ସଂପର୍କ ସୁଦୃଢ କରିଛି ପ୍ରତିରକ୍ଷା ମନ୍ତ୍ରୀଙ୍କ ଜାପାନ ଗସ୍ତ

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ସେପ୍ଟେମ୍ବର 2ରୁ 3 ତାରିଖ ଯାଏଁ ଜାପାନ ଗସ୍ତରେ ଥିଲେ ଏବଂ ସେପ୍ଟେମ୍ବର 5ରୁ 6 ତାରିଖ କୋରିଆ ଗସ୍ତରେ ଯିବା ନିର୍ଦ୍ଧାରିତ ହୋଇଛି। ଭାରତ ପ୍ରଶାନ୍ତ ମହାସାଗରୀୟ ଅଞ୍ଚଳରେ ଦେଖାଦେଇଥିବା ପରିସ୍ଥିତି ଦୃଷ୍ଟିରୁ ଉଭୟ ଗସ୍ତର ଅତ୍ୟନ୍ତ ଗୁରୁତ୍ବ ରହିଛି। ଶ୍ରୀ ସିଂହ ତାଙ୍କ ପ୍ରତିପକ୍ଷଙ୍କ ସହ ଦ୍ବିପକ୍ଷୀୟ ଆଲୋଚନାରେ ବିଭିନ୍ନ ଦ୍ବିପକ୍ଷୀୟ, ଆଞ୍ଚଳିକ ଏବଂ ଭାରତ ପ୍ରଶାନ୍ତ ମହାସାଗର ଅଞ୍ଚଳରେ ଶାନ୍ତି ଓ ସ୍ଥିରତା ଉପରେ ଗୁରୁତ୍ବାରୋପ କରିଥିଲେ।

ଜାପାନରେ ଶ୍ରୀ ସିଂହ ତାଙ୍କ ପ୍ରତିପକ୍ଷ ତକେଶି ଇୱାୟାଙ୍କ ସହିତ ବାର୍ଷିକ ପ୍ରତିରକ୍ଷା ମନ୍ତ୍ରୀ ସ୍ତରୀୟ ବୈଠକରେ ସହ ଅଧ୍ୟକ୍ଷତା କରିଥିଲେ। ଭାରତ ଏବଂ ଜାପାନ ମଧ୍ୟରେ ସ୍ବତନ୍ତ୍ର କୌଶଳଗତ ତଥା ବିଶ୍ବସ୍ତରରେ ଭାଗିଦାରୀ ସଂପର୍କକୁ ସୁଦୃଢ କରିବା ହେଉଛି ଏହି ବୈଠକର ମୂଳ ଉଦ୍ଧେଶ୍ୟ। ଦୁଇ ଦେଶ ମଧ୍ୟରେ ଦ୍ବିପକ୍ଷୀୟ ପ୍ରତିରକ୍ଷା ଏବଂ ନିରାପତ୍ତା ସଂପର୍କକୁ ଅଧିକ ସଂପ୍ରସାରଣ କରିବା ନେଇ ମଧ୍ୟ ବ୍ୟାପକ ଆଲୋଚନା ହୋଇଛି। ଶ୍ରୀ ସିଂହ ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କୁ ମଧ୍ୟ ସାକ୍ଷାତ କରିଛନ୍ତି। ଉଭୟ ଭାରତ ଏବଂ ଜାପାନ ସେମାନଙ୍କ ପ୍ରତିରକ୍ଷା ସଂପର୍କକୁ ଆହୁରି ସୁଦୃଢ କରିବା ପାଇଁ ପୂର୍ବରୁ ନିଷ୍ପତ୍ତି ନେଇସାରିଛନ୍ତି। ଶ୍ରୀ ସିଂହଙ୍କ ଗସ୍ତ କାଳରେ ମିଳିତ ଉଦୌଗ ସଂପର୍କରେ ମଧ୍ୟ ବିଶେଷ ଭାବେ ଆଲୋଚନା ହୋଇଛି।

ଶ୍ରୀ ସିଂହ ତାଙ୍କ ଗସ୍ତରେ ତାଙ୍କ ପ୍ରତିପକ୍ଷଙ୍କ ସହ ଆଲୋଚନାରେ ଜାପାନ ଦ୍ବାରା ଭାରତକୁ ଦୀର୍ଘ ଦିନରୁ ଯୋଗାଇ ଦିଆଯିବାକୁ ଥିବା ୟୁଏସ-2 ଯୁଦ୍ଧବିମାନ ବିଷୟରେ ଆଲୋଚନା କରିଛନ୍ତି। ଦୁଇ ଦେଶ ମଧ୍ୟରେ ଦ୍ବିପକ୍ଷୀୟ ପ୍ରତିରକ୍ଷା ସହଯୋଗ ଉପରେ ବ୍ୟାପକ ସମୀକ୍ଷା କରାଯାଇଛି। ଚୀନ ନିଜର ସାମରିକ ଉପସ୍ଥିତିକୁ ବୃଦ୍ଧି କରୁଥିବା ଭାରତ ପ୍ରଶାନ୍ତ ମହାସାଗରୀୟ ଅଞ୍ଚଳର ପରିସ୍ଥିତି ଉପରେ ଦୁଇ ନେତା ଆଲୋଚନା କରିଛନ୍ତି। ଭାରତ, ଜାପାନ ଏବଂ ଆମେରିକା ବାର୍ଷିକ ମାଲାବାର ସାମୁଦ୍ରିକ ସମରାଭ୍ୟାସର ଅଂଶଗ୍ରହଣକାରୀ ଅଛନ୍ତି ଯାହାର ମୁଖ୍ୟ ଉଦ୍ଧେଶ୍ୟ ହେଉଚି ତିନି ଦେଶର ନୌବାହିନୀ ମଧ୍ୟରେ ଉତ୍ତମ ସମନ୍ବୟ ସ୍ଥାପନ କରିବା। ଚଳିତ ବର୍ଷ ଏହି ସମରାଭ୍ୟାସ ସେପ୍ଟେମ୍ବର ଶେଷ ସପ୍ତାହରେ ଆରମ୍ଭ ହୋଇ ଅକ୍ଟୋବର ପ୍ରଥମ ସପ୍ତାହ ପର୍ଯ୍ୟନ୍ତ ଚାଲିବ। ଶ୍ରୀ ସିଂହ ତାଙ୍କ ଗସ୍ତ କାଳରେ କଶ୍ମୀରକୁ ନେଇ ପାକିସ୍ତାନ ଯେପରି ଅପପ୍ରଚାର ଚଳାଇଛି ଏବଂ ଏହାକୁ ଆନ୍ତର୍ଜାତୀୟକରଣ କରିବାକୁ ଚେଷ୍ଟା କରୁଛି ସେସଂପର୍କରେ ତାଙ୍କ ପ୍ରତିପକ୍ଷଙ୍କୁ ଅବଗତ କରାଇଛନ୍ତି। ଜମ୍ମୁ କଶ୍ମୀରରୁ ସ୍ବତନ୍ତ୍ର ଅଧିକାର ଉଚ୍ଛେଦ କରାଯିବା ପରେ ଚୀନ ପାକିସ୍ତାନକୁ କିପରି ଉସକାଉଛି ସେ ସଂପର୍କରେ ମଧ୍ୟ ପ୍ରତିରକ୍ଷା ମନ୍ତ୍ରୀ ଶ୍ରୀ ସିଂହ ତାଙ୍କ ଜାପାନ ପ୍ରତିପକ୍ଷଙ୍କୁ ଅବଗତ କରାଇଛନ୍ତି। କଶ୍ମୀର ଉପରେ ଆଭିମୁଖ୍ୟ ସଂପର୍କରେ ଭାରତ ଏହାର ମିତ୍ର ଦେଶମାନଙ୍କୁ ଅବଗତ କରାଇ ଆସୁଛି। ଭାରତ ପ୍ରଶାନ୍ତ ମହାସଗରୀୟ ଜୋନରେ ନାଭିଗେସନାଲ ସ୍ବତନ୍ତ୍ରତା ଉପରେ ଭାରତ ଚୀନ ଉପରେ କୂଟନୈତିକ ଚାପ ପକାଇଆସୁଛି।

ନରେନ୍ଦ୍ର ମୋଦି ସରକାରଙ୍କ ଦ୍ବାରା ଧାରା 370 ଉଚ୍ଛେଦ ବିପକ୍ଷରେ ନିଜର ଅଭିଯାନ ଚଳାଇବାକୁ ଯାଇ ଚୀନ ବିବାଦୀୟ ଦକ୍ଷୀଣ ଚୀନ ସାଗରରେ ଯେପରି ନିଜର ଶକ୍ତି ପ୍ରଦର୍ଶନ କରୁଛି ସେନେଇ ଭାରତ ଆପତ୍ତି କରିବାର ଦିନକ ପରେ ଭାରତ ଜାପାନର ମିଳିତ ବିବୃତ୍ତି ସାମ୍ନାକୁ ଆସିଛି। ମିଳିତ ବିବୃତ୍ତିରେ କୁହାଯାଇଛି ଯେ ଭାରତ ଏବଂ ପ୍ରଶାନ୍ତ ମହାସାଗ ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରହିବା ଗୁରୁତ୍ବପୂର୍ଣ୍ଣ ଏବଂ ଏହି ଅଞ୍ଚଳର ସମୃଦ୍ଧି ତଥା ସମଗ୍ର ବିଶ୍ବ ପାଇଁ ଅଭିପ୍ରେତ। ଜାପାନ ପ୍ରଧାନମନ୍ତ୍ରୀଙ୍କ ସହିତ ଆଲୋଚନା କାଳରେ ଶ୍ରୀ ସିଂହ କଶ୍ମୀର ସଂପର୍କରେ ଅବଗତ କରିଥିଲେ ଏବଂ ଜମ୍ମୁ କଶ୍ମୀର ବାରତର ଅବିଚ୍ଛେଦ ଅଂଗ ବୋଲି ଜଣାଇଥିଲେ ତଥା ଜମ୍ମୁ କଶ୍ମୀର ଉପରେ ପାକିସ୍ତାନ କହିବାର କୌଣସି ଅଧିକାର ନାହିଁ ବୋଲି ସେ ଜଣାଇଥିଲେ। ଚଳିତ ମାସ ଜାତିସଂଘ ସାଧାରଣ ପରିଷଦର ବୈଠକ କାଳରେ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ଜାପାନ ପ୍ରତିପକ୍ଷ ଶ୍ରୀ ଅବେଙ୍କ ମଧ୍ୟରେ ହେବାକୁ ଥିବା ସାକ୍ଷାତ ଦୃଷ୍ଟିରୁ ଶ୍ରୀ ସିଂହଙ୍କ ଆଲୋଚନାର ପ୍ରାସଙ୍ଗିକତା ରହିଛି।

ଆଲେଖ୍ୟ: ରାଜାରାମ ପଣ୍ତା
ଭାବାନୁବାଦ: ରାମଚଂଦ୍ର ନାଥ