୍ତର କୋରିଆ ଏହାର ଦୀର୍ଘ ସମୟର ପରମାଣୁ କାର୍ଯ୍ୟକ୍ରମ ଦକ୍ଷତା ପ୍ରଦର୍ଶନ ଜାରି ରଖିଥିବାବେଳେ, ସମ୍ପ୍ରତି କରିଥିବା କ୍ଷେପଣାସ୍ତ୍ର ପରୀକ୍ଷଣ, ଦକ୍ଷିଣ କୋରିଆ ଏବଂ ଆମେରିକା ମଧ୍ୟରେ ଅନୁଷ୍ଠିତ ହେବାକୁ ଥିବା ବାର୍ଷିକ ମିଳିତ ସମରାଭ୍ୟାସକୁ ଏକ ସଙ୍କେତ ଦେବା ଉଦ୍ଦେଶ୍ୟରେ କରିଥିବା ଅନୁମେୟ | ଏତଦ ବ୍ୟତୀତ, ଦକ୍ଷିଣ କୋରିଆ ଦ୍ୱାରା 40 ଟି F-35 A ଜେଟ କ୍ରୟ କରାଯାଇଥିବା ମଧ୍ୟ ଉତ୍ତର କୋରିଆକୁ କ୍ଷେପଣାସ୍ତ୍ର ପରୀକ୍ଷଣ କରାଇବାରେ ପ୍ରରୋଚନା କରିଥିବା ମନେ କରାଯାଉଛି |

ଦକ୍ଷିଣ କୋରିଆ ରାଷ୍ଟ୍ରପତି ମୁନ ଜାଏ-ଇନ ଏହି କ୍ଷେପଣାସ୍ତ୍ର ପରୀକ୍ଷଣର ତୀବ୍ର ସମାଲୋଚନା କରିଛନ୍ତି | ଉତ୍ତର କୋରିଆ ଜାତିସଂଘ ପ୍ରସ୍ତାବର ଲଂଘନ କରିଥିବା ସେ ଦୋଷାରୋପ କରିଛନ୍ତି | ଜାତିସଂଘ ପ୍ରସ୍ତାବ ଅନୁଯାୟୀ ପ୍ୟଙ୍ଗଗ୍ୟାଙ୍ଗକୁ ବାଲିଷ୍ଟିକ କ୍ଷେପଣାସ୍ତ୍ର ଜ୍ଞାନକୌଶଳ ବିକଶିତ କରିବା ଉପରେ ପ୍ରତିବନ୍ଧକ ଲଗାଯାଇଛି ଓ ଉତ୍ତର କୋରିଆ ଏହାର ଲଂଘନ କରିଥିବା ସେ ଅଭିଯୋଗ କରିଛନ୍ତି | 

ଉତ୍ତର କୋରିଆର କ୍ଷେପଣାସ୍ତ୍ର ପରୀକ୍ଷଣକୁ ନେଇ ପ୍ରତିକ୍ରିୟା ପ୍ରକାଶ ଉପରେ ଆମେରିକା ହାଲୁକା ରହିଛି | ଆମେରିକା କୌଣସି କଠୋର ପ୍ରତିକ୍ରିୟା ପ୍ରକାଶ କରିନାହିଁ | ଅଳ୍ପ ଦୂରଗାମୀ କ୍ଷେପଣାସ୍ତ୍ର ପରୀକ୍ଷଣ ଉପରେ ଆମେରିକା ସରକାରଙ୍କର ପ୍ରତିକ୍ରିୟା ସାମାନ୍ୟ ଥିବା ଜଣାପଡିଛି | ତେବେ ଦୂରଗାମୀ କ୍ଷେପଣାସ୍ତ୍ର ପରୀକ୍ଷଣ କିମ୍ବା ପରମାଣୁ ପରୀକ୍ଷଣ ଉପରେ ଆମେରିକା ସର୍ବଦା ଉତ୍ତର କୋରିଆ ଉପରେ କଠୋର ପ୍ରତିକ୍ରିୟା ପ୍ରକାଶ କରିଆସିଛି |

ମେ ମାସରେ କରାଯାଇଥିବା ପରୀକ୍ଷଣ ଉପରେ ମଧ୍ୟ ଆମେରିକା ଏବଂ ଦକ୍ଷିଣ କୋରିଆର ପ୍ରତିକ୍ରିୟା ସାମାନ୍ୟ ରହିଥିଲା | ତେବେ ଏଭଳି ଧରଣର ପରୀକ୍ଷଣ ଓ ପ୍ରରୋଚନାତ୍ମକ କାର୍ଯ୍ୟକଳାପ ଯଦି ଜାରି ରହେ ତେବେ ଏହା କୋରିଆ ଉପଦ୍ବୀପର ଶାନ୍ତି ଓ ସ୍ଥିରତା ଉପରେ ପ୍ରତିକୂଳ ପ୍ରଭାବ ପକାଇବ |

2019 ମସିହା ଫେବୃଆରୀ ମାସରେ ହାନୋଇ ଠାରେ ଟ୍ରମ୍ପ ଏବଂ କିମଙ୍କ ମଧ୍ୟରେ କଥାବାର୍ତ୍ତା ବିଫଳ ହେବା ସତ୍ତ୍ୱେ ପୁଣି ଜୁନ ମାସରେ ଉଭୟ ନେତାଙ୍କ ମଧ୍ୟରେ ବୈଠକ ଅନୁଷ୍ଠିତ ହୋଇଥିଲା | ତେବେ ଏହି କଥାବାର୍ତ୍ତାରୁ ମଧ୍ୟ କୌଣସି ସୁଫଳ ମିଳିନାହିଁ | ଉତ୍ତର କୋରିଆ କୌଣସି ଦୃଢ ସକାରାତ୍ମକ ଫଳାଫଳ ଦେବାରେ ବିଫଳ ହୋଇଛି ଏବଂ ଏପର୍ଯ୍ୟନ୍ତ ସକ୍ରିୟ ଭାବେ ଏହାର ସାମରିକ ଦକ୍ଷତା ବୃଦ୍ଧି କରିବାରେ ଲାଗିଛି | ଚୀନ ସହ ଉତ୍ତର କୋରିଆର ଘନିଷ୍ଠତା ବୃଦ୍ଧି ପାଉଥିବା ମଧ୍ୟ ଆଉ ଏକ ମହତ୍ତ୍ୱପୂର୍ଣ୍ଣ ପ୍ରସଙ୍ଗ ରହିଛି | 

ଶାନ୍ତି ପ୍ରକ୍ରିୟାରେ ବେଜିଙ୍ଗର ଅନୁପସ୍ଥିତି କୌଣସି ଦୀର୍ଘକାଳୀନ ପ୍ରଭାବ ପକାଇବ ନାହିଁ | ତେବେ ବର୍ତ୍ତମାନ ମୁହୂର୍ତ୍ତରେ ଚୀନ-ଆମେରିକା ଦ୍ଵିପକ୍ଷୀୟ ସମ୍ପର୍କରେ ଅବନ୍ନତି ଯୋଗୁଁ ଉତ୍ତର କୋରିଆକୁ ଏହାର ପରମାଣୁ ଦକ୍ଷତା ବୃଦ୍ଧି କରାଇବାରେ ରୋକାଯିବା କଷ୍ଟକର ବ୍ୟାପାର ହେବ | 

ଭାରତ, କୋରିଆ ଉପଦ୍ବୀପରେ ଶାନ୍ତି ଓ ସ୍ଥିରତା ଆଶା କରୁଛି | ଏହି ଲକ୍ଷ୍ୟକୁ ହାସଲ କରିବା ଦିଗରେ ସମସ୍ତ ସଂଲିଷ୍ଟ ପକ୍ଷଙ୍କୁ ମିଳିମିଶି କାମ କରିବା ଉଚିତ | 

ମୂଳ ଲେଖା : ଡକ୍ଟର ରାହୁଲ ମିଶ୍ର, ପୂର୍ବ ଏବଂ ଦକ୍ଷିଣ-ପୂର୍ବ ଏସିଆ ଉପରେ ସାମରିକ ବିଶ୍ଳେଷକ 

ଅନୁବାଦ : ଅନୀଲ କୁମାର ପଟ୍ଟନାୟକ