ଏକୁଟିଆ ହେଇଗଲା ପାକିସ୍ତାନ

କଶ୍ମୀର ପ୍ରସଙ୍ଗକୁ ଆନ୍ତର୍ଜାତୀୟକରଣ କରିବାକୁ ପାକିସ୍ତାନର ପ୍ରୟାସ ଭଣ୍ତୁର ହୋଇଛି। ଏପରିକି ଏହାର ପରମ ବଂଧୁ କୁହାଯାଉଥିବା ଚୀନ ଓ ସାଉଦି ଆରବ ମଧ୍ୟ ଏହି ପ୍ରସଙ୍ଗକୁ ଏତେଟା ଗୁରୁତ୍ବ ଦେଇନାହାନ୍ତି। ଉଭୟ ଚୀନ ଏବଂ ସାଉଦି ଏହି ପ୍ରସଙ୍ଗରେ ଅଧିକ କିଛି କରିପାରିବେ ନାହିଁ ବୋଲି ନାସ୍ତି ବାଣୀ ଶୁଣାଇ ଦେଇଛନ୍ତି ବରଂ ଦୁଇଦେଶକୁ ଶାନ୍ତି ବଜାୟ ରଖିବାକୁ ପରାମର୍ଶ ଦେଇଛନ୍ତି।

ଭାରତ ଏହାର ସମ୍ବିଧାନର ଦାରା 370କୁ ଉଚ୍ଛେଦ କରିବା ଘୋଷଣା କରିବା ମାତ୍ରେ ପାକିସ୍ତାନର ସାମରିକ ଏବଂ ବେସାମରିକ କର୍ତ୍ତୁପକ୍ଷ ଅତ୍ୟଧିକ ପ୍ରତିକ୍ରିୟାଶୀଳ ହୋଇପଡିଲା। ଭାରତ ଏହାର ପୂର୍ବତନ ରାଜ୍ୟ ଜମ୍ମୁ କଶ୍ମୀରର ପୁନଃର୍ଗଠନ କରି ଏହାକୁ ଦୁଇଟି କେନ୍ଦ୍ରଶାସିତ ଅଞ୍ଚଳ, ଯଥା ଜମ୍ମୁ କଶ୍ମୀର ଏବଂ ଲଦାଖରେ ପରିଣତ କରିଛି। ଏହା ପାର୍ଲାମେଣ୍ଟର ସଂଖ୍ୟାଗରିଷ୍ଠ ସଦସ୍ୟମାନଙ୍କ ଅନୁମୋଦନରେ ହୋଇଛି ଏବଂ ଏହା ଦୁଇଟି ଅଞ୍ଚଳର ସାମଗ୍ରୀକ ବିକାଶକୁ ଧ୍ୟାନରେ ରଖି କରାଯାଇଛି। ଏହି ପଦକ୍ଷେପ ପାକିସ୍ତାନ ଦ୍ବାରା ପରିଚାଳିତ ସନ୍ତ୍ରାସବାଦକୁ ମଧ୍ୟ ରୋକିବାରେ ସହାୟକ ହେବ। ଯାହାକି ତିନି ଦଶନ୍ଧି ଧରି ପାକିସ୍ତାନ ଚଳାଇ ଆସୁଥିଲା। ପାକିସ୍ତାନର ଏହି ଆଚରଣରୁ ଗତ ତିନି ଦଶନ୍ଧିରେ ପ୍ରାୟ 42 ହଜାର ଭାରତୀୟଙ୍କ ଜୀବନ ଯାଇଛି। ଧାରା 370 ଉଚ୍ଛେଦ ବାରତର ଆଭ୍ୟନ୍ତରିଣ ମାମଲା ଏବଂ ଏଥିରେ ଅନ୍ୟ ଦେଶର କୌଣସି ହସ୍ତକ୍ଷେପ ହେବ ନାହିଁ ବୋଲି ପାକିସ୍ତାନ ଭଲ ଭାବରେ ଜାଣିଥିବାରୁ ଏହାକୁ ସେ ପିଡିତ ଭାବେ ଦର୍ଶାଇବାକୁ ଚାହୁଁଛି।

ଭାରତର ଏହି ପଦକ୍ଷେପ ଆଞ୍ଚଳିକ କ୍ଷେତ୍ରରେ ମଧ୍ୟ ପରିବର୍ତ୍ତନ ଆଣିଛି। ପାକିସ୍ତାନ ଏହା କେବେ ଚିନ୍ତା ବି କରିନଥିଲା। ପାକିସ୍ତାନ କାଶ୍ମୀର ପ୍ରସଙ୍ଗକୁ ଜୀବିତ ରଖିବାକୁ ଭାବି ସେଥିରୁ ନିଜ ଇଛା ମୁତାବକ ଲାଭ ଉଠେଇବାକୁ ଭାବିଥିଲା। କିନ୍ତୁ ପାକିସ୍ତାନ ନୂଆ ବିକଳ୍ପ ଖୋଜୁଛି। କଶ୍ମୀର ପ୍ରସଙ୍ଗକୁ ନେଇ ପାକିସ୍ତାନ ସର୍ବଦା ପରାଜିତ ହୋଇଆସିଛି। ଜମ୍ମୁ କଶ୍ମୀରର ବିଲୟ ଭାରତ ସହିତ ସଂପୂର୍ଣ୍ଣ ହୋଇସାରିଛି ଏହି ସତ୍ୟତାକୁ ସେ ହଜମ କରିପାରୁ ନଥିଲା ବରଂ ପାକିସ୍ତାନ କଶ୍ମୀରର 13000 କିଲୋମିଟର ଅଞ୍ଚଳକୁ ବେଆଇନ ଭାବେ ଦଖଲ କରିଛି ଯାହାକୁ ପାକିସ୍ତାନ ଛାଡିଦେବା ବୁଦ୍ଧିମାନର କାର୍ଯ୍ୟ ହେବ।

ଜାତିସଂଘ ନିରାପତ୍ତା ପରିଷଦର ପାଞ୍ଚଟି ସଦସ୍ୟ ରାଷ୍ଟ୍ର ଆମେରିକା, ଇଂଲଣ୍ତ, ଫ୍ରାନ୍ସ, ରୁଷ ଏବଂ ଚୀନ ଦାରା 370 ଉଚ୍ଛେଦ ଉପରେ କିଛି ସାହାର୍ଯ୍ୟ ପାକିସ୍ତାନକୁ କରିପାରିବେ ନାହିଁ ବୋଲି କହିସାରିଛନ୍ତି। ରୁଷ କହିଛି ଭାରତ ଏହାର ସମ୍ବିଧାନର ନିୟମ ଅନୁଯାୟୀ ଧାରା ଉଚ୍ଛେଦ କରିଛି ଏବଂ ଶିମଳା ରାଜିନାମା 1972 ଏବଂ ଲାହୋର ଘୋଷଣାନାମା 1999 ଅନୁଯାୟୀ ଭାରତ ଏବଂ ପାକିସ୍ତାନ ସେମାନଙ୍କର ବିବାଦର ସମାଧାନ କରିବା ଦରକାର ବୋଲି ଆଶା ପ୍ରକାଶ କରିଛି।

ଆମେରିକା ମଧ୍ୟ ଭାରତର 70 ଧାରା ଉଚ୍ଛେଦ ପ୍ରସଙ୍ଗରୁ ନିଜକୁ ଅଲଗା କରିଛି ଏବଂ ଉଚ୍ଛେଦ ପୂର୍ବରୁ ଭାରତ ଆମେରିକା ସହ କୌଣସି ପରାମର୍ଶ କରିନାହିଁ ବୋଲି ଜଣାଇ ଦେଇଛି। ଆମେରିକା କହିଛି ଏହା ଭାରତର ଆଭ୍ୟନ୍ତରୀଣ ମାମଲା କିନ୍ତୁ ଅଞ୍ଚଳରେ ଶାନ୍ତି ବଜାୟ ରଖିବାକୁ ସେ ପରାମର୍ଶ ଦେଇଛି।

ପାକିସ୍ତାନ ପାଇଁ ଆଉ ଏକ ଚିନ୍ତାର କାରଣ ହେଲା ଯେ କଶ୍ମୀର ପ୍ରସଙ୍ଗରେ ଜାତିସଂଘ ହସ୍ତକ୍ଷେପ କରିବ ନାହିଁ କି ଭାରତ ଉପରେ କୌଣସି ଚାପ ପକାଇବ ନାହିଁ ବୋଲି ରୋକଠୋକ କହିଦେଇଛି। ଜାତିସଂଘ ସେକ୍ରେଟାରି ଜେନେରାଲ ଆଣ୍ଟୋନିଓ ଗୁଟେରସ ମଧ୍ୟସ୍ଥତା କରିବାକୁ ମନା କରିଦେଇଛନ୍ତି। ଏହା ବ୍ୟତିତ କୌଣସି ଚିନ୍ତାଜନକ ପରିସ୍ଥିତି ଉପୁଜିଲେ ସାଧାରଣତଃ ଜାତିସଂଘ ସେକ୍ରେଟାରି ଜେନେରାଲ ନିରାପତ୍ତା ପରିଷଦକୁ ସୂଚନା ଦେଇଥାନ୍ତି କିନ୍ତୁ କଶ୍ମୀର ପ୍ରସଙ୍ଗରେ ସେପରି କୌଣସି ସୂଚନା ମଧ୍ୟ ଦେବାର ଯୋଜନା ନାହିଁ।

ଏବେ ପାକିସ୍ତାନ ଯେତେବେଳେ ଆନ୍ତର୍ଜାତୀୟ ସମର୍ଥନ ହାସଲରେ ବିଫଳ ହେବାର ଜାଣୁଛି ଏଣୁ କଶ୍ମୀର ପ୍ରସଙ୍ଗରେ ନିଜେ ପିଡିତ ବୋଲି ଦର୍ଶାଇ ଆନ୍ତର୍ଜାତୀୟ ସମର୍ଥନ ଚାହୁଁଛି। କିନ୍ତୁ ବିଶ୍ବ ଏହାକୁ ଆଦୌ ଗୁରୁତ୍ବ ଦେଉନାହିଁ। ବରଂ ସନ୍ତ୍ରାସବାଦ ଦମନରେ ପାକିସ୍ତାନ କିଛି କରିନଥିବାରୁ ଅର୍ଥନୈତିକ କାର୍ଯ୍ୟାନୁଷ୍ଠାନ ଟାସ୍କ ଫୋର୍ସ ଦ୍ବାରା କଳାତାଲିକାବୁକ୍ତ ହେବାର ଭୟ ଏବେ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନ ଏବଂ ଜେନେରାଲ କମର ବାଜୱାକୁ ଘାରିଛି। ପାକିସ୍ତାନ ପଡୋଶୀ ଦେଶର ପ୍ରସହ୍ଗରେ ମୁଣ୍ତ ନଖେଳାଇ ନିଜ ଲୋକଙ୍କ ପ୍ରତି ଧ୍ୟାନ ଦେବା ଉଚିତ।

ଆଲେଖ୍ୟ: କୌଶିକ ରାୟ

ଭାବନୁବାଦ: ରାମଚଂଦ୍ର ନାଥ