ହାଓଡି ମୋଦୀ- ଏକ ଐତିହାସିକ କାର୍ଯ୍ୟକ୍ରମ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହଷ୍ଟନ ସହରରେ ଅନୁଷ୍ଠିତ ‘ହାଓଡି ମୋଦୀ’ ଭଳି ଐତିହାସିକ କାର୍ଯ୍ୟକ୍ରମର ଅଭୂତପୂର୍ବ ସଫଳତାର ସହ ଆମେରିକା ଗସ୍ତ ଆରମ୍ଭ କରିଛନ୍ତି | ଏହି ଅବସରରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ ମଧ୍ୟ ଉପସ୍ଥିତ ଥିଲେ | ଏହି କାର୍ଯ୍ୟକ୍ରମରେ ଯୋଗ ଦେଇଥିବା 50,000ରୁ ଅଧିକ ଭାରତୀୟ ବଂଶୋଦଭବ ଆମେରିକୀୟ ଙ୍କୁ ପ୍ରଧାନମନ୍ତ୍ରୀ ଉଦବୋଧନ ଦେଇଥିଲେ |

ପ୍ରଧାନମନ୍ତ୍ରୀ ପୂର୍ବରୁ 2014ରେ ନ୍ୟୁୟର୍କ ର ମେଡିସନ ସ୍କ୍ୱେର ଗାର୍ଡେନ ଠାରେ ଓ 2015 ରେ ସାନଯୋଶରେ ଭାରତୀୟ ବଂଶୋଦଭବ ଆମେରିକୀୟ ମାନଙ୍କୁ ଉଦବୋଧନ ଦେଇଥିଲେ | ଏହି କାର୍ଯ୍ୟକ୍ରମରେ ରାଷ୍ଟ୍ରପତି ଟ୍ରମ୍ଫ ଓ ସିନେଟ ର ସମସ୍ତ ସଦସ୍ୟ ତଥା କୂଟନୈତିକ ମାନଙ୍କ ଉପସ୍ଥିତି ଭାରତ-ଆମେରିକା ଭାଗୀଦାରୀତା କ୍ଷେତ୍ରରେ ଦୁଇ ଦେଶ ମଧ୍ୟରେ ଦୃଢ ସମ୍ପର୍କକୁ ପ୍ରତିଫଳିତ କରୁଛି |

ଟ୍ରମ୍ଫ ଙ୍କୁ ‘ହାଓଡି ମୋଦୀ’ ରେ ସ୍ଵାଗତ କରି ଏହି କାର୍ଯ୍ୟକ୍ରମରେ ଯୋଗ ଦେଇଥିବାରୁ ଧନ୍ୟବାଦ ଜଣାଇ ଶ୍ରୀ ମୋଦୀ କହିଥିଲେ ଯେ ଶ୍ରୀ ଟ୍ରମ୍ଫ “ ମୋର ଓ ଭାରତର ପ୍ରକୃତ ବନ୍ଧୁ ହେବା ସହ ସେ ହେଉଛନ୍ତି ଆମେରିକାର ଜଣେ ମହାନ ରାଷ୍ଟ୍ରପତି | ତାଙ୍କ ସହିତ ମୋର ପ୍ରତ୍ୟେକ ସାକ୍ଷାତ ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ସୁଦୃଢ କରିଛି ବୋଲି ସେ କହିଥିଲେ | ରାଷ୍ଟ୍ରପତିଙ୍କ ନେତୃତ୍ଵ ପ୍ରତି ଉଚ୍ଚ ପ୍ରଶଂସା କରି ଟ୍ରମ୍ଫଙ୍କ ନେତୃତ୍ଵ ରେ ଆମେରିକା ପୁଣି ମହାନ ହୋଇଛି ବୋଲି ଶ୍ରୀ ମୋଦୀ ମତବ୍ୟକ୍ତ କରିଥିଲେ |

ରାଷ୍ଟ୍ରପତି ଟ୍ରମ୍ଫ ଏହି କାର୍ଯ୍ୟକ୍ରମକୁ ଏକ ଐତିହାସିକ ବୋଲି ବର୍ଣ୍ଣନା କରି ଏହା ଭାରତ ଓ ଆମେରିକା ମଧ୍ୟରେ ଏକତା ସୂତ୍ରରେ ବାନ୍ଧି ହୋଇଥିବା ସମ୍ପର୍କର ମହୋତ୍ସବ ପାଳନ ବୋଲି ଅଭିହିତ କରିଥିଲେ | ସେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ଵ ପ୍ରତି ଭୂୟସୀ ପ୍ରଶଂସା କରି ତାଙ୍କ ସରକାରଙ୍କ ଦ୍ଵାରା ନିଆଯାଇଥିବା ଅର୍ଥନୈତିକ ସଂସ୍କାରମୂଳକ ପଦକ୍ଷେପ ଯୋଗୁଁ ଦେଶର 300 ନିୟୁତ ଲୋକ ଦାରିଦ୍ର୍ୟ ମୁକ୍ତ ହୋଇଛନ୍ତି ବୋଲି କହିଥିଲେ | ସେ ମଧ୍ୟ ଔଷଧପତ୍ର, ନୂତନ ବ୍ୟବସାୟ ଆରମ୍ଭ କରିବା ଓ ହଜାର ହଜାର ସଂଖ୍ଯାରେ ଚାକିରି ପ୍ରଦାନ କରିବା କ୍ଷେତ୍ରରେ ଭାରତୀୟ ଆମେରିକୀୟ ସମୁଦାୟ ର ଯଥେଷ୍ଟ ଅବଦାନ ରହିଥିବା ବିଷୟ ଉଲ୍ଲେଖ କରି ସେମାନଙ୍କ ଉଚ୍ଚପ୍ରଶଂସା କରିଥିଲେ | ଭାରତ-ଆମେରିକା ସମ୍ପର୍କ ଏବେ ଯେଭଳି ମଜବୁତ ହୋଇଛି ତାହା ପୂର୍ବରୁ କେବେ ସେମିତି ନଥିଲା ବୋଲି ଜଣାଇ ଶକ୍ତି ସହଯୋଗ, ସୁରକ୍ଷା, ପ୍ରତିରକ୍ଷା ସହଯୋଗ ଓ ମହାକାଶ ସହଯୋଗ ଆଦି କ୍ଷେତ୍ର ଉପରେ ସେ ରେଖାଙ୍କିତ କରିଥିଲେ | ମୌଳବାଦ ଓ ସନ୍ତ୍ରାସବାଦ ବିରୁଦ୍ଧରେ ଦୁଇ ଦେଶ ଐକ୍ୟବଦ୍ଧ ହୋଇ ଏହାର ସଂଗ୍ରାମ କରିବେ ବୋଲି ବିବୃତ୍ତି ଦେବାପରେ ଉପସ୍ଥିତ ଲୋକମାନେ ତାଙ୍କୁ କରତାଳି ସହ ଉଚ୍ଛ୍ଵସିତ ସମ୍ବର୍ଦ୍ଧନା ଦେଇଥିଲେ | ସେ ମଧ୍ୟ ଭାରତୀୟ କମ୍ପାନୀ ଦ୍ଵାରା ଆମେରିକାରେ ପୁଞ୍ଜି ନିବେଶ ପ୍ରତି ସନ୍ତୋଷ ବ୍ୟକ୍ତ କରିଥିଲେ |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦବୋଧନ ଦେବା ସମୟରେ ତାଙ୍କ ବକ୍ତବ୍ୟରେ କହିଥିଲେ ଯେ ଭାରତରେ ଏବେ ବିକାଶ ସବୁଠାରୁ ବଡ ଶବ୍ଦ ହୋଇଛି ଏବଂ ଆମେ ପ୍ରତି କ୍ଷେତ୍ରରେ ନିଜେ ନିଜକୁ ଚାଲେଞ୍ଜ କରୁଛୁ ଓ ଆମେ ନିଜକୁ ପରିବର୍ତ୍ତନ କରୁଛୁ | ଭାରତ ଏବେ ଅଧିକ ଦ୍ରୁତ ଗତିରେ ବଢିବାକୁ ଚାହୁଁଛି ବୋଲି ବର୍ଣ୍ଣନା କରି ଗତ ପାଞ୍ଚ ବର୍ଷ ମଧ୍ୟରେ 110 ନିୟୁତ ଶୌଚାଳୟ ନିର୍ମାଣ କରାଯାଇଥିବା ବେଳେ 150 ନିୟୁତ ନୂତନ ରନ୍ଧନ ଗ୍ଯାସ ସଂଯୋଗ କରାଯାଇଛି ଓ ଗ୍ରାମୀଣ ସଂଯୋଗୀକରଣ 55 ପ୍ରତିଶତରୁ 97 ପ୍ରତିଶତ କୁ ବୃଦ୍ଧି କରାଯାଇଛି ବୋଲି ଶ୍ରୀ ମୋଦୀ କହିଥିଲେ |ଏଥିସହିତ ଶତ ପ୍ରତିଶତ ପରିବାର ବ୍ୟାଙ୍କିଙ୍ଗ ବ୍ୟବସ୍ଥା ସହିତ ଯୋଡି ହୋଇଛନ୍ତି ବୋଲି ମଧ୍ୟ ସେ ଜଣାଇଥିଲେ | ଗ୍ରାମୀଣ ବିକାଶ କ୍ଷେତ୍ରରେ ଭାରତ ଅନେକ ସଫଳତା ହାସଲ କରିଛି | ବ୍ୟବସାୟ ସୁଗମତା ରେ ଭାରତର ସ୍ଥାନ ଉନ୍ନତି ହୋଇଛି | ଭାରତୀୟ ଅର୍ଥବ୍ୟବସ୍ଥା କୁ ମୁଦ୍ରାସ୍ଫୀତି ହ୍ରାସ , ଆର୍ଥିକ ନିଅଣ୍ଟ ହ୍ରାସ ଓ ଉଚ୍ଚ ଅଭିବୃଦ୍ଧି ଭାବେ ବର୍ଣ୍ଣନା କରି ଭାରତର ଏକ ପାଞ୍ଚ ଟ୍ରିଲିଅନ ଡଲାର ଅର୍ଥନୀତି ରେ ପରିଣତ କରିବାର ଲକ୍ଷ୍ୟ ଥିବାରୁ ମୌଳିକଢାଞ୍ଚା କ୍ଷେତ୍ରରେ ବ୍ୟୟ, ନିବେଶ ତଥା ରପ୍ତାନି ବୃଦ୍ଧି କରିବାର ଯୋଜନା ଉପରେ ଇଙ୍ଗିତ କରିଥିଲେ| ବିଭିନ୍ନ କ୍ଷେତ୍ରରେ ମାନଦଣ୍ଡକୁ ସରଳୀକରଣ କରାଯାଇଥିବା ଯୋଗୁଁ ଭାରତ ପ୍ରତ୍ଯକ୍ଷ ବିଦେଶୀ ପୁଞ୍ଜି ନିବେଶ ଲାଗି ଏକ ପ୍ରମୁଖ ସ୍ଥଳୀ ପାଲଟିଛି ବୋଲି ମଧ୍ୟ ସେ କହିଥିଲେ |

ଭାରତ କହିଛି ଯେ ଦେଶରେ ବହୁ ପୁରୁଣା ନିୟମ ଓ ପ୍ରଥାକୁ ଉଚ୍ଛେଦ କରାଯାଉଛି | ବିଭିନ୍ନ ଉନ୍ନୟନ ମୂଳକ ଲାଭ ଗୁଡିକରୁ ଜାମ୍ମୁ ଓ କାଶ୍ମୀର ତଥା ଲଦାଖ ର ଲୋକମାନଙ୍କୁ ବଞ୍ଚିତ କରୁଥିବା 70 ବର୍ଷ ପୁରୁଣା ଭାରତୀୟ ସମ୍ବିଧାନର ଧାରା 370 ର ଉଚ୍ଛେଦ କରାଯାଇଛି | ଏଥିଯୋଗୁଁ ବିଚ୍ଛିନ୍ନତାବାଦୀ ଓ ସନ୍ତ୍ରାସବାଦୀ ମାନେ ଯେଉଁ ଫାଇଦା ଉଠାଉଥିଲେ ତାହାକୁ ସରକାର ଶେଷ କରିଦେଇଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି |

ଆମେରିକାରେ ସେପ୍ଟେମ୍ବର 2001ର 9/11 ସନ୍ତ୍ରାସବାଦୀ ଆକ୍ରମଣ ହେଉ ବା ଭାରତରେ ନଭେମ୍ବର 2008ରେ 26/11 ଆକ୍ରମଣ ହେଉ, ଆତଙ୍କବାଦ କୁ ପାଳନ ପୋଷଣ କରୁଥିବା ରାଷ୍ଟ୍ର ବିରୋଧରେ ନିର୍ଣ୍ଣାୟକ ଲଢେଇ ପାଇଁ ସମୟ ଉପନୀତ ହୋଇଯାଇଛି ବୋଲି ଶ୍ରୀ ମୋଦୀ ଏହି ଅବସରରେ ଆହ୍ଵାନ ଜଣାଇଛନ୍ତି |

ଭାରତୀୟ ପ୍ରଧାନମନ୍ତ୍ରୀ ଭାରତର ସାଂସ୍କୃତିକ ବିବିଧତା ବିଷୟରେ ଆଲୋକପାତ କରି ବିଭିନ୍ନତା ମଧ୍ୟରେ ଏକତା ହେଉଛି ଆମର ଶକ୍ତି ଓ ପ୍ରେରଣା ଏବଂ ଶକ୍ତିଶାଳୀ ଗଣତନ୍ତ୍ର ର ଏହା ହେଉଛି ପ୍ରମାଣ ବୋଲି କହିଥିଲେ | ଭାରତୀୟ ଗଣତନ୍ତ୍ର ର ମୂଳଦୁଆ ଏହି ବିବିଧତା ଉପରେ ପର୍ଯ୍ୟବେଶିତ ବୋଲି ସେ କହିଥିଲେ |

ହାଓଡି ମୋଦୀ କାର୍ଯ୍ୟକ୍ରମ ନ୍ୟୁୟର୍କରେ ଦୁଇ ନେତା ଙ୍କ ମଧ୍ୟରେ ଏକ ଆନୁଷ୍ଠାନିକ ଦ୍ଵିପକ୍ଷୀୟ ବୈଠକ ଲାଗି ପଥ ପରିଷ୍କାର କରିଛି | ଏହି ଐତିହାସିକ କାର୍ଯ୍ୟକ୍ରମ ନିଃସନ୍ଦେହରେ ଭାରତ ଓ ଆମେରିକା ମଧ୍ୟରେ ସୌହାର୍ଦ୍ୟମୂଳକ ସଂପର୍କର ଏକ ଅଦ୍ଵିତୀୟ ପ୍ରଦର୍ଶନ ଭାବେ ସ୍ମରଣୀୟ ହୋଇ ରହିବ |

ପୂର୍ବରୁ ପ୍ରଧାନମନ୍ତ୍ରୀ ହଷ୍ଟନରେ ପହଞ୍ଚି ଶକ୍ତି କମ୍ପାନୀ ଗୁଡିକର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ମାନଙ୍କ ସହ ଏକ ରାଉଣ୍ଡ ଟେବୁଲ ବୈଠକରେ ଆଳାପ ଆଲୋଚନା କରିଥିଲେ | ଏହି ଆଲୋଚନା କାଳରେ ଶକ୍ତି ସୁରକ୍ଷା କ୍ଷେତ୍ରରେ ସମ୍ମିଳିତ ଭାବେ କାର୍ଯ୍ୟ କରିବା ଓ ଭାରତ ଓ ଆମେରିକା ମଧ୍ୟରେ ପାରସ୍ପରିକ ପୁଞ୍ଜି ନିବେଶ ସୁଯୋଗ ଗୁଡିକୁ ପରିବ୍ୟାପ୍ତ କରିବା ଆଦି ମୁଖ୍ୟତଃ ଆଲୋଚନା କରାଯାଇଥିଲା | ପ୍ରଧାନମନ୍ତ୍ରୀ ପ୍ରବାସୀ ଭାରତୀୟ ମାନଙ୍କ ସହ ମଧ୍ୟ ସାକ୍ଷାତ ଆଲୋଚନା କରିଥିଲେ | ଶ୍ରୀ ମୋଦୀ ନ୍ୟୁୟର୍କରେ ପହଞ୍ଚିଯାଇଛନ୍ତି | ସେଠାରେ ସେ ଜାତିସଂଘ ସାଧାରଣ ସଭାର 74 ତମ ବୈଠକରେ ଉଦବୋଧନ ଦେବା ସହ ଅନେକ ଦ୍ଵିପକ୍ଷୀୟ ବୈଠକରେ ଯୋଗ ଦେବାର କାର୍ଯ୍ୟକ୍ରମ ରହିଛି |

ମୂଳ ଲେଖା : ନବତେଜ ସରନା, ଆମେରିକା ପାଇଁ ପୂର୍ବତନ ଭାରତୀୟ ରାଷ୍ଟ୍ରଦୂତ

ଅନୁବାଦ : ରୀତା ଯୋଶୀ