ଭାରତ ଏହାର ସମ୍ବିଧାନରୁ ଧାରା 370କୁ ଉଚ୍ଛେଦ କରିବା ପରେ ପାକିସ୍ତାନ ବିଚଳିତ ହୋଇପଡିଛି। ଭାରତର ଏପରି ପଦକ୍ଷେପ ପାକିସ୍ତାନ ପାଇଁ କଳ୍ପନାତୀତ ଥିଲା। ଧାରା 370 ହଟାଇ ଜମ୍ମୁ କଶ୍ମୀର ଏବଂ ଲଦାଖକୁ ଦୁଇଟି କେନ୍ଦ୍ର ଶାସିତ ଅଞ୍ଚଳ କରିବା ଭାରତର ନିହାତି ଆଭ୍ୟନ୍ତରୀଣ ମାମଲା କିନ୍ତୁ ଏହି ପଦକ୍ଷେପ ପାକିସ୍ତାନକୁ ହତଚକିତ କରିଦେଇଛି। ପାକିସ୍ତାନ ଜାଣେ ଯେ ଏହି ପଦକ୍ଷେପ ଦ୍ବାରା କଶ୍ମୀର ପ୍ରସଙ୍ଗ ସଂପୂର୍ଣ୍ଣ ବଦଳିଯିବ। ଏଣୁ ଇମରାନ ଖାନ ସରକାର ଏହାକୁ ନେଇ ବିଚଳିତ ହୋଇପଡିଛି।
ବିଚଳିତ ପାକିସ୍ତାନ ଭାରତ ସହିତ ଏହାର ସଂପର୍କ ଛିନ୍ନ କରିବାକୁ ଯାଇ ନୂଆଦିଲ୍ଲୀରୁ ଏହାର ରାଷ୍ଟ୍ରଦୂତଙ୍କୁ ଡକାଇଆଣିବା ସହିତ ପାକିସ୍ତାନରେ ଅବସ୍ଥିତ ଭାରତର ରାଷ୍ଟ୍ରଦୂତଙ୍କୁ ପଠାଇବା ସଙ୍ଗେ ସଙ୍ଗେ ବାଣିଜ୍ୟିକ ସଂପର୍କ ବାତିଲ କରିଛି। ଜମ୍ମୁ କଶ୍ମୀର ପ୍ରସଙ୍ଗକୁ ପାକିସ୍ତାନ ଜାତିସଂଘ ସୁରକ୍ଷା ପରିଷଦରେ ଉଠାଇବାକୁ ଧମକ ଦେଇଛି। ଅବଶ୍ୟ ଏହାର କୌଣସି ସୁଫଳ ପାକିସ୍ତାନକୁ ମିଳିବ ନାହିଁ କାରଣ କେହିବି ପାକିସ୍ତାନର କାର୍ଯ୍ୟକୁ ଗୁରୁତର ଭାବେ ଗ୍ରହଣ କରୁନାହାନ୍ତି।
ପାକିସ୍ତାନର ଘରୋଇ ରାଜନୀତିରେ କଶ୍ମୀର ସର୍ବଦା ଅସ୍ତ୍ର ଭାବେ ରହିଆସିଛି। ପ୍ରଧାନମନ୍ତ୍ରୀ ଇମରାନ ଖାନଙ୍କ ଆମେରିକା ଗସ୍ତ ଏବଂ କଶ୍ମୀର ପ୍ରସଙ୍ଗକୁ ନେଇ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟସ୍ଥତା ପ୍ରସ୍ଥାବକୁ ପାକିସ୍ତାନ କଶ୍ମୀର ପ୍ରସଙ୍ଗର ସଫଳ ପଦକ୍ଷେପ ବୋଲି ଭାବୁଥିଲା। କିନ୍ତୁ ଭାରତ ସରକାରଙ୍କ ପଦକ୍ଷେପ ପାକିସ୍ତାନର ଆଶାକୁ ଧୂଳିସାତ କରିବା ସହିତ ସେଠାକାର ରାଜନୈତିକ ପରିସ୍ଥିତିକୁ ମଧ୍ୟ ଓଲଟପାଲଟ କରିଦେଲା।
କଶ୍ମୀର ପ୍ରସଙ୍ଗକୁ ନେଇ ପାକିସ୍ତାନ ଏହାର ନ୍ୟାସନାଲ ଆସେମ୍ଲିର ଏକ ସ୍ବତନ୍ତ୍ର ଅଧିବେଶନ ଡାକିଥିଲା। ଉଭୟ ସରକାର ଏବଂ ସାମରିକ ନେତୃତ୍ବ ଭାରତ ବିରୁଦ୍ଧରେ ବିଶୋଦଗାର କଲେ। କିନ୍ତୁ ସେଠାରେ ଇମରାନ ଖାନଙ୍କ ଆମେରିକା ଗସ୍ତ ର ଉଦ୍ଦେଶ୍ୟ ଉପରେ କେତେକ ବିରୋଧି ସଦସ୍ୟ ପ୍ରଶ୍ନ ଉଠାଇଥିଲେ। ଯେତେବେଳେ ଅଧିକାଂଶ ବିରୋଧି ଦଳ ନେତା ଙ୍କୁ ଜେଲରେ ରଖାଯାଇଛି ସେପରି ସମୟରେ ଏପରି ମିଳିତ ଅଧିବେଶନର ଅନାବଶ୍ୟକତା ଉପରେ ବିରୋଧି ଦଳ ପ୍ରଶ୍ନ କରିଥିଲେ।
କଶ୍ମୀରର କୌଣସି ପ୍ରକାର ଜନସଂଖ୍ୟିକ ପରିବର୍ତ୍ତନ କଶ୍ମୀର ପ୍ରସଙ୍ଗ ଉପରେ ପାକିସ୍ତାନର ଭୂମିକାକୁ ସବୁଦିନ ପାଇଁ ବଦଳାଇ ଦେବ ବୋଲି ସେଠାକାର ଗଣମାଧ୍ୟମରେ ଚର୍ଚା ଚାଲିଛି। ଅପରପକ୍ଷେ କଶ୍ମୀରରେ ଜେହାଦ ନାମ ନେଇ ଇସଲାମିକ ଦେଶ ତଥା ପାଶ୍ଚାତ୍ୟ ଦେଶମାନଙ୍କୁ ଯେଉଁ ଚାନ୍ଦା ଆଦାୟ କରାଯାଉଥିଲା ତାହା ବାଧାପ୍ରାପ୍ତ ହେବ। ଭାରତ କଶ୍ମୀରକୁ କେନ୍ଦ୍ରଶାସିତ ଅଞ୍ଚଳ ଘୋଷଣା କରି କଶ୍ମୀର ନାମରେ ପାଣ୍ଠି ସଂଗ୍ରହ ପାଇଁ ପାକିସ୍ତାନର ଦ୍ବାର ବନ୍ଦ କରିଦଇଛି।
ପାକିସ୍ତାନର ବିଶେଷଜ୍ଞମାନଙ୍କ ମତରେ ଯଦି କଶ୍ମୀରର ଶାସନ ପ୍ରଶାସନ ଉପରେ ଭାରତ ସରକାରଙ୍କ ନିୟନ୍ତ୍ରଣ ରହିବ ତେବେ ପାକିସ୍ତାନରେ କଶ୍ମୀରକୁ ନେଇ ରାଜନୈତିକ ପ୍ରାସଙ୍ଗିକତା ଲୋପ ପାଇଯିବ। କେତେକ ବିଶେଷଜ୍ଞମାନଙ୍କ ମତରେ ବିଗତ ଶତାବ୍ଦିରେ କଶ୍ମୀର ସଂଘର୍ଷକୁ ସମର୍ଥନରେ ହ୍ରାସ ଘଟିଛି ଏବଂ ଏହି ପ୍ରସଙ୍ଗକୁ ଆନ୍ତର୍ଜାତୀକ ସ୍ତରରେ ଉଠାଇବାରେ ବିଫଳ ହେଇଥିବାରୁ ପାକିସ୍ତାନ ସରକାରଙ୍କୁ ଦୋଷାରୋପ କରାଯାଇଛି। ଏବେ ଏହି ଘଟଣା ପରେ ପାକିସ୍ତାନକୁ କୌଣସି ବାହାର ଦେଶ ସମର୍ଥନ କରିବ ନାହିଁ। ଏହି ପ୍ରସଙ୍ଗକୁ ଇସଲାମିକ ସହଯୋଗ ସଂଗଠନରେ ଉଠାଇବାକୁ ଇମରାନ ଖାନ ପ୍ରଚେଷ୍ଟା କରୁଛନ୍ତି।
ଭାରତ ପାକିସ୍ତାନ ପାଇଁ ଖସ୍ମୀରକୁ ନେଇ ରାଜନୀତି କରିବାର ରାସ୍ତା ବନ୍ଦ କରି ପାକିସ୍ତାନକୁ ବିଚଳିତ କରିଦେଇଛି। ଏବେ ଏହାର ଭାରତର ଆଭ୍ୟନ୍ତରୀଣ ମାମଲା ଆଉ ଭାରତ ପାକିସ୍ତାନର ଦ୍ବିପକ୍ଷୀୟ ମାମଲା ହୋଇ ରହିନାହିଁ।
ପାକିସ୍ତାନ ମନେ ରଖିବା ଉଚିତ ଯେ ଏହା ପାକିସ୍ତାନ ଅଧିକୃତ କଶ୍ମୀର ଏବଂ ଗିଲଗିଟ- ବାଲତିସ୍ତାନକୁ ବେଆଇନ ଭାବେ କବଜା କରି ରଖିଛି। ଏଣୁ ପାକିସ୍ତାନ ଏବେ କଶ୍ମୀର କଥା କହୁଥିବା ବେଳେ ତାକୁ ପାକିସ୍ତାନ ଅଧିକୃତ କଶ୍ମୀର ଓ ଗିଲଗିତ ବାଲତିସ୍ତାନ ପ୍ରସଙ୍ଗ ଉପରେ ଆତ୍ମ ସମୀକ୍ଷା କରିବା ଉଚିତ।
ଆଲେଖ୍ୟ: ଡକ୍ଟର ଜୈନବ ଅଖତର
ଭାବନୁବାଦ: ରାମଚଂଦ୍ର ନାଥ
Comments
Post a Comment