ଦେବାଳିଆ ପାକିସ୍ତାନ

ଭାରତର ଜମ୍ମୁ କଶ୍ମୀର ଉପରେ ନିଜର ଆଭିମୁଖ୍ୟକୁ ନେଇ ପାକିସ୍ତାନ ଏବେ ଫସି ଯାଇଛି | ଧାରା 370 ଉଚ୍ଛେଦ ପରେ ପାକିସ୍ତାନ ଏହାକୁ ଆନ୍ତର୍ଜାତୀୟ ରୂପ ଦେବାକୁ ଚେଷ୍ଟା କରୁଛି କିନ୍ତୁ ପାକିସ୍ତାନକୁ ଅନ୍ୟ ଦେଶ ତ ଦୂରର କଥା ମଧ୍ୟ ପୂର୍ବ ଏବଂ ପଶ୍ଚିମ ଏସିଆର ତାର ପ୍ରଭାବଶାଳି ବଂଧୁ ରାଷ୍ଟ୍ରମାନେ ମଧ୍ୟ ତାକୁ ସମର୍ଥନ ଦେଉ ନାହାନ୍ତି | ପ୍ରଥମ ଥର ପାଇଁ ମୁସଲମାନ ରାଷ୍ଟ୍ରମାନେ କଶ୍ମୀର ପ୍ରସଙ୍ଗ ଉପରେ ମୁହଁ ଖୋଲୁ ନାହାନ୍ତି | କେତେକ ପ୍ରଭାବଶାଳି ଦେଶ କଶ୍ମୀର ମାମଲକୁ ଭାରତର ଆଭ୍ୟନ୍ତରିଣ ମାମଲା କହିଛନ୍ତି| ଏସବୁ ମଧ୍ୟରେ ପାକିସ୍ତାନ ଏବେ ଯୁଦ୍ଧ ପାଇଁ ଧମକ ଦେଉଛି |

କେବଳ ତୁର୍କୀ ଏବଂ ମ୍ୟାଲେସିଆ ପାକିସ୍ତାନର ବିଳାପକୁ ଗୁରୁତ୍ବ ଦେଇଛି | କିନ୍ତୁ ଭାରତରୁ ପଳାୟନ କରିଥିବା ଜାକିର ନାଏକକୁ ମ୍ୟାଲେସିଆ ସରକାର ପ୍ରତିବନ୍ଧିତ କରିବା ସହିତ କଶ୍ମୀର ପ୍ରସଙ୍ଗ ଉପରେ କୌଣସି ପ୍ରତିକ୍ରିୟା ଦେଇନାହିଁ |

ଜାତିସଂଘର ନିରାପତ୍ତା ପରିଷଦରେ ମଧ୍ୟ ପାକିସ୍ତାନକୁ ଅସଫଳତା ମିଳିଛି ଯେଉଁଠି ପାକିସ୍ତାନ ଏବଂ ଚୀନର ଚାଲାଖି ବିଫଳ ହୋଇଛି | ଏହାପରେ ପାକିସ୍ତାନ ନିଜ ଦେଶର ଲୋକମାନଙ୍କୁ ଦେଖାଇବା ପାଇଁ ଏଣୁତେଣୁ ବୟାନ ଦେଇଚାଲିଛି | ପାକିସ୍ତାନ ପ୍ରଧାନମନ୍ତ୍ରୀ ଏହି ସପ୍ତାହ ଆରମ୍ଭରେ ଯୁଦ୍ଧ ପାଇଁ ଧମକ ଦେଇଥିଲେ | ଇମରାନ ଖାନ କହିଛନ୍ତି ପାକିସ୍ତାନର ଜନତା କଶ୍ମୀର ସହିତ ଅଛନ୍ତି କିନ୍ତୁ ସେ ଏକଥା କହିବାକୁ ଭୁଲି ଯାଇଛନ୍ତି ଯେ ସେ କେଉଁ କଶ୍ମୀର କଥା କହୁଛନ୍ତି | ପାକିସ୍ତାନର ପ୍ରଧାନମନ୍ତ୍ରୀ ଜେହାଦ ପାଇଁ ଆହ୍ବାନ ଦେଇଛନ୍ତି | ପାକିସ୍ତାନର ରେଳ ମନ୍ତ୍ରୀ ଶେଖ ରସିଦ ଏକଥା ମଧ୍ୟ କହିଦେଲେ ଯେ ଭାରତ ଏବଂ ପାକିସ୍ତାନ ମଧ୍ୟରେ ଅକ୍ଟୋବରରେ ଯୁଦ୍ଧ ହୋଇପାରେ | ସେ କହିଛନ୍ତି ପ୍ରଧାନମନ୍ତ୍ରୀ ଇମରାନ ଏବଂ ସେନା ମୁଖ୍ୟ ବାଜଵାଙ୍କ କାର୍ଯ୍ୟକାଳରେ କଶ୍ମୀର ସମସ୍ୟାର ସମାଧାନ ହୋଇଯିବ | ଏହା ପ୍ରମାଣ କରୁଛି ଯେ ପାକିସ୍ତାନ ଅହଙ୍କାରରେ ସ୍ବପ୍ନ ଦେଖୁଛି |

1947ରେ ଜମ୍ମୁ କଶ୍ମୀର ଭାରତରେ ବିଲୟ ହେବା ପରଠାରୁ ଭାରତ କହିଆସିଛି ଯେ ଏହା ଭାରତର ଅଭିନ୍ନ ଅଙ୍ଗ | ଅପରପକ୍ଷେ ପାକିସ୍ତାନ ଭାରତର 13000 ବର୍ଗ କିଲୋମିଟର ଭୂଭାଗ ଉପରେ ବେଆଇନ କବ୍ଜା କରି ରଖିଛି | ଆଉ ଏହା ମଧ୍ୟରୁ କେତେକ ଅଂଶ ବେଆଇନ ଭାବେ ଚୀନକୁ ଦେଇ ଦେଇଛି | ଏବେ ଆବଶ୍ୟକତା ରହିଛି ଯେ ପାକିସ୍ତାନ ଏହି ଅନଧିକୃତ ଅଞ୍ଚଳକୁ ଭାରତକୁ ଫେରାଇଦେଉ | ଭାରତ ପାକ ଅଧିକୃତ କଶ୍ମୀର ବ୍ୟତିତ ଅନ୍ୟ କୌଣସି ପ୍ରସଙ୍ଗ ଉପରେ କଥାବାର୍ତ୍ତା କରିବାକୁ ବର୍ତ୍ତମାନ ପ୍ରସ୍ତୁତ ନାହିଁ | ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହା ସ୍ପଷ୍ଟ କରିବା ସହିତ ଏକଥା ମଧ୍ୟ କହିଛନ୍ତି ଯେ ପାକିସ୍ତାନ ପ୍ରଥମେ ସନ୍ତ୍ରାସବାଦକୁ ନିଜର ବିଦେଶ ନୀତିରୁ ହଟାଇବାକୁ ପଡିବ |

ପାକିସ୍ତାନ ପକ୍ଷରୁ ଆସୁଥିବା ଦାୟିତ୍ବହୀନ ଏବଂ ଅପରିପକ୍ବ ମନ୍ତବ୍ୟ ଭାରତର ଆଭ୍ୟନ୍ତରିଣ ମାମଲାରେ ହ୍ସତକ୍ଷେପ ସଦୃଶ୍ୟ | ଏପରି ବିବୃତ୍ତି ପାଇଁ ଭାରତର ବୈଦେଶିକ ମନ୍ତ୍ରଣାଳୟ ନିନ୍ଦା କରିଛି | ଭାରତ ପାକିସ୍ତାନକୁ ଏହା ମଧ୍ୟ କହିଛି ଯେ ସେ ଆନ୍ତର୍ଜାତୀୟ ସନ୍ତ୍ରାସବାଦି ସଂଗଠନ ଠାରୁ ନିଜର ସଂପର୍କ ଛିନ୍ନ କରି ଦୋଷିମାନଙ୍କୁ ଦଣ୍ତ ଦେଉ |

ପାକିସ୍ତାନରେ ବର୍ତ୍ତମାନ ଦେଖାଦେଇଥିବା ଆଭ୍ୟନ୍ତରିଣ ପରିସ୍ଥିତି ଉପରେ ପୁରା ଦୁନିଆ ଅବଗତ ଅଛି | ଆର୍ଥିକ ଦୃଷ୍ଟିରୁ ପାକିସ୍ତାନ ଏପରି ଦେବାଳିଆ ହୋଇସାରିଛି ଯେ ଖୋଦ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳଯର ବିଜୁଳି ବିଲ 41 ଲକ୍ଷ ଟଙ୍କା ବକେୟା ରହିଛି | ଆଉ ବିଜୁଳି ବିଭାଗ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ବିଜୁଳି କାଟିଦେବାକୁ ଧମକ ବି ଦେଇଛି |

ପାକିସ୍ତାନର ସାଧାରଣ ଲୋକ ସବୁଜିନିଷରେ ଅତ୍ୟଧିକ ପଇସା ଦେୟ କରୁଛି ନିକଟରେ ଆନ୍ତର୍ଜାତୀୟ ମୁଦ୍ରା ପାଣ୍ଠି ପାକିସ୍ତାନକୁ କୌଣସି ପ୍ରକାର ସହାୟତା ଦେବାକୁ ମନା କରିଛି | ସବୁଠୁ ବଡ ଧକ୍କା ଏଫଟିଏଫ ଦେଇଛି | ଏଫଟିଏଫର ଏସିଆ ପ୍ରଶାନ୍ତ ମହାସାଗରୀୟ ସଂଗଠନ ନିଜର ରିପୋର୍ଟରେ କହିଛି ଯେ ଯେଉଁ 40 ମାନଦଣ୍ତ ଉପରେ ପାକିସ୍ତାନକୁ କଡା ପଦକ୍ଷେପ ନେବାର ଥିଲା ସେଥିମଧ୍ୟରୁ 32ଟିରେ ସେ ଅସଫଳ ରହିଛି | ପାକିସ୍ତାନ ପୂର୍ବରୁ ଏଫଟିଏଫର ଗ୍ରେ ସୂଚିରେ ରହିଛି ଆଉ କିଛି ମାସ ମଧ୍ୟରେ ପାକିସ୍ତାନକୁ କଳାତାଲିକା ଭୁକ୍ତ କରାଯାଇପାରେ | ଯଦି ଏପରି ହୁଏ ତେବେ ପାକିସ୍ତାନକୁ ନିଜର ପରିସ୍ଥିତି ସୁଧାରିବାକୁ ଋଣ ନେବା ଅସମ୍ଭବ ହେଇଯିବ |

ଏପରି ପରିସ୍ଥିତିରେ ପାକିସ୍ତାନ ନିଜର ପଡୋଶୀ ଦେଶର ଆଭ୍ୟନ୍ତରୀଣ ମାମଲାରେ ହସ୍ତକ୍ଷେପ କରିବା ପରିବର୍ତ୍ତେ ବୁଦ୍ଧିମାନତାର ସହିତ ନିଜ ଦେଶର ନାଗରିକମାନଙ୍କର ଉନ୍ନତ ଜୀବନ ପାଇଁ ପଦକ୍ଷେପ ନେବା ଉଚିତ |




ଆଲେଖ୍ୟ: ଜେ.ଏଲ. କୌଲ ଜଲାଲି

ଭାବାନୁବାଦ: ରାମଚଂଦ୍ର ନାଥ