ଉପସାଗରୀୟ ଦେଶରୁ ପାକିସ୍ତାନ ନିରାଶ

ଆରବ ରାଷ୍ଟ୍ରମାନଙ୍କରୁ ପାକିସ୍ତାନ ଯେଉଁପରି ସମର୍ଥନ ଆଶା କରୁଥିଲା ତାହା ମିଳିଲା ନାହିଁ | ଭାରତ ଏହାର ସମ୍ବିଧାନର ଧାରା 370କୁ ଉଚ୍ଛେଦ କରି ଜମ୍ମୁ କଶ୍ମୀର ଏବଂ ଲଦାଖକୁ କେନ୍ଦ୍ରଶାସିତ ଅଞ୍ଚଳ ଘୋଷଣା କଲାପରେ ଆରବ ଦେଶସମୁହ ଏନେଇ କୌଣସି ପ୍ରକାର ପଦକ୍ଷେପ ନେଇନାହାନ୍ତି | ଏପରି ହେବା ପଛରେ ଭାରତର ବଢୁଥିବା ଗୁରୁତ୍ବ ଏବଂ ପରିପକ୍ବତା କାରଣ ହୋଇଛି | ଆରବ ଦେଶସମୁହ ସହିତ ଭାରତର ବାର୍ଷିକ ବାଣିଜ୍ୟ କାରବାର ପ୍ରାୟ 100 ବିଲିୟନ ଡଲାରରୁ ଅଧିକ ରହିଛି ଏବଂ ଭାରତ ଏକ ଅତ୍ୟନ୍ତ ମୂଲ୍ୟବାନ ଆର୍ଥିକ ସହଯୋଗୀ ରହିଛି |

ସବୁଠୁ ଅଧିକ ଶକ୍ତିଶାଳି ଇସଲାମିକ ଦେଶ ସାଉଦି ଆରବ ଭାରତକୁ କେବଳ ଶାନ୍ତି ବଜାୟ ରଖିବାକୁ ପରାମର୍ଶ ଦେଇଛି | ଅନ୍ୟ ଗୁରୁତ୍ବପୂର୍ଣ୍ଣ ଦେଶ କୁଏତ, କତାର, ବାହାରିନ ଏବଂ ଓମାନ ଏ ପ୍ରସଙ୍ଗରେ କୌଣସି ବିବୃତି ଦେଇନାହାନ୍ତି | ସଂଯୁକ୍ତ ଆରବ ଏମିରେଟ ଭାରତର ନିଷ୍ପତ୍ତିକୁ ଦେଶର ଆଭ୍ୟନ୍ତରିଣ ମାମଲା କହିଛି ଯାହାକି ଅତ୍ୟନ୍ତ ଉଲ୍ଲେଖନୀୟ ବିଷୟ | ଯଦିଓ ଏମିରେଟ ପାକିସ୍ତାନକୁ 3 ବିଲିୟନ ଡଲାର ଋଣ ଦେଇଛି କିନ୍ତୁ କଶ୍ମୀର ପ୍ରସଙ୍ଗରେ ଯେଉଁ ସଂକେତ ଦେଇଛି ତାହା ଭାରତ ସହିତ ଏହାର ସଂପର୍କକୁ ପ୍ରତିଫଳିତ କରିଛି |

ୟୁଏଇ ହେଉଛି ଭାରତର ସର୍ବାଧିକ ବାଣିଜ୍ୟିକ ଭାଗିଦାରୀ ଦୁଇ ଦେଶ ମଧ୍ୟରେ ବାଣିଜ୍ୟ କାରବାର ପ୍ରାୟ 50 ବିଲିୟନ ଡଲାର ରହିଛି | ଯେଉଁଥିରେ ଭାରତର ରପ୍ତାନି 28 ବିଲିୟନ ଡଲାର ଥିବାବେଳେ ୟୁଏଇର ରପ୍ତାନି ଭାରତକୁ 22 ବିଲିୟନ ଡଲାର ରହିଛି | ଚୀନ ଏବଂ ଆମେରିକା ପରେ ଏହା ଭାରତର ତୃତୀୟ ବୃହତ୍ତ ବାଣିଜ୍ୟିକ ଭାଗିଦାରୀ |

ୟୁଏଇରେ ଭାରତର ପୁଞ୍ଜିନିବେଶ 55 ବିଲିୟନ ଡଲାର ରହିଛି ଏବଂ ଦୁବାଇର କୋଠାବାଡି କାରବାରରେ ଭାରତୀୟମାନଙ୍କର ସର୍ବାଧିକ ବିଦେଶି ପୁଞ୍ଜି ବିନିଯୋଗ ରହିଛି | କଶ୍ମୀରରେ ପରିସ୍ଥିତି ଉନ୍ନତି ଘଟିଲେ ଦୁବାଇର ଅଗ୍ରଣୀ ବିଶ୍ବ ବନ୍ଦର ପରିଚାଳକ ସେଠାରେ ଏକ ପରିବହନ କେନ୍ଦ୍ର ବିକଶିତ କରିବାକୁ ଯୋଜନା କରୁଛି | ଭାରତ ସ୍ଥିତ ୟୁଏଇର ରାଷ୍ଟ୍ରଦୂତ ଅହମଦ ଅଲ ବନ୍ନା କହିଛନ୍ତି ଯେ କଶ୍ମୀରରେ ହୋଇଥିବା ପରିବର୍ତ୍ତନ ସେଠାରେ ସାମାଜିକ ନ୍ୟାୟ ଏବଂ ସୁରକ୍ଷା, ସ୍ଥିରତା ତଥା ଶାନ୍ତି କ୍ଷେତ୍ରରେ ଉନ୍ନତି ଘଟାଇବ |

ସାଉଦି ଆରବପ ଘନିଷ୍ଠ ସଂପର୍କ ଉଭୟ ଭାରତ ଏବଂ ପାକିସ୍ତାନ ସହିତ ରହିଛି | ଆଞ୍ଚଳିକ ଭୂରାଜନିତିରେ ଦେଖାଦେଇଥିବା ପରିବର୍ତ୍ତନ ଯୋଗୁଁ ସାଉଦିର ନୀତିଗତ ବିବାଦ ତୁର୍କୀ ଏବଂ ଇରାନ ସହିତ ରହିଛି | କଶ୍ମୀର ଉପରେ ସାଉଦି କହିଛି ଯେ ପରିସ୍ଥିତି ଉପରେ ଧ୍ୟାନ ରଖିଛି ଏବଂ ଏକ ଶାନ୍ତିପୂର୍ଣ୍ଣ ମିମାଂଶା ପାଇଁ ଆହ୍ବାନ ଦେଇଛି | ସାଉଦି ଆରବରେ ପ୍ରାୟ 27 ଲକ୍ଷ ଭାରତୀୟ ବସବାସ କରନ୍ତି ଏବଂ ଇରାକ ପରେ ଏହା ଭାରତର ଦ୍ବିତୀୟ ବୃହତ୍ତ ତୈଳ ଯୋଗାଣକାରୀ ଦେଶ | ଚଳିତ ସପ୍ତାହରେ ଭାରତର ରିଲାଏନ୍ସ ତୈଳ ଏବଂ କେମିକାଲ ସାଉଦିର ରାଷ୍ଟ୍ରାୟତ ଆରାମକୋ ଠାରୁ 15 ବିଲିୟନ ଡଲାରର ତୈଳ କ୍ରୟ କରିବାକୁ ଘୋଷଣା କରିଛି | ସେହିପରି ସାଉଦି ଯୁବରାଜ ମହମ୍ମଦ ବିନ ସଲମାନ ଭାରତରେ 2021 ସୁଦ୍ଧା 100 ବିଲିୟନ ଡଲାର ବିନିଯୋଗ କରିବାକୁ ଘୋଷଣା କରିଛନ୍ତି |

ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନ ସାଉଦି ଆରବ ଏବଂ ବାହାରିନର ନେତାମାନଙ୍କ ସହିତ କଶ୍ମୀର ପ୍ରସଙ୍ଗରେ ଆଲୋଚନା କରିଥିଲେ ମଧ୍ୟ କୌଣସି ସମର୍ଥନ ପାଇନାହାନ୍ତି ବରଂ ବାହାରିନ କଶ୍ମୀର ପ୍ରସଙ୍ଗରେ ବିରୋଧ ପ୍ରଦର୍ଶନ କରୁଥିବା ଲୋକମାନଙ୍କୁ ଗିରଫ କରିଛି | ଇରାନ ରାଷ୍ଟ୍ରପତି ହସନ ରୁହାନି ଏବଂ ଦେଶର ବୈଦେଶିକ ମନ୍ତ୍ରଣାଳୟ ଭାରତ ପାକିସ୍ତାନ ମଧ୍ୟରେ ଶାନ୍ତି ଆଲୋଚନା ଆରମ୍ଭ କରିବାକୁ ପରାମର୍ଶ ଦେଇଛନ୍ତି | କଶ୍ମୀର ପ୍ରସହ୍ଗକୁ ନେଇ ଉପସାଗରୀୟ ଦେଶ ପାକିସ୍ତାନକୁ ସମର୍ଥନ କରିବାକୁ ଇଛା ପ୍ରକାଶ କରୁନାହାନ୍ତି କାରଣ ସେମାନେ ଭାବୁଛନ୍ତି ଯେ ପାକିସ୍ତାନ କଶ୍ମୀରକୁ ବ୍ୟବହାର କରି ଏହିସବୁ ଦେଶମାନଙ୍କ ଠାରୁ ଅର୍ଥ ଆଦାୟ କରୁଛି | କିନ୍ତୁ ଏହି ଅର୍ଥ ଭୁଲ ରାସ୍ତାରେ ବିନିଯୋଗ ହେଉଛି | ଅପରପକ୍ଷେ ଉପସାଗରୀୟ ଦେଶମାନେ ବେକାରି ଏବଂ ଜୀବନଯାପନ ପାଇଁ ବଢୁଥିବା ଖର୍ଚ୍ଚକୁ ନେଇ ସମସ୍ୟାରେ ଗତି କରୁଛନ୍ତି |

ଭଲ ହୁଅନ୍ତା ଯଦି ପାକିସ୍ତାନ ନିଜର ବେକାରି, ମୂଲ୍ୟବୃଦ୍ଧି ପରି ଘରୋଇ ସମସ୍ୟାର ସମାଧାନ କ୍ଷେତ୍ରରେ ଧ୍ୟାନ ଦିଅନ୍ତା | କେବଳ କଶ୍ମୀର ପ୍ରସଙ୍ଗକୁ ଆୟୁଧ କରି ପାକିସ୍ତାନ କିଛି ବି ହାସଲ କରିପାରିବ ନାହିଁ |

ଆଲେଖ୍ୟ: କୌଶିକ ରାୟ

ଭାବାନୁବାଦ: ରାମଚଂଦ୍ର ନାଥ