ମୌଳିକଢାଞ୍ଚାକୁ ପ୍ରାଧାନ୍ୟ ଦେଇଛି ବଜେଟ

ଅର୍ଥମନ୍ତ୍ରୀ ନିର୍ମଳା ସିଥାରମଣ ନରେନ୍ଦ୍ର ମୋଦୀ ନେତୃତ୍ଵାଧୀନ ସରକାରଙ୍କ ଦ୍ଵିତୀୟ କାର୍ଯ୍ୟକାଳର ପ୍ରଥମ ସାଧାରଣ ବଜେଟ ଉପସ୍ଥାପନ କରିଛନ୍ତି | ଆଗାମୀ ପାଞ୍ଚ ବର୍ଷ ଭିତରେ ଭାରତକୁ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବାକୁ ଅର୍ଥମନ୍ତ୍ରୀ ଦୃଢ ମତପୋଷଣ କରିଛନ୍ତି | ଏହି ବଜେଟରେ ମୌଳିକଢାଞ୍ଚାରେ ଆଗାମୀ ପାଞ୍ଚ ବର୍ଷ ମଧ୍ୟରେ 100 ଲକ୍ଷ କୋଟି ଟଙ୍କା ପୁଞ୍ଜି ନିବେଶ ଲାଗି ଅର୍ଥମନ୍ତ୍ରୀ ପ୍ରତିବଦ୍ଧତା ଦୋହୋରାଇଛନ୍ତି | ସଡକ,ଗ୍ଯାସ,ଜଳ ତଥା ବିମାନବନ୍ଦର ଗ୍ରୀଡର ପରିକଳ୍ପନା କରିବା ନେଇ ଏକ ରାଷ୍ଟ୍ର ଓ ଏକ ଗ୍ରୀଡ ବ୍ୟବସ୍ଥା ଉପରେ ବଜେଟରେ ପ୍ରାଧାନ୍ୟ ଦିଆଯାଇଛି ଯାହାକି ଅର୍ଥନୀତିର ରୂପାନ୍ତରଣ କରିବାରେ ସହାୟକ ହେବ |

ଭାରତର ପ୍ରଥମ ପୂର୍ଣ୍ଣ କାଳୀନ ମହିଳା ଅର୍ଥମନ୍ତ୍ରୀ ନିର୍ମଳା ସିଥାରମଣଙ୍କ ଦ୍ଵାରା ଉପସ୍ଥାପିତ ପ୍ରଥମ ବଜେଟରେ ମୌଳିକଢାଞ୍ଚା କ୍ଷେତ୍ରରେ ବ୍ୟାପକ ନିବେଶ ଲାଗି ପ୍ରସ୍ତାବ ରହିଛି | ବାସ୍ତବରେ ନରେନ୍ଦ୍ର ମୋଦୀ ନେତୃତ୍ଵାଧୀନ କେନ୍ଦ୍ରସରକାରଙ୍କ ପ୍ରଥମ କାର୍ଯ୍ୟକାଳ ସମୟରେ ମଧ୍ୟ ମୌଳିକଢାଞ୍ଚାକୁ ସର୍ବୋଚ୍ଚ ପ୍ରାଥମିକତା ଦିଆଯାଇଥିଲା | ତାଙ୍କ କାର୍ଯ୍ୟକାଳ ସମୟରେ ସଡକ, ବନ୍ଦର ଓ ରେଳବାଇ କ୍ଷେତ୍ରରେ ଅନେକ ସମ୍ପ୍ରସାରଣ କରାଯାଇଥିଲା | ଏଥିସହିତ ସରକାର ଭିତ୍ତିଭୂମି କ୍ଷେତ୍ରରେ ଦେଖାଦେଇଥିବା ଅନେକ ସମସ୍ୟାର ଦୂରୀକରଣ କରିଥିଲେ ଓ ସରକାର ପଡିରହିଥିବା ପ୍ରକଳ୍ପ ଗୁଡିକୁ କାର୍ଯ୍ୟକ୍ଷମ କରିବା ଲାଗି ନିଜ ହାତକୁ ନେଇଥିଲେ | ବର୍ତ୍ତମାନ ମୌଳିକଢାଞ୍ଚା କ୍ଷେତ୍ର ଏକ ଉତ୍ତମ ସ୍ଥିତିରେ ପହଞ୍ଚିଥିବା ବେଳେ ଏହାକୁ ଆହୁରି ଆଗକୁ ବଢାଇବା ଲାଗି ସରକାର ଲକ୍ଷ ରଖିଛନ୍ତି |

ବଜେଟରେ 2018 ଓ 2030 ମଧ୍ୟରେ ରେଳବାଇ କ୍ଷେତ୍ରରେ 50 ଲକ୍ଷ କୋଟି ଟଙ୍କା ନିବେଶ ଲାଗି ପ୍ରସ୍ତାବ ରହିଛି | ଏହି ପଦକ୍ଷେପ ପ୍ରଶଂସନୀୟ କାରଣ ରେଳବାଇ କେବଳ ଏକ ଜାତୀୟ ପରିବାହକ ନୁହେଁ ବରଂ ଏହା ହେଉଛି ଭାରତର ଜୀବନରେଖା | ଏହା ଅତ୍ୟନ୍ତ ପରିତାପର ବିଷୟଯେ ଅତୀତରେ ସଡକ ସେକ୍ଟର ତୁଳନାରେ ରେଳବାଇ କ୍ଷେତ୍ରରେ ନିବେଶର ଅଭାବ ରହିଥିଲା | ରେଳବାଇ ସୁଲଭ ମୂଲ୍ୟ ଓ ପରିବେଶ ଅନୁକୂଳ ପରିବହନର ମାଧ୍ୟମ ହୋଇଥିବାରୁ ଏହି କ୍ଷେତ୍ରରେ ବ୍ୟାପକ ନିବେଶ କରିବାର ଆବଶ୍ୟକତା ଉପରେ ବଜେଟରେ ପ୍ରାଧାନ୍ୟ ଦିଆଯାଇଛି | ରେଳବାଇରେ ସରକାରୀ-ବେସରକାରୀ ଭାଗୀଦାରୀତାରେ ବାକି ରହିଥିବା ପ୍ରକଳ୍ପ ଗୁଡିକୁ ସମ୍ପୁର୍ଣ୍ଣ କରାଯାଇପାରିବ ବୋଲି ଅର୍ଥମନ୍ତ୍ରୀ ଦୃଢୋକ୍ତି ପ୍ରକାଶ କରିଥିଲେ |ଏହା ବ୍ୟତୀତ ବଜେଟରେ ଦ୍ରୁତ ସହରିକରଣକୁ ଦୃଷ୍ଟିରେ ରଖି ଦିଲ୍ଲୀ-ମେରଠ ଦ୍ରୁତ ଆଞ୍ଚଳିକ ପରିବହନ ବ୍ୟବସ୍ଥା ଲାଇନରେ ଉପ-ସହରୀ ରେଳବାଇ ଉପରେ ମଧ୍ୟ ଗୁରୁତ୍ଵ ଦିଆଯାଇଛି | ବର୍ତ୍ତମାନ ଚଳାଚଳ କରୁଥିବା 657 କିଲୋମିଟର ପର୍ଯ୍ୟନ୍ତ ମେଟ୍ରୋ ରେଳ ଯୋଗୁଁ ସହରାଞ୍ଚଳ ଲୋକ ମାନେ ଆଶ୍ବସ୍ତିକର ଅନୁଭବ କରୁଛନ୍ତି କାରଣ ଏହାଦ୍ବାରା ଲୋକମାନେ ବିନା ଟ୍ରାଫିକରେ ନିଜ ନିଜ କାର୍ଯ୍ୟସ୍ଥଳୀରେ ଅତି ସୁବିଧାରେ ପହଞ୍ଚିପାରୁଛନ୍ତି |

ବଜେଟରେ ଦୋହୋରାଯାଇଛି ଯେ ପୂର୍ବାଞ୍ଚଳ ଓ ପଶ୍ଚିମାଞ୍ଚଳ ଆଦି ଦ୍ଵେତ ମାଲ ପରିବହନ କୋରିଡର ର କାର୍ଯ୍ୟ ସମ୍ପୁର୍ଣ୍ଣ ହେଲେ ଯାତ୍ରୀ ସେବା ସମ୍ପ୍ରସାରଣ କ୍ଷମତା ବୃଦ୍ଧି ହେବ | ଅବଶ୍ୟ ଏହି ବଜେଟରେ ରେଳଷ୍ଟେସନ ଗୁଡିକୁ ଦ୍ରୁତ ଗତିରେ ଆଧୂନିକୀକରଣ କରିବା ଉପରେ ଜୋର ଦିଆଯାଇଛି | ସରକାର ଏକଥା ମଧ୍ୟ ସ୍ପଷ୍ଟ କରିଛନ୍ତି ଯେ ମୌଳିକଢାଞ୍ଚାର ବିକାଶ ପାଇଁ 100 ଲକ୍ଷ କୋଟି ଟଙ୍କାର ନିବେଶକୁ ଆକର୍ଷିତ କରିବା ଲାଗି ସବୁ ବିକଳ୍ପ ନେଇ ବିଚାର କରାଯିବ | କ୍ରେଡିଟ ଗ୍ୟାରେଣ୍ଟି ସମ୍ବର୍ଦ୍ଧନ ନିଗମ ଗଠନ କରିବା ଲାଗି ଏକ ଯୋଜନା ଏଦିଗରେ ଏକ ଉଚିତ ପଦକ୍ଷେପ ବୋଲି କୁହାଯାଇଛି |

ଶିଳ୍ପ କୋରିଡର, ଭାରତମାଳା, ସାଗରମାଳା, ଜଳ ମାର୍ଗ ବିକାଶ ଓ ଉଡାଣ ଯୋଜନା ଆଦି ଅଧିନରେ ଜାରି ରହିଥିବା ପ୍ରକଳ୍ପ ଗୁଡିକୁ ସମ୍ପୁର୍ଣ୍ଣ କରିବା ଉପରେ ଏହି ବଜେଟରେ ଗୁରୁତ୍ଵ ଦିଆଯାଇଛି | ବଜେଟରେ ସଡକ, ଜଳମାର୍ଗ, ରେଳବାଇ, ତାପଜ ଓ ବିମାନ ଚଳାଚଳ ପାଇଁ ଏକ ରାଷ୍ଟ୍ର, ଏକ ଗ୍ରୀଡ ନେଇ ସରକାରଙ୍କ ଆଭିମୁଖ୍ଯ ସ୍ପଷ୍ଟ କରାଯାଇଛି | ବାରାଣାଶୀ-ହଳଦିଆ ଜଳମାର୍ଗ କମ ମୂଲ୍ଯରେ ମାଳ ପରିବହନ ପାଇଁ ଭାରତର ସମୃଦ୍ଧ ନଦୀ ଗୁଡିକର ସମ୍ଭାବନା ପ୍ରଦର୍ଶିତ କରିଥାଏ | ସରକାର ଅର୍ଥବ୍ୟବସ୍ଥା କୁ ଆହୁରି ମଜବୁତ କରିବା ଲାଗି ସାଗରମାଳା ଭଳି ପ୍ରକଳ୍ପକୁ ଆହୁରି ଗୁରୁତ୍ଵ ଦେଉଛନ୍ତି | ନୂଆ ବନ୍ଦରର ବିକାଶ ଓ ପୁରୁଣା ବନ୍ଦର ଗୁଡିକର କ୍ଷମତା ର ସମ୍ପ୍ରସାରଣ ଯୋଗୁଁ ସାଗରମାଳା ପ୍ରକଳ୍ପ ଅତ୍ୟନ୍ତ ମହତ୍ବପୂର୍ଣ୍ଣ ହୋଇଯାଇଛି ଓ ଏହା ଦ୍ଵାରା ବିଶ୍ଵ ବ୍ୟାପାରରେ ଭାରତର ଭାଗୀଦାରୀତା ବୃଦ୍ଧି କରିବାରେ ସହାୟତା ମଧ୍ୟ ମିଳୁଛି |

ଏହା ବ୍ୟତୀତ ବଜେଟରେ ବିମାନର ରକ୍ଷଣାବେକ୍ଷଣ, ମରାମତି ଓ ପରୀକ୍ଷଣ କ୍ଷମତା ବୃଦ୍ଧି କରି ଭାରତକୁ ଏକ ବିମାନଚଳାଚଳ ର ପେଣ୍ଠସ୍ଥଳୀ ଭାବେ ପରିଣତ କରିବା ଲାଗି ଏକ ନୀତି ନିର୍ଦ୍ଦେଶ ଦେବା ଲାଗି ଦର୍ଶାଯାଇଛି | ଭାରତମାଳା ପରିଯୋଜନାର ଦ୍ଵିତୀୟ ପର୍ଯ୍ୟାୟରେ ଦେଶବ୍ୟାପୀ 48,000 କିଲୋମିଟର ସଡକ ନିର୍ମାଣ ଲାଗି ପରିକଳ୍ପନା କରାଯାଇଛି | ବଜେଟରେ ଭାରତମାଳା ପ୍ରକଳ୍ପର କାର୍ଯ୍ୟକାରୀ ପାଇଁ ଜମି ଅଧିଗ୍ରହଣ ଲାଗି ରାଜ୍ୟ ସରକାର ମାନଙ୍କୁ ସମର୍ଥନ ଦେବାର ପ୍ରସ୍ତାବ ରହିଛି | ଏହି ପଦକ୍ଷେପ ନିଶ୍ଚିତ ରୂପରେ ଜମି ଅଧିଗ୍ରହଣକୁ ତ୍ୱରାନ୍ୱିତ କରିବ | ବାସ୍ତବରେ ଏହା ଅତ୍ୟନ୍ତ ପ୍ରଶଂସନୀୟ ଯେ ଦେଶରେ 97 ଭାଗ ଲୋକ ଏବେ ସବୁ ଦିନିଆ ସଡକ ନେଟୱର୍କ ସହ ସଂଯୋଗ ହୋଇଛନ୍ତି | ପ୍ରଧାନମନ୍ତ୍ରୀ ସଡକ ଯୋଜନା ଦେଶର ଗ୍ରାମୀଣ ଭାଗକୁ ସହରୀ କେନ୍ଦ୍ରର ନିକଟତର କରିଦେଇଛି | ଏହି ବଜେଟରେ କୃଷକ ମାନଙ୍କୁ ଫାଇଦା ପହଞ୍ଚାଇବା ପାଇଁ ଗ୍ରାମୀଣ ସଡକ ଉପରେ ଧ୍ୟାନ କେନ୍ଦ୍ରିତ କରାଯାଇଛି | କାରଣ ଏହାଦ୍ବାରା ଚାଷୀ ମାନେ ଅତି ସୁବିଧାରେ ନିଜ କାରବାର ଲାଗି ଗମନା ଗମନ କରିପାରିବେ | ମୌଳିକଢାଞ୍ଚା ନିବେଶ ନିଶ୍ଚିତ ରୂପରେ ଏକ ଅର୍ଥବ୍ୟବସ୍ଥା ପାଇଁ ଅତ୍ୟନ୍ତ ଜରୁରୀ | ବଜେଟରେ 20 ଲକ୍ଷ କୋଟି ଟଙ୍କା ପ୍ରତି ବର୍ଷ ମୌଳିକଢାଞ୍ଚା ଉପରେ ଖର୍ଚ୍ଚ କରିବାକୁ ପ୍ରସ୍ତାବ ଦିଆଯାଇଛି ଯାହା ଏହି ବିଷୟକୁ ସଂକେତ ଦେଇଥାଏ ଯେ ଅର୍ଥବ୍ୟବସ୍ଥା ଦ୍ରୁତ ଗତିରେ ବିକାଶ ଦିଗରେ ଆଗେଇଛି |

ମୂଳ ଲେଖା : ମନୀଷ ଆନନ୍ଦ, ନ୍ୟୁ ଇଣ୍ଡିଆନ ଏକ୍ସପ୍ରେସ୍



ଅନୁବାଦ : ରୀତା ଯୋଶୀ