ଆକ୍ଟ ଇଷ୍ଟ ନୀତି ଉପରେ ପ୍ରାଧାନ୍ୟ ଦେଇଛି ଭାରତ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୁଷ କୁ ଦୁଇଦିନିଆ ଗସ୍ତରେ ଯିବା ଅବସରରେ ଜାପାନ ପ୍ରଧାନମନ୍ତ୍ରୀ ଶିଞ୍ଜୋ ଆବେଙ୍କ ସହ ମଧ୍ୟ ସାକ୍ଷାତ କରିଥିଲେ | ଜାପାନ ସହ ଭାରତର ଦୃଢ ସମ୍ପର୍କ ରହିଥିବା ବେଳେ ଦୁଇ ପ୍ରଧାନମନ୍ତ୍ରୀ ଙ୍କ ମଧ୍ୟରେ ବ୍ୟକ୍ତିଗତ ବନ୍ଧୁତା ସମ୍ପର୍କ ମଧ୍ୟ ରହିଛି | ଦୁଇ ନେତା ଙ୍କ ମଧ୍ୟରେ ଅନୁଷ୍ଠିତ ବୈଠକ ସୌହାର୍ଦ୍ୟମୂଳକ ଥିଲା ବୋଲି ଭାରତୀୟ ବୈଦେଶିକ ମନ୍ତ୍ରୀ ଜଣାଇଛନ୍ତି | ଆସନ୍ତା ଡିସେମ୍ବରରେ ହେବାକୁ ଥିବା ବାର୍ଷିକ ଶିଖର ସମ୍ମିଳନୀରେ ଯୋଗ ଦେବାଲାଗି ଜାପାନ ପ୍ରଧାନମନ୍ତ୍ରୀ ଭାରତ ଗସ୍ତରେ ଆସିବାକୁ ଥିବା ଦୃଷ୍ଟିରୁ ଏହି ବୈଠକର ଯଥେଷ୍ଟ ପ୍ରାସଙ୍ଗିକତା ରହିଛି |

ଏହି ବାର୍ଷିକ ଶିଖର ବୈଠକ ହେବା ପୂର୍ବରୁ ଦୁଇ ଦେଶର ବୈଦେଶିକ ଓ ପ୍ରତିରକ୍ଷା ମନ୍ତ୍ରୀ ମାନଙ୍କ ମଧ୍ୟରେ ପ୍ରଥମ 2+2 ମନ୍ତ୍ରୀସ୍ତରୀୟ ବୈଠକ କରିବା ଲାଗି ଉଭୟ ନେତା ସହମତି ପ୍ରକାଶ କରିଛନ୍ତି | ପ୍ରଧାନମନ୍ତ୍ରୀ ଆବେ ସମ୍ପ୍ରତ୍ତି ଭାରତୀୟ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଜାପାନ ଗସ୍ତ ସମୟରେ ପ୍ରତିରକ୍ଷା କ୍ଷେତ୍ରରେ ଆଦାନ ପ୍ରଦାନ ଓ ସହଯୋଗ ନେଇ ତତସଙ୍କ୍ରାନ୍ତୀୟ ପ୍ରସଙ୍ଗ ଉପରେ ବ୍ୟାପକ ଆଲୋଚନା ହୋଇଥିବା କଥା ମଧ୍ୟ ଉଲ୍ଲେଖ କରିଛନ୍ତି |

ଉଭୟ ପ୍ରଧାନମନ୍ତ୍ରୀ ଜାପାନ ଆମେରିକା ଭାରତ ତ୍ରିପକ୍ଷୀୟ ବୈଠକର ଏକ ସକାରାତ୍ମକ ଆକଳନ କରିଛନ୍ତି | ଏଥିମଧ୍ୟରୁ ଦୁଇଟି ବୁଏନୋସ ଆରିସ ଓ ଓସାକା ରେ ଜି 20 ଶିଖର ବୈଠକ ଅବସରରେ ଅନୁଷ୍ଠିତ ହୋଇଥିଲା | ତିନି ଦେଶ ମଧ୍ୟରେ ଶିଖର ବୈଠକ ଆୟୋଜନ କରିବାର ଏହି ପରମ୍ପରା ଜାରୀ ରହିବା ଉଚିତ ବୋଲି ନେତା ଦ୍ୱୟ ମତବ୍ୟକ୍ତ କରିଛନ୍ତି |

ଭାରତ ଓ ଜାପାନର ଭାରତ-ପ୍ରଶାନ୍ତସାଗରୀୟ ଅଞ୍ଚଳ ଉପରେ ସମାନ ବିଚାରଧାରା ରହିଛି | ପ୍ରଧାନମନ୍ତ୍ରୀ ଆବେ ଏକ ସୁରକ୍ଷିତ ଓ ସମୃଦ୍ଧ ଭାରତ-ପ୍ରଶାନ୍ତସାଗରୀୟ ଅଞ୍ଚଳର ସ୍ଥାପନ ଲାଗି ଉଭୟ ଅର୍ଥନୈତିକ ଓ ପାରସ୍ପରିକ ସମ୍ପର୍କ କ୍ଷେତ୍ରରେ ଦ୍ଵିପକ୍ଷୀୟ ସହଯୋଗ ର ଗୁରୁତ୍ଵ ବିଷୟରେ ଆଲୋକପାତ କରିଥିଲେ |

ଆରସିଇପି ଅର୍ଥାତ ଆଞ୍ଚଳିକ ଅର୍ଥନୈତିକ ସହଯୋଗ ରାଜିନାମା ଉପରେ ଏକ ସ୍ଵଳ୍ପକାଳୀନ ଆଲୋଚନା ହୋଇଥିଲା | ଆସିଆନ (ASEAN)ର ଦଶ ଟି ଦେଶ ସମେତ 16 ଟି ଦେଶ ଏହା ଉପରେ ବିଚାର ବିମର୍ଶ ଚଳେଇଛନ୍ତି | ଏହି ପ୍ରସଙ୍ଗ ଉପରେ ଉଭୟ ପକ୍ଷ ନିଜ ନିଜର ବକ୍ତବ୍ୟ ପ୍ରଦାନ କରିଛନ୍ତି | ପ୍ରଧାନମନ୍ତ୍ରୀ ଶ୍ରୀ ମୋଦୀ ବିଶେଷତଃ ବସ୍ତୁ କ୍ଷେତ୍ରରେ ଓ ସେବା କ୍ଷେତ୍ରରେ ବ୍ୟାପାର ରେ କିଛିଟା ସମସ୍ୟା ଥିବା କଥା ଦର୍ଶାଇ କୌଣସି ପ୍ରକାରର ଆଞ୍ଚଳିକ ବ୍ୟାପାର ବ୍ୟବସ୍ଥାରେ ଏହାକୁ ଦୃଷ୍ଟିରେ ରଖି କାର୍ଯ୍ୟକାରୀ କରାଯିବା ଉଚିତ ବୋଲି କହିଛନ୍ତି | ଏହାଦ୍ବାରା ଏହି ରାଜିନାମା ସବୁ ପକ୍ଷକୁ ସୁହାଇବ ବୋଲି ମଧ୍ୟ ସେ ମତବ୍ୟକ୍ତ କରିଛନ୍ତି | 

ଶ୍ରୀ ମୋଦୀ ମଧ୍ୟ ମାଳୟେସିଆ ର ପ୍ରଧାନମନ୍ତ୍ରୀ ଡଃ ମହାଥିର ମହମ୍ମଦ ଙ୍କ ସହ ଆଳାପ ଆଲୋଚନା କରିଛନ୍ତି | ଡଃ ମହାଥିରଙ୍କ ପୁନଃ ନିର୍ବାଚିତ ହେବା ଘଟଣା ଏକ ଐତିହାସିକ ଥିଲା ବୋଲି ଭାରତୀୟ ପ୍ରଧାନମନ୍ତ୍ରୀ ବର୍ଣ୍ଣନା କରି ମାଳୟେସିଆ ସହ କାମ କରିବାକୁ ଭାରତ ଆଗ୍ରହୀ ବୋଲି କହିଛନ୍ତି |

ବୈଠକ କାଳରେ ଦ୍ଵିପକ୍ଷୀୟ ପ୍ରସଙ୍ଗ ଉପରେ ଉଭୟ ନେତା କଥାବାର୍ତ୍ତା କରିଥିଲେ | ପ୍ରଧାନମନ୍ତ୍ରୀ ମହାଥିର ଦୁଇ ଦେଶ ମଧ୍ୟରେ ବାଣିଜ୍ୟ କାରବାର ବୃଦ୍ଧି ପାଇଛି ବୋଲି କହିଛନ୍ତି ଓ ଏହି କାରବାର କୁ ଜାରୀ ରଖିବା ଉଚିତ ବୋଲି ପ୍ରଧାନମନ୍ତ୍ରୀ ଙ୍କୁ ଆଶ୍ଵାସନା ଦେଇଛନ୍ତି | ମାଳୟେସିଆ ଦୁଇ ପକ୍ଷର ବ୍ୟାପାରକୁ ସନ୍ତୁଳିତ କରିବା ଭଳି ଉପାୟ ଖୋଜି ବାହାର କରୁଛି ବୋଲି ମଧ୍ୟ ସେ ଜଣାଇଛନ୍ତି | ମାଳୟେସିଆ ଭାରତରୁ ଆମଦାନୀ ବୃଦ୍ଧି କରିବା ନେଇ ବିବେଚନା କରିବ ଯଦ୍ୱାରା ମାଳୟେସିଆ କୁ ଭାରତର ରପ୍ତାନି ବୃଦ୍ଧି ପାଇବ ବୋଲି ମଧ୍ୟ ସେ କହିଛନ୍ତି |

ଫଳପ୍ରଦ ପ୍ରଶାସନ ତଥା ସାମାଜିକ-ଆର୍ଥିକ ନ୍ୟାୟ ପ୍ରଦାନ ଲାଗି ଜାମ୍ମୁ ଓ କାଶ୍ମୀର ର ପୁନର୍ଗଠନ କରାଯାଇଥିବା ବିଷୟ ନେଇ ପ୍ରଧାନମନ୍ତ୍ରୀ ମାଳୟେସିଆ କୁ ଅବଗତ କରାଇଛନ୍ତି । ଦୁଇ ନେତା ବୃଦ୍ଧି ପାଉଥିବା ସନ୍ତ୍ରାସବାଦ ବିପଦ ଓ ବୈଶ୍ଵିକ ସନ୍ତ୍ରାସବାଦ ର ମୁକାବିଲା କରିବା ଲାଗି ଉଭୟ ପକ୍ଷ ଦ୍ଵାରା କରାଯାଉଥିବା ପ୍ରୟାସ ନେଇ ଆମୂଳଚୂଳ ଆଲୋଚନା କରିଥିଲେ | ଆନ୍ତର୍ଜାତୀୟ ସ୍ତରରେ ଏହା ଏକ ବଡ ବିପଦ ଭାବେ ଉଭା ହୋଇଛି ବୋଲି ଜଣାଇ ମାଳୟେସିଆ ସବୁ ପ୍ରକାରର ସନ୍ତ୍ରାସବାଦକୁ ତୀବ୍ର ଭର୍ସନା କରେ ବୋଲି ପ୍ରଧାନମନ୍ତ୍ରୀ ମହାଥିର ଜୋର ଦେଇ କହିଥିଲେ |

ଭାରତୀୟ ପ୍ରଧାନମନ୍ତ୍ରୀ ମଙ୍ଗୋଲିଆ ରାଷ୍ଟ୍ରପତି ଖଲ୍ଟମାଗିନ ବାଟ୍ଟୁଲ୍ଗା ଙ୍କ ସହ ମଧ୍ୟ ସାକ୍ଷାତ କରି ବହୁ ପ୍ରସଙ୍ଗରେ ଆଲୋଚନା କରିଛନ୍ତି | ମଙ୍ଗୋଲିଆ ର ଶକ୍ତି ଚାହିଦା ମେଣ୍ଟାଇବା ଲାଗି ଭାରତ ସହାୟତାରେ ନିର୍ମାଣ କାର୍ଯ୍ୟ ଜାରୀ ରହିଥିବା ଏକ ପ୍ରମୁଖ ତୈଳ ବିଶୋଧାନାଗାର ତଥା ଅନ୍ୟାନ୍ୟ ପ୍ରକଳ୍ପ କାର୍ଯ୍ୟ ନେଇ ଦୁଇ ନେତା ପ୍ରମୁଖତା ର ସହ ଆଲୋଚନା କରିଥିଲେ | ଚଳିତ ମାସ ଶେଷ ସୁଦ୍ଧା ରାଷ୍ଟ୍ରପତି ବାଟ୍ଟୁଲ୍ଗା ଭାରତକୁ ଏକ ସରକାରୀ ଗସ୍ତରେ ଆସିବାର କାର୍ଯ୍ୟକ୍ରମ ରହିଛି |

ଏହି ଅବସରରେ ସାଂସ୍କୃତିକ ଓ ଆଧ୍ୟାତ୍ମିକ ସମ୍ପର୍କ ସମେତ ଅନେକ ପାରସ୍ପରିକ ପ୍ରସଙ୍ଗ ନେଇ ଆଲୋଚନା ହୋଇଥିଲା | ମଙ୍ଗୋଲିଆ ରାଷ୍ଟ୍ରପତି ଦିଲ୍ଲୀ ଓ ବାଙ୍ଗାଲୋର ଗସ୍ତ କରିବା ସହ ବୋଧଗୟା ମଧ୍ୟ ପରିଭ୍ରମଣ କରିବେ ବୋଲି କହିଛନ୍ତି | ଉଲାନବାଟାର ରେ ସ୍ମଗ ବା ଧୂଆଁ ମିଶା କୁହୁଡିର ପ୍ରଭାବ କୁ କମ କରିବା ଉପରେ ମଧ୍ୟ ଆଲୋଚନା ହୋଇଛି | ଶୀତରୁତୁରେ ନଡା ଜଳାଇବା ଯୋଗୁଁ ସୃଷ୍ଟି ହୋଇଥିବା ପ୍ରଦୂଷଣକୁ ହ୍ରାସ କରିବାରେ ଭାରତର ସଫଳତା ପ୍ରତି ମଧ୍ୟ ରାଷ୍ଟ୍ରପତି ଭୂୟସୀ ପ୍ରଶଂସା କରିଛନ୍ତି |

ଭାରତ ଏହି ବୈଠକ କୁ ଅତ୍ୟନ୍ତ ଫଳପ୍ରଦ ଓ ସୁଦୂରପ୍ରସାରୀ ବୋଲି ବର୍ଣ୍ଣନା କରି ଏହାର ‘ଆକ୍ଟ ଇଷ୍ଟ ନୀତି’ ବିଷୟରେ ଦୃଢତାର ସହ ଦୋହୋରାଇଛି |

ମୂଳ ଲେଖା :: ପଦମ ସିଂ, ଆକାଶବାଣୀ ସମ୍ବାଦ ବିଶ୍ଳେଷକ

ଅନୁବାଦ : ରୀତା ଯୋଶୀ