ଜି-7ରେ ପ୍ରଧାନମନ୍ତ୍ରୀ ମୋଦି ଏବଂ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ବୈଠକ

ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନଙ୍କ ଆମନ୍ତ୍ରଣ କ୍ରମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫ୍ରାନ୍ସର ବ୍ୟାରିଜ ଠାରେ ଅନୁଷ୍ଠିତ ଜି-7 ଶିଖର ସମ୍ମିଳନୀରେ ସ୍ବତନ୍ତ୍ର ଅତିଥି ଭାବେ ଯୋଗ ଦେଇଥିଲେ। ଭାରତ ଏବଂ ଫ୍ରାନ୍ସ ଇରାନ ପରମାଣୁ ରାଜିନାମା ଏବଂ ଜଳବାୟୁ ପରିବର୍ତ୍ତନ ପରି ଅନେକ ପ୍ରସଙ୍ଗରେ ଏକ ମତ ରଖିଥାନ୍ତି । ଜି-7 ସମ୍ମିଳନୀ କାଳରେ ପ୍ରଧାନମନ୍ତ୍ରୀ ମୋଦି ଏବଂ ଆମେରିକା ରାଷ୍ଟ୍ରପତି ଟ୍ରମ୍ପ ପରସ୍ପରକୁ ସାକ୍ଷାତ କରିଥିଲେ।

ବୈଠକ କାଳରେ ଉଭୟ ନେତା ବାଣିଜ୍ୟ ଏବଂ ଅର୍ଥନୀତି ପ୍ରସଙ୍ଗରେ ଆଲୋଚନା କରିଥିଲେ। ବିଶ୍ବ ବାଣିଜ୍ୟ ସଂଗଠନ ଦ୍ବାରା ପ୍ରଦତ୍ତ ବିକାଶଶୀଳ ଦେଶର ପରିଚୟ ନେଇ ଭାରତ ଏହାର ଲାଭ ଉଠାଉଛି ଏବଂ ଆମେରିକା ସାମଗ୍ରୀ ଉପରେ ଅଧିକ ଟିକସ ଲାଗୁ କରୁଛି ବୋଲି ଆମେରିକା ଅଭିଯୋଗ କରୁଥିବା ପରିପ୍ରେକ୍ଷୀରେ ଏହି ବୈଠକ ଗୁରୁତ୍ବ ବହନ କରୁଛି। ଏହି ଅଭିଯୋଗର ମୁକାବିଲା କରିବାକୁ ଯାଇ ଆମେରିକା ଭାରତୀୟ ଇସ୍ପାତ ଉପରେ ଶୁଳ୍କ ଲାଗୁ କରି ଭାରତୀୟ ସାମଗ୍ରୀ ପାଇଁ ପ୍ରାଧାନ୍ୟତାକୁ ହ୍ରାସ କରିଛି।

ଭାରତ ମଧ୍ୟ ଏହାର ଜବାବରେ 2019 ଜୁନରେ ଆମେରିକାରୁ ଆମଦାନି ହେଉଥିବା 28ଟି ସାମ୍ଗରୀ ଉପରେ ଅନୁରୂପ ଶୁଳ୍କ ଲାଗୁ କରିଛି। ଉଭୟ ଶ୍ରୀ ମୋଦି ଏବଂ ଶ୍ରୀ ଟ୍ରମ୍ପ କୌଶଳଗତ ସଂପର୍କକୁ ଅଧିକ ପରିବ୍ୟାପ୍ତ କରିବା ଉପରେ ମଧ୍ୟ ଆଲୋଚନା କରିଛନ୍ତି। ଯଦିଓ ଦ୍ବିପକ୍ଷୀୟ ସଂପର୍କ କ୍ଷେତ୍ରରେ ବାଣିଜ୍ୟ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥାଏ ତଥାପି ଦୁଇ ଦେଶ ମଧ୍ୟରେ ବଜାର ଅନୁମତି ଏବଂ ଶୁଳ୍କକୁ ନେଇ ଯେଉଁ ବିବାଦ ଦେଖାଦେଇଥିଲା ତାହା ଦ୍ବାରା କିଛିଟା ଆଶଙ୍କା ପ୍ରକାଶ ପାଇଥିଲା। ଏହି ପରିପ୍ରେକ୍ଷୀରେ ଦୁଇ ଦେଶ ମଧ୍ୟରେ ବିବାଦକୁ ହ୍ରାସ କରିବା ପାଇଁ ଭାରତ ଆମେରେକୀୟ ସାମଗ୍ରୀର ଆମଦାନୀକୁ ବୃଦ୍ଧି କରିବ ବୋଲି ପ୍ରଧାନମନ୍ତ୍ରୀ ମୋଦି କହିଥିଲେ।

ଶକ୍ତି କ୍ଷେତ୍ରକୁ ଅଧିକ ସହଯୋଗ ପାଇଁ ଚିହ୍ନଟ କରାଯାଇଛି। ଜାତିସଂଘ ସାଧାରଣ ପରିଷଦ ବୈଠକରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ସେପ୍ଟେମ୍ବରରେ ଆମେରିକା ଗସ୍ତରେ ଯିବେ ଏବଂ ସେ ସେଠାରୁ ହଟସନ ଯାଇ ଭାରତୀୟ ସଂପ୍ରଦାୟମାନଙ୍କ ସହ ସାକ୍ଷାତ ଆଲୋଚନା କରିବେ ଏବଂ ଶକ୍ତି କ୍ଷେତ୍ରର ଶିଳ୍ପପତିମାନଙ୍କ ସହ ବୈଠକ ମଧ୍ୟ କରିବେ। ଏହି ଆଲୋଚନାର ମୁଖ୍ୟ ଉଦ୍ଧେଶ୍ୟ ରହିଛି ଯେ କିପରି ଭାରତ ଆମେରିକାରୁ ଅଧିକ ତୈଳ ଆମଦାନୀ କରିପାରିବ ଏବଂ ଶକ୍ତି କ୍ଷେତ୍ରରେ ଆମେରିକାରେ କିପରି ଅଧିକ ନିବେଶ କରିପାରିବ। ରାଷ୍ଟ୍ରପତି ଟ୍ରମ୍ପଙ୍କ ସହ ସାକ୍ଷାତ ଆଲୋଚନା ପାଇଁ ପ୍ରଧାନମନ୍ତ୍ରୀ ମୋଦି ୱାସିଙ୍ଗଟନ ଡିସି ମଧ୍ୟ ଯିବେ। ସେଠାରେ ଦୁଇ ନେତା ଦ୍ବିପକ୍ଷୀୟ ସଂପର୍କକୁ ଆହୁରି ମଜବୁତ କରିବା ନେଇ ଆଲୋଚନା କରିବେ।

ଶ୍ରୀ ମୋଦି ଦ୍ବିତୀୟ ଥର ପ୍ରଧାନମନ୍ତ୍ରୀ ହେବା ପରେ ପ୍ରଥମ ଥର ବ୍ୟାରିଜ ବୈଠକ କାଳରେ ଶ୍ରୀ ଟ୍ରମ୍ପଙ୍କ ସହ ସାକ୍ଷାତ ହୋଇଛି। ଜମ୍ମୁ କଶ୍ମୀରରୁ ସ୍ବତନ୍ତ୍ର ଅଧିକାର ପ୍ରତ୍ୟାହାର କରାଯିବା ପରେ ଏହି ବୈଠକ ହୋଇଛି। ଭାରତର ଏହି ଆଭ୍ୟନ୍ତରିଣ ମାମଲାକୁ ନେଇ ପାକିସ୍ତାନ ଆନ୍ତର୍ଜାତୀୟକରଣ କରିବାକୁ ଚେଷ୍ଟା କରୁଛି। କିନ୍ତୁ ଏହା ଯେ ସଂପୂର୍ଣ୍ଣ ଭାବେ ଭାରତର ନିଜସ୍ବ ପ୍ରସଙ୍ଗ ଏହା ନୂଆଦିଲ୍ଲୀ ସ୍ପଷ୍ଟ କରିସାରିଛି।

ରାଷ୍ଟ୍ରପତି ଟ୍ରମ୍ପ କହିଥିଲେ ଯେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଜମ୍ମୁ କଶ୍ମୀରରେ ପରିସ୍ଥିତି ନିୟନ୍ତ୍ରଣାଧିନ ରହିଛି ଏବଂ ଦ୍ରୁତଗତିରେ ସ୍ବାଭାବିକ ଆଡକୁ ଗତି କରୁଛି। ଟ୍ରମ୍ପ କହିଥିଲେ ଯେ ଯଦି ଭାରତ ଏବଂ ପାକିସ୍ତାନ ପରସ୍ପର ଆଲୋଚନା କରିବେ ତେବେ ରହିଥିବା ବିବାଦ ସମାଧାନ କରିପାରିବେ। କଶ୍ମୀର ଏକ ଦ୍ବିପକ୍ଷୀୟ ପ୍ରସଙ୍ଗ କହି ଏଥିରେ ତୃତୀୟ ପକ୍ଷର କୌଣସି ହସ୍ତକ୍ଷେପର ଆବଶ୍ୟକତା ନାହିଁ ବୋଲି ପ୍ରଧାନମନ୍ତ୍ରୀ ସ୍ପଷ୍ଟ ଭାବେ କହିଛନ୍ତି। ଏହା ଆନ୍ତର୍ଜାତୀୟ ସମୁଦାୟକୁ ଭାରତର ସ୍ପଷ୍ଟ ଅଭିବ୍ୟକ୍ତି।

ଆମେରିକା କହିଛି ଯେ ପ୍ରଧାନମନ୍ତ୍ରୀ ମୋଦି ଏବଂ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ହୋଇଥିବା ଆଲୋଚନା ଭାରତ ପାକିସ୍ତାନ ମଧ୍ୟରେ ରହିଥିବା ଉତ୍ତେଜନାକୁ ହ୍ରସା କରିବାରେ ସହାୟକ ହେବ। ଜି-7 ସମ୍ମିଳନୀ କାଳରେ ଏହା ଥିଲା ଭାରତ ପାଇଁ ସବୁଠୁ ବଡ ସଫଳତା।

ଆଲେଖ୍ୟ: ସ୍ତୁତି ବାନାର୍ଜୀ

ଭାବାନୁବାଦ: ରାମଚଂଦ୍ର ନାଥ