ଘୃଣା ପାଇଁ ସାଥୀ ପାଇଲାନି ପାକିସ୍ତାନ

କଶ୍ମୀର ପ୍ରସଙ୍ଗକୁ ଆନ୍ତର୍ଜାତୀୟକରଣ କରିବାକୁ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନ ଜାତିସଂଘ ସାଧାରଣ ପରିଷଦର 74ତମ ବୈଠକରେ କରିଥିବା ପ୍ରୟାସ ବିଫଳ ହୋଇଛି। ସେ ଭାରତୀୟ ରାଜ୍ୟ ଜମ୍ମୁ କଶ୍ମୀରର ତଥାକଥିତ ଦୁର୍ଦ୍ଧଶା ବିଷୟରେ ଯାହା କହିଲେ ତାକୁ ବୈଠକରେ କେହି ଗୁରୁତ୍ୱ ଦେଇ ନାହାନ୍ତି। ଏହାପରେ ଇମରାନ ଯୁଦ୍ଧ ଏବଂ ପରମାଣୁ ଶବ୍ଦ ବ୍ୟବହାର କଲେ। ଦୃଷ୍ଟି ଆକର୍ଷଣ ପାଇଁ ପାକିସ୍ତାନ ନେତାମାନଙ୍କର ଭାଷାର ଅଂଶବିଶେଷ ହୋଇଯାଇଛି।

ଜମ୍ମୁ କଶ୍ମୀର ପ୍ରସଙ୍ଗରେ ପାକିସ୍ତାନ ଆମେରିକା ପ୍ରଶାସନ ପକ୍ଷରୁ ମଧ୍ୟ କୌଣସି ସମର୍ଥନ ପାଇ ନାହିଁ। ଆମେରିକାର ବୈଦେଶିକ ବିଭାଗ ଓଲଟି ପାକିସ୍ତାନ ପ୍ରଧାନମନ୍ତ୍ରୀଙ୍କୁ ସମାଲୋଚନା କରି କହିଛି ଯେ ଇମରାନଙ୍କୁ ଚିନର ଉଘୁର ମୁସଲମାନ ସଂପ୍ରଦାୟର ନିର୍ଯ୍ୟାତନା ଦେଖାଯାଉନି। ବୈଦେଶିକ ବିଭାଗର ଦକ୍ଷିଣ ଏବଂ ମଧ୍ୟ ଏସିଆ ପାଇଁ ଥିବା କାର୍ଯ୍ୟକାରୀ ସହକାରୀ ମନ୍ତ୍ରୀ ଆଲିସ ୱେଲ୍ସ ଇମରାନଙ୍କ କଶ୍ମୀର ଉକ୍ତିକୁ ସହାୟକହୀନ ବୋଲି କହିଛନ୍ତି। ସେ କହିଛନ୍ତି ଚିନରେ ପ୍ରାୟ 10 ଲକ୍ଷ ଉଘୁର ମୁସଲମାନଙ୍କୁ ନିର୍ଯ୍ୟାତନା ଦିଆଯାଉଥିବାବେଳେ ଇମରାନ ଚିନ ବିରୁଦ୍ଧରେ ମୁଁହ ଖୋଲୁନାହାନ୍ତି। ଇମରାନ ମଧ୍ୟ ଉଧୁର ମୁସଲମାନଙ୍କ ପ୍ରସଙ୍ଗ ଉପରେ କିଛି କହିବେ ନାହିଁ ବୋଲି କହିଛନ୍ତି କାରଣ ଚିନ ସହ ପାକିସ୍ତାନର ଏକ ବିଶେଷ ସଂପର୍କ ରହିଛି।

ଜାତିସଂଘ ସାଧାରଣ ପରିଷଦ ବୈଠକରେ ପାକିସ୍ତାନ ନେତାଙ୍କ ଅଭିଭାଷଣକୁ ଭାରତ ଏହାର ଉତ୍ତରରେ ଅପରିପକ୍ୱ ଏବଂ ଅବାନ୍ତର ବୋଲି କହିଛି। ପାକିସ୍ତାନର ପରମାଣୁ ଧମକକୁ ଭାରତ ପିଲାଲିଆମି କହିଛି। ଭାରତ କହିଛି ଜାତିସଂଘରେ ଇମରାନଙ୍କ ଭାଷଣ ଘୃଣାରେ ପରିପୂର୍ଣ୍ଣ ଥିଲା। ଜାତିସଂଘରେ ଭାରତର ସଚିବ ବିଦିଶା ମୈତ୍ର କହିଛନ୍ତି ପାକିସ୍ତାନରେ ସନ୍ତ୍ରାସବାଦର ଶିଳ୍ପ ଚାଲୁଥିବାବେଳେ ପ୍ପଧାନମନ୍ତ୍ରୀ ଇମରାନଙ୍କ ଏହାପ୍ରତି ସମର୍ଥନ ଲଜ୍ୟାଜନକ ବିଷୟ। ପାକିସ୍ତାନରେ ସନ୍ତ୍ରାସବାଦି ଆଡ୍ଡା ନାହିଁ ଏବଂ ଜାତିସଂଘ ପର୍ଯ୍ୟବେକ୍ଷକଙ୍କୁ ତଦାରଖ ପାଇଁ ଆମନ୍ତ୍ରଣ ଏକ ହାସ୍ୟାସ୍ପଦ କଥା କାରଣ ଇମରାନ ନିଜେ ସ୍ୱୀକାର କରିଛନ୍ତି ଯେ 130 ଜଣ ଜାତିସଂଘ ଦ୍ୱାରା ପ୍ରତିବନ୍ଧିତ ସନ୍ତ୍ରାସବାଦି ଏବଂ 25ଟି ସନ୍ତ୍ରାସବାଦି ସଂଗଠନ ପାକିସ୍ତାନରେ ରହିଛି। ପାକିସ୍ତାନ କଣ ଅସ୍ୱୀକାର କରିପାରିବ ଯେ ଅର୍ଥନୈତିକ କାର୍ଯ୍ୟାନୁଷ୍ଠାନ ଟାସ୍କ ଫୋର୍ସ ପାକିସ୍ତାନକୁ 27ଟି ମାନଦଣ୍ତରୁ 20ଟିରେ ଲଂଘନ କରିଥିବା ଦର୍ଶାଇଛି ବୋଲି। ସନ୍ତ୍ରାସବାଦ ଏବଂ ଘୃଣାପୂର୍ଣ୍ଣ ବକ୍ତବ୍ୟ ଦେଉଥିବା ପାକିସ୍ତାନ ମାନବାଧିକାର ବିଷୟରେ କହିବା ଯୁକ୍ତିସଂଗତ ନୁହେଁ। ଭାରତ ଏହା ମଧ୍ୟ କହିଛି ଯେ 1947ରେ ପାକିସ୍ତାନରେ 23 ଭାଗ ସଂଖ୍ୟାଲଘୁ ସଂପ୍ରଦାୟ ଥିବାବେଳେ ଏବେ 3 ଭାଗକୁ ଖସି ଆସିଛି ପାକିସ୍ତାନର ଅତ୍ୟାଚାର ଯୋଗୁଁ। ସେଠାରେ ଥିବା ଖ୍ରିଷ୍ଟିୟାନ, ଶିଖ, ଅହମଦିଆ, ହିନ୍ଦୁ, ଶିଆ, ପସ୍ତୁନ, ସିନ୍ଧି ଏବଂ ବାଲୋଚି ସଂପ୍ରଦାୟକୁ ଜାଣିଶୁଣି ନିର୍ଯ୍ୟାତନା ଦେବା, ବେଆଇନ ଭାବେ କାଳକୋଠରିରେ ରଖିବା ଏବଂ ଜବରଦସ୍ତ ଧର୍ମ ପରିବର୍ତ୍ତନ କରାଯାଉଛି। ଏହା ସତ୍ୱେ ମଧ୍ୟ ପାକିସ୍ତାନ ମାନବାଧିକାର କଥା କହିବା ସମୀଚିନ ନୁହେଁ। ଭାରତ ବିଶ୍ୱବାସୀଙ୍କୁ ସ୍ମରଣ କରାଇ ଦେଇଛି ଯେ ପାକିସ୍ତାନ 1971ରେ ନିଜ ଲୋକଙ୍କ ବିରୁଦ୍ଧରେ ଗଣ ହତ୍ୟା ସଂଘଠିତ କରିଛି। ଜମ୍ମୁ କଶ୍ମୀରର ବିକାଶ ଏବଂ ଶାନ୍ତି ପାକିସ୍ତାନ ଚାହେଁନାହିଁ ବୋଲି ଭାରତ ଦୃଢ ଭାବେ କହିଛି। ପାକିସ୍ତାନ ସେଠାରେ ହିଂସା ଏବଂ ସନ୍ତ୍ରାସବାଦ ଚାହୁଁଥିବାବେଳେ ଭାରତ ସେଠାରେ ବିକାଶ କରିବାକୁ ଚାହେଁ।

ଜାତିସଂଘରେ ପାକିସ୍ତାନ ପ୍ରଧାନମନ୍ତ୍ରୀଙ୍କ ଅଭିଭାଷଣକୁ ସେଠାକାର ବିରୋଧି ଦଳ ତୀବ୍ର ସମାଲୋଚନା କରିବା ସହିତ ଇମରାନ କଶ୍ମୀର ଉପରେ ସମର୍ଥନ ନପାଇ ଖାଲି ହାତରେ ଫେରିଥିବା ଦୋଷାରୋପ କରିଛି।

ଆଲେଖ: କୌଶିକ ରାୟ

ଭାବାନୁବାଦ: ରାମଚଂଦ୍ର ନାଥ