ରାଷ୍ଟ୍ରପତି ରାମନାଥ କୋବିନ୍ଦଙ୍କ ଗସ୍ତ ଭାରତ ଓ ପଶ୍ଚିମ ଆଫ୍ରିକା ମଧ୍ୟରେ ସମ୍ପର୍କ ନିବିଡ କରିଛି

ଭାରତର ରାଷ୍ଟ୍ରପତି ରାମନାଥ କୋବିନ୍ଦ ବେନିନ, ଗାମ୍ବିଆ ଓ ଗିନି ଆଦି ପଶ୍ଚିମ ଆଫ୍ରିକାର ତିନୋଟି ଫ୍ରାନ୍ସ ଭାଷାଭାଷୀ ରାଷ୍ଟ୍ରକୁ ଏକ ସାତଦିନିଆ ଗସ୍ତ ଶେଷ କରି ଭାରତ ପ୍ରତ୍ୟାବର୍ତ୍ତନ କରିଛନ୍ତି | ଭାରତ ଆଫ୍ରିକା ସହ ବିଶେଷକରି ଫ୍ରାନ୍ସ ଭାଷାଭାଷୀ ପଶ୍ଚିମ ଆଫ୍ରିକା ରାଷ୍ଟ୍ର ସହ ସମ୍ପର୍କ ନିବିଡ କରିବା ଉପରେ ଭାରତ ସର୍ବୋଚ୍ଚ ପ୍ରାଥମିକତା ଦେଉଥିବା ବିଷୟ ରାଷ୍ଟ୍ରପତିଙ୍କ ଏହି ଗସ୍ତରୁ ସ୍ପଷ୍ଟ ପ୍ରତୀତ ହେଉଛି |

ରାଷ୍ଟ୍ରପତି ଙ୍କ ଏହି ତ୍ରିରାଷ୍ଟ୍ରୀୟ ଗସ୍ତ ଐତିହାସିକ ଥିଲା କାରଣ ଭାରତର କୌଣସି ରାଷ୍ଟ୍ରପତିଙ୍କ ଏହା ପ୍ରଥମ ଗସ୍ତ ଥିଲା | ଏହା ଉଲ୍ଲେଖ ଯୋଗ୍ୟଯେ ପାରମ୍ପରିକ ଭାବେ ଫ୍ରାନ୍ସ ଭାଷାଭାଷୀ ପଶ୍ଚିମ ଆଫ୍ରିକୀୟ ଦେଶ ଗୁଡିକ ସହ ଭାରତର ସମ୍ପର୍କ ସେତେଟା ମଜବୁତ ନାହିଁ ଯେପରି ଇଂରାଜୀ ଭାଷାଭାଷୀ ଆଫ୍ରିକୀୟ ରାଷ୍ଟ୍ର ଗୁଡିକ ସହ ସମ୍ପର୍କ ରହିଛି | ଭାଷା ଅବରୋଧ ତଥା ଦୂରତା ଓ ଯୋଗାଯୋଗର ଅଭାବ ଯୋଗୁଁ ସମ୍ପର୍କ ସେତେଟା ସୁଦୃଢ ନଥିବାର ଜଣାପଡିଛି | ଉଭୟଙ୍କ ମଧ୍ୟରେ ସମ୍ପର୍କ ବୃଦ୍ଧି ଲାଗି ଅନେକ ନୀତିଗତ ପଦକ୍ଷେପ ଗ୍ରହଣ କରାଯିବା ସତ୍ତ୍ୱେ ଏହି କ୍ଷେତ୍ରରେ ପ୍ରଗତି ଘଟିବାର ପରିଲକ୍ଷିତ ହୋଇନାହିଁ | ସମ୍ପ୍ରତ୍ତି ଭାରତ ଆଫ୍ରିକାରେ, ଅଧିକାଂଶ ଫ୍ରାନ୍ସ ଭାଷାଭାଷୀ ପଶ୍ଚିମ ଆଫ୍ରିକୀୟ ଦେଶରେ 18 ଟି ଦୂତାବାସ ଖୋଲିବା ପାଇଁ ଘୋଷଣା କରିଛି | ଅଞ୍ଚଳରେ ଏହାର କୂଟନୈତିକ କାର୍ଯ୍ୟକଳାପ ବୃଦ୍ଧି ଲାଗି ସେଠାରେ ଅଧିକ ଦୂତାବାସ ଖୋଲିବା ଲାଗି ଘୋଷଣା କରାଯାଇଛି |

ରାଷ୍ଟ୍ରପତି କୋବିନ୍ଦ ତାଙ୍କ ଗସ୍ତ କାଳରେ ସଙ୍କ୍ରାନ୍ତୀୟ ନେତା ମାନଙ୍କ ସହ ପ୍ରତିନିଧି ସ୍ତରୀୟ କଥାବାର୍ତ୍ତା କରିଛନ୍ତି | ସେ ବେନିନ ଓ ଗାମ୍ବିଆରେ ନେସନାଲ ଏସେମ୍ବ୍ଲିରେ ଉଦବୋଧନ ଦେବା ସହ ଏହି ତିନି ଦେଶରେ ବସବାସ କରୁଥିବା ଭାରତୀୟ ମାନଙ୍କ ସହ ବାର୍ତ୍ତାଳାପ କରିଥିଲେ | ଏହି ବୈଠକ ସମୟରେ ବାଣିଜ୍ୟ, ପୁଞ୍ଜି ନିବେଶ, ସୌର ଶକ୍ତି, କୃଷି, ଡିଜିଟାଲ ଜ୍ଞାନ କୌଶଳ , ଦକ୍ଷତା ବିକାଶ, ସାମୁଦ୍ରିକ ସୁରକ୍ଷା ଓ ପ୍ରତିରକ୍ଷା କ୍ଷେତ୍ରରେ ଦ୍ଵିପକ୍ଷୀୟ ସମ୍ପର୍କକୁ ଆହୁରି ମଜବୁତ କରିବା ନେଇ ବ୍ୟାପକ ଆଲୋଚନା ହୋଇଥିଲା | ଏଥି ସହିତ ଆନ୍ତର୍ଜାତୀୟ ସ୍ତରରେ ଉଦବେଗର କାରଣ ପାଲଟିଥିବା ପ୍ରସଙ୍ଗ ଗୁଡିକ ମଧ୍ୟ କଥାବାର୍ତ୍ତାର ମୁଖ୍ୟ ଆଲୋଚ୍ୟ ବିଷୟ ହୋଇଥିଲା |

ବେନିନରେ ଆପୋଷ ପୁଞ୍ଜି ନିବେଶକୁ ସହାୟତା କରିବା ଓ ରପ୍ତାନି କ୍ଷେତ୍ରକୁ ବୃଦ୍ଧି କରିବା ଲାଗି ମିଳିତ ପ୍ରୟାସ କରିବା ଉପରେ ଉଭୟ ପକ୍ଷ ସହମତି ପ୍ରକାଶ କରିଛନ୍ତି | ରାଷ୍ଟ୍ରପତି କୋବିନ୍ଦ ଇ-ଭିସା ସୁବିଧା ସମ୍ପ୍ରସାରଣ କରିବା ବିଷୟ ଘୋଷଣା କରି ଏହାଦ୍ୱାରା ବ୍ୟବସାୟ ସମ୍ପର୍କ କ୍ଷେତ୍ରରେ ପ୍ରଗତି ହେବ ବୋଲି ମତବ୍ୟକ୍ତ କରିଛନ୍ତି | ଗାମ୍ବିଆରେ ରାଷ୍ଟ୍ରପତି କୋବିନ୍ଦ ଭାରତୀୟ ଉଦ୍ୟୋଗ ଓ ନିବେଶ ପାଇଁ ଗାମ୍ବିଆର ନିରନ୍ତର ସମର୍ଥନ ନେଇ ଭାରତର ଆଶା ଆକାଂକ୍ଷା ଉପରେ ଆଲୋକପାତ କରିଥିଲେ | ଭାରତୀୟ କମ୍ପାନୀ ଗୁଡିକ ଗିନିରେ ବିଶେଷକରି ଖଣି, ମୌଳିକ ଢାଞ୍ଚା, ସ୍ୱାସ୍ଥ୍ୟ ଓ ଔଷଧ ପତ୍ର କ୍ଷେତ୍ରରେ ନିବେଶ କରିବା ପାଇଁ ପ୍ରବଳ ଉତ୍ସୁକ ଥିବା ବିଷୟ ନେଇ ରାଷ୍ଟ୍ରପତି କୋବିନ୍ଦ ଗିନିରେ ଉଦବୋଧନ ଦେବା ସମୟରେ କହିଥିଲେ |

ସଙ୍କ୍ରାନ୍ତୀୟ ଦେଶ ଗୁଡିକର ପ୍ରାଥମିକତା ଅନୁଯାୟୀ ବିକାଶ ଭାଗୀଦାରୀ ବୃଦ୍ଧି କରିବା ଲାଗି ଭାରତୀୟ ରାଷ୍ଟ୍ରପତି ବିଭିନ୍ନ ଘୋଷଣାମାନ କରିଥିଲେ | ସେ ବେନିନକୁ ଏହାର ଜାତୀୟ ପ୍ରାଥମିକତା ପ୍ରକଳ୍ପ ଗୁଡିକ ପାଇଁ 100 ନିୟୁତ ଆମେରିକୀୟ ଡଲାର ଋଣ ଆକାରରେ ପ୍ରଦାନ ଲାଗି ଘୋଷଣା କରିଥିଲେ | ଇଂରାଜୀ ଦକ୍ଷତା ରେ ଏକ ସ୍ଵତନ୍ତ୍ର ଆଇଟିଇସି ପାଠ୍ୟକ୍ରମ ଓ ବେନିନ ର ବିଦେଶୀ କୂଟନୈତିକ ମାନଙ୍କ ପାଇଁ ଏକ ସ୍ଵତନ୍ତ୍ର ପେଷାଗତ ପାଠ୍ୟକ୍ରମ ଲାଗି ସହାୟତା ପ୍ରଦାନ କରିବା ପାଇଁ ସେ ଘୋଷଣା କରିଥିଲେ | ସେହିପରି ଗାମ୍ବିଆକୁ କୌଶଳ ବିକାଶ ଓ କୁଟୀର ଉଦ୍ୟୋଗ ପ୍ରକଳ୍ପ ଲାଗି ସହାୟତା ପ୍ରଦାନ ନିମନ୍ତେ 500,000 ଆମେରିକୀୟ ଡଲାର ସହାୟତା ଦେବା ପାଇଁ ମଧ୍ୟ ଘୋଷଣା କରିଥିଲେ | ଗାମ୍ବିଆର ଅନୁରୋଧକ୍ରମେ ନ୍ୟାୟପାଳିକା, ପୋଲିସ, ପ୍ରଶାସନ ଓ ବୈଷୟିକ ଦକ୍ଷତା କ୍ଷେତ୍ରରେ ପ୍ରଶିକ୍ଷଣ ଦେବା ଲାଗି ମଧ୍ୟ ପ୍ରସ୍ତାବ ଦିଆଯାଇଥିଲା | ଗିନି କୁ କୋନକ୍ରି ଜଳ ଯୋଗାଣ ପ୍ରକଳ୍ପ ପାଇଁ 170 ନିୟୁତ ଆମେରିକୀୟ ଡଲାର ଋଣ ଆକାରରେ ସହାୟତା ପ୍ରଦାନ ଲାଗି ମଧ୍ୟ ସେ ଘୋଷଣା କରିଛନ୍ତି | ରାଷ୍ଟ୍ରପତି କୋବିନ୍ଦ ମଧ୍ୟ ଆନ୍ତର୍ଜାତୀୟ ସୌର ମେଣ୍ଟରେ ଅଂଶୀଦାର ଭାବେ ଭାରତ ସହ ହାତ ମିଳାଇଥିବାରୁ ବେନିନ, ଗାମ୍ବିଆ ଓ ଗିନିର ନେତୃତ୍ଵଙ୍କ ପ୍ରତି ଭୂୟସୀ ପ୍ରଶଂସା କରିଥିଲେ ଓ ଜଳବାୟୁ ପରିବର୍ତ୍ତନର ମୂକାବିଲା କରିବା ଲାଗି ସୌର ଶକ୍ତି କ୍ଷେତ୍ରରେ ସହଯୋଗ ଉପରେ ଗୁରୁତ୍ଵାରୋପ କରିଥିଲେ |

ପ୍ରତିରକ୍ଷା ଓ ନିରାପତ୍ତା ସହଯୋଗକୁ ଆହୁରି ଦୃଢୀଭୂତ କରିବା ଉପରେ ମଧ୍ୟ ଭାରତ ପକ୍ଷରୁ ଜୋର ଦିଆଯାଇଥିଲା | ଗିନି ଉପସାଗରରେ ଜଳଦସ୍ୟୁ ମାନଙ୍କ ବୃଦ୍ଧି ପାଉଥିବା ପ୍ରାଦୁର୍ଭାବକୁ ଦୃଷ୍ଟିରେ ରଖି ଏହାର ଜଳଦସ୍ୟୁ ନିରୋଧୀ ଦକ୍ଷତା ସମ୍ପ୍ରସାରଣ ଲାଗି ବେନିନକୁ ପ୍ରଶିକ୍ଷଣ ସହାୟତା ଦେବା ନିମନ୍ତେ ଭାରତ ପ୍ରସ୍ତାବ ଦେଇଛି | ଉଭୟ ପକ୍ଷ ଦ୍ୱାରା ଜାରି ଏକ ମିଳିତ ବିବୃତ୍ତିରେ ବୃଦ୍ଧି ପାଉଥିବା ସନ୍ତ୍ରାସବାଦ ଉପରେ ଗଭୀର ଉଦବେଗ ପ୍ରକାଶ କରାଯାଇଥିବା ବେଳେ ଆନ୍ତର୍ଜାତୀୟ ସନ୍ତ୍ରାସବାଦ ଉପରେ ବ୍ୟାପକ ସମ୍ମିଳନୀ ର ଖୁବ ଶୀଘ୍ର ଆୟୋଜନ କରିବାର ଆବଶ୍ୟକତା ଉପରେ ଏକମତ ହୋଇଥିଲେ |

ରାଷ୍ଟ୍ରପତି ତାଙ୍କ ଏହି ତ୍ରିରାଷ୍ଟ୍ରୀୟ ଗସ୍ତ ସମୟରେ ସହଭାଗିତାକୁ ଆହୁରି ମଜବୁତ କରିବା ଲାଗି ବିଭିନ୍ନ ବୁଝାମଣା ପତ୍ରରେ ସ୍ଵାକ୍ଷରିତ କରିଛନ୍ତି | ବେନିନରେ ଉଭୟ ପକ୍ଷ ସାଂସ୍କୃତିକ ବିନିମୟ, ରପ୍ତାନି କ୍ରେଡିଟ ଓ ପୁଞ୍ଜିନିବେଶ ବୀମା କ୍ଷେତ୍ରରେ ସହଯୋଗ, ଇ-ଭିବିଏବି (ଇ- ବିଦ୍ୟା ଭାରତୀ ଓ ଇ-ଆରୋଗ୍ୟ ଭାରତୀ ) ନେଟୱର୍କ ପ୍ରକଳ୍ପ ତଥା ଭାରତୀୟ କୂଟନୈତିକ /ସରକାରୀ ପାସପୋର୍ଟ ପାଇଁ ଭିସା କୋହଳତା ଆଦି ଉପରେ ଚାରୋଟି ରାଜିନାମାରେ ସ୍ଵାକ୍ଷର କରିଛନ୍ତି | ସେହିଭଳି ଗାମ୍ବିଆରେ ପାରମ୍ପରିକ ଚିକିତ୍ସା ପଦ୍ଧତି ଓ ହୋମିଓପାଥି କ୍ଷେତ୍ରରେ ସହଯୋଗ ନେଇ ବିଭିନ୍ନ ବୁଝାମଣା ପତ୍ର ସ୍ବାକ୍ଷରିତ ହୋଇଛି | ଗିନିରେ ମଧ୍ୟ ଦୁଇ ରାଷ୍ଟ୍ରପତି ପାରମ୍ପରିକ ଚିକିତ୍ସା ପଦ୍ଧତି ଓ ହୋମିଓପାଥି କ୍ଷେତ୍ରରେ ସହଯୋଗ, ଇ-ଭିବିଏବି (ଇ- ବିଦ୍ୟା ଭାରତୀ ଓ ଇ-ଆରୋଗ୍ୟ ଭାରତୀ ) ନେଟୱର୍କ ପ୍ରକଳ୍ପ ଓ ପୁନଃବ୍ୟବହାରକ୍ଷମ ଶକ୍ତି କ୍ଷେତ୍ରରେ ବୁଝାମଣା ପତ୍ର ଗୁଡିକରେ ସ୍ଵାକ୍ଷର କରିଛନ୍ତି |

ମୋଟାମୋଟି ଭାବେ କହିବାକୁ ଗଲେ ଏହି ଅଞ୍ଚଳ ସହ ବିଭିନ୍ନ କ୍ଷେତ୍ରରେ ସମ୍ପର୍କ ପ୍ରଗାଢ କରିବା ପାଇଁ ରାଷ୍ଟ୍ରପତି ରାମନାଥ କୋବିନ୍ଦଙ୍କ ତ୍ରିରାଷ୍ଟ୍ରୀୟ ଗସ୍ତ ଅତ୍ୟନ୍ତ ସଫଳ ହୋଇଛି |

ମୂଳ ଲେଖା : ଡଃ ନିବେଦିତା ରାୟ , ଆଫ୍ରିକା ଉପରେ ରଣନୀତିକ ବିଶ୍ଳେଷକ

ଅନୁବାଦ : ରୀତା ଯୋଶୀ